Mathiyu 9
9
Yisɔs puyi hati lamgba wunthe wogbɛsinkɔy
(Maki 2:1-12; Luku 5:17-26)
1Yisɔs mɛnɛ bakarandeni nama beŋ thɔɔyɛ ka gbe baŋ ba thuhande mankɔ maŋ ba duwa ka mɛti nama ka. 2Naa tɛŋ bindɛ kɛndɛ, biya sisi bathoonaŋ wogbɛsinkɔy ka yala ka Yisɔs. Yisɔs kute ba dɔma na lanɛya ba ka biya beŋ beŋ baŋ abɔyi, huna dome ndɛ ka wogbɛsinkɔy woŋ, na “Yehitɔkɔ, hatiŋ woŋ, baa yi thanki peniyo hakɛŋ nda baŋ.”
3Bikarimɔkɔiŋ binɔndi bi ka Siraŋ baŋ beŋ bi penkitiye nde kɛndɛ beŋ bohe gbonkiyɔkɔ ka yɛthɛ namɛŋ ba dɔma, na “Hati lamgba woŋ baŋ kɔŋ yetheni Masaala na.”
4Ka thagbɛmgbɛŋ thabɛina, Yisɔs kɔthɛ hu bindɛ siyi ka thathukuma namɛŋ thaŋ. Huna dome Yisɔs kɛnamɛŋ, na “Mbɛ hu beŋ siyuwe bɛyiniŋ banɛnɔy ka thathukuma ndeŋ thaŋ? 5Mbɛ wu yamɛ ŋɛnɔ, ba yaŋ dɔma ka hati lamgba woŋ baŋ, na ‘Hakɛŋ nda baŋ peniyo,’ maa, na ‘Ŋaye ka kɔɔ, e yi yatha’? 6Yaŋ kɔŋ ni ba beŋ kɔthɔ ba dɔma na wɔ wo dɔma Hati ka Wɔ woŋ kiŋ iŋ mayoho ba pɛniyɛ biya hakɛŋ bakɛnamɛŋ baŋ ka faido.” Kɛna dome ntiŋ ndɛ ka hati lamgba wogbɛsinkɔy woŋ, na “Ŋaye ka kɔɔ e yi sɛkitha yala nda baŋ e yi duwa ka banka nda ka.”
7Ka thagbɛmgbɛŋ thabɛina hati lamgba woŋ ŋaye ka kɔɔ e ndɛ duwa ka banka nama ka. 8Naa kute sɛthɛ baŋ ba thankɛ niyɔ baŋ, bindɛ fooma thooyo payɔ awa e bindɛ thunkunuwa Masaala na wumandiŋ baa ndɛ dunkuŋ mayoho maŋ maŋ ka biyamɛti.
Yisɔs thiyi Mathiyu na
(Maki 2:13-17; Luku 5:27-32)
9Naa pɛyɛŋ Yisɔs kɛndɛ e ndɛ kɔ kaa ka kɔtɔkɔy, ndɛ penke bathuu duthu wunthe wo dɔma Mathiyu doŋe ka ndɛ thuuwe duthu woŋ ka. Huna dome Yisɔs kɛnama, na “Yema yama.”
Ka thagbɛmgbɛŋ thabɛina Mathiyu ŋaye ka doŋe ndɛ ka e yema Yisɔs na ka kaa.
10Naa dɔŋɔy Yisɔs ka thɔma ka banka ba ka Mathiyu baŋ, bathuuni duthuiŋ bibɔyɛ mɛnɛ bi siyuwe bayahɛŋ bi ka dina wo ka biYusu beŋ ba bindɛ niyɔ bahakɛŋ thɔɔtɔy Yisɔs na mɛnɛ bakarandeni nama beŋ ka thɔma haŋ. 11Awa naa kute wuŋ biFaresini binɔndi beŋ, bindɛ thɔnthɔŋɔŋ bakarandeni bi ka Yisɔs beŋ ba dɔma, na “Mbɛ hu karimɔkɔ ndeŋ woŋ thome ka tha banthe iŋ bathuuni duthu woŋ beŋ mɛnɛ bahakɛŋ beŋ?”#Luku 15:1-2
12Naa yuye Yisɔs bi si nɛŋ thɔnthɔŋɔŋ, ndɛ kaaye bindɛ thayiŋ ba dɔma, na “Biya bipethɔy beŋ thimota nda bapuyi woŋ, kɛrɛ bithoonɔy beŋ bina thimo nda bapuyi woŋ. 13Kaaŋ e beŋ ka thanuwa hu tepe magbali ma ka Masaala maŋ, awa beŋ kɔŋ kɔthɔ wu yaŋ ni wuŋ.#Math 12:7 Magbali maŋ tepe ba dɔma, na ‘Nkinikiniŋ kina thimo yaŋ, awa yaŋ thimota saraka ba fuŋuno.’#Hos 6:6 Yaŋ tha see ka thiya bithumbɛ beŋ, kɛrɛ yaŋ see ka thiya bahakɛŋ beŋ.”
