Zaŋ 5
5
Zezu car hurbu
1Kəki rum, Zezu 'ya ta so Jeruzalem kədan mum gi cer vun fur sôwâ Zuwif. 2Wə Jeruzalem, həre' kə vun gam so məni sôwâ wə ɗe kə «Vun Gam Cime», bara kəta' wə hana. Sôwâ kaw daŋki vatl gan wa bara rum kə ndi. Sôwâ wə ɗe bara rum kə vun Hebre: Betzata. 3Wə zə daŋki kuni, sum gaɓ juk bar wə hana: dəŋâr, kə lem, ɓay hurbu. [Handay wə ji nyen mbi rumu. 4Zə kəri məsin, vay sin Bârî mə wafray dam mbə nyen mbi bara na. Bə gaɓ məni dam ta mbi vun kofo kəki məni vay sin nə nyen mbi rum, gaɓ um car, ko gaɓ mi su daŋ'ŋ#5.4 Ri ɗerwa rum cu wə du ɗerwa məni wây' cem cem məsin kuni mi..] 5Bə gaɓ məsin kəta' wə han, mum gi kim guhinji' wa coho' kə gaɓ rumu. 6Kəri məni Zezu we num bar wə han ɓay we i mum gi kim juk kə gaɓ rum, mum ci vun rumu: «Ha wa' i gaɓ wû nə car su?» 7Bə gaɓ nə ɗam vun rumu: «Bârî, na cu kə swə məsin kədan mum man tle cin də bara nə kəri məni vay sin wə nyen mbi nə mi. Kəri məni na wə keɓ kədan na dam də du mbi, swə məsin dam də han cop kə rini.» 8Zezu la' ne numu: «A car ye, a tle la' bar gaɓ wû ɓay a ta ye.» 9Kəkor sar, gaɓ swə nə cara. Mum tle la' bar um, ɓay mum təŋ kə ta.
Kwa rum gi kə fəta pemây sôwâ Zuwif. 10Zə rum, sôwâ Zuwif la' ne kə swə məni gaɓ um car na: «Tam bəka pemây, ɓay dan dlay mba cu ne vari ne nu kədan ha tle la' bar wû ta kə ndi mi#Neh 13.19; Jer 17.21.» 11Mum ɗam vun ndaya: «Swə məni car nan nə la' ne nana: "A tle la' bar wû, ɓay a ta ye."» 12Handay faŋ ci vun rumu: «Sa nə swə məni la' ne nu: "A tle la' bar wû, ɓay a ta ye nə su?"» 13Ama swə məni gaɓ um car nə cu we swə məni car num nə mi, zə Zezu pâ 'ya dle 'yeŋ mbə du raw sôwâ məni wə ri rumu. 14Kəki rum, Zezu ndewa kə rum wə so po' fur sôwâ Zuwif, ɓay mum la' ne numu: «A mun ri'i: Mgbaŋ ni nə ha car gaɓ si, a gi kwa mə bro' za' mi, kədan kwa mə bro' mə pâ məni nə mbə wa ru za' mi.» 15Swə nə car ɓay ta in ne kə sôwâ Zuwif i Zezu kə məni car numu. 16Zə rum, sôwâ Zuwif təŋ kə keɓ zu Zezu, zə mum gi kwa rum kə fəta pemây ndaya. 17Ama Zezu ɗam vun ndaya: «Ba man wə gi sin bəka daŋ', ɓay na wə gi sin ta'a.»
18Zə dan rum, sôwâ Zuwif dle kə keɓ zu Zezu kə gbəgboŋ kədan handay um ci, cu zə i mum cuwol dan dlay kə gi sin kə fəta pemây nday taw mi, ama zə mum in i Ifray nə Ba um, ɓay ndəna', mum wə gi tu rum vun nji ɗaw kə Ifraya.
