Tèmel keeya 13
13
Temeya ge Barnabas mage Sol ne
1Ge ɓase ge Krist ne ge suwal Antiyoch diŋ-ge ma buwal zì, nda ge zwagre Dok wa mage nda ge hate nda ma kaa: Barnabas, Simeyo̰ ge àa tol ne go Ndu ge pisil, Lukiyus ndu ge suwal Siren ne. Manayḛ ge gan ga̰a̰l Heroɗ kondore wa kag, ge a ge ne wuwa dagre, Sol me. 2Dwam a̰me go ɗu, sok ge àa see ta uware Bagezok Dok mage wan mam njuwal go, On̰om ge Harcal mbo ya jan num go: Ḛ mbege mbi Barnabas mage Sol gezi caɗ, ge tèmel ge mbi too num ya ge ne pe keeya. 3Guwa̰ ge àa wa̰a̰ mam njuwal mage kee kaɗeya go, àa ee maa tok ma ge num pagal, àa n̰a num mboya.
Barnabas mage Sol ge Til Chipr zì
4Nda ge On̰om ge Harcal teme num ya ma, ndwa go Barnabas mage Sol, àa deɗ-ɗa ge suwal Selesi go, ge sok mbe go, àa ndee ge baaburi ge mam se ge go, mbo ge til Chipr yà. 5Sok ge àa dee ge suwal Salamin diŋ yà, àa ee pe oy fare ge Dok ne ge zok kee kaɗeya ge Yahuɗ ma way ma zì. Yohana Mark kaa ndu ge in num galam.
6Guwa̰, Barnabas mage Sol gaa mboya maa ndwa zḛḛ ɗiŋ, àa deɗ-ɗa ge suwal ga̰a̰l Pafos ge til Chipr mbe ne diŋ. Àa seɗ Yahuɗ a̰me ɗu, ge kee mbole ge àa tol ne dḭḭl go Bar-Zeso, ge kee tene go, na ndu ge zwagre Dok wa ne. 7Ne sḛ kaa ge Sergiyus Polus, goformo̰ ge til Chipr ne diŋ. Goformo̰ kaa ndu ge andaŋ ne, ee tèmel mbo tol Barnabas mage Sol ya, ge dape, kaa ge ene gḛḛ, ge za̰a̰ fare ge Dok ne. 8Ɗaŋɗe, Bar-Zeso ge àa tol ne waɗme go Elimas, ndu ge kee mbole, ka mḛḛ piliya ge num, ka ɓyare vin̰a ge vḛḛne num fare mbe ge Goformo̰ ndwa zì, ndwa go ne ho fareba ge num fare janna mbe ma ta to. 9Ge sok mbe go, Sol ge àa tol ne Pol waɗme, ge On̰om ge Harcal biri ne, dol na ndwa ge Elimas ndwa zì, 10jan ne go: Mo ge kee Ba ge ho̰o̰l moor, mo kaa ge hày pe kunna, mo kaa ge nda pe laseya, mo ho̰o̰l ge kaŋ ge go maa kwaɗa ma peɗ. Dee ma̰ del, mo wa n̰a be batame laa ɓyareya ge Bagezok ne ge temel de? 11Ge sego, mo zwal twam ge Bagezok ne ja ge mo pagal, mo ndwa ma gaa dame-dame, mo mbo gwan kuwa sok daa to, ɗiŋ fare ge ɗogle dun ne mbḛḛ. Ge sok mbe go gaw, sok mbo ya sibi se ge ne ndwa zì, gaa kàɗɗa dàma, ka dol na tok lee gene me-lee gene me, ndwa go na see ndu ge wan na tok. 12Sok ge goformo̰ kuwa kaŋ mbe ma keeya go, mbo ya kee ajab ge fare hateya ge Bagezok ne pagal. Ge sok mbe go, hoɗ fareba.
Barnabas mage Sol ge suwa ge Pisidi ne go,ge ne suwal ga̰a̰l Antiyoch diŋ
13Pol mage na ka̰a̰m ge maa ge num mbo sok ya ma, ndee baaburi ge mam se ge go, ge Pafos go mbo ge suwal Perg ge no ge suwa ge Pamfili ne yà. Sok ge àa dee yà, Yohana Mark swaɗ num, gwan mbo Jerusalem. 14Nda ge gaa ma ɗege ge Perg go, àa deɗ-ɗa ge suwal Antiyoch diŋ, ge suwa ge Pisidi ne go. Àa waɗ ge zok kee kaɗeya ge Yahuɗ ma way zì, ge dwam sabaɗ go, àa kaɗ se kee kwateya ge num. 15Guwa̰ ge àa isi fare ge maktub ge eeya mage maktub ge nda ge zwagre Dok wa ma way go, ga̰a̰l ge zok kee kaɗeya ge Yahuɗ ma way ma jan Pol mage Barnabas go: «Na̰ van ma, kaɗɗa fare ge ḛ mbiya moɗege ɓase ma go, fare gaa ḛ tok go.» 16Pol ɗege digi, kee num na tok ndwa go num zane, guwa̰, jan num go: «Na̰ van Izrayel ma, ḛ ge chiya Dok voo ma, ḛ za̰a̰ mbi. 17Dok ge pe rusu ge Izrayel ne, taa nè baŋ ma ne, ee num zuli ta se ge suwa Ejypt, ge àa kaa gɔswal ne go no. Guwa̰, ɔwabe num ge suwal mbe diŋ ya zum no, ge pool ge na ne ge ɓaŋlaŋ ta. 18Ge sok mboya ge num way ge babur pul go, ḭḭ tene ge num no ɗiŋ del warndà ta guwa. 19Guwa̰ ge burmi rusu ge ɗogle ma pe ɓỳala ge suwa ge Kana ne go gezi, ho̰ nè baŋ ma num suwa mbe joo no, 20àa gaa kàɗɗa ne go no ɗiŋ guwa ge del kikis ndà ge ziya warnuwan̰.
