मत्ती 12
12
बशैघे धैल़ीओ प्रभू
(मरकुस 2:23-28; लुका 6:1-5)
1तेसा धैल़ी त ईशू बशैघे धैल़ी खेचा बाती लागअ द डेऊंदअ। ता तेऊए च़ेल्लै ती आई दी भुखै। तिंयां लागै सील चोल़ी करै और हाथै मरोक्की करै खांदै। 2तिन्नां च़ेल्लै इहअ करदै भाल़ी बोलअ फरीसी लोगै ईशू लै, “भाल़, तेरै च़ेल्लै आसा लागै दै बशैघे धैल़ी इहै कामां करदै ज़ुंण बधाने साबै एसा धैल़ी करनअ ठीक निं आथी।”
3ईशू दैनअ तिन्नां लै ज़बाब, “तम्हैं कै कधू इहअ निं पहल़अ कि ज़धू दाबेद राज़ै ज़रुरत पल़ी और ज़ांऊं सह और तेऊए साथी भुखै तै तेभै तेऊ किज़ै किअ? 4सह किल्है नाठअ परमेशरे च़ऊंरै दी? और तेऊ किल्है खाई बेदी दी भैंट दैनी दी रोटी? ज़हा रोटी परोहिता का सुआई होर मणछ नां खाई सकदअ त और नां तेऊए साथी खाई सकदै तै?
5 “तम्हैं कै बधाना दी इहअ पहल़अ निं आथी कि परोहित हआ बशैघे धैल़ी मांदरा दी बधाना चोल़ी करै बी नर्दोश। (गणांई 28:9-10; युहन्ना 7:22-23) 6पर हुंह खोज़ा तम्हां का सत्त कि इधी आसा सह; ज़ुंण मांदरा का बी बडअ आसा!
7 “थारै बल़ीदाना करै निं हुंह खुश हंदअ, हुंह हआ खुश ज़ै तम्हैं होरी लै झींण करे। ज़ै तम्हां एसा गल्लो मतलब समझ़ै हंदै, तै निं तम्हैं मेरै इना नर्दोश च़ेल्लै दोशी बणांदै तै। (होशा 6:6) 8हुंह मणछो शोहरू आसा बशैघे धैल़ीओ बी मालक।” (मरकुस 2:28)
मछैंऐं दै हाथो मणछ ठीक करनअ
(मरकुस 3:1-6; लुका 6:6-11)
9तिधा का नाठअ सह तिन्नें सभा दी आराधना कोठी लै; 10ता तिधी त एक मणछ इहअ, तेऊओ हाथ त मछैंअ द; और तिन्नैं लोगै ईशू लै दोशा लाणें तैणीं ईशू का सुआल किअ “बशैघे धैल़ी कै एऊ मणछो लाज़ करनअ ठीक आसा?”
11तेखअ पुछ़अ ईशू तिन्नां का, “तम्हां मांझ़ै इहअ कुंण आसा कि ज़हा का एक्कै भेड़ होए और बशैघे धैल़ी पल़े सह भेड़ ढेका और सह निं तेसा बशैघे धैल़ी काढदअ? 12मणछो मोल भेडा का केतरअ खास्सअ आसा? इहअ करै आसा बशैघे धैल़ी बमारी का ठीक करनै ज़िहअ भलअ करनअ ठीक।”
13तेखअ बोलअ ईशू तेऊ मणछा लै, “आपणअ हाथ कर आजू।” तेऊ किअ आपणअ हाथ ईशू सेटा आजू और सह हाथ हुअ दुजै हाथा ज़िहअ ठीक-ठाक राम्बल़अ। 14तेखअ लागै फरीसी पंथे लोग बागै डेऊई करै ईशूए खलाफ आप्पू मांझ़ै इहै जोगा करदै कि हाम्हां पाणअ त अह किहअ करै मारी।
परमेशरो छ़ांटअ द टैहलू
15ईशू हेरी अह गल्ल भुझ़ी और सह लागअ तिधा का हांढदअ। ता बडै भारी लोग लागै तेऊ पिछ़ू हांढदै। ईशू किऐ तिंयां सोभ दाह-खिज़ा का राम्बल़ै। 16ईशू बोलअ तिन्नां भूता लै चतैनगी दैई करै इहअ, “मेरै बारै निं कोही का खोज़ी कि हुंह कुंण आसा; 17ताकि ज़ुंण बैण याशायाह गूरा बाती परमेशरै बोलअ त; सह पूरअ हई होए,
18‘भाल़ा, अह आसा मेरअ टैहलू ज़ुंण मंऐं छ़ांटअ द आसा,
अह आसा सह ज़हा लै हुंह झ़ूरा और ज़सरी हर गल्ला करै हुंह खुश आसा।
मुंह पाणीं आपणीं आत्मां एऊ दी
और तेऊ दैणअ होरी ज़ातीए सोभी लोगा लै न्याय हणैंओ समाद।
