লূক 8

1-2য়াংনক যীশু রুওয়াদৈং রুওয়াদৈং অর ম্রুদৈং ম্রুদৈং পেঃরো থাওরা ফুরা ঈ নেংঙেংদঃ আকং তাঃরাগো ক্যঞালিরি। যীশুনা আতু, য়াংসুউমা তিছিনৈয়ক তিবিরোনা অর লৈগায়ক মিঃমালি হিকলিরি। দিঃ মিঃমারোচা মকং নেঃ কৈচাগা রুওয়েকেলিরি অর রঃগাগা কেইংমাগেলিরি। য়াংসুউরোচা ফ্রইতি, মরিয়ম যাসুগো মগদলীনী খঃগেতি, য়াংসুউ আথিঃগা খঃনকং মকং নেঃ ওয়িঞেংচা থুঃওয়ক লাঃখালিইরি। 3হেরোদ মাং ভেন্ডেমা কূষের মিয়া যোহানা; শোশন্না অরলি আম্যাগ্রিই মিয়ারো। যীশুনা তিবিরোগো প্রুকজুফু আতুওয়ক দিঃ মিঃমারো আলুংসুউরোচা কুঃমা টেংগা পয়স্যারোগো ফ্যাককেরি।

লুক চাঃসা তয়ক ওয়েথুউ

(মথি ১২:৪৬—১৩:২৩; মার্ক ৩:৩১—৪:২৫)

4য়াং আখিংমা যে যে রুওয়াগা লুঃউরোচা যীশুবাদুঃ লাঃলো চুককেলিইরি। য়াংখা যীশুচা য়াংসুউরোগো সুয়েংসাং পিইফু আতুওয়ক দিঃ ওয়েথুউকগো প্রলিইরি, 5“লুক চাঃসা তয়কচা অাচিই প্যুওফু লাঃখারি। আচিই প্যুওরি আখিংমা লৈংজিই আচিইচা লেংবামা ক্যালিইরি। লুঃউরোচা য়াংচাগো ফুওয়ানা নাংবলৈকেতি অর হ্ঙাক লাঃলো চাঃবলৈকেতি। 6লৈংজিইচা ক্যকম্রিমা ক্যালো ক্রিই তাকলিইরি ছুগি ম্রিমা আছিই মিহিকলো খ্রক খ্যাখারি। 7অর লৈংজিইচা চুউখ্রুংমা ক্যালিইরি। নক্কা চুউখ্রুংচা আচিই সারানা ক্রিই তাকলো সারারোগো খ্যুকলিইরি। 8অর লৈংজিইচা ম্রি আকংমা ক্যালো ক্রিই তাকখা আপ্রেং তাঃরা আসিই সিইলিইরি।”

দিঃ চাঃগা প্রব্রিইনক যীশুচা অাঃনা অরো প্রলিইরি, “যাসুউমা নাথংফু নাঃ হিকরিলি য়াংসুউ নাঃথংবেচিই।”

9য়াং নক যীশু তিবিরোচা দিঃ উপমা আদিপিগো যীশুগো মিংগেলিইরি। 10য়াংখা যীশু প্রলিইরি, “থাওরা ফোরামা নেংঙেংদ স্যুও থাঃচাগো নাংরোগো আসিক পিইলিইরি, ছুগি আখ্রা লুঃউরোবামা ঙাচা ওয়েথুউনা প্র প্রারি যাফুলিছুগি য়াংসুউরো ম্রাংরোলি মাম্রাং ফ্রইঅং অর ক্রারোলি মাক্রা ফ্রইঅং।”

