Luke 19
19
Jesus le Zacchaeus
1Jesus in Jericho khua sungah tumin kaantan hi. 2Tua munah shiadong pipa ahi sumhaupa Zacchaeus kici khat om hi. 3Ama in Jesus sia a koibang mi hi a, ci in mu nuam ahihang a tuntom khat ahikom mihonte hangin Jesus a mu thei bua hi. 4Ama in mihonpite mai ah tai a, tua mun kaantan in hong pai tu Jesus mu nuamin theiteak kung khat tungah kaato hi. 5Jesus in tua mun a thet ciangin a tung ento in, “Zacchaeus awng, a manlangin hong tuaksuk ta'n, tuni in nangma inn ah hong taam tu khi hi,” ci hi.
6Zacchaeus hong tuaksuk paih a, lungdamna lianpi taw Jesus muak hi. 7A mu mihing theampo phun tek a, “Hisia pa in, mawneipa khat ii inn ah zintung thong hi!” ci uh hi.
8Zacchaeus ding a, Topa tungah hi bangin ci hi. “En in, Topa awng! Ka neisa a lang mizawngte ka pia tu hi; tuaciangin khat po ka theam ngei le a zaa li in ka lo kik tu hi,” ci hi.
9Jesus in ama tungah, “Ngupna sia tuni in hi bangkua ah hong theng hi; banghang ziam cile hisia pa zongh Abraham ii suan khat ahi hi. 10Mihing Tapa sia a bo a mangte zong tu le a ngum tu in hong pai hi,” ci hi.#Mt 18:11
Khamh Dangkatang taw Thusonteena
(Matthew 25:14-30)
11Mipite in hi thu ngai in a om laitakin, Jesus in thusonteena khat son thua hi. Ama tua laitakin, Jerusalem theng dektak zo ahikom mipite in Pathian Ngam hong kilangh pal tu hi vak ci in muangmaw uh hi.#Mt 25:14-30 12Tua ahikom ama in, “Khatvei lai in ulian khat sia ngam khualapi khat ah kumpi suak tu in pai a, tuasia zawkciang cia kik sawm hi. 13A vai din ma in a naseamte sawm sam a, khamh dangka khat tek pia in hi bangin ci hi. “Ka om ngawl sung teng in hisia taw bangza na meetsak thei uh ziam kisin vun,” ci hi. 14Tu in a ngammite in ama ensan uh a, kamtaite in delsak a, ‘Ko hisia pa ka kumpi tu in dei ngawl khu hi,’ cisak uh hi.
15“Tua pa kumpi kisuaksak a, hong heak kik hi. Sum bangza tek meetsak ziam cisia a heak thei natu in, thakhat thu in a naseamte a mai ah samsak hi. 16A masa in khat hong pai a, ‘Topa awng, nong aap khamh dangka khat ii tung panin, a dang sawm ka meetsak hi,’ ci hi. 17Ama in, ‘Pha mama hi. Nang in naseam pha khat na hi hi! Thunote tung zongh ah thumaan na hi ciang, khuapi sawm kong uksak tu hi,’ ci hi. 18A niina naseampa hong pai a, ‘Topa awng, kei khat nong piak sia ii tung pan khamh dangka nga ka meetsak hi,’ ci hi. 19Hisia pa ii tungah, ‘Nang sia khuapi nga hong uksak tu khi hi,’ ci hi. 20Naseam dang khat hong pai a, ‘Topa awng, hi lai ah na khamh dangka om hi, mainawlna puan sungah ka na phual hi. 21Nang sia mihing haksa mama khat na hikom kong kiita hi; nangma neisa ahi ngawlte na la a, na poai ngawlna tung pan a at pa na hi hi,’ ci hi. 22Ama in, ‘Naseam taktai ngawlpa awng! Nangma kammal taw ma in, nangma hong kiman kik tu hi. Kei mihing haksa khat hi a, ka neisa ngawl bul la a, ka poai sa ngawl bul a atpa ka hi nong he hi. 23Tua ahile banghangin ka sum sia dangka kholna zum ah koi ngawl ni ziam? Tua hile kong cia kik ciang a meet taw nga kik tu khi hi,’ ci hi. 24Tua zawkciangin a kungah a dingte munah, “A khamh dangka ama tung pan laaksak vun a, dangka sawm a nei naseampa pia vun,” 25Ahihang amate in, ‘Topa awng, ama in sawm nei zo hi,’ ci uh hi. 26Ama in zo kik a, ‘A tatakin ka ci ciangin, bang khat po a nei mihing sia ii tungah a tamzaw kipia tu hi; ahihang bangma a nei ngawl mihing khat ii tung panin a nei sun po kilaaksak lai tu hi,’ ci hi.#Mt 13:12; Mk 4:25; Lk 8:18 27Tu in a kumpipa tu in hong dei ngawl ka ngalte, hi munah hong paipui tavun a keima mai ah that vun,’ ci hi,” ci in son hi.
