Jenesesi 11
11
Balaletchiwa wa atu no mwalanihiwa wa viwongelo
1Mwilamboni mwatene, iwongelo yali imohive bahi eto atu atene makalelo ewa owonga ali mamohive. 2Mbwenye muwari mwa tempu yenne kohokalawo atu kavenyile pandi ya makumelo wa nzuwa, aliwa roma wendawenda. Mwa enne kawendawendaga kohofwanya nimburo notandeleya mwilamboni mwa Sinari, aliwa roma kala vevale. 3-4Evale kohowongaga mmohi na nfwaye, aliwa ira: <<Ndoweni niwombeni boloki, nitumeyeni pama, nimangeni sidadi yehu vamohi na nyumba yolapa ya agwarda, ifiye zulu ira nzina nehu nivweye eto ira nahamwadeyele mwilamboni ya vati.>>#11:3-4 ira nzina nehu nivweye eto ira nahamwadeyele mwilamboni ya vati: Yoviringaniha ya atwale yali funa wewa ira kavweye okave hiya vweyiha nzina na Mulugu. Eto yoviringaniha imohiwa, atwale tchafunne mwadeyela mwilamboni, agali Mulugu aarelihaga aNowe kakumaga mmwadeyani airile: Mubalihane, muindjivihane, muzale ilambo ya vati. (Jenesesi 9:1,7) Evale kohoroma manga. Aliwa eto tchamangile na mabwe na simenti, nari. Vamalroni va mabwe kalabana boloki eto vamalroni va simenti kalabana alikataraya.
5Mwa enne Yehova ohotita ira aone sidadi vamohi na nyumba yolapa ya gwarda, jejo jamanga atwale. 6Evale Yehova ohowonga eraga: <<Mabasala ku roma wene. Aliwa eto kinaimwanana irana jatene jinaumbuwela atu mwasiwa atwala iwongelo yewa tchi imohive eto ba atu a nlogo nimohive. 7Ndoweni nititeni, naviringanihe iwongelo yewa,#11:7 Ndoweni nititeni, naviringanihe iwongelo yewa: Va Mulugu kanawonga nnga mutu mmohi mbwenye unawonga nnga atu ambinli owu araru. Para Mulugu wongaga eni inafwanela niiziwe ira muwari mwa Mulugu, agalive Mulugu mmohive, ukalawo Mulugu Baba na Mulugu Mwana (Yesu) na Mulugu Munemba Otchena. Nione eto Jenesesi 1:26. Mbwenye kahi ira Mulugu ba atu oindjiva hehi. kakayena viwongelo doindjiva ira kahawandege vwanana.>> 8-9Evale Yehova ohoviringaniha iwongelo yewa, kada atu kana iwongelo yewene. Noira enne, aliwa kohotchelela manga sidadile na mwasa oira tchavwanana. Mwa enne Yehova paabalaletchele liye mwilamboni ya vati.#11:8-9 Mwa enne Yehova paabalaletchele liye mwilamboni ya vati. Mazwala anawonga zela balaleya wa malogo matene mwilamboni ya vati. Mazu a Mulugu anawonga ira para kalawo malogo pwi pwi na viwongelo pwi pwi na makalelo ohiyana hiyaniha a ntutu, airilena ejo gu Mulugu. Nione Joira ja Anamarumiwa 17:26. Sidadi yamanga atu ile yohovahiwa nzina na Babeli, mwasiwa Babeli ku wewo Yehova waviringanihile liye viwongelo da atu atene eto aabalaletchela atu mwilamboni yatene ya vati.
Makolo a Abaramu
10Ula gu muselu wa mulombwana Semi. Semi aganna yaka 100 ohombala Arifaxade. Jejo jaireyile agakumile mmwadeyani, vagamanle yaka mbinli. 11Semi agambanle Arifaxade, ohomala yaka 500 dimohi diwa hiya yaka 100 doroma dile. Muwari mwa yaka dedile, ohabala ahima amohiwa, alombwana vamohi na ahiyana.#11:11 Semi… ohomala yaka 500 dimohi diwa hiya yaka 100 doroma dile: Mazwala ananiwandela ira Semi ohokalawo yaka 600. Nahela konta da yaka danna liye, ku wonga Abaramu, Izaki na Jako kabaliwaga, Semi agaliwove.
12Arifaxade aganna yaka 35, ohombala mulombwana Sela. 13Arifaxade agambanle Sela, ohomala yaka dimohi diwa 403, hiya 35 doroma dile. Muwari mwa yaka dedile ohabala ahima amohiwa, alombwana vamohi na ahiyana.
14Mulombwana Sela aganna yaka 30, ohombala Eberi. 15Sela agambanle Eberi, ohomala yaka dimohi diwa 403, hiya 30 doroma dile. Muwari mwa yaka dedile ohabala ahima amohiwa, alombwana vamohi na ahiyana.
16Mulombwana Eberi aganna yaka 34, ohombala Pelegi. 17Eberi agambanle Pelegi, ohomala yaka dimohi diwa 430, hiya 34 doroma dile. Muwari mwa yaka dedile ohabala ahima amohiwa, alombwana vamohi na ahiyana.
18Mulombwana Pelegi aganna yaka 30, ohombala Rewu. 19Pelegi agambanle Rewu, ohomala yaka dimohi diwa 209, hiya 30 doroma dile. Muwari mwa yaka dedile ohabala ahima amohiwa, alombwana vamohi na ahiyana.
20Mulombwana Rewu aganna yaka 32, ohombala Serugi. 21Rewu agambanle Serugi, ohomala yaka dimohi diwa 207, hiya 32 doroma dile. Muwari mwa yaka dedile ohabala ahima amohiwa, alombwana vamohi na ahiyana.
22Mulombwana Serugi aganna yaka 30, ohombala Nahori. 23Serugi agambanle Nahori, ohomala yaka dimohi diwa 200, hiya 30 doroma dile. Muwari mwa yaka dedile ohabala ahima amohiwa, alombwana vamohi na ahiyana.
24Mulombwana Nahori aganna yaka 29, ohombala Tera. 25Nahori agambanle Tera, ohomala yaka dimohi diwa 119, hiya 29 doroma dile. Muwari mwa yaka dedile ohabala ahima amohiwa, alombwana vamohi na ahiyana.
26Mulombwana Tera aganna yaka 70, ohombala Abaramu, Nahori na Arani.
Ahima a mulombwana Tera
27Ula gu muselu wa mulombwana Tera. Tera ohombala Abaramu, Nahori na Arani. Arani eto ohabala ahimaye araru. Mmohi eriwa Lroti, 28-29mmohi eriwa Milika, mmohi eriwa Isika. Mulombwana Arani ohokwa mwilamboni mwabaliwe liye mwa Uri wewo wali aKalidewu, babaye Tera ahanakwe. Mwa enne Nahori ohovenya dowa mutela Milika, mwana mbalaye Arani. Eto Abaramu ohomutela muhiyanaye eriwa Sarayi. 30Mbwenye Sarayi kaanna ahima mwasiwa ali ngomwa.
31Evale Tera ohomutukula mwanaye Abaramu na nijaliye Sarayi na muzuliye Lroti mwana Arani, aliwa kuma Uri, ilambo ya aKalidewu ira kadowe ilambo ya Kana. Kahanafiye Kana, kohoimelaga ilambo yeriwa Arani, aliwa roma kala wewule. 32Mwa enne mulombwana Tera ohofiyeda kwa kagali Arani ule. Tera akwile aganna yaka 205.
Iliyochaguliwa sasa
Jenesesi 11: iLolo
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2018 Visão Integral