লূক 23

পিলাত মাং হ্রিঃগা আস্যাং যীশুগো তাঃরা চঃখ্রাং

(মথি ২৭:১,২,১১-২৬; মার্ক ১৫:১-১৫; যোহন ১৮:২৮—১৯:১৬)

1য়াংখা থুঃউ তাঃরা বুওয়িগা আলুংসুউ থাঃরো যীশুগো রোমীয়মা আগ্রি উকখ্যুকসু পিলাতবাদুঃ য়ুউ লালিইরি। 2য়াংসুউরো দিঃ চাঃগা প্ররো যীশুগো ছেংগ্যাংফাক লুককেলিইরি, “ঙারো ম্রাংগেলিইরি, দিঃ লুঃউচা সরকারগো ছেংগ্যাংফাক লুকরো ঙারো লুঃউগো ব্রাক সুওয়ংরি। দিঃ লুঃউচা সিঃথিকগো ফেংদা মিপিগিলো হেংরি অর কোদৈং প্ররি কোচা রিসিই, অর মাং তাবা।”

3পিলাত যীশুগো মিংলিরি, “নাং যিহুদীরোমা মাং লঃ?”

যীশু আফ্রি পিলিরি, “কোবাং আম্হেং চাঃগা প্ররি।”

4য়াংখা পিলাতচা আগ্রিই ফুংগ্রিরোনা হিকচা আলুং লুঃউরোগো প্রলিইরি, “ঙাগা দিঃ লুঃউমা তুখুউলি আপ্রই মাম্রাং।”

5য়িগিলি য়াংসুউরো কেইংছেং লঃরো প্রগেলিইরি, “দিহুদিয়া প্রিনি আলুং আঃরামা দিঃ লুঃউচা সুয়েংসাং পিইলো লুঃউরোগো মেং তাংলিরি। গালীল প্রিনিগা নিংরো য়াংসুউ চাঃলিরি, অর আগো দিঃমা লাঃরি।”

6দিঃ চাঃগাগো ক্রারো পিলাত যীশুগো মিংলিইরি, গালীল প্রিনিগা লুঃউ হুকতি লঃ। 7উকখ্যুকসুউ হেরোদ মাং উকখ্যুকচা আথিমা যা প্রিনি হিকরি, যীশুচা য়াং প্রিনিগা লুঃউ সিইরিখা, পিলাতচা য়াংসুউগো হেরোদবাদুঃ রুওয়েলৈতি। য়াং আখিংমা হেরোদলি যিরুশালেংমা হিকলিইরি। 8হেরোদচা যীশুগো ম্রাংরো কংগং প্যলিইরি। হেরোদচা যীশু আক্রংলিলারোগো কংগং আম্যা ক্রারো হিকলিইরি, য়জংকিজু হেরোদচা যাখাকাবাং যীশুগো ক্রিখ্যাংলো হিকলিইরি। হেরোদ ম্হেলিইরিচা যীশু কোগো তুখুকমাসা এংঅফুয়ি আলুক লুকরো প্রামি। 9হেরোদচা যীশুগো মিংলিইরি, য়াংখা যীশু চাঃগা তুখুয়েংলি আফ্রিঃ মিপিইলি। 10আগ্রিই ফুংগ্রিরোনা কেইং ছারারোচা, য়াংদেমা রেঃরো অঃ প্রলো যীশুগো আপ্রই তাংগেলিরি। 11য়াংখা হেরোদচা যীশুগো সিরিই ফ্যাকরো আরিআসুয়েং প্রুকলিইরি অর হেরোদ সুরুয়িইরোলি হেরোদঞ্যং তেথেং প্যাংগেরি। য়াংনক যীশুগো রংক্যকতি আওয়ে তিথি ওয়েচিইরো, হেরোদচা যীশুগো পিলাতবাদুঃ রুওয়েলৈতি। 12দিঃ হ্রিইগা হেরোদনা পিলাতচা রেংসুউ হিকগেলিইরি য়িগিলি য়াংরাকনিক কাবাং মিকছুয়ি ফ্রইকেলিইরি।

