Mathiyu 6
6
Mathanani ma na na niye bayɔhɔy
1“Niyaŋ kuthɛgbɛ ba beŋ be tha tindɛ tɔŋinɔkɔ ka biyamɛti ka bayɔhɔy ba beŋ ni ba dɔma na badinɛŋ bina beŋ, haliko beŋ be gbuŋunuwa iŋ biyamɛti.#Math 23:5 Mɛnɛ wuŋ niiye nɛŋ, beŋ ka nda iŋ kuthunkuŋ maŋaye ka Fanda ndeŋ wo ka ariana woŋ.
2“Naa yi dunkuŋ munkii mukɛnda muŋ ka bamɔnɛŋ beŋ, ba key kaŋ teepuwe biya nɔŋ ka wɔ key kaŋ hɔŋa kuthuthu. Ba ni nɔŋ na banitɔkɔiŋ beŋ ni na ka bankɛŋ bathuŋuyande baŋ, mɛnɛ ka mɛti baŋ, haliko bi be gbuŋunuwa iŋ biyamɛti. Yaŋ kɔŋ bena tepe nɔndi baŋ, bindɛ thanki nda kuta kuthunkuŋ kukɛnamɛŋ fooma. 3Kɛrɛ naa beŋ kɔ dunkuŋ munkii mukendeŋ muŋ ka bamɔnɛŋ beŋ, baŋ ni ba yɔnkɔ hupɔkɔdɔ haŋ kɔthɔ ba huthome haŋ ni. 4Dunkunaŋ munkii ndeŋ muŋ ka nunɔkɔy. Fanda ndeŋ wo kutɛ bena ka nunɔkɔy woŋ, ndɛ kɔŋ bena thunkuŋ.
Mathanani ba na na niye kuraminɛ
(Luku 11:2-4)
5“Awa naa beŋ kɔ ni kuraminɛ, baŋ niyɔkɔ nɔŋ banitɔkɔiŋ beŋ, baa bindɛ athimo ba kɔɔ ka kɔtɔkɔy ka niya kuraminɛ ka bankɛŋ bathuŋuyande baŋ mɛnɛ ka thapɛthandeŋ thaŋ, haliko bi be kuta iŋ biyamɛti.#Luku 18:10-14 Yaŋ kɔŋ bena tepe nɔndi baŋ, bindɛ thanki nda kuta kuthunkuŋ namɛŋ koŋ. 6Kɛrɛ naa beŋ bathɔy ba niya kuraminɛ, biyandeŋ ka makonko ndeŋ maŋ e beŋ manka biyo haŋ, awa e beŋ niya kuraminɛ ka Fanda ndeŋ wo sa kuta woŋ. Awa Fanda ndeŋ wo kutɛ bɛyiniŋ ba ni beŋ ka nunɔkɔy woŋ, ndɛ kɔŋ bena thunkuŋ.
7“Awa naa beŋ kɔ ni kuraminɛ, baŋ tindɛ gbonkoy thasɔkɔiŋ thabɔyɛ tha ka waŋ nɔŋ na biya bi be ni Masaala na lanɛya beŋ ni na, baa bindɛ siyi ba dɔma na bi kɔŋ yuya ba gbonkiya namɛŋ hubɔyɛ haŋ. 8Baŋ niyɔ nɔŋ bindɛ, baa Fanda ndeŋ wo ka ariana woŋ kɔthɛŋ mu panke beŋ saanuŋ beŋ ba niŋ thɔnthiŋina. 9Nanaŋ baŋ na beŋ niye kuraminɛ: na
‘Fanda ntuŋ wo ka ariana, haliko keŋ nda kukuwɛ koŋ ku niyo yiki.
10Haliko huybakine nda haŋ hu kɛriŋa ka faydo; haliko bɛyiniŋ ba thimo yi baŋ ba niyɔ ka faydo nɔŋ na bɛŋ niyɔ ka ariana na.
