লূক 18
18
ছুতংখ্রাং আক্রংলিলাঃগো সুয়েংসাং পিঃচা
1-2তিবিরো খ্যাংখামুছু ছুতংনৈঅং অর চিই মাপ্যাকরাঅং য়াংচাগো সুয়েংসাং পিঃফু কিজু যীশু তিবিরোগো দিঃ উপমাগো প্রলিরি, “ম্রু তুম্রুমা তাঃরা চৈসা সুগ্রী তয়ক হিকলিরি। য়াংসুউচা থাওরা ফুরাগো মক্রক অর লুঃউগোলি লুঃউলো মেম্হে। 3য়াং ম্রুমা মিকছুমা তয়ক হিকলিরি। য়াংসুউচা আপ্রেইং আপ্রেইং লাঃরো য়াং তাঃরা চৈসা সুগ্রীইগো প্রলিইরি, ‘আল্হা তাঃরা চৈরো, ঙাগো অং পিই।’ 4য়াং তাঃরা সুগ্রীইচা লৈগারাক তৈঅং তুখুউলি মুলুকলিই। য়জংছুগি নক্কা য়াংসুউ চিইমা চিইমা তুওয়কলিরি, ‘ঙা থাওরা ফুরাগো মক্রক অর লুঃউগো লুঃউলি মেখেং, 5য়িগিলি দিঃ মিকছুমাচা ঙাগো আপ্রেইং আপ্রেইং পাঃছা প্যাংরিকিজু, ঙা য়াংসুউ ফাককা তাঃরা চৈফু। য়জংমুহুকি য়াংসুউচা আপ্রেইং আপ্রেইং লাঃফুব্যা অর য়জংছুগি ঙাচা কংগং পাঃছা ফ্রইফুব্যা।’”
6য়াংনক আস্যাং ফুরাচা অরলি প্রলিরি, “আল্হা তাঃরা চৈসা মুহুককিলি, য়াংসুউ যা প্ররিলি য়াংচাগো ছাংখ্রাংলো ক্রিগে। 7য়জংছুগি থাওরা ফুরাগো যাসুউরো রাক নিং তাঃরো, থাওরা ফুরাচা কো রুইকক থাঃচা লুঃউরো ব্রাক্কা ব্রাক য়ুউরো তাঃরা মচঃপ্যালঃয়ি? থাওরা ফুরা য়াংচা লূকফু কিজু আক্রা নিংফু চাঃগা লঃ? 8ঙা নাংরোগো প্ররি, থাওরা ফুরাচা য়াংসুউরো ব্রাক্কা ব্রাক য়ুউরো তাঃরা চঃফুচা আক্রা মাঃথামুব্যা। ছুগি মনুসাওয়া সাঃ যাখা লাঃফুলি য়াংখা থাওরা ফুরাচা দিঃ লঃগামা আক্যুং হিচাগো ম্রাংরাফু লঃ?”
ফরিশিরোনা ফেংদা ককসা
9যাসুউরো কোগো সুউদগং তুওয়করো আখ্রা লুঃউরোগো লুঃউ মেখেং, য়াংসুউরোগো সুয়েংসাং পিইফু কিজু যীশু দিঃ চাঃগা প্রলিইরি, 10“লুঃউ নৈয়কচা ছুউক তংফু কিজু ওয়িইপাসানা ক্যংদুঃ লাঃগেলিইরি। য়াংসুউরোমা তয়কচা হিকলিইরি ফরিশী অর তয়কচা হিকলিইরি ফেংদা ককসা। 11ফরিশিচা রেঃরো কো আক্রংলিলাগো য়ুউরো ছুউক তংলিরিচাগা, ‘অ থাওরা ফোরাস্যাং, ঙা কুবাংগো কিজুতাংবারিচাগা, ঙা অর লুঃউরোঞ্যং আলিং, আপ্যাক অর কামিসু মুলুঃউ, প্রফুছুগি থুউ ফেংদা ককসাঞ্যংলি মুহুক। 12ঙা খাঃলিমা নৈরাকচি তাঃরা ছকতিরি অর ঙামা মন্হক কাংমেরো রাঃরিলি য়াংচাগা ছিইবাকমা তাবাক ঙা ল্হুরি।’ 13য়াং আখিংমা থুউ ফেংদা ককসাচা তিফি আওয়িইমা রেঃরো হিকলিইরি। গংখাংব্রাংদুঃ ক্রিফুতয়ং য়াংসুউমা রিই মিহিলি, য়াংসুউচা রাংগো বুকরো প্রলিরি, ‘অ থাওরা ফুরাস্যাং! ঙা আপ্রইস্যাং, ঙাগো মিত্তা থাঃবা।’