Kuthɔnthɔŋɔŋ ku ba bɔha suŋ baŋ
(Maki 2:18-22; Luku 5:33-39)
14Kɛna see bakarandeni bi ka Yɔni wo Babiye biye hu ka Masaala haŋ woŋ ka Yisɔs e bindɛ niŋ thɔnthiŋina ba dɔma, na “Mbɛ hu miŋ mɛnɛ biFaresini beŋ bohe suŋ, kɛrɛ bakarandeni nda beŋ boheta suŋ?”
15Naa yuye huŋ Yisɔs, ndɛ tepe bindɛ, na “E beŋ atute thukuma ba wɔ wo thiyo ba penkitiye ka kuyɛntande koŋ kɔ bɔha suŋ? Yaŋ niyeŋ lanɛya wuŋ sa niyɔ mɛnɛ bayɛnti woŋ kiŋ kɛndɛ. Ndɛ sa mɛyi ba wuŋ niyɔ. Kɛrɛ lɔkɔ baŋ ba kɔŋ see ti bayɛnti woŋ sɛkitha ka mateete namɛŋ e kato napooŋ. Ka lɔkɔ babɛina mɛŋ ntiŋ bohi suŋ.
16“Wɔ o wɔ ka wo thiyi rombo huŋama ka yaba batiyɔ, bɛyi bahɛna kutɛ rombo huŋama haŋ hu kɔŋ thuriyande e huŋ niya ba yaba batiyɔ baŋ sainɔ wumandiŋ. 17Wɔ sa hɛlɛŋ thiyi mampa maŋama ma huitu ka muthiye mutiyɔ mu yehinuwo ka kuthagba ku ka baahu e muŋ lɔŋita, bɛyi bahɛna kutɛ, muthiye muŋ mu kɔŋ thambɔ awa mampa maŋ ndo iŋ muthiye muŋ mu kɔŋ teetuwɔ. Wuna biyɛ mampa maŋama ayɔhɔ ba thiyo ka muthiye muŋama, awa ti muŋ muye sa teetuwɔ.”
Hati woyɛrɛmɛ wo ka bayaha mɛnɛ hati yɛrɛmɛ wo boheke Yisɔs na yaba baŋ woŋ
(Maki 5:21-43; Luku 8:40-56)
18Naa nde Yisɔs hintiŋ gbonkoy, bayaha wo ka banka bathuŋuyande ba ka biYusu beŋ baŋ see kunthuŋ ka kɔtɔkɔy ka Yisɔs e dɔma, na “Hatiŋ woyɛrɛmɛ na nthɔŋ dɔy tuka woŋ. Kɛrɛ yaandi kaa, yi be niŋ ka tutu yɔnkɔ nda haŋ, ndɛ kɔŋ pethɔ.”
19Yisɔs mɛnɛ bakarandeni nama beŋ ŋaye yako, bindɛ yeme niŋ ka kaa.
20Naa bindɛ key, hati yɛrɛmɛ wunthe kiŋ nde kɛndɛ wo bare ka niyɔ iŋ nthoonaŋ ki ka yɛrɛmɛŋ ba thanina kɔhi iŋ thaye. Ndɛ yeme Yisɔs na mahɛŋ e ndɛ boheke kulɛmpilɛmpi ku ka yaba nama baŋ koŋ. 21Hati woyɛrɛmɛ woŋ baŋ tepe ka yɛthɛ nama, na “Hali hɔkɔŋ aboheke na yaŋ yaba nama baŋ, yaŋ kɔŋ pethɔ.”
22Yisɔs sikiyɔkɔy mahɛŋ e ndɛ kuta hati woyɛrɛmɛ woŋ, awa huna dome ndɛ kɛnama, na “Yehitɔkɔ, hati woyɛrɛmɛ, yi peniyo hakɛŋ nda baŋ, awa lanɛya bakɛnda baŋ ni ba yi pethɔ.” Ka thagbɛmgbɛŋ thabɛina hati woyɛrɛmɛ woŋ pethɔy.
23Awa naa tɛŋ Yisɔs ka banka ba ka bayaha woŋ baŋ, ndɛ penke bathurɔkɔiŋ bi hɔŋ nthoriyɛŋ ba tuka haŋ e biya muŋ kɔ manka poro. 24Huna dome Yisɔs kɛnamɛŋ, na “Fuŋaŋ dondo baŋ fooma. Hati woŋ tuketa, nine ma nine.”
