Maatiyoos 5
5
Rɔɔriya Yeese Kurkum Raŋk
(Imiiny 5—7)
1Saaɓa Yeese dɛnɛɛɗ joop sigɔ ɓɔɔkaaŋɔŋkuk, nɛɓa kɔtɔɔŋɛ kurkuma nɛ kɛɛ dokuɗe. Nɛɓa nomtaana gɛɛnɛ wideetar ɛɛk son lak sɛɛnik, 2nɛɓa tuke sɛɛg rɔɔriyɔɔna kɛ,
3"Iinak joop sigɛ sankaanak wɛɛŋakɛɛk, iinak geetitaanak,
agut sinɔ ege burɛ dariyoŋk noŋk.
4Iinak joop sigɛ ɓakɛydiik, iinak geetitaanak,
agut sinɔ ege gaananit Waakoyotoŋk noŋk.
5Iinak joop sigɛ rikiter ɛɛk nɛŋkik, iinak geetitaanak,
agut sinɔ ege ɗook baŋɛ noŋk.
6Iinak joop sigɛ ɗɛyɛr any sinɔ mentan taamɛkɛ Waakoyotoŋk jɛtik, iinak geetitaanak,
agut sinɔ ege ɓooɗorɔn any sinɔ yaaŋɔŋk noŋk.
7Iinak joop sigɛ maariyɗik, iinak geetitaanak,
agut sinɔ ege maariyeet Waakoyotoŋk noŋk.
8Iinak joop sigɛ mentaana ɓayɛtunɛɛkɛ gɛŋkik, iinak geetitaanak,
agut sinɔkoy dɛnɛrɗɔ Waakoyoŋɔŋk.
9Iinak joop sigɛ ijaagir taakiyɛk, iinak geetitaanak,
agut sinɔ ege Waakoyot Ɓaaɓa noŋk.
10Iinak joop sigɛ epapayɛɛk agut any sinɔ mentan taamɛkɛ Waakoyotoŋkuk, iinak geetitaanak,
agut sinɔ ege burɛ dariyoŋk noŋk.
11Iinak geetitaanak saa kɔnu sɔɔkɛrɗik joop a saa kɔnu epapayarɗik ɛ saa kɔne tonurɗu any sinɔ ŋɛɛwɛnŋɔŋk a nyɔɔna sigɔ ɓɛɛlɛr kundiyaakɛk baŋɛ agut eetik. 12In kɔna yaa jɛt agut sinɔ obi gati sinɛkoy laŋiir darikiŋ. Epapayɛɛɓa joop pɛrkaakoŋk sigɛɓa ɓɛɛlɛr iinakɛ ɔɗɔɔkɛk oko sinik.
Mooyi A Pɛɗɛrka
(Mar. 9:50; Luk. 14:34-35)
13"Iinak mooyi ɗookoŋk. Mayakana ɔkɔn ki mooyi luuluwukaaŋ, nɛkɔɔ oolɛ a luuluwe kɛkar ɛk? Kɛɛ any sinɔ kɔnykuk, ɔkɔn mokokɔɔ oriirɛ walasa nɔ torookar joop. 14Iinak pɛɗɛrka joopa ɗookoŋk. Katamɛ sinɔ ar kurkum raŋk ki oolɛ a dugiɗiiŋ. 15Kɛɛ iɗit sinɔ idaawu ɗaawan nɛ turkuuke kebetik, ma riiɓe soodi dɛnɛɛɗɛ pɛɗɛrka nɛɛk, kɛnɔ pɛɗɛɛɗ joopa sigaaga atu godeey takik baŋɛ. 16Oko sinik in ɗaawu pɛɗɛrka noŋk joope taamɛkɛ, kɛnɔ dɛnɛr joop ijaag noŋk sinɔ mentanŋɔŋk, kɛnɔ eemɛyar Ɓaaɓa noŋk dariyoŋk.
Dusanɛɛt Higi Muuseek
17"Kat koɓiir kɛ kusaakan kɛnɔ aala higi Muuseek a pɛɛni joop pɛrkaakoŋk. Kusaakan kɛnɔ gayɛ any baŋɛ a eekeer, ma mokokan kɛnɔ aala. 18Eekeer tona kɔnaaŋ, nɔkoy ɗoyiɗ ɗook a darik gayɛkoy any baŋɛ a eekeer higii baŋɛ, makoy kɛɛ aalɛt higii pɛɛni sɔstan a omoŋ. 19Iɗit sinɔ aasi aalɛ sekiyɛɛkɛ sigeege sinɔ omoŋɔŋk balaaŋɔŋk ɛ rɔɔriy joop ɔgɔ kɛnɔ ijaagir oko sinik, gagiɗɛkoy Burɛɛ dariyoŋk nyon sinɔ ar ɗookuk. Mayakana iɗit sinɔ dusanɛ sekiyɛ baŋɛk ɛ rɔɔriy joop ɔgɔ kɛnɔ ijaagir oko sinik, gagiɗɛkoy Burɛɛ dariyoŋk nyon sinɔ ar rakaayk. 20Tona kɔnaaŋ, ɔkɔnkoy ki kaalɛt mentanka noŋk taamɛkɛ Waakoyotoŋkuk mentanka rɔɔriytaanak higi Muuseekiŋ a joop Paarisikiŋ, kiirkoy guugunyɔn Burɛya dariyoŋk adaktan.
