Tèmel keeya 6

Talla ge nda ge mbaa tèmel ma way

1Ge sok mbe go, ajo̰o̰ nda ge ame hateya ma zuli ya se, Yahuɗ ge faa wa Grek ma ɗege ge ho̰o̰l ge Yahuɗ ge faa maa wa hebre ma ta, ge dape, àa ka ndil num nda zaab ge kumu ma solom, dwam ma pagal tatab, ge sok vaa kaŋ zam go. 2Nda ge temeya ge wol pɔgwa zi ma tol ɓase ge ame hateya ma ya se mɔɗwag, àa jan num go: Be kee kwaɗa go, i n̰a fare ge Dok ne be oyya ge kaŋ zam vaaya pe to. 3Na̰ van ma, ke kwaɗa vare zoo go, ḛ tuwa nda ɓỳala ge ḛ buwal zì, nda ge àa dore num ma, ge andaŋ ma, ge On̰om ge Dok ne kee tèmel no ge num zì ma, i wa hon num tèmel mbe no keeya. 4Keeya mbe go ɗe, i mbo foge digi, i gaa hon ta ge tèmel ge kaɗeya mage fare oyya ne pe.

5Ɓase ma vin fare mbe. Àa tal Etiyen ndu ge ho fareba mbyaɗɗa tab, ge kee tèmel no ge On̰om ge Harcal pagal, ɓanna ge Filib, ge Prokor, ge Nikanor, ge Timon, ge Parmenas, ge Nikola me, van ge suwal Antiyoch ne, ge ho fareba ge Dok ge Yahuɗ ma way ta. 6Àa mbo ge num ya ge nda ge temeya ma ta. Nda ge temeya ma kee kaɗeya ge num, àa ee maa tok ma ge num pagal.

7Fare ge Dok ne ka dasare se, nda ge ame hateya ma ka zuli se ge suwal Jerusalem diŋ, nda ge kee tuwaleya ma gḛḛ deɗ-ɗa hoɗ fareba me.

Wanna ge Etiyen ne

8Etiyen, ndu ge àa ee maa tok ma ge ne pagal sok kee kaɗeya go, kaa pool gḛḛ ge kwaɗa keeya ge Dok ne ta, ka ee ne kee kaŋ ajab mage kaŋ haŋle ge ɓaŋlaŋ ma ge ɓase ma buwal zì. 9Ge sok mbe go, nda a̰me ma mbo ge zok kee kaɗeya ge Yahuɗ ma way zì yà, ge àa tol ne go, zok kee kwateya ge moor ge gaa ya suli ma way, àa mḛḛ piliya ge ne. Ge num buwal zì, Yahuɗ a̰me ma mbo ge suwal Siren mage Alekzandri ya, gegene ma mbo ge suwal Silisi mage sok ge Azi ne ma ya me. Àa ɗege pee ta ge ne. 10Ɗaŋɗe, àa seɗ fare ge janna ge ne wa byalam go to, ge dape, ne fare janna ma kaa fare janna ge andaŋ ma ne, ka jan num ge pool ge On̰om ge Dok ne, ge ho̰ na ne ta. 11Ge sok mbe go, àa lwaɗe nda a̰me ma wa, àa waɗ fare ge num zì ndwa go num mbo jan ge ɓase yà go: I za̰a̰ ne jan fare ge sone kakatag ge Moyiz mage Dok pagal. 12Àa tun ɓase ma, ge ga̰a̰l ge ɗeme num mage nda ge hate eeya ge Moyiz ne ma digi. Ge sok mbe go, àa mbo wan Etiyen ya, àa gene ne ya ge Yahuɗ ma ga̰a̰l ge kun sariya ma ndwa se. 13Àa gene nda ge kee sayda ge hày ma ya, àa ka janna go: Ndu mbe no kaɗ ge fare janna ge sone kakatag ma ɗaɗag ge zok ge Dok ne ge harcal mage eeya ge Moyiz ne ma pagal. 14Ago, i za̰a̰ ne wa janna go: Zeso ge suwal Nazareɗ ne, mbo gul zok ge Dok ne mbe no se, mbo eya kaŋ keeya ge nè baŋ ma way ge Moyiz n̰a nè num ma waɗme. 15Nda ge kaa ge zok yuwaleya zì ma peɗ, àa ee ndwa ya ge Etiyen ta, àa kuwa ne diir eyaya ge mojo̰o̰ malayka go.

Iliyochaguliwa sasa

Tèmel keeya 6: kiaGRB

Kuonyesha

Shirikisha

Nakili