14“ঙা নাংরোগো প্ররি, য়াং ফেংদা ককসাগো থাওরা ফুরাচা আপ্রই মিহিকছুরো লাক খেংলিরি অর য়াংসুউচা ইংদুঃ প্রেং লাঃখারি। য়জংছুগি থুউ ফরিশিগো, থাওরা ফুরাচা আপ্রইইমিহিছুরো লাক মেখেংলি। খ্যাংসুমুছু কোগো আগ্রি তুওয়ককি য়াংসুউগো অকখ্যাফু অর যাসুউ কোগো লুঃউ মুহুক তুওয়কতিলি, য়াংসুউগো আগ্রিই লুকফু।”
ফুরা যীশু অর অঃম সেনেংরো।
(মথি ১৯:১৩-১৫; মার্ক ১০:১৩-১৬)
15লুুঃউরোচা আশ্যি অঃমরোগো যীশুবাদুঃ য়ুউ লাঃগেলিরি, যাফুলিছুগি যীশুচা য়াংসুউরো আথাকমা আলাক তাংঅং। তিবিরোচা য়াংচাগো ম্রাংরো, থুউ লুঃউরোগো হকলিরি। 16য়জংছুগিলি যীশুচা য়াং আশ্যিরোগো কোবাদুঃ খঃয়ুউলিইরি। য়াংনক যীশুচা তিবিরোগো প্রলিরি, “অঃম য়ক্ক্যাশ্যি মিঃমাশ্যিরোগো ঙাদুঃ লাঃফু পিই, ছিইমাঃথাগি আক্রংগা থাওরা ফু্রা ঈ নেংঙেংদচা দিঃপুয়েং আশ্যিঞ্যং অঃমরোকিজুরা। 17ঙা নাংরোগো আম্হেং প্ররি, আশ্যি অঃমরোঞ্যং থাওরা ফুরা ঈ ছুংমাচাগো লাকখেংরো মুয়ুছুগি, খ্যাংসুমুছু তাখালি থাওরা ফোরা ঈ নেংঙেংদ দুঃ মুওয়ংনৈং।”
উচাস্যাং তয়ক
(মথি ১৯:১৬-৩০; মার্ক ১০:১৭-৩১)
18রুওয়ামা গংখ্যুক তয়ক যীশুগো মিংলিরি, “অ ছারা, কোবাং তয়ক আকং লুঃউ লঃ। ঙাগো প্রঃ,যাপুয়েং লূককি ঙা তিম্রিজ বাওয়াগো রাঃফুলি?”
19যীশু য়াংসুউগো প্রলিরি, “ঙাগো আকংছুরো যাফু প্ররিলি? থাওরা ফুরাস্যাং আপি অর তয়কলি আকং মুহুক। 20কুবাংগা আঃনারোগো সিকবারি, ‘কামিসুক মুলুককি, আসাক মেসেকি, মুখুগি, আলিং সাকসিই মিপিইগি, নাক মিখাং-ফাখাংগো রুসিইতারা থাঃ।’”
21য়াং গংখ্যুকচা প্রলিরি, “আশ্যিকাবাং ঙা, য়াংচারোগো রুসিরো লাঃরি।”
22দিঃ চাঃগাগো ক্রারো যীশু য়াংসুউগো প্রলিরি, “আগোলি কোবাংমা অলুঃউতুখু মিব্রিসি। কোবাংমা যাবাংহিচাগো, রংরো ছাংরিসারোগো ল্হুলঃ, য়জংছুগি কোবাংচা নেংফুং চৈজিগো রাঃমি। য়াংনক লাঃরো ঙাক তিবি ফ্রইখিলি।” 23দিঃ চাঃগাগো ক্রারো য়াং গংখ্যুকচা কংগং চিই নাঃলিরি আক্রংগা য়াংসুউ কংগং উচাস্যাং হিকলিরি।
24য়াং গংখ্যুককো ক্রিরো যীশুচা প্রলিরি, “উচাস্যাংরো থাওরা ফুরা ঈ নেংঙেংদদুঃ ওয়ংফু কংগং খংখিঃরি! 25উচাস্যাং তয়ক থাওরা ফুরা ঈ নেংঙেংদদুঃ ওয়ংফুচা থাকপাং এঃ নাঃফাগা কুলুউক ওয়ংফুচাবাং লুয়িরি।”
26যীশু দিঃ চাঃগাগো যাসুরো ক্রাগেলিরি, য়াংসুউরো প্রগেলিরি, “য়জংছুগি যাসু আপ্রইইকা ক্যুয়েনৈংরিলি?”