Rɔɔriyaaɗ Yeese Ɔɔtɛ Goopanoŋk
(Luk. 12:57-59)
21"Tiyɛɛrɓa sinɛɓa tonɛɛ joopa sigaagaɓa ɗeeŋk kɛ 'Kat ɓokotɗiikinkiŋ, iɗit sinɔ ɓokotu iɗitik pɛrɛdɛɛɗɛɛkoyŋ.' 22Yakana saak tona kɔna kɛ, ɔkɔn goopun masookoy sɔkɔn diilɛɛ kɔɔnu higiya. Ɔkɔn nyɔɔnun iɗit kɛ, 'Iin badtanŋ' guugunyunkɔɔ pirdiya joop sigɔ gaɓɛr woorank. Ɔkɔn nyɔɔnakin kɛ, 'Iin gaagɛŋ' koorɛni pirdi maɗ siiooluk.
23Saa widerkiɗin tigi sinɔ uduŋɛɛŋɔŋk nyona sinaana uduŋeetoŋk Waakoyotak, ɛ koɓukun masookoy sinɔ kɔna ŋadiŋɔŋkuŋ, 24nɛ toŋoɗu tigi nɛɛk nyon sinaanɛ uduŋeetoŋk taamɛkɛ. Nɔ tuki nɛɛkɛ kɛɛɗin nɔ taakiɗikar a masookoy, nɛ saadi baŋiya murkun nɛ wideerin any sinɛ uduŋɛɛk. 25Saa kaarɗɔ a iɗit sinɛ manɗiikarik godeya pirdiyoŋkuk, nɛ in mɛyikɛ a gorgor a in atukari gopɛ. Ma ɔkɔnkɔɔŋ nɛ kɔɔnu gaɓɛ ɔɗɔwenta pirdiyoŋk, nɛ kɔɔnu ɔɗɔwen sinɛ pirdiyoŋk gaɓɛ amaasiniya, nɛkɔɔ guugunyun godeya korkoɗɔɔnoŋk. 26Eekeer tona kɔnaaŋ, kii kinkɔɔ ŋaarin saadi ɔɔtɛya sɛkɔɔ koyiiɗin taaribɛ sinɛ pedtank.
Rɔɔriyaaɗ Yeese Ɔɔtɛ Ibeeɗoŋk
27"Tiyɛɛrɓa sinɛɓa tonɛɛ kɛ, 'Kat ibiɗiikinkiŋ.' 28Yakana, saak tona kɔnaaŋ, iɗit sinɔ dɛnɛ peet nɔ ɗɛyɛk ibiɗiikɔ sisa ɓayaay nɛɛkɛ a sɛɛniŋ. 29Ɔkɔnnu ooɗɛ taama nookɛ gɔɔ sinɛ ɗiɗikkiŋ ɔɔtɛ tikiyɛɛkoŋkuŋ, kɔɔkɔyak nɔ orun. Ɔɔtɛ sinɔɔnɛ gun oriiɗɛ ɛɛk nook baŋɛ siioolak nɛna dɔɔs a sanin ɛɛk nook nyon om. 30Ɔkɔnnu ooɗɛ ari nookɛ gɔɔ sinɛ ɗiɗikkiŋ ɔɔtɛ tikiyɛɛkoŋkuŋ, yawak nɔ orun. Ɔɔtɛ sinɔɔnɛ gun oriiɗɛ ɛɛk nook baŋɛ siioolak nɛna dɔɔs a sanin ɛɛk nook nyon om.
Rɔɔriyaaɗ Yeese Ɔɔtɛ Pakakatoŋk
(Maa. 19:9; Mar. 10:11-12; Luk. 16:18)
31"Tonɛɛɓa kɛ, 'Iɗit sinɔ pakakati a jarti nɛɛkik in gageeɗ wargatɛ sinɛ pakakatoŋk.' 32Yakana tona kɔnaaŋ, iɗit sinɔ pakakati a jarti nɛɛkik ɔkɔnkɔ moko jarti nɛɛkɛ ibiɗiiŋ, nɛ ari jarti nɛɛk a ibiɗiiŋ, iɗit sinɛ boŋu jarti sinɛkɔ pakakatiikɛkik ibiɗiiŋ.