Jesus in Zawna taw Jerusalem Zuan
(Matthew 21:1-11; Mark 11:1-11; John 12:12-19)
28Jesus in hi teng ci in Jerusalem zuan tu in amate mai ah pai hi. 29Olive mual ah a om Bethphage khua le Bethany khua nai a thet ciangin, a nungzuite nii paisak khol a, hi bangin thupia hi: 30“Na mai ah a om khua ah pai tavun. Khua sung na tum uh ciang, bangma hunin a tungah a kito ngeingawl lai laano khat kikhit in a om na mu tu uh hi. Hong suut tavun a, hi sungah hong paipui tavun. 31Khat po in banghangin suut nu ziam ci in hong dongh le Topa in tulmaw hi ci vun,” ci hi.
32Amate a pai uh ciangin na theampo Jesus ii son bangin a om mu uh hi. 33Amate in laano ii khau a suut ciangin, a neipa in, “Banghangin suut nu ziam?” ci in dongh hi.
34“Topa in tulmaw hi,” ci in zo kik hi. 35Amate in laano Jesus kungah paipui hi. Tua zawkciangin amate in a laktong puasilh suut a, laano tungah dapin, Jesus suanhto hi. 36Laano tungah to in a pai ciangin, mihonpite in a laktong puasilh uh lampi tungah pha uh hi.
37Ama Jerusalem nai ah hong thet ciang Olive Mual sang paisukna munah, ama nungzui mihonpite in nalamdangte a mu hu in, awnging tak taw lungdamko in, Pathian pok uh a, 38“Topa min taw hong pai Kumpipa tungah Pathian in thupha pia tahen! Vantung ah thinnopna om tahen a, Pathian minthang tahen!” ci uh hi.#Ps 118:26
39Tuasia ciangin mihon sung a kihel Pharisee mi pawlkhat in Jesus tungah, “Sya awng, na nungzuite a thim natu in sawl in!” ci uh hi.
40Jesus in “A tatakin ka ci ciang, amate in a thim uh le, suangtumte mama in au tu in hong kipan tu hi,” ci hi.
Jerusalem atu in Jesus Kap
41Ama khuapi taw a kinai vaialna hong theng a, khuapi a mu ciangin kapin, 42“Thinnopna om thei natu in tuni in bang kisamh ziam ci in he thei thong lete maw! Ahizong tua thu mu thei ngawl ni hi! 43Hun khat hong theng tu a, na ngalte in na kiimkot panin phung leecian bangin hong uumci tu a, hong khakcip in, mun theampo panin hong sim tu hi. 44Amate in na khuapi lalthamsak tu a, na tate uh taw hong moncip siat tu hi; suangtum khat beak zongh a omna ngei ah hong om nawn buatu hi, banghang ziam cile Pathian in no hong ngum tu in hong pai hunlam na phawk bua uh hi,” ci in kaamal lo hi.
Jesus Biakinn ah Pai
(Matthew 21:12-17; Mark 11:15-19; John 2:13-22)
45Tua zawkciang Jesus Biakinn sungah tum in sumzuakte not tu kipan a, 46hi bangin ci hi, “Laithiangtho sung a ki atna ah, Pathian in ‘Ka biakinn sia thungetna inn kici tu hi,’ ci hi. Ahihang note in ngutate bukna mun na suaksak uh hi,” ci hi.#Is 56:7; Jer 7:11
47Ni simin Jesus in Biakinn sungah thuhil hi. Thiampi liante, Thukham hil syate, le mihon lampuite in ama thatlum nuam uh hi; #Lk 21:37 48ahihang, amate in tuabang a pian thei natu in, lampi a mu bua uh hi, banghang ziam cile mihonte in, kammal no khat zongh a zaak khial tu uh uuk ngawlin, ama pauna ngai top uh hi.
Iliyochaguliwa sasa
Luke 19: SCB2
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Siyin Chin Bible © Bible Society of Myanmar, 2016