Naa yuye huŋ biya beŋ, bindɛ bohe hɛtha Yisɔs na. 25Naa funkutu ndɛ bindɛ ka gbada ka, Yisɔs biyande ka ŋoye hati woŋ ka e ndɛ niŋ ka bɔha yɔnkɔ, awa e niŋ ŋayina ka kɔɔ. 26Awa bɛyiniŋ ba ni Yisɔs baŋ baŋ fooma see gbanthande ka bompi wobɛina.
Yisɔs puyi biya biye bi mankɔy thaaya
27Naa pɛyaŋ Yisɔs kɛndɛ e ndɛ kɔ kaa, kɛna yemo ndɛ iŋ lamgbeŋ biye bi mankɔy thaaya. Biya beŋ beŋ baŋ yele thampa wutɔɔkɛ ka Yisɔs e bindɛ dɔma, na “Kutiyɛ mina nkinikiniŋ, yindo hati ka Dauda woŋ.”
28Naa biyande Yisɔs ka banka banthe, biya bi mankɔy thaaya beŋ see kɛnama. Huna dome Yisɔs kɛnamɛŋ, na “E beŋ siyuweŋ ba yaŋ kɔ punka bena puya?”
Huna dome bindɛ ka Yisɔs, na “Ndo, hɛmɔŋ, yi kɔŋ punku mina puya.”
29Kɛna boheke Yisɔs thaaya namɛŋ thaŋ e ndɛ tɛpa ba wuŋ niyɔ, na “Haliko wu niyɔ nɛŋ na niye beŋ lanɛya na.” 30Ka thagbɛmgbɛŋ thabɛina thaaya namɛŋ thaŋ pɛthɔy, bindɛ kute nagberekethe. Kɛrɛ Yisɔs yeli bindɛ wukahɛ-kahɛ ba dɔma, na “Baŋ ni ba wɔ yo wɔ huŋ kɔthɔ.”
31Kɛrɛ bindɛ tha punku bohiteke. Bindɛ key huŋ kaŋ tɛɛpuwa fooma ka bompi wobɛina.
Yisɔs puyi wɔ mankɔy hothi
32Naa biya beŋ beŋ baŋ key, biya bihɛna sisi wɔ mankɔy hothi ka Yisɔs. Ndɛ punketa gbonkiya baa wayi na bɔhɛ niŋ. 33Naa kaninando hati wowathe woŋ iŋ wayi woŋ, ndɛ gbonkoy. Awa sɛthɛ ba pɛnkande baŋ ni thakaba wumandiŋ, e bindɛ dɔma, na “Miŋ kuita hɛ hanthe bɛyi ba niyɔ baŋ baŋ ka Isirɛli.”
34Kɛna dome biFaresini beŋ, na “Ndɛ kɔŋ kaninande biya mbayiŋ ka sɛmbɛ ba ka gbaku wo ka mbayiŋ beŋ woŋ.”#Math 10:25; 12:24; Maki 3:22; Luku 11:15
Yisɔs kutiye biya beŋ nkinikiniŋ
35Awa naa nde Yisɔs kaande kɛndɛ fooma ka mɛtiŋ babukuyuwɛ baŋ mɛnɛ ka thabikidiŋ thaŋ, ndɛ kɔŋ nde thanani biya beŋ ka bankɛŋ bathuŋuyande baŋ, awa e ndɛ kɔ niya kɛwandi Huseri Huyɔhɔy haŋ ba Hugbakinɛ hu ka Masaala haŋ, awa e ndɛ kɔ puya fooma nthoonani kihakuwande mɛnɛ kɔnthɔhiliŋ bi ka ŋakɔtɔ fooma ka biya bi kɛndɛ beŋ.#Math 4:23; Maki 1:39; Luku 4:44 36Naa kute Yisɔs sɛthɛ baŋ, ndɛ kutiye bindɛ nkinikiniŋ, baa bi teetuwɔy thathukuma bina awa bindɛ punketa ba mase yɛthɛ namɛŋ. Biya bina bi thɔyande nɔŋ takɛŋ bi ka iŋ batɔli.#Kɔn 27:17; 1 Gb 22:17; 2 Mbɔ 18:16; Isi 34:5; Sɛk 10:2; Maki 6:34 37Huna dome ndɛ ka bakarandeni nama beŋ, na “Biya beŋ beŋ athɔyande nɔŋ ŋɔna humandiŋ, kɛrɛ baŋɔni beŋ athahuwɔ. 38Huna niyaŋ kuraminɛ haliko wo biyɛ ŋɔna haŋ woŋ be tɔŋɔti baŋɔni ka ŋɔna haŋ.”#Luku 10:2
Iliyochaguliwa sasa
Mathiyu 9: LMBNT
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© The Bible Society of Sierra Leone, 2011