Gbəgboŋ Vay Ifraya
19Zə rum, Zezu ɗam vun ndaya: «Na in mi ne kəzin', Vay cu gak gi kwa kə tu rum mi. Mum wə gi kwa məni mum we Ba um wə gi nə tawa. Kwa daŋ' məni Ba Vay wə gi, ndəna' ta' Vay wə. 20Zə Ba Vay wə bə Vay ɓay mum wə ta' kwa daŋ' məni mum wə gi kə tu rum ne kə Vaya. Mum də ta' sin cem cem mə pâ məni nə um ne, ɓay sin um də jin' wa mi ne. 21Zə ce' ndə məni Ba Vay wə ra' sôwâ mbə mar, ndəna' ta', Vay wə ne nyî ne kə sôwâ məni mum wə wa' nday ne. 22Ɓay Ba Vay cu wə ɓok dan wa swə ɗaw kə tu rum mi, ama mum ne gbəgboŋ ɓok dan daŋ' ne kə Vay, 23kədan sôwâ daŋ' mbâ Vay ce' ndə məni handay wə mbâ Ba Vay. Swə məni cu mbâ Vay mi, bə rum cu mbâ Ba Vay məni sin num nə məta'a.» 24Na in mi ne kəzin', swə məni mun dan man ɓay ve swə məni sin nan, bə rum kə nyî mə də hâ. Dan ɓok cu də ke wa bə rum mi, mum car ɓay mum kə nyî mə də hâ. 25Na in mi ne kəzin', ri wə də mbə, ɓay ri rum mbə si. Kəri rum, sôwâ məni mar də mun wor Vay Ifray, ɓay sôwâ məni mun wor rum, handay də ke kə nyî mə də hâ. 26Zə ce' ndə məni Ba Vay kə gbəgboŋ kədan mum ne nyî ne kə sôwâ, ndəna' ta', mum ne gbəgboŋ rum ne kə Vay kədan mum ne nyî rum ne kə sôwâ. 27Ɓay mum ne vari ɓok dan ne kə Vay zə mum Vay sumra'a. 28I ar dan man jin' wa ne ni mi, zə ri wə də mbə ɓay kəri rum, sôwâ daŋ' məni mar də mun wor um, 29ɓay handay də wur mbə zra nday kədan ke kə nyî mə də hâ. Sôwâ məni ke gi kwa mə bro' də wur zra nday, ɓay Ifray də ɓok dan wa ndaya#Dan 12.2.
Kwa cem cem məni ta' gbəgboŋ Zezu
30«Na cu gak gi kwa ɗaw kə tu rin mi: Na wə ɓok dan ce' ndə məni Ifray wə man in ne ɓay dan ɓok man nə njeŋ, zə na cu wə keɓ kədan na gi kwa məni na wə wa' nə mi, ama na wə gi kwa məni swə məni sin nan wə wa'a. 31Na la' in njeŋ dan wa tu rin kə tu rin si, dan məni na wə in nə cu gak gi sin ce' ndə kwata' mə kəzin' mi. 32Ama swə məsin kəta' məni wə in njeŋ dan wa rin, ɓay na we si: dan məni mum wə in wa rin nə kəzini. 33Hi sin sum sin hay' Zaŋ ɓay njeŋ dan məni mum in nə kəzini. 34Na cu kə mê' njeŋ dan swə ɗaw mi, ama na in dan rum ndəna' kədan hi gak fe siɗi. 35Zaŋ ke ce' ndə baŋgay məni swə ge ku wə han ɓay wə ɗeri. Ama hi tuk kəɗam kə ri mə ɓu rum zə ri kî. 36Ama mə na, na kə njeŋ dan wa rin kə mbra' pâ məni Zaŋ in wa rini: Mum nə sin cem cem məni Ba man ne nan kədan na gi. Sin kuni kə məni in njeŋ dan wa rin, ɓay handay ta' i Ba man sin nana. 37Ɓay Ba man məni sin nan wə in njeŋ dan wa rin ta'a. Hi cu mun wor rum kpe mi, ɓay hi cu we vuk rum kpe məta'a#Mat 3.17; Mak 1.11; Luk 3.22. 38Hi cu kaw dan um wə vunduk ri mi, zə hi cu ve swə məni mum sin nə mi. 39Hi wə keɓ mun zu Ɗerwa Ifray zə hi wə ɗik i hi gak za' nyî mə də hâ wə du rumu. Ɗerwa rum kə məni in dan wa rini. 40Kə ndi nə daŋ', hi cu bə mbə hay' rin kədan hi fe nyî mə də hâ mi. 41Na cu wə keɓ mbra' məni car mbə hay' sôwâ mi. 42Ama na we si, hi cu bə Ifray wə vunduk ri mi. 43Na mbə kə semɗe Ba man, ama hi cu bə man ve mi. Ama swə məsin la' mbə kə wa tu rum si, hi də um ve. 44Hi wə tuk kəɗam kə ve mbra' mbok nji, ama hi cu keɓ mbra' məni car mbə hay' Ifray nə ɗaw mi. La' ndəna' si, gi ma hi gak man ve su? 45Ama i ɗik i na də tum sem ri wə kor Ba man mi: Moyizə, swə məni hi cin vunduk ri wə wa rum, mum kə məni tum sem ri. 46Hi la' ve Moyizə kəzə kəzin' si, hi man ve ta', zə mum wây' dan wa rini. 47Ama zə hi cu ve dan məni mum wây' wa rin nə mi, gi ma hi gak ve dan man su?»
Iliyochaguliwa sasa
Zaŋ 5: KMN
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Le Nouveau Testament et Psaumes en Peve © Alliance Biblique du Tchad, 2014.
