Zaŋ 20
20
Zra mar uraya
(Mat 28.1-8; Mak 16.1-8; Luk 24.1-12)
1Kə dimaŋsə, kə bəka ceɗ, ka ri ura' ɓo, Mari mə so Magdala ta wə vun zra. Ta we gway' mə ta' vun zra nə ɓuru ta kə hay'i. 2Zə rum, ta faŋ kə ne ta hay' Simoŋ Piyer kə bə ta zə Zezu məni mum bə, ɓay ta in ne ndaya: «Sôwâ tle mar Zezu mbə zra um si, ɓay namba cu we ri məni handay cin num han nə mi.» 3Piyer kə bə ta zə Zezu məsin 'ya ta vun zra. 4Handay pik ne vun nji hoɓ jak, ama bə ta zə Zezu məsin ne ga'ri pâ Piyer, ɓay mum ta day vun zra copo. 5Mum goɓ kədan mum kar rawti zra ɓay mum we zim mo' mar məni handay mo' mar kə ndi nə njay wə han, ama mum cu ze ta han mi. 6Kəki rum, Simoŋ Piyer ne ta day, ɓay mum ze ta rawti zra. Mum we zim mo' mar məni handay mo' mar kə ndi nə njay wə han, 7kə zim məni handay ɗəlak wa Zezu kə ndi nə ta'a. Zim rum cu njay wa nji kə zim mo' mar məni handay mo' mar kə ndi nə mi, ama zim rum ɗəlak cin kə hay' ceme. 8Kəri rum, bə ta zə Zezu məsin, swə məni mbə day vun zra cop nə, ze ta han ta'a. Mum we kwa rum, ɓay mum ve dan rumu. 9Kəri rum, sum ta zə Zezu cu mun zu dan Ɗerwa Ifray məni in i Zezu də mbə mar nə məto'o. 10Kəki rum, sum ta zə Zezu mə hoɓ kuni faŋ ta so ndaya.
Zezu ta' tu rum ne kə Mari mə so Magdala
(Mat 28.9-10; Mak 16.9-11)
11Mari car wə rəka həre' kə vun zra ɓay ci'i. Kəri məni ta wə ci', ta goɓ kədan ta kar rawti zra, 12ta we sum sin Ifray mə wafray hoɓ ge mbraw mə ɓu gay' wə ri məni sôwâ no' mar Zezu wə han, ɗaw suk ga' ri cin wa, ɓay məsin suk ga' ri njay seme.
13Handay ci vun sa: «Mə jwə, zə mi həŋ wə ci' su?» Ta ɗam vun ndaya: «Sôwâ tle Bârî man, ɓay na cu we ri məni handay cin num han mi.» 14Kəki məni ta in dan rum, ta faŋ i ɓay we Zezu car wə han, ama ta cu we i mum Zezu na mi. 15Zezu ci vun sa: «Mə jwə, zə mi həŋ wə ci' su? Həŋ wə keɓ sa su?» Ta ɗik i mum nə bə ji sine, zə rum ta la' ne numu: «Bârî, ha la' kə məni tle num si, a ta' ri məni ha cin num han nə ne nan, ɓay na də um tle.» 16Zezu la' ne sa: «Mari!» Ta faŋ i ta hay' rum ɓay la' ne num kə vun Hebre: «Rabuni!» Dan rum wa' ini: «Bə ta' kwa». 17Zezu la' ne sa: «Əŋ ɗak nan mi, zə na cu ur də hay' Ba man məto'o. Ama əŋ də in ne kə daw ba man i na wə də ur də hay' Ba man məni Ba mi ta', ɓay na də hay' Ifray man məni Ifray mi ta'a.» 18Zə rum, Mari mə so Magdala 'ya ta hay' sum ta zə Zezu ɓay la' ne ndaya: «Na we Bârî!» Ɓay ta in dan daŋ' məni Zezu in ne sə nə ne ndaya.
Zezu ta' tu rum ne kə sum ta zə rumu
(Mat 28.16-20; Mak 16.14-18; Luk 24.36-49)
19Fəta pemây kə ɓel rum, sum ta zə Zezu ɓa wə rawti so. Handay gay' vun vari zə handay wə ne wəlok sôwâ Zuwif, kəri rum Zezu mbə car du nday ɓay la' ne ndaya: «Heɓ nə ke kə ri!» 20Kəki məni mum in dan rum, mum ta' ɓa rum kə hay' rum ne ndaya. Kəri məni sum ta zə Zezu we Bârî, handay tuk kəɗam juku. 21Zezu la' ne nday kəreme: «Heɓ nə ke kə ri. Ce' ndə məni Ba man sin nan, na ta' na wə mi sini.» 22Kəki dan rum, mum fo' simbeɗ ta wa nday, ɓay la' ne ndaya: «I ve Simbeɗ mə Kəleŋe! 23Sôwâ məni hi də vrum kwa mə bro' nday, kwa mə bro' də vrum ta', ɓay sôwâ məni hi cu də vrum kwa mə bro' nday mi, kwa mə bro' nday cu də vrum məta'a.#Mat 16.19; 18.18»
Zezu kə Tomas
24Ama swə ɗaw wə du sum ta zə Zezu mə guɓ wa hoɓ, um ɗe kə Tomas Sôwâ wə um ɗe kə «Nyerwa» cu ke kə nday kəri məni Zezu ke du nday nə mi. 25Sum ta zə Zezu məsin la' ne numu: «Namba we Bârî.» Ama Tomas ɗam vun ndaya: «Na la' cu we tan wur məni sôwâ ke gay' num han kə kwa gay' kwa nə mi si, ɓay na la' cu cin vayɓa rin ta tan wur nə mi si, ɓay na la' cu no' ɓa rin ta mbir mə hay' rum nə mi si, na cu də ve dan rum mi.» 26Kəki rum bəka coho', sum ta zə Zezu ɓa wə rawti so nə kərem, ɓay Tomas kəta' kə ndaya. Handay gay' vun vari, ama Zezu mbə car du nday ɓay ini: «Heɓ nə ke kə ri.» 27Mum faŋ la' ne kə Tomas: «A sa vayɓa ru mbə ti, ɓay a kar ɓa rini. A sa ɓa ru no' mbə hay' rin, a ar way dan si, ɓay a ve.» 28Tomas ɗam vun rumu: «Bârî man ɓay Ifray mana!» 29Zezu ci vun rumu: «Ha ve nan zə ha we nan su? Kəɗam zə sôwâ məni ve nan dan man we.»
Zə mi Zaŋ wây' ɗerwa məni nə su?
30Zezu gi yew məsin juk wə kor sum ta zə rum məni dan rum cu wây' wə ɗerwa məni nə mi. 31Ama dan məni wây' wə han nə wây' kədan hi ve i Zezu nə Kris, Vay Ifray, ɓay kəri məni hi ve dan rum, hi də ke kə nyî zə semɗe rumu.
Iliyochaguliwa sasa
Zaŋ 20: KMN
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Le Nouveau Testament et Psaumes en Peve © Alliance Biblique du Tchad, 2014.
