Yohana 19

1Sok mbe go, Pilaɗ hoɗ asagar ma na wa go: Ḛ wa̰a̰ Zeso, ḛ dwagle ne ge bol. 2Asagar ma tiɗ balme ge gumi tok van ma, àa kubi ne ge Zeso pagal. Àa kan ne ba̰a̰ ga̰a̰l ge kàal sasaw ne ta. 3Guwa̰, àa ka gwan ta ya ne ta zì, àa ka jan ne go: Gan ga̰a̰l ge Yahuɗ ma way, i sa̰a̰ mo wa! Àa ka yaa ne ge ne tɔgwa pul zì.

4Pilaɗ gwan waɗ-ɗa zum, jan ɓase ma go: Ḛ za̰a̰ gale, mbi gaa gene ne ya ḛ ta zum ndwa go, ḛ kuwa go mbi be seɗ fare a̰me ge kun sariya ge ne pagal to. 5Sok mbe go, àa gene Zeso ya zum. Kaa ge balme ge gumi kubiya ge na pagal, kaɗ ge ba̰a̰ ga̰a̰l ge kàal sasaw kanna ge na ta me. Pilaɗ jan num go: Nà, ḛ ndu mbe no! 6Ɗaŋɗe, sok ge ga̰a̰l ge nda ge kee tuwaleya ma way mage nda ge koy zok ge Dok ne wa ma kuwa ne, àa oy digi go: Pee ne! Pee ne! Pilaɗ jan num go: Ḛ sḛ ma wa̰a̰ ne, ḛ pel ne. Kaɗɗa ge mbi, mbi be seɗ fare a̰me ge kun sariya ge ne pagal to. 7Yahuɗ ma ga̰a̰l ma gwan ge ne janna go: I go ge eeya ɗu, ge eeya mbe pagal mbiya go ne seɗ swày, ge dape, jin̰a go: Mbi Dok Van ne.

8Sok ge Pilaɗ za̰a̰ fare mbe ma go, voo gwan ɗege kee ne gḛḛ-gḛḛ. 9Waɗ ge na sok kun sariya zì yà, ele Zeso go: Mo mbo ge dii ya de? Ɗaŋɗe, Zeso gwan ge ne fare janna byalam go to. 10Pilaɗ jan ne go: Mo kuri be jan mbi fare ge dape de? Mo wan pe go mbi ge pool ge dol mo digi, mbi kaɗ ge pool ge pel mo me to de? 11Zeso gwan ge ne janna go: Mo ge pool ge kee mbi fare ɗeŋew go mo see ne ge Dok ta. A ge pe, ndu ge ɓin̰a mbi gezi ge mo tok go, kee sone ge waɗe amo. 12Sok ge Pilaɗ za̰a̰ fare mbe go gaw, ɗege ɓyare vin̰a ge dol ne digi. Ɗaŋɗe, Yahuɗ ma ɗege oy digi go: Kaɗɗa mo dol ne digi, mo be Sezar kondore ne to. Ndu ge diige ge jan zum waŋ go: Mbi gan ga̰a̰l ne, kale zuɗ na pagal zum gaw kee ho̰o̰l ge Sezar. 13Guwa̰ ge Pilaɗ za̰a̰ fare mbe ma go gaw, gene Zeso ya zum, ne sḛ kaɗ na pe ge kaŋ kaɗ pe ge sok kun sariya ge àa tol ne Tandal go, ndwa go Gabata ge wa hebre.

14Ajo̰o̰ na kaa dwam nuusi ta ge vḛḛso ge Paska ne pe ne, sok ge gyala yin̰a guwa ge pɔgwa taɗ, Pilaɗ jan Yahuɗ ma go: Nà, ḛ gan ga̰a̰l no! 15Ɗaŋɗe, àa gwan ka oyya digi go: Hṵṵ ne! Hṵṵ ne! Pee ne! Pilaɗ ele num go: Ḛ ɓyare go mbi pee ḛ gan ga̰a̰l ge ɔwara kaŋre ta digi ya? Ga̰a̰l ge nda ge kee tuwaleya ma way ma gwan ge ne janna go: I gan ga̰a̰l ge ɗogle to, a Sezar ɗu kikiɗ. 16Sok mbe go, Pilaɗ ɓyan num Zeso ndwa go num mbo pel ne ɔwara kaŋre ta digi. Asagar ma wan Zeso, [àa mbo ge ne me.]

