Matyo 6
6
Yeso a Diʼ Anu mbɨ́ʼ Ngǎ Akwatɨ a mbó Ɨbɛn ba bɨ Lɔnə Akwatɨ ə
1“A nɨ lə ɨtú ɨtsən nkeʼ ngɨ̌ ɨnu tsɨ shiʼnɨ tsa Ŋwi a lɔnə asaŋəsaŋ taŋ á ɨbɛn zɛn awɨŋ ə. Be nɨ ngɨə ma lan asaŋəsaŋ muŋ nɨ mɨ keʼ nɨ mɨkyaŋnɨ a mbó Ta ɨwən wa a tsinɨ a fɔməbvurə chyɛ.
2Ma lan, be nɨ tɨ ghǎ akwatɨ a mbó ŋwɔn wa a lɔnə akwatɨ, nɨ keʼ ntaŋ a ntɔ́ŋə́ a mbyi bən tso mbáʼ ngaŋ ngɨ̌ ɨtsi ghɨnə a mu ndáŋwi bə Yuda abɔʼnɨ bɨkɔŋ lá. Bo ghɨə ma lan lá taŋ á ɨbɛn mbóntə́ awa ghe. Tsɛʼ a nkənu, bo kwarɨnɨ nkáb afaʼ ɨza tsum ə. 3Lá nɨ tɨ kwátɨ́ ɨbɛn ba bɨ lɔnə akwatɨ, nɨ ghɨnə a zɛrə a nye ndóm wa tsɛʼ mbɔŋ ɨson ɨgho wa a fatɨnɨ agho tsɛʼ nkan a chi keʼ a zɛrə zhyɛ. 4A mɨ tiʼ be anu a nkubə ghe. Ta ɨwən, zɨ wa a zɛ́nɨ́ ɨnu tsa nɨ ghɨnə a nkubə, a mɨ tiʼ kyaŋ awɨŋ ə.”
Yeso a Diʼ Anu mbɨ́ʼ Atsaʼtɨ a Ŋwi ə
(Alu 11:2-4)
5“Nɨ tɨ tsaʼtɨ a Ŋwi, nɨ keʼ be tso ngaŋ ngɨ̌ ɨtsi ə! Bo kɔŋ ntɛmə ɨ tsaʼtɨ a Ŋwi a mu ndáŋwi bə Yuda abɔʼnɨ ɨtú bɨkɔŋ, taŋ á ɨbɛn ndzě awa ghe. Tsɛʼ a nkənu, bo kwarɨnɨ nkáb afaʼ ɨza tsum ə. 6Lá be nɨ tɨ tsaʼtɨ a Ŋwi, nɨ kon ngɛn a mu ndá ɨtsən nkubɨnɨ ntsu ndá ntsaʼtɨ a Ŋwi a mbó Ta ɨwən wa ka bɨ ndzě ayi ayi ɛ. Ta ɨwən wa a zɛ́nɨ́ ɨnu tsa nɨ ghɨnə a nkubə, a mɨ tiʼ kyaŋ awɨŋ ə.#6:6 Ɨŋwaʼnɨ tsɨ lvuŋ tsɨ mɔʼɔ kwiʼtɨ ‘‘asaŋəsaŋ’’ a ndwitə ghe
7Be nɨ tɨ tsaʼtɨ a Ŋwi nɨ keʼ númə́ sógɨ́rɨ́ ɨnu tɨ ɨnu tso mbáʼ Bɨtɨbeməŋwi ghɨnə, bo ba bɨ wiʼtɨnɨ ngə́ bɨŋwi ba zǔʼ ɨtsaʼtɨ ɨtsa mbɨ́ʼ ngə́ tsɨ sagɨ lá. 8Njimbɨʼ nɨ be tso bo ghe. Ta ɨwən a zhi ɨnu tsa nɨ lɔnə mbɔŋə nɨ tiʼə mbítə́ ayi ɛ. 9Nɨ ntíʼə ntsaʼtə a Ŋwi ngə́:
‹Ta ɨwɨgɨ a fɔməbvurə:
A ɨbɛn nkɔ́ʼsɨ́ ɨkum ɨgho wu fɛmnɨ atɨ́;
10á Nɨfɔ ɨno yiŋə;
á tsi atuəshe tso mbáʼ a tsinɨ a fɔməbvurə lá.
11Gha mɨdzɨ#6:11 Ɨŋwaʼnɨ tsɨ lvuŋ tsɨ mɔʼɔ soŋ be ngə́, ‘‘Gha awɨgɨ nɨ mɨdzɨ ma bɨgɨ lɔnə ɨzo ghe.’’ ma bɨgɨ lɔnə a mbó bɨgɨ ɨ sɨŋə ghe.