11“ওয়েথুউ আদিপিচা ফ্রইতি: আচিইচা ফ্রইতি থাওরা ফোরামা তাঃরা। 12লেং নাইমা ক্যাচা অাচিইগা নিংলো, য়াং লুঃউরো চাঃগাগো প্ররি যাসুউরো ফোরা তাঃরাগো নাথংগেকিলি নক্কা মেইংনেঃচা লাঃলো য়াংসুউরো চিইকা তাঃরা ক্যুয়ি বৈতি। য়াংখা য়াংসুউ মুক্যুংনৈং অাতুওয়ক আপ্রইকা কিতাং মাঃরাগে। 13ক্যকমা ক্যাচা আচিইগা নিংলো য়াং লুঃউরো চাঃগাগো প্ররি যাসুউরো ফোরা তাঃরাগো ক্রালো আপ্যনা লাক খেংগেতি য়িগিলি য়াং তাঃরাচা য়াংসুউরো চিইমা মুচুয়িনৈং। য়াং আতুওয়ক লৈংগারাকরা য়াংসুউরো ক্যুংরিব্যা ছুগি যাখা চুজাইং খ্রাং লাঃরি য়াংখা য়াংসুউরো নকতু ছুউকতিব্যা। 14চুউখ্রুংমা ক্যাচা আচিইগা নিংলো, য়াং লুঃউরোগো প্র প্রারি যাসুউরো ফোরা তাঃরাগো নাথংগেতি য়িগিলি লঃগামা লুক চাঃরি আখিংমা ইংথংগো য়ুউলো চেংজাখ্রাং, উচ্চা-পৈচিই অর আখেংসামা য়াং তাঃরারোচা প্যক লাঃরি। য়াংখা য়াংসুউরো বাওয়ামা তুখুউরি আক্যুও মাম্রাংরা। 15আকং ম্রিমা ক্যাচা আচিইকা নিংলো য়াং লুঃউরোগো প্র প্রারি যাসুউরো চিইঞ্যইনা ফোরা তাঃরাগো নাথংলো চিইমা আম্রি থাঃরি অর আম্রি থাঃরি আতুওয়ক লঃগামা আক্যুও রাঃরি।”

16খ্যাংসুউমুছু ছিইমিং ঞিয়িলো ফুং মাঃথা মুহুককিলি খেঃ অক্কা মাঃথা। ছিইমিংগো ছিইমিংদাং আথাকমারা থাঃরি যাফুলিছুগি যাসুউ লাঃফু য়াংসুউরো লালাং ম্রাংঅং। 17মাপ্রাব্যাছুলো তুখুউলি স্যুও থাঃলো মিহিক মুহুককিলি মিসিকরাব্যা অর মাম্রাংরাব্যাছুলো তুখুউলি স্যুও মিহিক। 18য়াং আতুওয়ক যাপুয়েং ক্রারালি য়াংচাগো চিই খ্যাগে আক্রংগা যাসুউমা হিকরিলি য়াংসুউগো অরলি পিইফু য়িগিলি যাসুউমা মিহিক য়াংসুউমা যা হিকরি তুওয়কতি, য়াংচাগোবাং য়াংসুউগা য়ুউ লাঃফু।

19নক্কা যীশু মিখাংনা ঞিংরোচা যীশুদুঃ লাঃগেলিইরি য়িগিলি লুঃউম্যারি কিজু যীশুনা আতুয়িই মাঃরাগেলিই। 20য়াংখা লুঃউ তয়কচা যীশুগো প্রলিইরি, “কুবাংমা মিখাংনা ঞিংরোচা কুবাংনা আতুয়িই খেংফু আতুওয়ক প্রাংগা রেঃ হিকগেতি।”

21য়াংখা যীশু লুঃউরোগো প্রলিইরি, “যাসুউরো থাওরা ফোরা তাঃরা নাথংলো য়াংপুয়েং চংস্যকতি, য়াংসুউরোরা ঙামা মিখাংনা ঙামা ঞিং ফ্রইতি।”

লিগ্রীঃগো তাইংজিখ্রাং

(মথি ৮:২৩-২৭; মার্ক ৪:৩৫-৪১)

22তারাকখা যীশুনা তিবিরোচা লং তাজাংমা তাককেলিইরি। যীশুচা তিবিরোগো প্রলিইরি, “লাঃ, ঙুরো ম্রঃ থুউগাব্রাক লাঃগেমি।”

তিবিরোচা লংগো ফ্রুককেলিইরি। 23লং লাঃরি আখিংমা যীশুচা ওয়িইলিইরি। য়াং আখিংমা ব্রুং প্যাংলো ম্রঃমা মুও রুওয়ালিইরি অর লংমা রিই প্রি তাকলিইরি। য়াংখা তিবিরোচা দুঃখাওয়া ফ্রইকেলিইরি। 24তিবিরোচা যীশুদুঃ লাঃলো নুওলো প্রগেলিইরি, “ছারা, ছারা, ঙুরোগা সিইফুব্যা!”