11Nkaa hɛ mina mu miŋ thɔŋ.
12Pɛniyɛ mina banɛnɔy ba thanki miŋ niya baŋ,
nɔŋ na miŋ pɛniyɛ bi mina ni wunɛnɔy beŋ.
13Ba mina kati ka miŋ ka gberiŋinuwo,
kɛrɛ fuŋuta mina ka yɔnkɔ hu ka Sithani, Wɔ Nɛnɔy woŋ.’
14“Mɛnɛ beŋ pɛniyɛ biyamɛti banɛnɔy ba bindɛ bena ni, Fanda ndeŋ wo ka ariana woŋ kɔŋ nɛnɛ bena pɛniyɛ banɛnɔy bakendeŋ baŋ. 15Kɛrɛ mɛnɛ beŋ tha pɛniyɛ biyamɛti banɛnɔy bakɛnamɛŋ, Fanda ndeŋ wo ka ariana woŋ sa nɛnɛ bena pɛniyɛ banɛnɔy ndeŋ baŋ.#Maki 11:25-26
Mathanani ma ka bɔha suŋ
16“Naa beŋ bohe suŋ baŋ, baŋ ŋuru nɔŋ na banitɔkɔiŋ beŋ ni na, baa bi kɔŋ ŋuru haliko wu be kothiyo ba bindɛ bɔha suŋ. Yaŋ kɔŋ bena tepe nɔndi baŋ, bindɛ thanki nda kuta kuthunkuŋ namɛŋ koŋ. 17Kɛrɛ naa beŋ bohe suŋ baŋ, puyinaŋ thankaha ndeŋ thaŋ mayɔ awa e beŋ loka thayethi ndeŋ thaŋ natharaŋ, 18wuna sa biya kɔthɔ ba beŋ bɔha suŋ. Kɛrɛ Fanda ndeŋ, wo sa biyamɛti kutu woŋ, ndɛ kɔthɛŋ ba beŋ bɔha suŋ. Ndɛ Fanda ndeŋ, wo kutɛ bɛyiniŋ ba beŋ ni ka nunɔkɔy woŋ, ndɛ kɔŋ bena thunkuŋ.
Hudinhaŋiya hu ka ariana haŋ
(Luku 12:33-34)
19“Baŋ kɔsɔŋ hudinhaŋiya hukendeŋ haŋ ka faido du mɔɔki mɛnɛ makenkeretiŋ huŋ teetuwe do,#Yem 5:2-3 du batuwani thinki banka do e bindɛ muŋ biiyande ba muŋ tuwe. 20Kɛrɛ kɔsinaŋ nanhuluiŋ bakendeŋ baŋ ka ariana ka sa mɔɔki mɛnɛ makenkeretiŋ bɛŋ teetuwe, awa batuwani sa kɛndɛ thinki ba bɛŋ biiyande ba bɛŋ teetuwa. 21Ka nanhuluiŋ bakɛnda baŋ, kɛna thukuma hukɛnda haŋ.
Waŋ ba ka kɔtɔ koŋ baŋ
(Luku 11:34-36)
22“Thaaya thakɛnda thaŋ thɛna mumɔɔli mu ka kɔtɔ koŋ. Mɛnɛ thaaya thakɛnda thaŋ tha kiŋ thayɔhɔy, kɔtɔ kukɛnda koŋ fooma ku kɔŋ thiŋa iŋ waŋ. 23Kɛrɛ mɛnɛ thaaya thakɛnda thaŋ yeheta, kɔtɔ kukɛnda koŋ ku kɔŋ thiŋa iŋ huntuma. Awa mɛnɛ waŋ ba yina baŋ kiŋ huntuma, huntuma hubɛina hu kɔŋ niyɔ humandiŋ.
