Yoane 7
7
Bampai ba Yes bawonta yante iwe ra Yerusarem
1Ampis muna yante awar u Garirea, yante aber uwar u Yudea, isin basi Yuda basot kundjak.
2Rusu ru nianko mu basi Yuda, raurak banta nianko mu a mpuru marampa muawar kora kor.
3Bekiy bante kunor : Kobua ane, yak ra sues a Yuda, isina keka baronki bawo butar ake mayemp muker wene.
4Isina rek a muot unkek mey busuamn bo. Mpe wene inkerk wene mey mene, suintsh bat wene wamet.
5Isina bekiy bante bamet unyes ya bo.
6Yes kubaror yampe : Isoenki rami rek ratuwiy; na isoenki ra binu rungwak matankua makima.
7Bat ba man bak uyeb ubiok pis, di banta bumak pok minyi pis, isin intotok minyi ampe, mey munkerk banta mungwak ma mabe.
8Yak ana binu mukang mune, di minyi rak tobentu bo, isina isoenki rami rek ratokok bo.
9Nter amabaror ya nkos, ya kusasar u Garirea.
10Ampis nter awe bekiye bante, ri mukang, ya ake kuwe, kuawe u nteng a bat bo, di yante awe nko busuamn.
11Basi Yuda baukunsoti u kate matu mu nianko muna bampe : Ya angwa kue ?
12Banta baukusiki pantshi isin mey mante, bana bamwetsh bampe : Muot nsek ; bana bamwetsh ake bampe : Bo, yante ank rimp bat.
13Rek a muot mwetsh aukutot ankon isin ya bo, isina aukupakr banta basi Yuda.
14Yes kuwe ra mpur a Ntsampe rusu ri mukang muna, aukusuengs bat mey.
15Basi Yuda kupak bampe : Muot nywe ayeb Mikanta kue, yante uyek bo ?
16Yes kubasaks yampe : Rueye rami kerungwak rami bo, di ra yone ntshu amatom minyi.
17Mpe muot awont uker ruwont ra Ntsampe, ya apayeb mey mene mpe ma Ntsampe, di mpe rutotok i bukumu buami miamet.
18Muot ntshu nkutoti i bukumu buante ankusoti ruton rante yamet, di muot yona ntshu sota ruton ru ntom ante, yante muot a barabara, rek a ruey rube u ntem muante bo.
19Moise kamabiwek bikin ; rek a muot mwetshi u kat a binu mak biyerer bo. Binu bukusoti untshjak minyi isin ye?
20Bat kunor bampe : Wene ungwar i nsong na ikusoti uidjak?
21Yes kubasaks yampe : Minyi ramaker iyemp rumwetsh, ruera binu bakim bamapak.
22Moise amabiwek mey miromp kuratoa ngwar Moise bo, ri rinta ratoa ngwar banank binu bunker muot iromp rusu ru nkira.
23Mpe muot bumok iromp rusu ru nkira mu basi Yuda, isin ikin ra Moise upuintsh bo, isin ye ingwor binu kabo u mpungun ami isina abers minyi muot rusu ru nkira ?
24Rek ana butentes muot isin rutoko bo, di tentes ana yona ntshu ngwar a ruey ra barabara.
25Bana bamwetsh bawak u Yerusarem, kutot bampe : Ka ya yone ntshu ikisot banta undjaka ?
26Rent ya iktoti u kat a bat bakima irengen irengen, di banta unor ruey bo. Bakumu buma kayeb barabara ampe, yante angwa Kristo.
27Di bitu tshumayeb mpok ato yone, di Kristo nter iwiy yante, rek a muot iyeb irak yeruto yante.
28Yes kutot ankon u kat a mpur a Ntsampe, nter aukusuengs ya bat mey, yampe : Binu bamantshyeb, binu bamayeb mpok ato minyi, minyi kerawiy miamet bo, di ntshu amatom minyi, angwak a barabara ; binu kebamanyeb ya bo.
29Minyi ramanyeb yante isin minyi rato ngwa yante, ya amatom minyi.
30Banta barab kungwat yante, di muot mwetsh uses rou u kora ante bo, isina isoenki rante utakok bo.
31Bat ba buiki u kat a tong a bat kunyes, ba kutot bampe : Nter yeiwiy Kristo, yeipaker bisana binkerk yone ?
32Bafarisaii bamaok mey maukukukukuk bat isin Yes, bakumu bu bampang bakump banen nto ake bafarisaii kutom tshuparai isina kungwat.
33Yes kutot yampe : Minyi rukawar nto a binu itankua kakek, ampis minyi rukawe ngwa yone ntshu amatom minyi.
34Binu yebusak sot minyi, yekebumpon bo, binu yekebuyeb uwiy irak yeruwar minyi bo.
35Isina mey mas, basi Yuda kutot u kat a banta bampe : Yante yeiwe kue, keka iwa bitu rek umon bo ? Yeiwe kat a bene batshakra bungwak u nteng basi Greke mpe ; uwasuengs basi Greke ?
36Mey maye mene munor ya ampe : Binu yebusak sot minyi, yekebumpon bo, binu yekebuyeb uwiy irak yeruwar minyi bo ?
37Rusu rumans ri runen ru nianko, Yes kukatu kunyemt, kuwam ankon yampe : Mpe muot awar a puesa, iwiy ngwa minyi, ya inyui.
38Muot ntshu ntshes minyi, ntshare sia mas ma mony sito u kat a tor ante, nko aror mukant mua Ntsampe.
39Ya atot mey mas isin Ntem mua Puinki a Ntsampe, mu rab bene yebunyes yante, isin Ntem mua Puinki a Ntsampe utowiy bo, isina Yes utotonos bo.
40Babuik u kate a tong a bat, nter aok ba mey mas bampe : Ya nywe angwa profete a barabara.
41Bat bamwetsh bampe : Ya nywe Kristo. Bana bamwetsh bampe : Kristo yeito u Garirea ?
42Mukant mua Ntsampe kumuaror ampe : Kristo yeito iruentsh ra bura Davir nto ake u bora basi Betrehem irak rawak Davir ?
43Bat bamakaps isin mey ma Yes.
44Bat bamwetsh barab kungwat, ya muot mwetsh usik rou u ruk rant bo.
45Mayor kukakaru ngwa bamene ba banta nto ake u kor Bafarisaii, banta kuror mayor : Isin ye binu bumer ngwat uwintshuar ane ?
46Mayor kubasaks bampe : Muot mwetsh rek ante ntshu tot mey bunono nko ya bo.
47Bafarisai kubasaks : A binu ake bumak nyesa ?
48Muot mwetsh u kat bakumu, nto ake Bafarisaii bamatanyes yante ?
49Tong a bat bene baber yeb mey mibo bungwa bantshera.
50Nikodem, yone atawiy ngwa Yes i butu, ya awar u kat a ba yampe.
51Ibo ra bitu rumpakuaks muot, mpe utuok nonto muante bo, nto ake bitu tshumon mey maker yante?
52Ba kunsaks : A wene ake u nsi Garirea ? Sot busek, wene wapatar rek a profete mwetshi atoa u Garirea.
53Ampis muna, ba bakima kumuangn muota muot kukaru ra mpur ante.
Iliyochaguliwa sasa
Yoane 7: EJK2012
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Copyright © 2012, ASAREB, Suisse MiDi BIBLE