19तेऊ नां झांशा काढणीं
और नां लोगा संघै झ़गल़अ करनअ
और नां तेऊ लोगा मांझ़ै ज़ोरै गल्ला करनी।
20तेऊ करनी जैंटी दी नगाल़ै ज़िहै दुबल़ै मणछा लै झींण।
तेऊ निं हिशदी धूँआं दैंदी बाती ज़िहै खरी दी पल़ै दै मणछा मरनै दैंदअ।
तेऊ बणांणैं न्याय करी करै तिंयां नर्दोश
21और होरी ज़ातीए सोभी लोगा डाहणीं
तेऊ दी आशा।’”
ईशू और भूतो राज़अ
(मरकुस 3:20-30; लुका 11:14-23)
22तेखअ आणअ तिधी लोगै एक मणछ, सह आसा त कांणअ बी और टाट्टअ बी। तेऊ दी त भूत शाचअ द। ईशू किअ सह राम्बल़अ ता सह लागअ तेभी भाल़अ और गल्ला करदअ। 23एता लै हुऐ सोभ लोग रहैन और तिंयां लागै बोलदै, “अह कै आजू राज़ै दाबेदे लुआद आसा।”
24पर फरीसी पंथे लोगै बोलअ एसा गल्ला शूणीं करै ईशू लै इहअ, “अह काढा भूते राज़ै राख्से शगती करै भूत।”
25ईशू बोलअ तिन्नें मनें गल्ल भुझ़ी करै तिन्नां लै, “ज़हा राईसी दी फूट पल़ा सह राईसी हआ बरैबाद। कोई बी नगरी या खांनदान; ज़हा दी फूट पल़ा, सह बी हआ बरैबाद। 26इहअ करै ज़ै राख्स ई राख्सा काढे, तै हणअ सह इहअ करै आपणअ ई दुशमण। तेखअ तेऊओ राज़ किहअ करै रहणअ बणीं?
27 “ज़ै अह तम्हैं मुल्है इहअ बोला कि हुंह काढा राख्सा करै इना भूता दूर। तै हुई अह गल्ल बी शुची कि थारै च़ेल्लै बी काढा भूत राख्से शगती करै? मुखा बी आसा इहअ थोघ कि अह गल्ल आसा गलत! एसा गल्लो न्याय हेरअ तिन्नैं करी कि तम्हैं बोला झ़ुठी गल्ला।
28 “पर ज़ै हुंह परमेशरे आत्मां करै भूत काढा, तै गअ परमेशरो राज़ तम्हां सेटा पुजी। 29कोहै मणछ निं राख्सा ज़िहै जोधै मणछे घरै पेशी करै तेऊओ धन तेभै तैणीं लुटी सकदअ, ज़ेभै तैणीं की सह तेऊ जोधै मणछा बान्हीं नां लऐ; और तेखअ सका सह तेऊओ धन लुटी।
30 “ज़ुंण मुंह संघै नांईं आथी, सह आसा मेरै बरोधा दी। ज़ुंण मुंह संघै नांईं झाल़दअ सह पाआ छिंगी।
31 “तैहीता हुंह खोज़ा तम्हां का सत्त ‘मणछो सोभी रंगो पाप और निंदा हणैं माफ, पर पबित्र आत्में निंदा करनी निं माफ हणीं।’ 32ज़ुंण बी मुंह मणछे शोहरूए खलाफ कोई गल्ला करे, तेऊओ पाप सका माफ हई, पर ज़ुंण बी पबित्र आत्में खलाफ किज़ै बोले, तेऊओ ज़ुल्म एऊ संसारै ता कै च़ाल्लअ माफ हई पर आजू एछणैं आल़ै संसारै बी निं सह माफ हणअ।
बूट और तेतो फल़
(लुका 6:43-45)
33 “ज़ै बूट राम्बल़अ होए, तै हणैं तेते फल़ बी राम्बल़ै। ज़ै होए बूट नकाम्मअ तै हणैं तेते फल़ बी नकाम्मैं। किल्हैकि बूट बछ़ैणियां तेते फल़ा करै।
34 “तम्हैं आसा झ़रीली दानुईंए शोहरू ज़िहै? तम्हैं निं भली गल्ला करी ई सकदै किल्हैकि तम्हैं आसा बूरै, ज़ुंण मनैं भरअ द हआ सह ई एछा खाखा दी। 35भलअ मणछ काढा आपणैं मनें भलै भढारा का भली गल्ला और बूरअ मणछ काढा आपणैं मनें बूरै भढारा का बूरी गल्ला।