12Lɨgɨnɨ mɨbvu ma bɨgɨ ghɨnə,
tso mbáʼ bɨgɨ kɨ́nə́ ndɨ́gɨ́nɨ́ mɨbvu mɨ ɨbɛn bə mɔʼɔ ma bo fanə a nye bɨgɨ ə.
13Koʼ nyɛʼtɨ á bɨgɨ ghɨ ɨbvu mbáʼ be bɨ kwaʼnɨ awɨgɨ,
lá kwarɨ awɨgɨ a mbó Wu Ntɔmnɨnɨ wa.›#6:13 Ɨŋwaʼnɨ tsɨ lvuŋ tsɨ mɔʼɔ kwiʼtɨ a ndwitə ngə́, ‘‘Mbɨ́ʼ ngə́ Nɨfɔ nɨtsum lǒ a mbó gho, mɨtən abɔʼnɨ nɨfáŋ, a mbiʼnə láʼ keʼ lwitə. A be lá.
14Be nɨ lɨgɨnɨ mɨbvu ma ɨbɛn ghɨnə a nye bən, muŋ Ta ɨwən a fɔməbvurə a mɨ kɨ lɨgɨnɨ ɨmɨŋ mɨbvu ə. 15Lá be nɨ tú lɨgɨnɨ mɨbvu mɨ ɨbɛn bə mɔʼɔ, muŋ Ta ɨwən a fɔməbvurə a mɨ keʼ ɨmɨŋ mɨbvu kɨ ndɨgɨnə.”
Yeso a Diʼ Anu mbɨ́ʼ Nchigɨ Nji Tsə Ntsaʼtɨ Ŋwi ə
16“Be o nchígɨ́ nji tsə ntsaʼtɨ Ŋwi, koʼ adzəŋnɨ a ndiʼə a ɨshi gho tso mbáʼ ngaŋ ngɨ̌ ɨtsi ghɨnə lá. Bo diʼə adzəŋnɨ a mɨshi bo lá taŋ á ɨbɛn zɛn ngə́ bo chigɨ nji tsə ntsaʼtɨ Ŋwi ə. Tsɛʼ a nkənu, ma sóŋə́ awɨŋ ə, bo kwarɨnə mɨtsɔʼnɨ mɨ afaʼ ɨma ghe. 17Lá be o tɨ chigɨ nji tsə ntsaʼtɨ Ŋwi, sugɨ ɨshi ɨgho ndzɔʼ nɨ mɨvwurɨ nkɨ sha ɨnyɔŋ atú ɨtso, 18taŋ á ɨbɛn bə mɔʼɔ chi keʼ zhi ngə́ o chigɨ nji tsə ntsaʼtɨ Ŋwi ə. A baŋnɨ nji tsɛʼ Ta ɨgho wa mbáʼ ka ŋwɔn tsɛrə a ndzě ayi ayi ɛ. Ta ɨgho wa a zɛ́nə́ anu za o ghɨnə a nkubə, a mɨ tiʼ kyaŋ agho ə.”
Yeso a Diʼ ngə́ á bɨ Ndě Afuʼ a Fɔməbvurə ghe
(Alu 12:33-34)
19“A nɨ keʼ afuʼ a mbó ɨtumbəm ɨtsən lɛn atuəshe, adiʼ wa ɨsɛʼ bo ntsɛb mɨ tsənkɨ, á mɨzɛrə kɨ ngyen ndze. 20A nɨ baŋnɨ ndɛn afuʼ azən a fɔməbvurə, adiʼ wa ɨsɛʼ abɔʼnɨ ntsɛb chinɨ keʼ tsənkɨ, á mɨzɛrə keʼ kɨ mbɛʼ ndá nkon ndze. 21Mbɨ́ʼ ngə́ o lě ntəm ɨgho lá tsɛʼ adiʼ wa afuʼ azo a tsinə.”
Yeso a Diʼ Anu mbɨ́ʼ Azúm za a Ghánɨ́ Nkaʼ a mbó Mbəmnye
(Alu 11:34-36)
22“Ɨmɨgɨ lá nkaʼ mbəmnye ɨzo ghe. Ma lan, be ɨmɨgɨ ɨmo tsi ɨ shiʼnɨ, mbəmnye ɨzo tsum mɨ tsi nɨ nkaʼ ə; 23lá be ɨmɨgɨ ɨmo tú tsi ɨ shiʼnɨ muŋ mbəmnye ɨzo tsum mɨ tsi a mu ndzumnɨ ə. Be nkaʼ ɨnye ɨgho bəŋ ndzumnɨ, məza ndzumnɨ ɨ ghaʼ mbó ə!”