«Guwa̰, Dok mbo ya ee nda ge kun sariya ma kaɗ ga̰a̰l ge num pagal no, ɗiŋ deɗ-ɗa ge ndu ge zwagre Dok wa Samiyel ta. 21Nè baŋ ma mbo ya ele Dok no go, ne ho̰ maa gan ga̰a̰l a̰me ɗu. Sok ge àa ele ne mbe go ɗe, ho̰ num Sol ge Kis van no, ge no pe rusu ge Benjamḛ ne zì. Ke ge hòol gan pagal no del warndà. 22Guwa̰ ge Dok ndage ne gezi go, eya ne ge Daviɗ no, jin̰a fare ge Daviɗ pe no go: “Jese van ge àa tol ne Daviɗ, a ndu ge mbi see go, ne fare kwaɗa ge mbi ndwa zì ne, ne sḛ mbo kee kaŋ ge mbi laa ɓyare num ma ne peɗ.”#1Sa 13.14; Mkm 89.21. 23Ge pe rusu ge Daviɗ ne zì, ge wa tii ge Dok kê pagal, pate Zeso no, ne kaa Ba ge mon Izrayel van ma. 24Zḛḛ ge go Zeso mbo ya, Yohana ba ge kee nda baptem oy fare ge Izrayel van ma ta go: Ḛ mbo ya kee baptem ge ngay go ḛ seŋe ta ja se ge Dok ta. 25Sok ge dee ya na tèmel ma wa aaya go, ka janna go: “Mbi be ndu ge ḛ ee ḛ dwaɗɗa ma no ge ne pagal ne to. Ɗaŋɗe, ne sḛ mbe ge mbo no ge mbi guwa̰ ya, a ne ge ḛ da̰a̰re nee ne, mbi be mbyaɗ ge fwage ne tyako ma ge ne ko zì to peɗ.”
26«Na̰ van ma, ḛ ge no ge pe rusu ge Abraham ne zì ma koo ḛ ge no ge voo ge Dok ne ḛ zì ma, fare janna ge monna mbe ne mbo ya ge nè pe. 27Ago, nda ge kaa ge suwal ga̰a̰l Jerusalem diŋ-ge ma ɓanna ge maa ga̰a̰l ma be kuwa go Zeso ne huɗi ne de to, koo àa wan fare janna ge nda ge zwagre Dok wa ma way, ge àa ka isi ne dwam sabaɗ go tatab pe to me. Ɗaŋɗe, àa zane huy fare janna ge maktub ne ma wa, àa wan ne ge sariya ge gene ne mbo swày no. 28Ajo̰o̰ àa be seɗ fare a̰me ge sone ge ee ne mbo swày to puy ɗe, àa kaɗe Pilaɗ no go, ne hṵṵ ne gezi. 29Sok ge àa huy kaŋ ge njaŋe no ge maktub ge Dok ne zì ge ne pe ma wa peɗ, àa fwage ne ge ɔwara kaŋre ta digi ya se no, àa mbuu ne no me. 30Ɗaŋɗe, Dok ta̰a̰ ne ge nda ge swày ma buwal zì no. 31Dwam ma gḛḛ, ka ngay tene ge nda ge ɗeme na ge Galile go mbo Jerusalem yà ma ta. Ge sego, num sḛ mbe ma gaa ne sayda ma ne ge ɓase ma ta. 32I sḛ ma waɗme, i wuwage ḛ Fare ge Kwaɗa mbe, ndwa go wa tii ge Dok kê nè baŋ ma ne.
33«Dok huy wa tii mbe ge nè ge num van ma ta, sok tan Zeso ge swày se, dinna ge a njaŋe no ge Maktub ge kaŋ mballa ma way zì, ne caɗeya zi zì go:
“Mo mbi Van ne,
Màno mbi gaa mo Ba ne.”#Mkm 2.7.
34«Dok ta̰a̰ ne ge nda ge swày ma buwal zì, mbo daa gwan suu to. A fare ge Dok dee jin̰a nee ne go:
“Mbi mbo hon ḛ kaŋ ge harcal ge mbi kê wa tii hon Daviɗ num ma,
Àa kaŋ ge mbiya ee ndu hoɗ fareba ma ne.”#Eza 55.3.