Asagar ma pel Zeso ge ɔwara kaŋre ta

Mat 27.32-52; Mrk 15.21-37; Luk 23.26-46

17Ge sok mbe go, Zeso sḛ ḭḭ na kaŋre ne ge suwal ga̰a̰l diŋ ya, mbo ge sok ge àa tol ne Pagal kal yà, ge ne dḭḭl no wa hebre go: Golgota. 18A ge sok mbe go, asagar ma pee ne ge ɔwara kaŋre ta digi no. Àa pee nda ge ɗogle ma no zi waɗme ge ɔwara kaŋre ta digi, ge Zeso ne kaɗ ge tuwal zì. 19Pilaɗ gwan hoɗ na wa go, àa ca byalga ɗu, àa njaŋe kaŋ ne ta, àa habe ne ge ɔwara kaŋre ta digi. Kaŋ ge njaŋe ne ta mbe isi go: Zeso ge suwal Nazareɗ ne, gan ga̰a̰l ge Yahuɗ ma way. 20Ajo̰o̰ sok ge àa pee Zeso kaa guwa ge suwal ga̰a̰l ɗe, Yahuɗ ma gḛḛ ka isi kaŋ mbe, ge dape, njaŋe wa ma hini-hini pe taa: Wa hebre, wa latḛ, wa grek me. 21Ga̰a̰l ge nda ge kee tuwaleya ma way ma jan Pilaɗ go: Mo njaŋe daa go: Gan ga̰a̰l ge Yahuɗ ma way to. Mo njaŋe go, ndu mbe sḛ jin̰a ne go: Mbi gan ga̰a̰l ge Yahuɗ ma way ne. 22Pilaɗ gwan ge num janna go: Kaŋ ge mbi njaŋe ne yà mbe no, gul to.

23Sok ge asagar ma tok aa ge Zeso pella go, àa ɔwabe ne ba̰a̰ ma, àa vaa num se pe ndà, ndu ge diige seɗ na ne ndwa. Àa ɔwabe ne ba̰a̰ kanna ge pul zige waɗme, ge àa zô ne zoo ge digi ɗiŋ mbo se, be ne sok a̰me yaaya ɗu to, 24àa ka jan ta ta buwal zì go: Ge go nè taabe ne se ɗe, ɓyare go nè ee daŋ ndwa kuwaya go ne deɗ mà huɗi de. A go mbe no, fare ge no Njaŋeya ge Dok ne zì ma wa huy no go: «Àa vaa ta mbi ba̰a̰ ma, àa ee mbi ba̰a̰ kanna ge pul zige daŋ no me.»#Mkm 22.9. Ano, a kaŋ ge asagar ma kee nee ne.

25Zeso na̰, ne na̰ na̰ van ge gwale, Mari ge Klopas gwale mage Mari ge suwal Magdala kaa mḛḛya ge kaŋre ge Zeso ne ta guwa. 26Zeso sok ge kuwa na na̰, kuwa ndu ge ame hateya ge na laa wa̰a̰ ne mḛḛya ne ziya, jan na na̰ go: Na̰a̰, ndi ne ge mo van go. 27Guwa̰, jan ndu ge ame hateya mbe go: Ndi ne ge mo na̰ go me. Ge sok mbe ya day, ndu ge ame hateya mbe wan ne na diŋ yà.

Swày ge Zeso ne

28Ge ano mbe guwa̰, ajo̰o̰ Zeso kaa ge kuwaya go na kee kaŋ ge na mbiya kee num ma ya peɗ ɗe, ge go fare ge no Njaŋeya ge Dok ne zì wa huy ɗe, jan go: Mam njuwal kee mbi go. 29Ge sok mbe ta guwa, kṵṵri wa ya huyya ge on̰or jìn̰al ge haɗ-ɗa ka̰a̰mal. Asagar ma hee chifo̰, àa paa ne jìn̰al mbe pagal, àa tyal ne ge sugu ge àa tol ne hizop wa zì, àa tare ne ge Zeso wa zì yà. 30Sok ge Zeso suwa̰me ne go, uɗi ne yà, jan go: Fare ma wa huy ya go peɗ. Guwa̰, cwage na pagal se, n̰a na on̰om ndageya.