Yeso a Diʼ Anu mbɨ́ʼ Ɨdzúm tsa Bɨgɨnə Tsínə́ nɨ Tsɛrə ghe
(Alu 16:13; 12:22-31)
24“Ka ŋwɔn tse a chi faʼ ayi a mbó bɨta bɨ afaʼ bi bɨbá ghe; a mɨ ban a táʼ, ɨ baŋnɨ kɔŋ a wu mɔʼɔ kə a shíʼtɨ́nə a ɨshe a ɨshi táʼ, ɨ baŋnə tságɨ́nə a wu mɔʼɔ ghe. O chi koʼ faʼə a mbó Ŋwi nkɨ mbe abuʼ a mbó afuʼ ə.
25Ma lan, ma sóŋə́ awɨŋ ə, koʼ ɨnye ɨzo a mbúʼə mbɨ́ʼ ntsi mbyi ɨzo, mbɨ́ʼ mɨdzɨ ma o mɨ dzɨ kə za o mɨ no, kə ɨtsɛʼ tsa o mɨ wəgə. Ntsi mbyi ɨzo se tsa mɨdzɨ, á mbəmnye ɨzo tsa ɨtsɛʼ le? 26Nɨ zě bɨsɨ́ŋ ben ba bɨ línə́ a mu ɨfɛgɨ lá: bo se mbǐ mɨdzɨ kə nkə́ fúʼə ngótə́ a mu mɨntaŋ mɨ mɨdzɨ ɨma ghe, lá Ta ɨwən a fɔməbvurə a dzɨ́gə́ awa ghe. Ndvuŋ ɨwɨŋ se tən ntsa wu bɨsɨ́ŋ ben le? 27Ɨwa ŋwɔn nɨ bən a chi kwiʼtɨ tsɛʼ mə tsəb a nye ndvuŋ njwi tsa Ŋwi a lɛ́nɨ́ wəmbo a atuəshe wen mbɨ́ʼ ngə́ a bǔʼ ɨnye ɨzhi le?
28Nɨ kə́ mbǔʼ ɨnye ɨtsən mbɨ́ʼ ɨtsɛʼ lá mbɨ́ʼ ake le? Nɨ ze bɨbaŋbaŋ ba bɨ kwínə́ a mu mɨbaʼ: bɨ se fáʼə kə ngɨ̌ ɨtsɛʼ ngwə́gə́ a nye bo ghe. 29Lá ma sóŋə́ a mbó bən ngə́ tsɛʼ Ɨfɔ Sanɨmɔ nɨ ɨdzúm ɨchi ɨtsum; a sé nɨ ɨtsɛʼ tsi tsa tsɨ bɔŋnɨ nkuʼ a táʼ baŋbaŋ wɛnə ghe. 30A wə́gə́ Ŋwi ngwəgɨ ɨtsɛʼ a nye ngyɛn — ngyɛn za mbáʼ o zɛ́nə́ sɨŋə ndo ndo ɨzo kɨ́káŋ, mbɨ́ʼ ngə́ bɨ tɔn nɨ ɨmugɨ ə. Be Ŋwi a boŋ lá abə́ŋ atsɛʼ ake a ngwə́gə́ a ɨnye bən le? Abeməntəm azən a kɨ́gɨ́ be tɨsɨŋə!
31Ma lan, á nɨ keʼ ɨnye ɨtsən a mbúʼə ɨ sóŋə́ ngə́, ‹Ma mɨ dzɨ lá ake le?› Kə ‹Ma mɨ no lá ake le?› Kə ‹Ma mɨ wəgɨ ake le?› 32Bɨtɨbeməŋwi númə́ ndǒ lá ɨdzaŋ ɨdzúm mətsiŋ ə. Ta ɨgho a fɔməbvurə a zhi ngə́ o lǒ ɨdzaŋ ɨdzúm mətsiŋ ə. 33Baŋnɨ ntɛgɨ atú azo be a nye ɨnu ɨtsum tsa tsɨ tsinɨ mbɨ́ʼ Nɨfɔ nɨ Ŋwi abɔʼnɨ ɨnu ɨtsum tsa Ŋwi a lɔnə a mbó gho, wɛrə a mɨ tiʼ gha ɨdzúm mətsiŋ ɨtsum a mbó gho ghe. 34Ma lan, koʼ ɨnye ɨzo a mbúʼə mbɨ́ʼ ɨzo, mbɨ́ʼ ngə́ ɨzo mɨ tsi nɨ ɨchi ɨnu a mbúʼ ɨnye mbɨ́ʼ a tsɛrə ghe. Koʼ kwiʼtɨ ngɨ́ʼ za sɨŋə a tsinɨ nɨ zɛrə ghe.”
Iliyochaguliwa sasa
Matyo 6: MNT
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2023, CABTAL
