Matayo 2
2
1Ili Yesu airiwa kulya Betileemu ya uruka lwa Yudaya kyeeri kya mangi Herode, vandu vaanga vakasha vauka kulya taari ya ngama vakafika kulya Yerusalemu vakanumbua: 2Mangi uu wa Vayuda andeiriwa alli nkwi akai? Fulya tallolia nyinyiri yamwi kulya taari ya ngama, neese tansha imwitikisa. 3Kyasia ili Herode andeita mboni ii, kataṛaaka andu emwi na va Yerusalemu woose. 4Kavaanga vakohani vanini woose na vaaṛia va vandu va mitisine kavasokoda nnu mboni ta Kristo kundo awonikyaa nkwi? 5Nawo vakamwia: Nkulya Betileemu ya kunu Yudaya. Amu nkuro kyeentisiṛwaa mmwauya kisuku ulya: 6Nawe Betileemu ya uruka lwa Yuda, kukee munnya kari ka miri ya Yuda kutu ndi, amu kwafo mfo aukaa ulya ashiliaa vandu vakwa va Isiraeli. 7Kyasia Herode kavaanga vaanga valya kiṛisiń kavauṛa kyeeri nyinyiri ilya indebooka ilolyo. Kavaotoṛa vaende Betileemu. Kavaia: wareń shia mwende kulya Betileemu mundeuṛa nnu mboni ta mwana ulya. Mukammaa illolia sheendień mboni, amu nań neende nndemwitikisa. 9Neeli vandemaa iita firero fa mangi, vakawara shia. Lia eni nyinyiri ilya vandellolia kulya taari ya ngama ikavairia mbele, kumande indesalalaa kwa ule ya numba ilya mwana ulya akai. 10Neeli vandelolia nyinyiri ilya, vakafura nnu. 11Vakaaka kulya numba vakalolia mwana andu emwi na Maria mae wamwi. Vakawwoya vakamwitikisa. Vakaboṛomua mikusha yawo vakanniinga masaa, nsaabu na findo fa kisaamu. 12Neeli vandemaa iikimbwa ni Iṛuva yorień sheeli vatakyuye lingi na kwa Herode, vakauya kyeń kwawo na shia ingi.
13Kyasia ili vaanga valya vandekwimboo vakaenda kyeń kwawo, llyo malaika wa Nndumi ashea Yosefu yorień kamwia: Kwimboo kurike kimwana ki na mae kurishie kulya Misiri, kundekaa-fo kumande nkwiaa. Fulya Herode akee iṛuya kimwana kyo akiwaa. 14Nae kakwimboo kakurika kimwana kilya na mae kio kilya kyeni. Karishia kulya Misiri 15kakaafo kumande Herode amaa ifwa. Nakyo kikava, amu kifike kilya kindererwa ni Nndumi na kana ka mwauya kisuku ulya eenumbuaa: Nkulya Misiri navvanga Mwana wakwa.
16Kyasia ili Herode andemanya allembwa waanga valya, katu-ṛuka nnu. Karuma vaseṛo vandewaa vana woose va kulya Betileemu na miyanuń vamae myaka ivili na valya vakiseere kisumani na kyeeri kilya andesokoda kwa vaanga valya. 17Llyo kikava, amu kifike kilya kyeenrerwaa mmwauya fisuku ulya Yeremia eenumbuaa: 18Kiifo kiṛoṛongyo kya kiiyo kulya Rama, nkiiyo na ikwalaala lya ukiva. Raeli akee ililia vana vamwi kakumba na ngoṛu nta ikunda ilembwalembwa, fulya vatakiifo.
19Ili Herode andemaa ifwa, llyo malaika wa Nndumi ashea Yosefu yorień kulya Misiri kamwia: 20Kwimboo kukurike kamwana ko na mae kuuye kulya urukeń lwa Isiraeli. Fulya valya veefuriee iwaa kamwana vammaa ifwa. 21Nae kakwimboo kakurika kimwana kilya na mae kio kilya kyeni kauya urukeń lwa Isiraeli. 22Kake ili andeita ni Arikelao akee mangi ya kulya Yudaya andu a ndee Herode, kaeṛea yenda-fo. Kaoruswa ni Iṛuva yorień kaenda alya muungoń wa Galilaya. 23Kasamia kulya kweni muṛiń ulya wivaangwaa Nasareti. Nakyo kikava, amu kifike kilya kyeenrerwaa waauya fisuku veenumbuaa: Avaangwaa nndu wa Nasareti.
Iliyochaguliwa sasa
Matayo 2: RWK72
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
New Testament in Kimeru-Tanzania © British and Foreign Bible Society and Bible Society of Tanzania, 1954,1967,1972.
