Yohana 17

Zeso kee kaɗeya ge na sḛ pe

Heb 7.24-28; 4.14-16

1Guwa̰ ge Zeso wa aa ge sok jan na nda ge ame hateya ma fare mbe ma go, hee na ndwa pḭḭ digi kee kaɗeya, jan go: Baa, mbi dwam ma mbyaɗ-ɗa go, ngay nda go mbi ge mo Van me ɗe, mbi pate pate, ndwa go, mbi ge mo Van, mbi ngay nda waɗme go mo pate pate. 2Mo ho̰ mbi pool ne, ge nda duwana ma pagal, ndwa go mbi ho̰ nda ge mo ho̰ num koyya mbi tok go ma peɗ ndwa ge ɗiŋ ge din. 3Fare ge ee nda seɗ ndwa ge ɗiŋ ge din mbe ɗe, ago num kuwa mo, mo Dok ge fareba ɗeŋew, Zeso Krist, ndu ge mo teme ne ya me. 4Mbi ngay pateya ge amo ya zum suwa pagal, sok huy tèmel ge mo ho̰ mbi ne keeya wa go. 5Ge sego, Baa, ee mbi seɗ pateya ge mo ta yà, pateya mbe ge mbi dee kaa ge ne, sok ge mo gale wa ya be kee pḭḭ mage suwa go.

Zeso kaɗe ge na nda ge num no na ta ge sego ma pe

6Zeso sok kee kaɗeya go, jan go: Nda ge mo ho̰ mbi num koyya mbi tok go, ge nda ge dunin̰a zige ma buwal zì ya ma, mbi kee mo ya kuwaya ge num ta. Àa kaa amo ma ne, mo ho̰ mbi num no. Àa guwa̰ maa pagal ge fare ge amo ma pe se no me. 7Ge sego, àa kuwa ya go kaŋ ge mo ho̰ mbi num ma peɗ mbo ge mo ta ya. 8Ago mbi jan num fare ge mo jin̰a mbi num ma ya go, àa ame num no me. Àa kuwa ya tyatyaɗ go mbi mbo ge mo ta ya, àa ho fareba no go, mo teme mbi ya ne me. 9A ge num pe mbi kaɗe mo ta no. Mbi kaɗe mo ge nda ge dunin̰a zum ma pe to, ɗaŋɗe, ge num ge mo ho̰ mbi num ma pe, ge dape, àa amo ma ne. 10Mbi nda mbe ma no peɗ, àa amo ma ne, mo nda ma peɗ, àa ambi ma ne me. Nda kuwa pateya ge ambi zum ge num ta. 11Ge sego mbi gwan mbo mo ta yà, zḛḛ ta fyalag, mbi mbo daa kaɗ dunin̰a zì to baɗ, ɗaŋɗe, num sḛ ma gale go dunin̰a zì. Dok ba ge Harcal, koy num ge pool ge amo ta, pool mbe ge mo ho̰ mbi ne. Go mbe no, àa mbo kaɗ ɗu dinna ge nè ge mo no ɗu go. 12Sok ge mbi kaa ge num, mbi ka koy num ge pool ge amo ta, pool mbe ge mo ho̰ mbi ne. Mbi cage num, ndu a̰me ɗu ge num buwal zige be ban to, ɗeŋew ndu ge taa vin̰a ge banna ne. Ano mbe ma dee ya keeya ndwa go fare ge no Njaŋeya ge Dok ne zì wa huy. 13Ge sego, mbi gwan mbo mo ta yà, mbi jan fare mbe ma ge mbi gale no dunin̰a zì pe, ndwa go num kee laa saal huyya tab ge mojo̰o̰ mbi kee no go. 14Mbi jan num fare ge mo jin̰a mbi ne ya go, a ge pe, nda ge dunin̰a ne ma laa ɓyare num to no, ge dape, àa be num way ma ne to, dinna ge mbi no num way to go me. 15Mbi kaɗeya no ɗe, ago mo ɔwabe num ge dunin̰a zì to, ɗaŋɗe, mo koy num ge Ba ge zwam ta. 16Àa be ge dunin̰a ne ma ne to, dinna ge mbi no ndu ge dunin̰a ne to go. 17Mbege num gezi ge mo pe, ge mo fareba ta. Mo fare, a fare ge fareba ne. 18Dinna ge mo teme mbi ya dunin̰a zì go, mbi waɗme, mbi teme num dunin̰a zì. 19Mbi ho̰ tene mo ge ɓul mɔɗwag ge num pe, ndwa go num sḛ ma kaa mbegeya ge mo pe waɗme, ge fareba ge amo ta.

Zeso kaɗe ge nda ge mbo hoɗ fareba ya na ta ma pe

20Mbi kaɗe ge mbi nda ge ame hateya ge no mbi ta ma pe ɗeŋew to, ɗaŋɗe, ge num ge mbo hoɗ fareba ya mbi ta ma pe waɗme, ge fare ge ndage no ge num wa zì pe. 21Mbi kaɗe go num kaa ɓanna ge ndu ɗu go dinna ge mo, mbi Ba, nè ɓa̰a̰ no ge ndu ɗu go me. Ɓyare go i ge num kaa ɓanna ge ndu ɗu go waɗme, ndwa go nda ge dunin̰a zì ma wa hoɗ fareba go, mo teme mbi ya ne. 22Mbi ee num ya seɗ pateya ge mo ee mbi seɗ ne pe, ndwa go num wa kaɗ ɓanna ge ndu ɗu go dinna ge nè ge mo ɓa̰a̰ no ge ndu ɗu go me. 23Mbi go dagre ge num, dinna ge mo no dagre ge mbi go. Go mbe no, àa mbo kaɗ ɓanna digi fareba ge ndu ɗu go, ndwa go nda ge dunin̰a zì ma wa kuwa go mo teme mbi ya ne, mo laa wa̰a̰ num wan ge mo laa wa̰a̰ mbi go me. 24Baa, mbi ɓyare go nda ge mo ho̰ mbi num ma kaa dagre ge mbi, ge sok ge mbi mbo kàɗ-ɗa ne go, ndwa go num wa kuwa pateya ge ambi. Pateya mbe ge mo ho̰ mbi ne, ge dape, mo laa wa̰a̰ mbi zḛḛ ge go mo ke pḭḭ mage suwa. 25Ba ge temel, nda ge dunin̰a zì ma be kuwa mo to, ɗaŋɗe, mbi kuwa mo kuwa, num mbe ma deɗ ja kuwaya go ne mo teme mbi ya ne. 26Mbi ee num ya kuwa mo, mbi mbo gwan kee ne iya, ndwa go laa wanna ge mo ngay ne ya mbi ta, ne kaa ngayya num ta waɗme, mbi me, mbi mbo kaɗ dagre ge num.

Iliyochaguliwa sasa

Yohana 17: kiaGRB

Kuonyesha

Shirikisha

Nakili