Matayo 2

Aghenyi ufuma ukëya

1Yesu agafafwa umuji wa uBetelehemu, uYudea, itungo nënaa Herode mutemi. Nënaa wafafwa, aremu va njota ufuma kiya vëgafika uYerusalemu, 2vëuhanya, “Wëëfee wasuu, nëwafafwaa mutemi wa Ayahudi? Gusoko gwamëonaa njota akwe nënaa adwëëraa ukiya, gwajaa gumukurye.” 3Mutemi Herode nënaa watagheeya asaa, agawurya majëghana, mweeso na uYerusalemu voong'e. 4Uvii, agavataana mwirundo wa akumbeki aküü voong'e na vaandëki va antu, agavawëya, fee fana naa Kiristo ugufafwa. 5Vëgamukhanëa, “uBetelehemu a uYuda. Uu mwino munyagëdaghu agandëka:

6‘Veve Betelehumu mung'ë a Yuda,

mba ëse wurë vee utimunyuughu

mbanduvë mukhatë a atongeeri

va Yuda, gusoko, ufuma

kunë vee ujie udwëëra mutongeeri

nëujie uvatongeera antu vane Isiraeli.’”

7Faafo, Herode agavataana umpëo aremu va njota vasaa, agawëya itungo ryeso nënaa njota asëë avadwëëraa. 8Agavatuma uBetelehemu uguhanya, “Endi mwende umanya sayu a mwana wasuu. Nëmwamuhanga ndetei sayu nëënonoo nende umukürya.” 9Nënaa vamutegheeya mutemi aremu va njota vasaa vëgenda kunë vinjë. Ngwë njota ësëë nënaa vamëghune ukiya ëgavatongeera, faka ëgenda gimëka gunto fana naa mwana urë. 10Nënaa vamëona njota ësëë vëgayanja ino. 11Uvii, vëgingëa u nyumba, vëgamwoona mwana wasuu itambëëmwe na Mariamu yiu wakwe, vëgatungama vëgamukumajua. Uvii vëgatarughua mpamba yawe, vëgamufa dahwa, sahaabu, urumba nanë manemane. 12Muungu agavëëra mu ndoti vataje vëmusukie Herode, uvii vëgasuka ung'ë awe gwa njëa ëngëja.

Gwenda uMisiri

13Nënaa aghenyi vasaa vatunguya, malaëka wa Müküü agamudwëëra Yosefu mundoti, agamukhanëa, “Wuka! Muhore mwana itambëëmwe ina nyinya, iruki mwende uMisiri. Ikhai kuuko faka fana nëjië ugukhanëa, gusoko Herode ugufënja umuuragha mwana uyuu.” 14Uvii, Yosefu agawuka utiku agamuhora mwana itambëëmwe ina nyinya agenda uMisiri. 15Agëkhaa kuuko faka nënaa Herode wakuya. Rësëë rëgatendeka ukhondeke ukhani nënaa agauhanya Müküü gwa ukëëra kunë munyagëdaghu, “Ufuma uMisiri ngamutaana mwanane.”

Ang'ënya adëëru vëguuraghwa

16Herode nënaa woona mwino aremu a njota vasaa naa vamukhongaa, agasida na uhura ino. Agaramua ang'enya voong'e në aghosya va uBetelehemu nanë umpeo ayo va umukoa usuu woong'e nënaa vina mëakha ëvëë mbesa fang'ë a mëakha ëvëë gwa uning'anëya ufuma kunë na aremu a njota, vendie vëuraghwe. 17Rëgakhondeka rësëë nënaa rëgahanyiwa na munyagëdaghu Yeremia:

18“Ruri wategheeyekaa u muji wa uRama,

gëëro nanë uhongeeya ino.

Raheli uguvarëëra vanaakwe,

ëgweeso noo atiufenja ufefeheeywa,

gusoko naavëtifo.”

Ufuma uMisiri Uja uNasareti

19Nënaa Herode wakuya, malaëka wa Müküü agamudwëëra Yosefu mundoti uko uMisiri agamukhanëa, 20“Wuka! Muhore mung'inya itambëëmwe ina nyinya, usuke ung'ë a Isiraeli, gusoko vasaa nënaa vëufenja umuuragha mung'ëënya wasuu vakuree.” 21Uvii, Yosefu agavuka, agamuhora mung'ënya itambëëmwe ina nyinya, agasuka ung'ë a Isiraeli. 22Ëgweeso Yosefu nënaa wategheeya mwino Arikelao mwana amwa Herode naa waye mutemi wa uYudea mwino ihe, agaoghofa gwenda kuuko. Nënaa waraghëërwa mu ndoti, agenda gitumbë ra uGalilaya, 23na agahamëa umuji ugutaanwaa Nasareti. Uvii igakhondeka nkhani nënaa yahanyiwe na anyagëdaghu: “Ugutaanwa Munasorayo.”

Iliyochaguliwa sasa

Matayo 2: RNT

Kuonyesha

Shirikisha

Nakili