Yohane 9
9
Onifuraefo bi adehu
1Na ɔretwam no, ohuu onipa bi a n’ani afura fi n’awo mu. 2#Luka 13.2 Na n’asuafo no bisaa no sɛ: Rabi, hena na ɔyɛɛ bɔne, oyi anaa n’agya ne ne na, sɛ wɔwoo no onifuraefo yi? 3#Yoh 11.4 Yesu buae sɛ: Ɛnyɛ oyi anaa n’agya ne ne na na wɔyɛɛ bɔne, na mmom sɛ Onyankopɔn nnwuma bɛda adi wɔ no mu. 4#Yoh 5.17 Ɛsɛ yɛn sɛ adekyee wɔ hɔ yi, yɛyɛ nea ɔsomaa me no nnwuma; anadwo reba a obiara ntumi nyɛ adwuma. 5#Yoh 8.12 Mewɔ wiase yi, mene wiase hann. 6#Mar 8.23 Ɔkaa saa no, ɔtow ntasu guu fam, na ɔde ntasu no fraa dɔte, na ɔde dɔte no sraa onifuraefo no ani so, 7na ɔka kyerɛɛ no sɛ: Kɔ, kɔhohoro so ɔtare Siloa (a ne nkyerɛase ne: Nea wɔasoma no) mu. Ɛnna osiim kɔe kɔhohoroo so, na ɔbae na ohu ade.
N’afipamfo asɛmmisa
8Ɛnna afipamfo ne wɔn a kan wohuu no sɛ ɔyɛ ɔsrɛsrɛfo no kae sɛ: Ɛnyɛ oyi na ɔte hɔ srɛsrɛ ade no? 9Ebinom se: Ɔno ni! Na afoforo se: Ɔte sɛ ɔno. Na n’ankasa se: Mene no. 10Ɛnna wɔbisaa no sɛ: Ɛyɛɛ dɛn na w’ani buei? 11Obua kae sɛ: Onipa bi a wɔfrɛ no Yesu na ɔfɔtɔw dɔte de sraa m’ani so, na ɔka kyerɛɛ me sɛ: Kɔ ɔtare Siloa mu kɔhohoro so. Na mekɔ mekɔhohoroo so no, na mihuu ade. 12Ɛnna wɔka kyerɛɛ no sɛ: Ɔwɔ he? Ose: Minnim.
Farisifo asɛmmisa
13Wɔde nea anka ɔyɛ onifuraefo no kɔɔ Farisifo nkyɛn. 14#Yoh 5.9 Nso da a Yesu fɔtɔw dɔte na obuee n’ani no yɛ homeda. 15Ɛnna Farisifo no nso bisaa no bio sɛnea ɛyɛe na ohuu ade. Na osee wɔn sɛ: Dɔte na ɔde sraa m’ani so, na mekɔhohoroo so, na mihu ade yi. 16#Yoh 9.31; 9.33; 7.43 Ɛnna Farisifo no mu bi kae sɛ: Onipa yi mfi Nyankopɔn nkyɛn, efisɛ onni homeda. Ebinom se: Ɛbɛyɛ dɛn na onipa ɔdebɔneyɛfo betumi ayɛ nsɛnkyerɛnne a ɛte sɛɛ yi? Na mpaepaemu baa wɔn mu. 17Ɛnna wosee onifuraefo no bio sɛ: Wo nso, wabue w’ani yi, dɛn na woka wɔ ne ho? Na ose: Ɔyɛ odiyifo.