Rɔɔriyaaɗ Yeese Ɔɔtɛ Wogoyoŋk
33"Tiyɛɛrɓa sinɛɓa tonɛɛ joopa sigaagaɓa ɗeeŋkiŋ kɛ in dusanɛɛ pɛɛni sinɛɓa gaɓɛɛr Suumiya wogoykuŋ. Ma kat aalɛɛr pɛɛni noŋk wogoyoŋk.' 34Yakana saak tona kɔnaaŋ, kat wogoyɛɛr adaktan. Kɛygun dari kat wogoyɛɛrɗ agut sinɔ ege dari barsum Waakoyotoŋk. 35Kɛygun ɗook kat wogoyɛɛrɗ agut sinɔ ege ɗook nyon sinɔ riiɓeeɗ Waakoyot derakik. Kɛygun Yorsaleeme kat wogoyɛɛɗɛ agut sinɔ ege Yorsaleem katamɛ Suumi sinɛ Obiikik. 36Kɛygun aɗoy nookɛ kat wogoyun, agut sinɔ kin oolɛ a arin amun nook a omoŋ a tupeenyiŋ maŋk a kɔjuŋ. 37Nɛ waasiyɛ goŋk ɔkɔn kɛ 'Ii' nɛ in 'Ii', ma ɔkɔn kɛ 'Moko' nɛ in 'Moko', ma pɛɛni sinɔ ŋayɗiiki sineenek setanik.
Rɔɔriyaaɗ Yeese Ɔɔtɛ Jumuran Any Sinɔ Ŋɛɛwɛnŋɔŋk
(Luk. 6:29-30)
38"Tiyɛɛrɓa sinɛɓa tonɛɛ kɛ 'Iɗit sinɔ kataki taama etoŋkuk nɛ katakɛ taama nɛɛk. Iɗit sinɔ orku ŋedan etoŋkuk nɛ orkɛ ŋedan nɛɛk.' 39Yakana saak tona kɔnaaŋ, kat jumurɛ eta sinɔɔna ijaag any sinɔ ŋɛɛwɛnŋɔŋkuk. Iɗit sinɔ paaŋi pariiwan nookuk gɔɔ sinɛ ɗiɗikik weergeeɗ gɔɔ om. 40Ɔkɔnne iɗit omaay ɗɛyɛ boŋiɗa abii nook sinɛ takanenkiŋ, toŋoɗargeeɗ ɓɔrɛ abii nook sinɛ raŋanenk nɔ boŋuɗ. 41Ɔkɔnnu remɛ iɗit omaay kɛ koy kɛɛɗii gopan sinɔ yowɛɛɗiŋɔŋkuŋ, nɛ in kɛɛɗɛ gopan sinɔ suɗaktank. 42Tigi iɗit sinɔnu kalɛyiŋɔŋk, kat ɓaarin iɗit sinɔne ɗɛyɛ masɛk.
Poru Joop Sigɛni Ɓooyurk
(Luk. 6:27-36)
43"Tiyɛɛrɓa sinɛɓa tonɛɛ kɛ, 'Poru iɗit sinɛ beeɗiir jɔkikentik, ma ɓooyu gumaaken nookuŋ.' 44Yakana saak tona kɔnaaŋ, in porɛ gumaakeer goŋk, in ɗanɗamaakɛ joopa sigaaga kɔnu epaayark. 45Ɔkɔn ijaagiir oko sinikiŋ, iinak koy tɔɔmɔk Ɓaaɓa noŋk sinɛ ar darik. Gaɓɛ Waakoyot waawuy nɛɛk joopa sigaaga ŋɛɛwɛk a joopa sigaaga mentaanakiŋ a tul joopa sigaaga mentaanak a joopa sigaaga ŋɛɛwɛkiŋ. 46Ɔkɔn poriir joop sigɛ kɔnu porurk, nɛ latukari gati kɛ jikon? Joop sigɔ yayawar worik a moto ijaagir siniŋ? 47Ɔkɔn digoyɛɛr masookoyak dakɛɗaŋ, nɛ kaalɗiɗɔ jikon sinɛ latukarik sinɛkɔ ijaagiirk? Ijaagir aasi joop sigɛ moko Ayuuduk oko sinik. 48In iinak joop sigɔ ijaagiir any sinɔ likik oko sinɛ ijaagiiɗ Ɓaaɓa noŋk dariyoŋk any sinɔ likik.
Iliyochaguliwa sasa
Maatiyoos 5: KSTM
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