36 “हुंह खोज़ा तम्हां का सत्त कि मणछा ज़ुंण नकाम्मीं गल्ला बोल़णीं; तेभै भेटणीं तिन्नां तेते साबै सज़ा ज़ेभै परमेशरा न्याय करनअ कि तम्हैं खाखा का किज़ै-किज़ै बोलअ। 37किल्हैकि तूह हणअ आपणीं गल्ला करै ई शुचअ और आपणीं ई गल्ला करै हणअ तूह झ़ुठअ।”
स्वर्गे नछ़ैणां रहैऊंणे मांग
(मरकुस 8:11-12; लुका 11:29-32)
38एसा गल्ला लै बोलअ कई शास्त्री और फरीसी ईशू लै, “हे गूरू, हाम्हैं च़ाहा ताखा सरगै एक नछ़ैण भाल़णअ ताकि हाम्हां इहअ भरोस्सअ होए कि तूह आसा परमेशरै हाम्हां सेटा लै छ़ाडअ द।”
39ईशू दैनअ तिन्नां लै ज़बाब, “एऊ जुगे बूरै और विश्वास घात करनै आल़ै लोग लोल़ा नछ़ैण। पर योना गूरे नछ़ैणां छ़ाडी निं तिन्नां लै होर किछ़ै भेटणअ आथी। 40ज़िहअ परमेशरो गूर योना रहअ चिई राची और चिई धैल़ी पाणीं जैंदरी माहाछ़े पेटा भितरी, तिहअ ई रहणअ हुंह मणछो शोहरू बी चिई राची धैल़ी पृथूई भितरी।
41 “निनबे नगरीए लोगा बी लाणअ न्याय हणें धैल़ी एऊ ज़मानें लोगा लै दोश। किल्हैकि योना गूरे प्रच़ारा शूणीं छ़ाडी तिन्नैं बूराई करनी पर तम्हैं निं आपणअ मन बदल़अ। हेरा, इधी आसा परमेशरे गूर योना का बी बडअ।
42 “दखण देशे राणीं बी लाणअ न्याय हणें धैल़ी एऊ ज़मानें लोगा संघै उझ़ुई करै तिन्नां लै दोश कि सह आई सुलैमाने ज्ञैना शुणदी पृथूईए दुजै बाढा का पर तम्हैं निं आपणअ मन बदल़अ। हेरा, इधी आसा सुलैमाना का बी बडअ।
कज़ाण बिद्या खाआ प्राण
(लुका 11:24-26)
43 “ज़ांऊं भूत मणछा का बागै निखल़ा, सह लोल़ा शुक्की ज़ैगा दी आप्पू लै राआमा करना लै और ज़ांऊं तेऊ नांईं भेटा ता। 44तेखअ बोला सह आप्पू लै इहअ, ‘मुंह डेऊणअ तेऊ ई मणछा दी बस्सणा लै बापस ज़िधा का हुंह पैहलै आसा निखल़अ द।’ बापस फिरी करै भाल़ा सह तेऊ मणछा शुन्नैं, धोअ-शोअ और सज़ाऊऐ दै घरा ज़िहै। 45तेखअ आणा सह भूत आप्पू का बी बूरै सात होर भूत आप्पू संघै शादी और तिंयां बस्सा सोभ तेऊ दी। तेऊ मणछे हआ तेखअ पैहलै का बी खास्सी बूरी दशा। एऊ जुगे बूरै लोगे दशा बी हणीं एही।”
ईशूए आम्मां और भाई
(मरकुस 3:31-35; लुका 8:19-21)
46ज़ांऊं ईशू झाल़ै जैंदरी इना गल्ला करदअ लागअ द त, ता तेऊए आम्मां और भाऊ तै बागै खल़्हुऐ दै, और तिंयां च़ाहा तै तेऊ संघै गल्ला करनी। 47एकी बोलअ ईशू सेटा एछी करै इहअ, “भाल़, तेरी आम्मां और तेरै भाई आसा बागै खल़्हुऐ दै, और ताह संघै च़ाहा तिंयां गल्ला-बाता करनी।”
48इहअ शूणीं करै ईशू दैनअ तेऊ लै ज़बाब, “मेरी आम्मां कुंण आसा? कुंण आसा मेरअ भाई? 49मेरअ भाई-बैहण कुंण आसा? तेखअ ईशू आपणैं च़ेल्लै बाखा हाथ करी करै बोलअ, ‘ईंयां आसा मेरै आम्मां और भाई-बैहण।’ 50किल्हैकि ज़ुंण मेरै स्वर्गै रहणैं आल़ै बाप्पू परमेशरो बैण शूणां और मना तिंयां ई आसा मेरै भाई-बैहणी और आम्मां।”
Iliyochaguliwa sasa
मत्ती 12: OSJNT
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
This work is licensed under Creative Commons Attribution-ShareAlike 4.0 License.