Asagar a̰me ɗu tṵṵ Zeso ziya zì ge ran̰

31Ajo̰o̰ na kaa dwam nuusi ta ge vḛḛso sabaɗ pe ne ɗe, Yahuɗ ma ga̰a̰l ma be ɓyare go nda ge àa pee num ma duul gaa ge ɔwara kaŋre ta digi dwam sabaɗ go to. Zane no, sabaɗ mbe no kaa dwam ge walay nde ne. Àa mbo Pilaɗ ta yà, àa ele ne go: Mà kaɗ ge mo hon vin̰a ge àa haa nda mbe ma ko ma gezi, àa ndage num duul mbe ma ya se nde me de. 32Sok mbe go, asagar ma mbo ya ge nda ge àa pee num dagre ge Zeso ma ta, àa hal ge ɗu ko ma, àa kee gegene mbe go me. 33Sok ge àa dee ya ge Zeso ta, àa kuwa go ne suu ya go, àa be daa gwan hal ne ko ma to. 34Ɗaŋɗe, asagar a̰me ɗu tun Zeso ne ziya zì ge ran̰. Swàm mage mam kale ɓul-la se gaw. 35Ndu ge kee sayda ge fare mbe ma way kuwa num ge na ndwa, ne fare mbe ge jin̰a, a fare ge fareba ne. Ne sḛ kuwa kuwa go na jan fare ge fareba. Jan num ndwa go ḛ sḛ ma waɗme, ḛ ho fareba. 36Ago fare mbe dee ya keeya ndwa go, fare ge no Njaŋeya ge Dok ne zì wa huy go: «Àa mbo hal ne kal a̰me ɗu to.»#Waz 12.46; Iiv 9.12. 37Njaŋeya ge Dok ne sok a̰me jan zì go: «Àa mbo seŋe ndwa ndil ndu ge maa tṵṵ ne ge ran̰ ne ziya zì.»#Zak 12.10.

Mbulla ge Zeso ne

Mat 27.57-61; Mrk 15.42-47; Luk 23.50-56

38Ge ano mbe guwa̰, Jozef ge suwal Arimate ne mbo Pilaɗ ta yà, ele ne go, na mà seɗ vin̰a ge hee Zeso duul swày mbo mbulla nde de. Jozef kaa ndu ge ame hateya ge Zeso nee ne, ɗaŋɗe, be kee ndu ne kuwaya to, ge dape, ka chiya Yahuɗ ma voo. Pilaɗ hon ne vin̰a, mbo hee duul mbe. 39Nikodem ge dee mbo ya wal Zeso ta ɗaal zì, mbo ya waɗme, gene idiir ge àa tol num mir mage alowes kirgiya ya kilo tapool ɗu. 40Nda ge zi mbe ma mbeɗe Zeso duul, àa taa ne ge ba̰a̰ pakta ge lɔgwa lalan̰ zì, àa suusi idiir ge huu tii mbe ma ne ta me. Àa kee ne ge mojo̰o̰ Yahuɗ ma nuusi duul swày mbo mbulla go. 41Gaaso a̰me kaa guwa ge sok ge àa pee Zeso ne go. Ge ne zì, njal pṵṵl ge mbul ta a̰me ge jin̰al ge àa gale mbuu ndu ne zì ɗu to kaa. 42Ajo̰o̰ ne kaa Yahuɗ ma dwam nuusi ta ge sabaɗ pe ne ɗe, àa ee ne duul swày ge njal pṵṵl ge mbul ta mbe zì, ge dape kaa num ziya guwa.

Iliyochaguliwa sasa

Yohana 19: kiaGRB

Kuonyesha

Shirikisha

Nakili