13য়াংখা পিলাতচা আগ্রিই ফুংগ্রিইরো, গংখ্যুকনা লুকরো চাসারোগো খঃরো তেরেমা ছুকরো প্রলিইরি, 14“কোবাংরো দিঃ লুঃউগো দিঃ আপ্রই খ্যারো ঙাবাদুঃ য়ুউলাঃচাগা, লুঃউরোগো দিঃ লুঃউচা সরকারগো ছেংগ্যাকফাক লুকরো ব্রাক সুওয়ংরি। য়িগিলি য়াংসুউগো ঙা কোবাংরো হ্রিইথাকমা মিংফু। কোবাংরো দিঃ লুঃউগো ছেংগ্যাংফাক লুকরো আপ্রই তাংরি, য়াংচামা তুখুকমালি আপ্রই হিকরিলো ঙা মাম্রাং। 15প্রফুছুগি হেরোদলি তুখুউলি আপ্রই মাঃরালি, আক্রংগা হেরোদচা যীশুগো ঙারোবাদুঃ প্রেং রুওয়েলৈতি। কোবাংরো ম্রাংরিচাগা, সেঃবৈফুঞ্যং, য়জংজে অলুক দিঃসুউ মলুকলিই। 16য়জংকিজু ঙা য়াংসুউগো ডেং পিইরো রুওয়েলৈফুব্যা।” 17পিলাতচা দিঃ চাঃগা প্রলিইরি আক্রংগা ক্যুয়েম্রকতি পুয়িমা খ্যাংখাফ্র পিলাতচা থংক্যাসা তয়ককো রুওয়েরারি।

18য়জংছুগি লুঃউরোচা তলৈংমা অরো প্রগেলিইরি, “দিঃ লুঃউগো সেঃবলৈই অর বারাব্বাগো ঙারোগো পিই।” 19দিঃ বারাব্বাচা ম্রুমা ছেংগ্যাংফাক লুকলো সেঃতি বৈতি কিজু থং খ্যালিইরি। 20য়িগিলি পিলাতচা যীশুগো রুওয়েফু ক্রিলিইরি, য়জংকিজু পিলাতচা লুঃউরোগো প্রেংরো থুউ চাঃগাগো প্রলিইরি। 21য়িগিলি লুঃউরোচা দিঃ চাঃগা প্রলো অগেলিইরি, “য়াংসুউগো থুউ খেবলৈই, থুউ খেবলৈই।”

22পিলাতচা সুংগ্রিং তৈঅং লুঃউরোগো প্রলিইরি, “যালি, দিঃ লুঃউ যা আপ্রই লুকরিলি? ঙাগা য়াংসুউমা তুখুউলি আপ্রই মাম্রাং, যা আপ্রই কিজু য়াংসুউ সিইলৈঅং ডেং রাঃফুলিঃ। য়জংকিজু ঙা য়াংসুউগো আখ্রাতুখুক ডেং পিইরো রুওয়েলৈফুব্যা।”

23য়িগিলি লুঃউরোচা যীশুগো থুউ খেফুকিজু অগেলিইরি অর আছুংমা য়াংসুউরো অরো অংম্রাংগেলিইরি। পিলাতচা লুঃউরো চাঃগাগো লাক খেংফু ক্যালিইরি। 24-25ছেংগ্যাংফাক লুকরো লুঃউরোগো সেঃসা যাসুউগো থংমা খ্যালিইরি, লুঃউরোচা য়াংসুউগো রুওয়েচিইগেরি য়জংকিজু পিলাতচা য়াংসুউগো রুওয়েলৈতি। অর লুঃউরো ছেংদা অলৈই যীশুগো সেবৈফু ‍কিজু য়াংসুউরো আলাকমা পিইলৈতি।

থুউ খেরামা আস্যাং যীশু

(মথি ২৭:৩২-৩৪; মার্ক ১৫:২১-৩২; যোহন ১৯:১৭-২৭)