N’awofo hɔ asɛmmisa
18Nso Yudafo no nnye ne ho nsɛm no nni, sɛ anka ɔyɛ onifuraefo na ohuu ade, de kosii sɛ wɔfrɛɛ nea ohuu ade no awofo, 19na wobisaa wɔn sɛ: Mo ba a moka sɛ wɔwoo no onifuraefo no ni anaa? Afei ɛyɛɛ dɛn na ohu ade yi? 20N’awofo buaa wɔn kae sɛ: Yenim sɛ yɛn ba ni, na wɔwoo no onifuraefo; 21na sɛ ɛyɛe na afei ohu ade yi de, yennim. Na bio nso onipa ko a obuee n’ani no, yɛn de, yennim; mummisa no, wanyin, na ɔno ara bɛkasa ama ne ho. 22#Yoh 7.13; 12.42 N’awofo kaa eyi, efisɛ wosuro Yudafo no; na Yudafo no apam dedaw sɛ, sɛ obi pae mu ka sɛ ɔne Kristo no a, wobetu no afi hyiadan mu. 23Eyi nti na n’awofo kae sɛ: Wanyin, mummisa no.
Farisifo pam no
24 #
Yos 7.19
Ɛnna wɔfrɛɛ onipa a anka ɔyɛ onifuraefo no, mprenu so, na wosee no sɛ: Fa anuonyam ma Onyankopɔn! Yɛn de, yenim sɛ onipa yi yɛ ɔdebɔneyɛfo. 25Ɛnna obua kae sɛ: Sɛ ɔyɛ ɔdebɔneyɛfo a, minnim; ade biako na minim, sɛ anka meyɛ onifuraefo, na afei de, mihu ade. 26Na wosee no sɛ: Dɛn na ɔyɛɛ wo? Obuee w’ani no dɛn? 27Obuaa wɔn sɛ: Maka makyerɛ mo dedaw, na moante? Dɛn na mopɛ sɛ mote bio? Mo nso mopɛ sɛ modan n’asuafo? 28Wɔyaw no, na wɔkae sɛ: Wo na woyɛ ne suani; yɛn de, Mose asuafo ne yɛn. 29Yenim sɛ Onyankopɔn kasa kyerɛɛ Mose; na oyi de, yennim faako a ofi. 30Onipa no bua see wɔn sɛ: Eyi na ɛyɛ nwonwa sɛ munnim nea ofi, nanso obuee m’ani. 31#Yes 1.15; Mmb 15.29 Na yenim sɛ Onyankopɔn ntie nnebɔneyɛfo; na sɛ obi fɛre Onyankopɔn na ɔyɛ nea ɔpɛ a, ɔno na otie no. 32Efi wiase mfiase wɔntee sɛ obi abue nea wɔwoo no onifuraefo ani pɛn. 33#Yoh 9.16 Sɛ oyi mfi Nyankopɔn nkyɛn a, anka ɔrentumi nyɛ hwee. 34#Yoh 9.2 Wobua see no sɛ: Wo de, bɔne mu koraa na wɔwoo wo, na wo na wokyerɛkyerɛ yɛn? Na wɔpam no fii adi.
Onifuraefo no gye Yesu di
35Yesu tee sɛ wɔapam no afi adi; na ohuu no no, ɔkae sɛ: Wugye Onipa Ba no di anaa? 36Obuae sɛ: Hena ne no, Owura, na minnye no minni? 37#Yoh 4.26 Na Yesu see no sɛ: Woahu no, na nea ɔne wo rekasa yi, ɔne no. 38Na ose: Migye midi, Awurade! Na ɔkotow sɔree no.
Farisifo anifurae
39 #
Mat 13.11-15
Na Yesu kae sɛ: Atemmu nti na mebaa wiase, na wɔn a wonhu ade no ahu, na wɔn a wohu ade no adan anifuraefo. 40Na Farisifo no mu bi a wɔne no wɔ hɔ no tee nsɛm yi, na wosee no sɛ: Na yɛn nso yɛyɛ anifuraefo? 41#Mmb 26.12 Yesu bua see wɔn sɛ: Sɛ moyɛ anifuraefo a, anka munni bɔne; na afei muse: Yehu, enti na mo bɔne aka.
Iliyochaguliwa sasa
Yohane 9: RATB
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Revised Akuapem Twi DC Bible © Bible Society of Ghana, 2017.
