Zaŋ 3
3
Zezu kə Nikodem
1Swə ɗaw kəta' wə du kul sôwâ Zuwif mə ɗe kə Farisiyen um ɗe kə Nikodem. Mum nə ɗaw wə du sum rôwâ Fada mə Mbri. 2Mum mbə hay' Zezu kə dukri ɓay la' ne numu: «Bə ta' kwa, namba we si, Ifray sin nu kədan ha ta' kwa mba ne, zə swə ɗaw cu gak gi yew məni ha wə gi nə mi, say ka Ifray kəta' kə bə rumu.» 3Zezu ɗam vun rumu: «Na in wû ne kəzin', swə ɗaw cu gak we ri Jwə Ifray nə mi, say ka bə rum vra' kə mbrewe.» 4Nikodem ci vun rumu: «Swə məni jeŋ tu si gi ma kədan mum faŋ vra' kə mbrew su? Kəzin' mum cu gak faŋ ze də rawti ya um ɓay vra' kərem za' mi!» 5Zezu ɗam vun rumu: «Na in wû ne kəzin', swə ɗaw cu gak ze wə ri məni Ifray wə də suk jwə wa sôwâ um nə mi, say ka bə rum vra' kə mbi ɓay Simbeɗ Ifraya. 6Swə məni vra' kə ba um mə wa nya, bə rum swə mə nya, ama swə məni vra' kə Simbeɗ mə Kəleŋ, bə rum swə mə Ifraya. 7A ar dan məni na in ne nu nə jin' wa ne nu kəri məni na in ne nu: "Say hi vra' kə mbrewe" mi. 8Simbeɗ wə sa' də ri məni mum wə wa'a. Ha mun tlər rum, ama ha cu we mum car mbə ka su ko də ka su mi. Ndəna' ta' kə sa su daŋ' məni vra' kə Simbeɗ mə Kəleŋe.» 9Nikodem faŋ ci vun rumu: «Kwa rum gak gi ndəna' kə vari mi su?» 10Zezu ɗam vun rumu: «Ha bə ta' kwa mə mbri wə du sôwâ Israyel, ɓay ha cu we kwa rum mi su? 11Na in wû ne kəzin', namba wə ge dan wa kwa məni namba mun, ɓay namba wə in dan wa kwa məni namba we, ama hi cu bə ve njeŋ dan məni namba wə in nə mi. 12Hi cu ve dan man kəri məni na in dan wa kwa mə nya ne ni mi, gi ma kədan hi ve dan man kəri məni na wə in dan wa kwa mə wafray mi ne nə su? 13Swə ɗaw cu ur ta wafray ɗaw mi, say Vay sumra' məni car mbə wafray dam mbə nya. 14Ce' ndə məni Moyizə tle wu' məni sôwâ ri num kə njike mə tlew rew ta wa gu wə du gop, ndəna' ta', sôwâ də rew Vay sumra' də wa gu#Irs 21.9 15kədan sa su daŋ' məni ve num, bə rum də ke kə nyî mə də hâ. 16Ifray bə sôwâ nya dle tu si, zə rum mum ne Vay um mə ɗaw kədan sa su daŋ' məni ve num cu vi' mi, ama bə rum də ke kə nyî mə də hâ. 17Ifray cu sin Vay um mbə wə du sôwâ nya kədan mum ɓok dan wa sôwâ nya mi, ama kədan sôwâ nya fe siɗ zə rumu. 18Swə məni ve Vay, dan ɓok cu wa bə rum mi, ama swə məni cu ve Vay nə mi, dan ɓok wa bə rum si zə mum cu ve Vay Ifray mə ɗaw nə mi. 19Dan ɓok rum nə ni na: Ri mə ɓu mbə wə du sôwâ nya, ama sôwâ nya wə bə ri mə ura' pâ ri mə ɓu si zə handay wə gi kwa mə bro'o. 20Sa su daŋ' məni wə gi kwa mə bro' wə sî ri mə ɓu, ɓay mum cu mbə wə ri mə ɓu mi, zə mum wə ne wəlok i ri mə ɓu nə wə ta' kwa mə bro' umu. 21Ama swə məni wə gi kwa mə njeŋ mbə wə ri mə ɓu kədan ri mə ɓu nə ta' sin mə njeŋ məni mum wə gi wə du ta um kə Ifraya.»
Zezu kə Zaŋ
22Kəki rum, Zezu kə sum ta zə rum 'ya ta nya Zude. Mum bar han kə nday bəka cep, ɓay mum gi baptem ne kə sôwâ. 23Zaŋ wə gi baptem ne kə sôwâ ta' wə ze Aynon həre' kə so Salim, ri məni mbi wə han juku. Sôwâ mbə hay' rum, ɓay mum gi baptem nday ne. 24Kəri rum, sôwâ cu kaw Zaŋ ge ta so daŋgay' məto'o#Mat 14.3; Mak 6.17; Luk 3.19-20.
25Kəri rum, sôwâ məsin wə du sum ta zə Zaŋ təŋ kə way dan kə swə Zuwif wa dan kol tu kə vari vun fur ndaya. 26Handay 'ya ta hay' Zaŋ ɓay la' ne numu: «Bə ta' kwa, ha dla' wa dan swə məni ke kə ru wə dapa ga' sin ze Zurdeŋ, swə məni ha in njeŋ dan wa rum ne mba nə si su? A kar ri', mgbaŋ ni nə, mum wə gi baptem, ɓay sôwâ daŋ' wə də hay' rumu.» 27Zaŋ ɗam vun ndaya: «Swə ɗaw cu gak fe kwa mi, say ka Ifray mə wafray ne kwa rum ne numu. 28Hi kə tu ri, hi gak in njeŋ dan wa dan məni na ke ini: "Na cu Kris mi, ama Ifray sin nan ta kofo rumu." 29Bə cin ma kə məni cin ma rum, ama bây bə cin ma wə car hay' rum ɓay mun dan umu. Ɓay mum tuk kəɗam juk kə mun wor bə cin ma na. Ndəna' ta', na wə tuk kəɗam ɓay mgbaŋ ni nə kəɗam man nyen si. 30Mə mum, say mum jeŋ də kofo kə mbra', ama mə na, say na faŋ də kəki.»
Swə məni car mbə wafraya
31«Swə məni car mbə wafray, mum nə wa kwa daŋ'ŋ. Swə məni wə wa nya, mum nə swə nya, ɓay mum wə in dan wa kwa nya. Swə məni car mbə wafray, mum nə wa kwa daŋ'ŋ. 32Mum in dan wa kwa məni mum we ɓay mun, ama swə ɗaw cu ve njeŋ dan um mi. 33Swə məni ve njeŋ dan um, bə rum wə we i Ifray in dan mə kəzini. 34Swə məni Ifray sin, bə rum wə in dan Ifray, zə Ifray wə nyen vunduk rum kə Simbeɗ umu. 35Ba Vay wə bə Vay, ɓay mum ne gbəgboŋ ne num wa kwa daŋ'ŋ#Mat 11.27; Luk 10.22. 36Swə məni ve Vay, bə rum kə nyî mə də hâ. Swə məni cu mun vun Vay nə mi, bə rum cu də we nyî mə də hâ mi, ama bak Ifray suk wa rumu.»
Iliyochaguliwa sasa
Zaŋ 3: KMN
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Le Nouveau Testament et Psaumes en Peve © Alliance Biblique du Tchad, 2014.