য়াংখা যীশুচা থাঃলো রিইনা লিইগো হকলিইরি। য়াংখা লিইনা রিইলৈংচা তেংলো আলুংচা ঙিঙ্রিং ফ্রইলাঃখারি। 25যীশুচা তিবিরোগো প্রলিইরি, “নাংরো যাচাগো ক্যুংগেতিলিঃ?”

তিবিরোচা রুসিই তাঃরানা এংঅলো কুঃরো কুঃরো আতুওয়ংমা প্রগেলিইরি, “দিঃ লুঃউ যাসুউলিঃ, যা লুঃউ লিইনা মুওগো আঃনা পিইগি লিইনা মুওলি য়াংসুউ চাঃগাগো নাথংরি?”

মকং নেঃ কৈং হিকরি লুঃউচা কেইংমালিইরি

(মথি ৮:২৮-৩৪; মার্ক ৫:১-২০)

26য়াংনক যীশুনা তিবিরোচা ম্রঃ কুউলো গালীল প্রিনিগা আপ্রেং ব্রাক গাদারীয় নিংরেদুঃ লাঃখাগেতি। 27যীশু যাখা লংগা ছাংলিইরি য়াংখা য়াংদে ‍রুওয়াসা তয়কচা যীশুবাদুঃ লাঃলিইরি। য়াং লুঃউগোচা কংগং আম্যা নেঃছুুও কৈংলো আম্যাগ্রিই রাক ফ্রইব্যা আওয়ে-আঃচা মুুওয়েপ্রি নিংরি অর ইংমা মিনিংব্রি সাংখ্যুয়েংমা নিংরি। 28যীশুগো ম্রাংরিখা য়াংসুউ অঃলিইরি অর যীশু হ্রিইগা কাবামা ওয়েরো আসেইং আগ্রিইনা প্রলিইরি, “মাহা থাওরা ফোরা সাঃ যীশু, কুবাংনা ঙা যা ছৈংরিলিঃ? ঙা আতংবেং থাঃরি কুঃবাং ঙাগো মিনিংনৈং-মাঃচানৈং মাপ্যাংগি।”

29য়াং লুঃউচা দিঃ চাঃগাগো প্রলিইরি আক্রংগা যীশুচা য়াং নেঃছুওগো য়াংসুউগা থুওয়ক লাঃফু আতুওয়ক আঃনা পিইলিইরি। য়াং নেঃছুওচা আপ্রেং আপ্রেং য়াং লুঃউগো ম্রুংছেংলিইরি। ছুগি য়াংখাচা য়াংসুউগো সেংক্যক্রুনা খ্যুয়েংলো লুঃউ চংসা হিকলিইরি য়িগিলি য়াংসুউচা সেংক্যক্রুগো ফ্রেবৈতি অর য়াং নেঃছুঃচা য়াংসুউগো চিছিক-ক্রাক আঃরাদুঃ য়ুলাঃরি। 30যীশু য়াংসুউগো মিংলিইরি, “নাক নাঃমি যালি?”

য়াংসুউচা প্রলিইরি, “সুরুয়ি,” আক্রংগা আম্যাগ্রিই নেঃছুওচা য়াংসুুুউমা ওয়ং হিকরি। 31য়াংখা থুউ নেঃছুওরোচা যীশুগো আখ্রিইকৈং আলাককৈং আতংবেং থাগেলিইচাগা, যীশু য়াংসুউরোগো আওয়িজিই তুওয়ংদুঃ মাখ্যারাঅং।

32-33য়াংদে তংনামা ওয়াক তুরুয়িই ক্যং হিকলিইরি। নেঃছুওরোচা যীশুগো আতংবেং থাঃগেলিইরিচাগা, য়াং ওয়াক রুয়িইদুঃ নেঃছুওরোগো রুওয়েঅং। যীশু খুওয়ং পিইব্রিইনক নেঃছুওরোচা য়াং লুঃউগা থুওয়কলো ওয়াক আরুয়িইমা ওয়ংগেলিইরি। য়াংখা য়াং ওয়াক আরুয়িইচা ম্রঃ তংনাগা ব্রিই লাঃলা ম্রঃমা ক্যা সিইগেরি।

