Markus 1
1
Yuhanna bana ɗɨma Baptisima ɗaɗɨn darhɨ adama buwakɨ ta Yesu
(Matiyu 3:1-12; Luka 3:1-9, 15-17; Yuhanna 1:19-28)
1Dzakwaka ɗɨngɨ ma piyatɨ aghama Yesu Almasihu lena Ghɨnsɨ#1:1 Ti ji Yesu ba bir jikɨn. 2Wane buwai ɗe rɨdlɨ ta Annabi Ishaya#1:2 Ba canna Ghɨsɨ ndu:
“Mɨna bi kafa ba can nuwɨn vɨnaha hahu,
ba dabɨ ɗaɗɨmahu darhɨ.
3Amayawi ma data zharara tsakɨma ndu,
‘Ɗaɗɨmi darhɨ adama Bakan, tsaɗayɨ darhɨ saɗaɗa adamusɨ.’ ”#Malkai 3:1; Ishaya 40:3
4Yuhanna ba Baptisima dɨ bawusa bɨtakɨ, tɨ data zara sɨba ndu, dzɨgɨka ɗe lyapɨ nanai na buwana mɨn ɗɨmana Baptisima adama Ghɨnsɨ dɨ bɨsana lyapɨ nanai. 5Sɨbɨ cas a pakɨ ta Judiya ɨna vuwa gwahɨ gyarya ta Urushalima dɨ bawatlɨna tirusɨ. Dɨ babɨla lyapapo natlɨn, jete ɗɨmatlɨn baptisima ɗe madzɨ ta Urdum. 6Yuhanna da dakwaka pedlar a ɗyahuwasɨ ɨna kabɨ ma ɗɨma a gɨzha lakumi, tahɨ tusɨ ja gwam ɨna bii sɨkwam. 7A ɗɨngɨ tusɨ ji#1:7 hausa ɗɨnga ndu:Sako: Ba tɨda ta busa ta cɨɓuwan aranrau tiji garna huwɨn, mɨn za magan mɨn ɓɨguwɨn mɨn ɓala zhawa kakɨr tusu. 8Mɨnata ɗɨmana baptisima a bii, ama ti ta ɗɨmana a Ryuwan ma Cartɨ.
Ɗɨmaka Baptisima Yesu ɨna Gudzahiyusɨ
(Matiyu 3:13-17; Luka 3:21-22)
9Ata naka wokacika Yesu dɨ busa Nazarat ɗe pakɨ ta Galili,Yuhanna dɨ ɗɨmaya Baptisima ɗe madzɨ ta urdum. 10Ndɨ bawa hiyusa a ɗe bii,Yesu dɨ naya lɨpɨn e gɨttaza, a Ryuwan ma Cartɨ data dawaza ghamusɨ wan gwagwum. 11Dɨ dɨkaya wiya mai a dɨna ndu: “Faji lenuwɨn, ba mɨn camau, Faji ba mɨn data dɨkaya piyatɨ hu saɗaɗa.”
12Nda dliyadli a Ryuwan ma cartɨ dɨ baiya bɨtakai, 13dɨ sɨnusɨ diɓi fɨɗa bɨtakɨ, tɨmbɨzɨm dɨ gwudzusɨ, tɨ de wute ɨna tlɨrɨn ta bɨtakɨ, Mala‘iku#1:13 Sɨba can niya Ghɨnsa dɨ buwatlɨn dɨbi gulaya ya.#1:13 A hausa ji:Hidima
Yesu bɨla ɗɨngɨ ma piyatɨ Sɨbɨ
(Matiyu 4:12-17; Luka 4:14-15)
14Dagabi tɨɓa Yuhanna bana ɗɨma baptisima ɗe kurkuku,Yesu dɨ busa a Galili, dɨ bɨla ɗɨngɨ ma piyatɨ ta Ghɨnsɨ. 15Du, “Wokaci ɗɨnsai, Gwalfu ta Ghɨnsɨ su mbatlai. Zuwɨ mbasaka gwahɨ nanai na samana ɨna ɗɨngɨ mapiyatɨ!”
16Yesu nda ta zira ta vɨna madzɨ gyarya ta Galili, je naya Saminu ɨna yasɨ wasɨ Andarawus, ata vaa taru a madzɨ, adama tlɨn sɨbana rɨnja bii. 17Yesu dɨ ɗɨnga tlɨna ndu, “Tiwika ɗiyuwɨn, mɨn gyagiyana rɨnjaka sɨbɨ.” 18Nda dliyadli dɨ zuwa taru ta tlin dɨ ɗiyusai.
19Daga sɨyusɨ vɨnahɨ gaɓɨ, je naya Yakubu lena Zabadi ɨna vashɨwasɨ Yuhanna ɗe kwatal, ata ɗaɗɨma taru ta tlɨn. 20Nda dliyadli jete zaratlɨn, Je tlɨne zuwa batlɨn Zabadi ɗe kwatal e wute ɨna sɨba can ba mir, dɨ ɗiyusai.