Baŋ niyɔkɔ thɔrɔ
(Luku 16:13; 12:22-31)
24“Wɔ o ka wo niyiyɛ marikiŋ biye wali kɔɔ hanthe. Lɔkɔ hɛ ndɛ kɔŋ thambo woŋ baŋ, e thimo woŋ baŋ. Maa ndɛ kɔŋ mɛyi yamari wo ka woŋ, e ndɛ yethitɔ woŋ baŋ. Wɔ ka wo niyiyɛ Masaala na wali, e ndɛ hɛlɛŋ kɔ niya wali ba kuta hudinhaŋiya.
25“Huna yaŋ tepe bena, baŋ ŋataŋ thukuma ba siini ndeŋ baŋ ba mu beŋ thɔŋ, maa mu beŋ thiiye, maa ba ŋakɔtɔ ŋakendeŋ ŋaŋ ba mu beŋ thɔɔ. E sii baŋ yameta ba muthɔma muŋ, awa e kɔtɔ koŋ yameta ba mupithi muŋ? 26Dethaŋ hɛ bɛtiŋ bikeŋɛ beŋ. Bindɛ ka iŋ dumgbuiŋ, bindɛ ŋoneta e bindɛ biita ka ŋahunkuŋ, kɛrɛ Fanda ndeŋ wo ka ariana woŋ kɔŋ bindɛ thɛriyɛ. E beŋ yameta niyɔ waŋ ba bindɛ? 27Mbɛ wɔ bɛina ka beŋ wo ŋataŋ thukuma ba sii nama baŋ haaŋ e ndɛ ndinta wakathi wunthe ba tɔyina sii nama baŋ ka kɔtɔkɔy?
28“Mbɛ hu beŋ niyeke thɔrɔ ba mu beŋ pithi? Siyuwaŋ hɛ musɛnkɛŋ mu ka ŋayeŋ ŋaŋ muŋ nɔŋ na muŋ senkine na. Muŋ niyeta wali, muŋ yehinuweta mupithi ba yɛthɛ namɛŋ. 29Kɛrɛ yaŋ tepe bena, hali nde hintiŋ gbaku woŋ Silamani iŋ hudinhaŋiya nama haŋ fooma,#1 Gb 10:4-7; 2 Mbɔ 9:3-6 ndɛ tha punku gbɛkitɔkɔ mupithi muyɔhɔy nɔŋ musɛnkɛŋ muŋ muŋ baŋ. 30Masaala gbɛkɛti mupithi muyɔhɔy hande hu ka boi ka haŋ, hu hɛ bathɔ haŋ, mɛmpɛ nda hu thithɛ e huŋ toonuwo. E ndɛ sa bena gbɛkɛti mupithi muyɔhɔy? Biya bina beŋ bi iŋ lanɛya bathahuwɔy.
31“Huna baŋ niyɔkɔ thɔrɔ ba dɔma, na ‘Mbɛ mu hɛ miŋ thɔŋ?’ maa ‘Mbɛ mu hɛ miŋ thiiye?’ maa ‘Mbɛ mu hɛ miŋ pithi?’ 32Muŋ muŋ baŋ fooma mu na biya bi be ni Masaala na lanɛya beŋ deethi, awa Fanda ndeŋ wo ka ariana woŋ kɔthɛŋ ba beŋ muŋ panka fooma. 33Kɛrɛ niyaŋ hintiŋ ba Masaala kɛriŋiyɛ siini bakendeŋ baŋ awa e beŋ niya bɛyiniŋ ba thɔnthɔŋɔŋ ndɛ bena baŋ, awa ndɛ kɔŋ bena dunkune muŋ muŋ fooma. 34Huna, baŋ ni thɔrɔ ba mɛmpɛ, baa mɛmpɛ ba kɔŋ teŋo thɔrɔ wokɛnama. Gbɛɛŋ ndo gbɛɛŋ ba kɔŋ teŋo wukahɛ wukɛnama.
Iliyochaguliwa sasa
Mathiyu 6: LMBNT
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© The Bible Society of Sierra Leone, 2011