34যাসুউরো ওয়াক ক্যংগেতি, য়াংসুউরোচা দিঃ প্রাসানাগো ম্রাংলো ব্রিই লাঃখাগেতি অর রুওয়া নেংবুনেংবা হিকচা আঃরামা য়াং সাদাংগো প্রগেলিইরি। 35যা প্রলি য়াংচাগো ক্রিফু অতুওয়ক লুঃরোচা প্রাংদুঃ থুওয়ক লাঃগেলিইরি। যীশুবাদুঃ লাঃলো য়াংসুউরো ম্রাংগেরিগা, যাসুউগা নেঃছুওচা থুওয়ক লাঃখারি য়াং লুঃউচা আওয়ে-আঃচা ওয়েলো চিই মিম্রিনা যীশু আখ্রিই আরাংমা থৈংলো হিকরি। য়াংচাগো ম্রাংলো আলুংসুউ ক্রককেলিইরি। 36যাসুউরো য়াং প্রাসানাগো ম্রাংগেলিইরি য়াংসুউরো থুউ লুঃউরোগো লাঃলো প্রগেলিইরি দিঃ লুঃউচা যাপুয়েং প্যাংলো আকং ফ্রইলিঃ। 37য়াংখা গাদারীয় নেংবুনেংবা হিকচা লুঃউরো যীশুগো য়াং আঃরাগা লাঃলিইফিইছুলো আতংবেং থাঃগেলিইরি আক্রংগা য়াংসুউরো কংগং আম্যা ক্রককেলিইরি।

য়াংখা যীশুচা প্রেং লাঃফু আতুওয়ক লংমা তাকলিইরি। 38যা লুঃউগা নেঃছুও থুওয়কলিইরি য়াং লুঃউচা যীশুগো আতংবেং প্যাংলিইরি, য়াংসুউচা যীশুনা আতু লাঃফু। ছুগি যীশুচা য়াংসুউগো দিঃ চাঃগা প্রলো ইংদুং রুওয়েলৈতি, 39“নাং ইংদো প্রাইংলো লাঃলি, লাঃলো থাওরা ফোরাস্যাং নাককো যা কিজু প্রুকরিলি য়াং চাগাঃগো প্রঃপ্রালিই।”

য়াংসুউচা ইংদুঃ প্রেং লাঃলো যীশু য়াংসুউ আতুওয়ক মন্হক কিজু প্রুকরিলি, য়াং চাঃগাগো হিকচা অাঃরামা প্র পেলিইরি।

আসিই মিকমাশ্যি তয়কনা রঃগাসি মিকমা তয়ক

(মথি ৯:১৮-২৬; মার্ক ৫:২১-৪৩)

40যীশু ম্রঃ অর তাব্রাকদুঃ লাঃখারিখা য়াংদেমা লুঃউরোচা যীশু চিই আপ্যনা লাকখেংগেরি, আক্রংগা য়াংসুউরো যীশুগো চং হিকগেলিইরি। 41নক্কা যায়ীর নাঃমিনা চেঃরেমা গংখ্যুক তয়ক যীশু খারাংমা ওয়েলিইরি। 42য়াংসুউচা যীশুগো কুও ইংদুঃ লাঃফু আতুওয়ক আলাক-আখ্রিই কৈংলিইরি। আক্রংগা য়াংসুউমা সিমিংশ্যি তয়কচা সিইফুব্যা-সিমিংশ্যিচা তিছিন্হইন্হ হিকলিইরি।

যীশু যাখা লাঃলিইরি য়াংখা লুঃউরোচা যীশু লিফাকলাকচিইমা তয়ককো তয়ক তুওগেলিইরি। 43য়াং লুঃউরো আতুওয়ংমা মিকমা তয়কচা তিছিন্হইন্হ পেলুং স্যুই স্য রঃগা কেএ হিকলিইরি। ছিইসামারোগো প্রালো যা হিকরি আলুংচা কুংপাহাব্যা য়িগিলি তয়কপাং আকং মাপ্যাংনৈংলিই। 44য়াংসুউচা যীশু নক্কা লাঃলো যীশু কুঃরুং আঃনাগো ম্হেংলিইরি অর খ্যাং খ্যাং য়াংসুউমা স্যুই স্য রঃগাচা কংলিইরি। 45য়াংখা যীশুচা প্রলিইরি, “যাসুউ ঙাগো ম্হেংরিলিঃ?”