Yesu bawai tɨmbɨzɨm a ɗe wi Sɨm
(Luka 4:31-37)
21Daga ɗama mukwa sawakɨ, dɨ batlɨn ɗe vuwagwahɨ ta Kafarnahum,Yesu dɨ busa bali ma pagham ta Yahudawa dɨ dzakwa gyegyiya hiyatlɨn. 22Sɨba dɨ dɨkayusa ta gyagiyakɨ dɨ ɗɨma ghɨriya ghama gyagyiyakɨ tusɨ, adama tɨma wan sɨbana gyegyiya dokau, tata gyagiya a iko. 23Nde yika Wisɨm ba mbasaka Ryuwan ɗe wasɨ dɨ ja bali ma pagham ta tlɨn da ɓaa kwararɨ, 24du, “Yesu na Nazarat, Ma zhahu ɨna miya? Fa bukwe maa ghama ma? Mɨn sɨngan fa ji we, Fɨ ba Cartɨ na Ghɨnsɨ!”
25Yesu dɨ dabaya du, “Makɨnafu tik! Dzarkwai ɨna ti!” 26Dɨ shiɗaya didedai#1:26 Farfaɗiya a hausa a mbasaka Ryuwan, dɨ wuyazai dɨbawusa ɗewasɨ.
27Sɨbɨ dɨ ɗɨma-ɗɨma ghɨri har dɨ dzakwa tsatsɨyaya tsafayatlɨn du, “Maniwi jikɨna? Wiya gyagiyakɨ tuwahɨ wa? Nakɨnsɨn ta iko har tɨda zai mbasaka Ryuwan da ɗiya dɨngɨ tusɨ!” 28A ɗɨngusɨ dɨ ɓandaza ndyam ɗe pakɨ ta Galili ahɨɗakɨ.
Yesu lai kɨka Bitrus
(Matiyu 8:14-15; Luka 4:38-39)
29Daga nda bawahiya tlɨna bali mana pagham, dɨ batlɨn ɨna ni Yakubu dɨfa Yuhanna a kani Saminu ɨna Andarawus. 30Kɨka Saminu dɨma dɨ wacu, tuwa tuwaza dɨ cucu e piyau, nda ɗamaka Yesu dɨ bɨlaya ndɨraza. 31Dɨ sɨyusa tiraza dɨ kuya kɨnza dɨ tletla dɨ lai tuwa #1:31 tuwaza dɨmanan cucuwu, dɨ bawaya tlɨn hambatau nji dɨɗata gaya tlɨn.
Yesu lai sɨbɨ cas
(Matiyu 8:16-17; Luka 4:40-41)
32Daga ɗɨma rɨdzɨ dahɨ ta muku, sɨbɨ dɨ buwai sɨba vɨzhazhau ɨna sɨba tɨmbɨzɨm a tira Yesu. 33Sɨbɨ niya vuwa gwahɨ ndyam dɨ paghama tlɨna vɨya kam. 34Je lai sɨba vɨzhazhau tuwahɨ-tuwahɨ a Yesu. Dɨ mɨna bawai tɨmbɨzɨm cas, Ama ti azuma tɨmbɨzɨm dɨ ɗɨnga ndu wihamu adama tɨmbɨzɨmamo ka sɨngan Yesu ji we.
Yesu bate tiya gil amewasɨ
(Luka 4:42-44)
35Ndɨ tsɨwaya daraba, gan shuwamayu,Yesu dɨ tlusɨ dɨ zuwa kamai. Dɨbusɨ e du wimoyu, dɨ tiyagil amewasɨ. 36Je ɗiyusa Bitrus ɨna sɨba tukusɨ dɨ batlɨne donusɨ, 37dagabi marusɨ, dɨ ɗɨngaya ndu: “Ndyam sɨbɨ ndata donahu!”
38Yesu dɨ gisatlina ndu, “Timiya gin ɗe vuwagwahɨ gyaɓoya mbatlaiya kɨn, dama mɨn bɨla ɗɨngɨ mapiyatɨ yika fegan. Hamba zai jika mɨn buwɨn.” 39Je te nda ndɨmau ndyam ɗe mɨdzai ta Galili, da bɨla ɗɨngɨ ma piyatɨ ɗe bali ta tlɨn ma pagham da bawai tɨmbɨzɨm.
Yesu Lai Wi Tɨgwardzɨhɨ
(Matiyu 8:1-4; Luka 5:12-16)
40Wi Tɨgwardzɨhɨ dɨ busɨ dɨ ɓɨgusa bɨɗusɨ, data rawusa ndu, “Fakwa samafu ka fiya laiwan layai.”
41Je ta lulu wasa Yesu, dɨ tsaɗe kɨnwasɨ dɨ tɨkɨnusɨ. Dɨ gɨsaya ndu, “Mɨn cansu falai!” 42Nda dliyadli a tɨgwerwetɨ dɨ dzaru sai ɨna ti, dɨ lai.
43A ɗɨka daga tlusa zuwusa busai je gɨtlusa Yesu wa ndu, 44“Dikai, fate bɨla wɨyu. Ama taku, fabi gɨra ghamafa tira ba Kwambal fa tsa hamba za tɨr dɨ gɨra fa tsarkusai wane ɗɨnga Musa ndu sidalahi tafu.” 45Ndyam ɨna wanka na ka sɨnka dɨ tlusa ɗɨka dɨ dɨnga babɨlaka hamba dɨ marusɨ. Hamba zai jika, Yesu dɨ iyama nan zusa vuwa gwahi ta ka ghamuse tsatsɨru. Ama dɨ tsɨrusɨ e kwa sɨbɨ. Ndyam ɨna wanka sɨbɨ dɨ ta vɨnahɨ ɨna bahiya tlɨna tirusɨ akoyi kwe ki.
Iliyochaguliwa sasa
Markus 1: MKF
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
©2023 Seed Company in collaboration with Language Developers and Bible Translators Association
