Tèmel keeya 5

Ananiyas mage na gwale Safira

1Ɗaŋɗe, ndu son a̰me ɗu ge àa ka tol ne Ananiyas ɓanna ge na gwale Safira, àa za̰a̰ ta go maa yiya maa sok a̰me gezi. 2Za̰a̰ tene ge na gwale, caɗe bware gezi nde, ge gaa, gene ne ya ge nda ge temeya ma ndwa se. 3Piyer jan ne go: Ananiyas, mo daa ho̰ Saytan vin̰a ge lase mo gyana, wa ee mo kun On̰om ge Harcal hày, ɗiŋ mo wa caɗe bware ge mo gaaso ne lee ɗu gezi yà de? 4Gaaso mbe amo ne, mo daa ɓyare yaɗ ne gezi to puy, mo ge pool koy ne, koo ge mo vḭḭ tene yaɗ ne gezi no puy, mo ge pool ge koy ne bware mbe ge tene pe. Ge dape, mo wa vin tene kee ano mbe no de? Mo be kun hày nda duwana ma to, mo kṵṵ hày Dok. 5Sok ge Ananiyas za̰a̰ fare mbe ma go peɗ, mbeɗe, deɗ, suu. Voo ge ɓaŋlaŋ mbo ya wan nda ge kaa sok mbe go ma peɗ. 6Nda ge bogol ma mbo ya, àa taa ne ge ba̰a̰ mbul ta zì, àa in ne mbo mbulla me.

7Ler taa guwa̰ swày ge ne obe ne go, ne gwale waɗ-ɗa ge sok ge Piyer ma kaa no ge ne go, be wan kaŋ ge kê ge na ndwa zḛḛ pe to. 8Piyer ele ne go: Jin̰a mbi gale, a ge yee mbe no pagal, ḛ yiya ḛ gaaso mbe gezi no de? Gwan ge ne vinna go: O̰o̰ a yee mbe ne. 9Sok mbe go, Piyer jan ne go: Ḛ daa za̰a̰ ta gyana kun On̰om ge Bagezok ne hày de? Za̰a̰ gale, bogol ge mbo mbul mo obe ma yan ja ge zok wa go no, àa mà in mo mbo mbulla mbe go waɗme.

10Ge sok mbe go waɗ, mbeɗe ge ndu ge temeya ndwa go, deɗ se, suu me. Sok ge bogol ma wuwa ge Piyer ta zì yà, àa seɗ ne suu ya, àa in ne mbo mbulla ge na obe ziya yà. 11Voo ge ɓaŋlaŋ mbo ya wan ɓase ge Krist ne ma peɗ, ge nda ge ɗogle ma peɗ ge za̰a̰ fare mbe ma me.

Kaŋ ajab mage kaŋ ngayya ge ka keeya ma

12 Nda ge temeya ma ka kee kaŋ ngayya mage kaŋ ajab ma gḛḛ ge ɓase ma buwal zì. Nda ge ho fareba ma peɗ, àa ka seɗ ta kee kwateya ge pag wa ge àa tol ne pag wa ge Salomo̰ ne zì. 13Ndu a̰me go ɗu ge nda ge ɗogle ma buwal zì ya be mbo ya ɓan tene ge num to. Ɗaŋɗe, ɓase ma ka dore kaŋ keeya ge num way ma gḛḛ nde. 14Ɓase ma, nda soɗob ge nda zaab, ge ho fareba ge Bagezok ta jin̰al ma, ka kan-na ge wal ma pagal. 15Àa ka gene nda ge ka kee tuguɗi ma ya fiiya ge saŋal mage daŋ ma go, ee ya ge vin̰a kin̰a ma go, ndwa go, sok ge Piyer mà ɗege ya kaleya, ɓyare go, ne gḭḭl kale ge nda a̰me ma pagal. 16Nda ge no ge suwal ga̰a̰l Jerusalem ziya ma ka mbo ya gḛḛ-gḛḛ ge maa nda ge kee tuguɗi ma, ɓanna ge maa nda ge no ge on̰om ge sone maa zì ma, àa peɗ ka seɗ zonna me.

Wanna ge ndwa zi ge nda ge temeya ma way ge daŋay zì

17Ge sok mbe go, yil mbo ya waɗ ge ga̰a̰l ge nda ge kee tuwaleya ma way ge waɗe mage nda ge ne pe go ge ma zì peɗ, ndwa go saduki ma, àa ɗege digi ge ho̰o̰l ɓal. 18Àa mbo ya wan nda ge temeya ma, àa kan num ge zok daŋay zì. 19Sok yan ɗaal, malayka ge Bagezok ne mbo ya hage zok daŋay wa ma gezi, kan num ya zum, jan num go: 20Ḛ mbo ge zok ge Dok ne zì, ḛ mbo oy fare ge hon nda ndwa ge jin̰al ne ma peɗ, ge ɓase ma ta. 21Sok ge àa za̰a̰ ne go, àa ɗege aaram pe vḛḛ mbo ge zok ge Dok ne zì yà, àa ɗege hate nda fare me.

Ga̰a̰l ge nda ge kee tuwaleya ma way ge waɗe ɓanna ge nda ge na pe go ge ma, tol Yahuɗ ma ga̰a̰l ge kun sariya mage ga̰a̰l ge ɗeme ɓase ge Izrayel van ma way ma se peɗ, àa seɗ ta kee kwateya ge ga̰a̰l. Àa hoɗ maa wa go, àa gene nda ge temeya ma ya ge maa ndwa se. 22Sok ge asagar ge mbo tèmel ma dee yà, àa seɗ num ge zok daŋay zì to. Àa gwan-na ge maa ga̰a̰l ma ta, àa wan num fare pe go: 23Sok ge i dee yà, i see zok daŋay wa ma dibiya ɓeɓereɗ, asagar ma kaɗ mḛḛya ge zok wa ma go, ɗaŋɗe, guwa̰ ge i hage zok wa ma se go, i be seɗ ndu a̰me zì ɗu to.