27যীশু প্রলিরি, “লুঃউরো মুলূকনৈং অলুককো থাওরা ফোরাস্যাং লুকনৈংরি।”
28য়াংখা পিতর প্রলিরি, “ঙারোগা আলুংচা বৈরো, কোবাং তিবি ফ্রইকেরি।”
29যীশুচা কো তিবিরোগো প্রলিরি, “ঙা নাংরোগো আম্হেং প্ররি, যাসুরো থাওরা ফুরা ঈ নেংঙেংদ কিজু ইং-য়াঃ, মিঃয়া, ঞিংনা-আকো, মিখাং-ফাখাং অর সাঃ-সিমিংগো বৈরো লাঃরি, 30য়াংসুউরো আলুংসুউ দিঃ খঃমা কংগং আম্যা রাঃফু অর হ্রিইদুঃ রাকমা য়াংসুউরো অাম্রিহিজ বাওয়াগো রাঃফু।”
কো সিইফু আক্রংলিলাগো য়ুউরো যীশু প্রচা চাঃগা
(মথি ২০:১৭-১৯; মার্ক ১০:৩২-৩৪)
31যীশু কো তিবি তিছিনৈয়ককো তেরেতুঃ খঃরো প্রলিইরি, “ক্রি, ঙারো যিরুশালেংদুঃ লাঃগেতি। মনুসাওয়া সাঃ ঈ আক্রংলিলাগো য়ুউরো রিসিইরো যা রুই বৈখারি, য়াংচারো আলুংচা প্রিজুংফু। 32য়াংসুউগো যিহুদিমুহু লুঃউরো আলাকমা খ্যাফু। লুঃউরোচা য়াংসুউগো আঃরি-আসুয়েংনা আহ্রাক পিফু অর য়াংসুউ কাইংথামা চুয়েংছি বৈকেফু। 33কংগং ক্রুুদুকনা সেঃপ্রিনক, য়াংসুউরো মনুসাওয়া সাঃগো সেঃবলৈফু। অর সুংরাক চিইরিনি, মনুসাওয়া সাঃচা হ্রাং থাঃফু।”
34ছুগি তিবিরোচা দিঃ আক্রংলিলাগো তুখুউলি নাঃমিলিগেলি। য়াং চাঃগা আদিপিগো, তিবিরোবামা ফুং থাঃলিইরি কিজু যীশু যা প্রলিরিলি, য়াংচাগো তিবিরোচা নাঃমিলিগেলি।
আকাইং তয়কচা ম্যাকচি পুওয়ংলিরি।
(মথি ২০:২৯-৩৪; মার্ক ১০:৪৬-৫২)
35যীশু যাখা যিরীহো ম্রুবামা রকলিরি য়াংখা আকাইং তয়কচা, লেংবামা থৈংরো মিত্তা রেঃলিরি। 36লুঃউম্যা আসেং ক্রারো, আকাইংচা মিংলিরি যা ফ্রইরিলি। 37লুঃউরো য়াংসুউগো প্রগেলিচাগা, নাসরতগা যীশু, থুউ লেংগা লাঃরি। 38য়াংখা আকেইংচা অঃরো প্রলিরি, “দায়ুদ আচৈং যীশু, ঙাগো মিত্তা থাঃবা!”
39যা লুুঃউরোচা লুঃউম্যা হ্রিইগা হিকলিরি, য়াংসুউরোচা য়াং আকাইংগো হকরো তিতিনিং প্রগেলিরি। য়িগিলি য়াং আকাইংচা অর অঃরো প্রলিরি, “দায়ুদ আচৈং, ঙাগো মিত্তা থাঃবা।”
40যীশু তেংলিরি অর য়াং আকাইংগো য়াংসুউবাদুঃ য়ুউ লাঃফু প্রলিরি। আকাইংচা যীশুবাদুঃ লাঃব্রিনক যীশু প্রলিরি, 41“নাং যা লুরিলি? নাককো ঙা যা পুয়েং লুকরো মিত্তা থাঃনৈংফুলি?”
আকাইংচা প্রলিরি, “আস্যাং, ঙা ম্রাংখ্যাংবারি।”
42যীশু য়াংসুউগো প্রলিরি, “কংরি, তংরি ছুককো রাঃলিফি। নাং ক্যুংরিকিজু কংরি।”
43য়াং আকাইংচা খ্যাং খ্যাং ম্রাংলিরি অর থাওরা ফুরাগো খিম্যুয়েংরো খিম্যুয়েংরো যীশু নক্কা লৈলিরি।
Iliyochaguliwa sasa
লূক 18: BBSRMZ
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