26সুরুয়িইরো যাখা যীশুগো য়ুউ লাঃগেতি, য়াংখা কুরিণী ম্রুমা শিমোন নাঃমিনা লুঃউ তয়কচা রুওয়াগা নিংরো লেলিইরি। সুরুয়িইরোচা য়াংসুউগো আনৈং প্যাংরো থুউ খেচা তৈংগো পাকখুংমা তাং পিইলিইরি যাফুলিছুগি য়াংসুউ যীশু নক্কা নক্কা লৈনৈংঅং। 27লুঃউম্যা আপংরোচা যীশু নক্কা নক্কা লৈকেতি। য়াংসুউরো আতুওয়ংমা মিকমালি আম্যা হিকলিরি। য়াংসুউরোচা রাংবুকরো ঙোগেতি। 28যীশুচা য়াংসুউরোদুঃ প্রেং ক্রিরো প্রলিইরি, “যিরুশালেংগা মিকমারো, ঙা কিজু মুঙুগেকি। নাংরো কো কিজু অর কো সা-সিমিং কিজু ঙোগে, 29আক্রংগা জং রাক লাঃরি, য়াং রাকমা লুঃউরোচা প্রগেমি, ‘যাসুউরোমা তাখালি সা-সিমিং মাঃরাসিই অর যাসুউরো তাখালি রাংস্যুই নুও আশ্যিরোগো মতঃসিই, য়াং আম্রুংমারোরা মাঙ্গালা হিকরি।’ 30য়াং অাখিংমা আগ্রিই আগ্রিই ক্যকলুংগো লুঃউরোচা প্রগেমি, ‘ঙারোমা ক্যা,’ অর আশ্যি আশ্যি তংরোগো প্রলিইমি, ‘ঙারোগো ফুংরো থাঃ।’ 31আপাং আচিং হ্রিইখা লুঃউরো ‍দিপুয়েং প্যাংগেকি, য়জংছুগি আপাং খ্রক লাঃখা যা ফ্রইকেফুলি!”

32সুরুয়িইরোচা আপ্রইস্যাং ন্হৈয়ককোলি থুউ খেফু কিজু যীশুনা আতুউ য়ুউ লাঃগেলিইরি। 33যা আরাগো গংখুয়েং ছুরো খঃগেতি, য়াংদেমা রকরো য়াংসুউরো যীশুনা অর আপ্রইস্যাং ন্হৈয়ককো থুউ খেকেলিইরি- তয়ককো যীশু ঞাফাক্কা অর তয়ককো বিঃফাককা। 34য়াংখা যীশু প্রলিইরি, “ফাখাং, দিঃসুউরোগো খুওয়ং রুওয়ে, আক্রংগা দিঃসুউরো যা লুককেতিলি, য়াংচাগো মিসিক।”

সুরুয়িইরোচা মিঃফক লুকরো যীশু আওয়ে-আঃচাগো কোরু আতুওয়ংমা ওয়িই য়ুউগেলিরি। 35লুঃউরোচা রেঃক্রি হিকগেলিইরি। কেইংছারারোচা যীশুগো আঃরি-আসুয়েং প্রুকরো প্রগেলিইরি, “যীশুগা লুঃউরোগো কিছিরি। য়াংসুউরা থাওরা ফোরা ঈ মশীহ, অর থাওরা ফোরা ঈ রুইককচা লুঃউছুগি, কুঃদৈং কোগো কিছিবেচিই!”

36সুরুওয়িরোলি যীশুগো আরি-আসুয়েং প্রুক্কেলিইরি। য়াংসুউরো যীশুগো সকফু কিজু কংগং আফুমিহিক আরাককো যীশু নেংমা পিইরো প্রগেলিরি, 37“নাংরা যিহুদিরোমা মাংছুগি, কোগো কো কিছি।”

38থুউতৈং আথাকমা প্যুয়েং রুওরামা রুইরো হিলিইচাগা, “দিঃ লুঃউচা যিহুদীরোমা মাং।”

39যা লুঃউ ন্হৈয়ককো যীশুনা আতু থুউ খেলিইরি, য়াং ন্হৈয়ক্কা তয়ক যীশুগো আনৈং প্যাংরো প্রলিইরি, “নাং মশীহ মুহু লঃ? য়জংছুগি কুদৈংনা ঙারোগো কিছিমেঃ।”

40য়াংখা অর তয়কচা হকরো য়াংসুউগো প্রলিইরি, “নাং থাওরা ফুরাস্যাংগো মক্রক লঃ? নাংলিগা তেজেতৈং ডেং রাঃরিব্যা। 41ঙারো ডেং রাঃফু থঃতেংরি ডেং রাঃরি। ঙারো যা রাঃফু হিকলিইরি, য়াংচা রাঃরি। য়িগিলি দিঃ লুঃউগা তুখুউলি আপ্রই মুলুকলি।” 42য়াংনক য়াংসুউচা প্রলি্ইরি, “যীশু, কোবাং যাখা মাং তাকফু কিজু প্রেং লাঃফু য়াংখা ঙা চাঃগাগো তুওয়করো রাঃঅং।”