24Sok ge ga̰a̰l ge nda ge koy zok ge Dok ne wa ma way ɓanna ge ga̰a̰l ge nda ge kee tuwaleya ma way ma za̰a̰ fare mbe go, num pagal mbo ya banna ge fare ge see nda ge temeya ma pe. Àa ele ta go, fare mbe pe wanna gyana de. 25Guwa̰, ndu a̰me mbo ya ge num ta zì jan num go: Ge sego, nda mbe ge ḛ ka̰a̰ num ge daŋay zì ma, àa hate ɓase ma ge zok ge Dok ne zì yà. 26Ge sok mbe go, ga̰a̰l ge koy zok ge Dok ne wa ɓanna ge na nda ma, mbo wan nda ge temeya ma ya be kee num a̰me. Àa ka chiya ɓase ma voo, ge dape, num mà haɗ mbal maa ge njal. 27Sok ge àa gene num ya ge Yahuɗ ma ga̰a̰l ge kun sariya ma ndwa se, ga̰a̰l ge nda ge kee tuwaleya ma way ge waɗe hee fare, ele num go: 28I ho ḛ i wa ndaa kaka go, ḛ daa hate nda fare ge ndu mbe dḭḭl to. Ndi, ḛ gwan dasare fare mbe ya se ge Jerusalem diŋ peɗ me. Ḛ ɓyare go swàm ge ndu mbe ne kaa ge i pagal de?

29Piyer mage na ka̰a̰m ge temeya gegene ma gwan ge num janna go: Nde-nde ge i gwan i pagal ge Dok pe se, ge go i gwan ne ge nda duwana ma pe se. 30Zeso mbe ge ḛ pee ne ge ɔwara kaŋre ta, ḛ hṵṵ ne no, Dok ge nè baŋ ma way, 31ta̰a̰ ne no, ee ne ge na tok matoson pagal no, ge mojo̰o̰ gan ga̰a̰l ge gan ga̰a̰l ma way mage Ba ge monna no go. Kê ano mbe ndwa go, Izrayel van ma see vin̰a ge seŋe ta ya se, num see poreya ge sone ge maa way ma pe me. 32I jan fare ge i kuwa num ge i ndwa ma, On̰om ge Harcal ge Dok ho̰ nda ge gwan maa pagal ge na pe se ma ngay num fare mbe ma go waɗme.

33Sok ge ga̰a̰l ge Yahuɗ ma way ge kun sariya ma za̰a̰ num fare mbe ma go gaw, twam mbo ya ceŋe num, àa ɓyare vin̰a ge hun num gezi. 34Ɗaŋɗe, ge num buwal zì, Farisi a̰me ɗu, ge àa tol ne Gamaliyel, ndu ge hate eeya ge Moyiz ne, ge Izrayel van ma peɗ hon ne hormo, ɗege digi ge na ka̰a̰m ge ga̰a̰l ma buwal zì, hoɗ na wa go, àa n̰a nda ge temeya ma waɗ zum gale. 35Guwa̰, jan num go: Ḛ Izrayel van ma, ḛ ke maam ge kaŋ ge ḛ ɓyare kee ge nda mbe ma no. 36Ago, gale be kee kaal to, ndu a̰me ɗu ge àa ka tol ne Tedas, ge ka ndil tene go na ndu a̰me ge ciciliŋ ne, mbo ya muwa̰le nda guwa ge kikis ndà ge na pe go no, guwa̰, see swày no. Nda ge muwa̰le num ge na pe go ma peɗ, àa ɓasare se no, ne fare mbe tḭḭli gezi yà bàŋ no. 37Ge ne guwa̰ go, ge sok ge àa ka njaŋe nda dḭḭl ndwa isi nda go, ndu a̰me ɗu ge suwal Galile ne, ge àa tol ne Yudas, mbo ya muwa̰le nda ɓase ge na pe go no. Ɗaŋɗe, ne sḛ see swày no waɗme, ne nda ge muwa̰le num ge na pe go ma peɗ ɓasare se no. 38Ge sego, mbi jan go, ḛ ka̰a̰ ḛ tok digi ge nda mbe ma ta, ḛ n̰a num mboya. Kaɗɗa nuusiya mage fare keeya ge num way mbe ma no, mbo ge nda duwana ma ta, àa mbo mbo pe yà to. 39Ɗaŋɗe, kaɗɗa go na mbo ge Dok ta ya, ḛ ge pool ge mbyaɗ tele num to. Ḛ ke maam, ne kaa ge ḛ ke ho̰o̰l ge kaŋ ge Dok ɓyare keeya to. Ga̰a̰l ge ɗeme Izrayel van ma vin ne fare mbe.

40Àa gwan ge nda ge temeya ma ya zì, àa ee asagar ma iyal num ge calaŋ, àa hoɗ num maa wa go, num daa gwan jan nda fare ge Zeso dḭḭl to. Guwa̰, àa n̰a num mboya. 41Sok ge nda ge temeya ma wuwa ge zok kun sariya zì ya zum, àa kee laa saal gḛḛ, ge Dok vḭḭ go, maa see lasageya ge dḭḭl ge Zeso ne pe. 42Dwam ma pagal tatab, àa ka hate nda mage oy Fare ge Kwaɗa ge Zeso ne ɗaɗag, ge zok ge Dok ne zì, ge zok ma diŋ me go, ne Krist, ndu ge Dok taa nee ne.

Iliyochaguliwa sasa

Tèmel keeya 5: kiaGRB

Kuonyesha

Shirikisha

Nakili