35«A ge pe, gwan jan ge sok ge ɗogle zì no go:
“Mo mbo n̰a mo ndu ge Harcal duul hubiya ge tugul swày se to.”#Mkm 16.10.
36«Ago, sok ge Daviɗ kaa ge na ndwa, kaa ndu ge tèmel ge Dok ne, ka kee ne laa ɓyareya ma, sok ge suu go, àa mbuu ne ge ne baŋ ma ziya, ne duul hubi ge tugul swày se no me. 37Ɗaŋɗe, ndu ge Dok ta̰a̰ ne ge nda ge swày ma buwal zì, ne duul be hubi to. 38Mbi na̰ van ma, ḛ kuwa ne kwaɗa: A ge Zeso mbe ta, àa wuwage ḛ poreya ge ḛ sone ma way no, 39ge dape, eeya ge Moyiz ne ma be mbyaɗ ge Dok ndil ḛ temel na ndwa se to. Ge ne ta, ndu ge diige ge hoɗ fareba ya, Dok ndil ne ge ndu ge temel go ge na ndwa se. 40Go no, ḛ kaa dàle to, ne kaa ge fare mbe ma see ḛ to, fare ge nda ge zwagre Dok wa ma dee jin̰a ḛ num ma go: 41Ḛ za̰a̰:
“Ḛ nda ge pagal ga̰a̰l ma,
Ḛ mbo kee ajab, ḛ burmi gezi me.
Ago mbi, mbi mbo kee kaŋ a̰me ge walay nde ge ḛ zaman go,
Kaɗɗa àa wa̰a̰ ḛ ne pe puy,
Ḛ mbyaɗ ge hoɗ fareba ge ne ta to.”»#Hab 1.5.
42Sok ge Sol mage Barnabas ɗege waɗ zum go, àa kaɗe num ge aa ta go, num guwa̰ ya hate maa ge fare mbe ma pagal ge dwam sabaɗ ge guwa̰ go ge go. 43Guwa̰ twageya ge num way go, Yahuɗ ma gḛḛ ɓanna ge pe rusu ge ɗogle ge ho fareba ge Dok ge Yahuɗ ma way ta ma, ka kàre Pol mage Barnabas pe. Pol mage Barnabas ka siɗigi fare ge num, àa ka moɗege num ndwa go, num wa̰a̰ maa tok ge Dok ge kuwa nda a̰se.
Fare oyya ge Pol mage Barnabas nege nda ge ho fareba to ma ta
44Dwam ge dwam sabaɗ ge guwa̰ go ge mbe mbiya, nda lee gḛḛ ge suwal ga̰a̰l diŋ-ge ma mbo ya za̰a̰ fare ge Bagezok Dok ne. 45Sok ge Yahuɗ ma kuwa go nda kwate ja gḛḛ, àa ɗege kee yil, àa ka besere fare janna ge Pol ne ma ɓanna ge saaso jɔjwag. 46Pol mage Barnabas jan num zum waŋ go: «Wa̰a̰ ndwa go, fare ge Dok ne ee pe janna daa ge ḛ Yahuɗ ma ta. Ajo̰o̰ ḛ sḛ ma kuri ne gezi ne, ḛ kun ta sariya go go ḛ mbyaɗ deɗ-ɗa ge ndwa ge ɗiŋ ge din go to. Ḛ kuwa go, i seŋe ta ja ge nda ge no rusu Yahuɗ zì to ma ta. 47Ago Bagezok ho ne na wa go: “Mbi taa mo go, mo kaa kɔn̰al ge nda ge no rusu Yahuɗ zì to ma way, ndwa go mo mbo ge fare ge monna ne ge suwa wa ndegeɗe ma yà.”»#Eza 49.6. 48Sok ge nda ge no rusu Yahuɗ zì to ma za̰a̰ fare mbe go, àa kee laa saal, àa ka sale Bagezok ge ne fare dee ya maa ta pe. Nda ge Dok taa num ma ndwa go num dee ya ndwa ge ɗiŋ ge din go ma mbo ya hoɗ fareba me.
49Go mbe no, fare ge Bagezok ne mbo ya dasare ge num sok ma go peɗ. 50Ɗaŋɗe, Yahuɗ ma kan nda zaab ge pagal kɔn̰al go ge ma, ge uware Dok ge Yahuɗ ma way ma cece, ɓanna ge nda soɗob ge pwal ge suwal ga̰a̰l diŋ-ge ma me. Àa ɗege digi ge ho̰o̰l ge Pol mage Barnabas ta, àa yan num ge maa suwa go. 51Nda ge zi mbe ma poy maa ko kuci ma ge num pagal, guwa̰, àa hee vin̰a mbo suwal Ikoniyom. 52Kaɗɗa ge nda ge ame hateya ge no suwal Antiyoch diŋ ma ɗe, àa gaa ge laa saal, àa biri ge On̰om ge Harcal me.
Iliyochaguliwa sasa
Tèmel keeya 13: kiaGRB
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2017 Wycliffe Bible Translations, Inc. All rights reserved.