অালুংসুউ লাক মেখেংগেলিই নক পিতর না য়াংদেমা লাঃসারোচা প্রগেলিইরি, ছারা, লুঃউরোগা কুঃবাং লিফাকলাকচিই তয়ক আথাকমা তয়ক ফ্রইলো কুঃবাংমা ক্যাগেতিব্যা।

46য়িগিলি যীশুচা প্রলিইরি, “ঙা সিকরি ঙাগো তয়কমুসুউ ম্হেংলিইরি আক্রংগা ঙা সিকলিইরি ঙাগা গুংধ থুওয়কলিইরি।”

47য়াং মিকমাচা কুও আঃতি ক্যাফুব্যা য়াংখা তুংলো তুংলো যীশু হ্রিইগা ওয়েলিইরি। নক্কা আলুংসুুুউ হ্রিইথাকমা মিকমাচা যীশুগো প্রলিইরি, যাফু য়াংসুউ যীশুগো ম্হেংরিলি অর যা পুয়েং প্যাংলো খ্যাং খ্যাং কংলিইরি। 48য়াংখা যীশুচা য়াং মিকমাগো প্রলিইরি, “মিখাং, নাং ক্যুংরি আতুওয়ক কং লাঃখারি। চিই আখেংসানা লাঃলিইফিই।”

49যীশু য়াংখা তয়ং চাঃগা প্র হিকরিসিই, য়াং অাখিংমা য়াং চেরেমা গংখ্যুক ইংগা তয়ক লাঃলো প্রলিইরি, কুবাং সিমিংচা সিই লাঃখাব্যা; ছারাগো অর দুঃখাওয়া মিপিইগিফিই।

50দিঃ চাঃগাগো ক্রালো যীশুচা যায়ীরগো প্রলিইরি, “মক্রককি; আক্যুংগো থাঃ-য়াংপুয়েং থাঃগি সিমিংচা কংমি।”

51যীশুচা যায়ীর ইংমা রকলো পিতর, যোহননা যাকোব অর মিকমাশ্যি মিখাং ফাখাং আপি অর তয়ককোলি ইংদু আথিদুঃ ওয়ংফু মিপিইলিইব্যা। 52আলুংসুউ মিকমাশ্যি আতুওয়ক ঙুগেতি অর রংরাং ফ্রইকেলিইরি। য়াংখা যীশু প্রলিইরি, “অর মুঙুগিফিই। মিকমাশ্যিচা মিসিইসিই, য়াংসুউচা ওয়িইতি।”

53লুঃউরোচা আঃরি-আসুওয়েং প্রুককেলিইরি আক্রংগা য়াংসুউরো সিকরি মিকমাশ্যিচা সিই লাঃখাব্যা। 54নক্কা যীশুচা মিকমাশ্যি আলাককো কৈংলো প্রলিইরি, “সিমিংশ্যি, থাঃ।” 55য়াংখা মিকমাশ্যিচা প্রেং হ্রাংলিইরি অর খ্যাং খ্যাং য়াংসুউচা থালো রেঃলিইরি। য়াংখা যীশুচা আঃনা পিইলিইরি, মিকমাশ্যিগো তুখুকমাসা চাঃফু পিলৈইকে। 56মিকমাশ্যি মিখাং ফাখাংচা কংগং এংঅগেলিইরি য়িগিলি যীশুচা য়াংসুউরোগো হেংলিইরি যাফুলিছুগি দিঃ প্রাসানারোগো তয়ককোলি মপ্ররাঅং।

Iliyochaguliwa sasa

লূক 8: BBSRMZ

Kuonyesha

Shirikisha

Nakili