43আফ্রিমা যীশু য়াংসুউগো প্রলিইরি, “ঙা নাককো আম্হেং প্ররি, নাং গিনি ঙানা আতু সাগ্রাফুংমা রকমি।”

আস্যাং যীশু সিইখ্রাং

(মথি ২৭:৪৫-৫৬; মার্ক ১৫:৩৩-৪১; যোহন ১৯:২৮-৩০)

44-45য়াংখা মুওয়েংদি তিছিনৈখ্যাক তিরিব্যা। নিংগা নিংরং মাক্যালিব্যা অর প্রিলুং মঃমঃ ফ্রলাঃলিইরি। ঞাজাখেঃ সুংনারি তিইঅং মঃমঃ ফ্রই হিকলিইরি। যিরুশালেং ক্যংমা তুওয়েং খাওয়াগা আওয়েচা আলিগং তিদি চুক ক্যারো নৈখেরেং ফ্রলিইরি।

46যীশুচা অঃরো প্রলিইরি, “ফাখাং, ঙা কোবাং আলাকমা ঙা আসাককো ল্হুরিব্যা।” দিঃ চাঃগা প্ররো যীশু আসাক চুকতিলিইরি।

47দিঃচারোগো ম্রাংরো রোমীয় আয়ক তাঃরামা সুরুয়িই বুগ্রিইচা থাওরা ফুরাগো খিইম্যুয়েংরো প্রলিইরি, “দিঃ লুঃউমা আম্হেং আপ্রই মিহিকলিই।”

48যা লুঃউরো য়াংদেমা হিকগেলিইরি, য়াংসুউরো দিঃ আলুং প্রাসানাগো ম্রাংরো রাংখেরো খেরো য়াংচাগা প্রেং লাঃগেলিইরি। 49যাসুউরো যীশুগো সিকগেতি অর যা মিকমারো গালীলগা যীশুনা আতু আতু লাঃগেলিইরি য়াংসুউরো আলুংসুউ আওয়িইগা প্রাসানাগো রেঃ ক্রিগেলিইরি।

আস্যাং যীশু সাংখ্যুয়েং

(মথি ২৭:৫৭-৬১; মার্ক ১৫:৪২-৪৭; যোহন ১৯:৩৮-৪২)

50যোষেফ নামিনা সুদগং তয়ক য়াং মহাআতৈংবাং গ্রিমা তয়ক হিকলিরি। য়াংসুউচা অরিমাথিয়া নামি খঃরো যিহুদী রুওয়া তুওয়াগা। 51যীশু আক্রংলিলাগো য়ুউরো আতৈংবাংমা লুঃউরোনা য়াংসুউ চাঃগা দঃমিচিইলিই। য়াংসুউচা থাওরা ফুরা ঈ নেংঙেংদগো চং হিকলিইরি। 52পিলাতবামা লাঃরো য়াংসুউ যীশু আলংগো তংলিইরি। 53নক্কা আলংগো থুউগা খ্যারো আওয়ে রঃলিইরি অর ক্যককো থুওয়ংরো লুকচা আখং তখংমা থঃলৈতি। য়াং আখংমা তাখালি তয়ককো মাঃথাসিই।

54য়াং রাকচা হিকলিইরি, সাদাং রাককো য়াংফু রাক হিকলিরি। সাদাং রাকচা ক্যালিইরিব্যা। 55যা মিকমারো যীশুনা আতু গালীলগা লাঃগেলিইরি, য়াংসুউরো যোষেফ নক্কা নক্কা লাঃরো সাংখ্যুয়েংগো ক্রিঃগেলিইরি অর যীশু আলংগো যা পুয়েং থাঃলিইরিলি, য়াংচাগোলি ক্রিকগেলিইরি। 56য়াংনক য়াংসুউরো প্রেং লাঃরো, যীশু আলং কিজু আমুয়িং ছিই অর পুরুক য়াংগেলিরি। য়াংনক য়াংসুউরো মোশির পুয়েংঞেচা আতৈং সাদাংরাকমা নাঃগেলিরি।

Iliyochaguliwa sasa

লূক 23: BBSRMZ

Kuonyesha

Shirikisha

Nakili