SISIKON NU TO RASUL-RASUL 3
3
Mian anu kapi' pina'alin
1Daagi' kino sansinaan i Petrus ka' i Yohanes namba i Laigan nu Tumpu jam totolu' ohanimo malom, tempo'nyomo nu balado'a. 2I kiijo' mae i sabatan anu osanggohi “Sabatan Ma'ima'”, daagi' ko samian na mo'ane anu kapi' salatan pe'e i hampe. Toka sansina-sinaa mian aijo' oboa mokiijo' da momoita hi to mia-mian anu minsoop i Laigan nu Tumpu. 3Salatan mian aijo' nontoa i Petrus ka' i Yohanes hau-haunyomo minsoop mokiijo'mo i Laigan nu Tumpu, ia nompoita hi aha da mombee'i apa-apaa hi ia. 4Sahingga aha nontonto'i ia, lapas aijo' i Petrus notatae, “Toa mae na kami!” 5Lantas mian aijo' nompalahatikan aha ka' nontaha'imani mohumpak apa-apaa lengkat hi aha. 6Panyo i Petrus notatae hi ia, “Aku madi' hondo ko doi. Panyo apaa na anu daagi' hi belengku, aijo' na ku bee' hi beleyum: Tiba kuasa i Yesus Kristus mian nu Nazaret aijo', lajangmo!” 7Lantas i Petrus nontoongi limanyo koanan nu mian anu kapi' aijo' ka' nontulungi ia tuminjo nombulaakon ia. Lau-laus tengke nu mian aijo' ka' bulansingnyo timbalimo nahoson. 8Lantas ia nalalumpat tinuminjo, ka' mulai i lumajang mokiijo' ka' no'uuka mae. Lapas aitu ia ninsoop nokiijo' i Laigan nu Tumpu nojajalan tiba i Petrus ka' i Yohanes, hau-haunyo i lumajang maha-mahalumpatan ka' mompuji-puji' Tumpu. 9Iwi-iwi' na mian nontoa ia i lumajang ka' nompuji' Tumpu Allah. 10Lantas aha aitu sininsumbu'je saba' iamo aitu na anu saja' mompoita ka' biasanyo sumuhang i “Sabatan Ma'ima'”, i Laigan nu Tumpu. Aha binangang hondo ka' tinonto' na nontoa apaa na anu jinadimo hi ia.
I Petrus nombee'i sisik i uno nu Laigan nu Tumpu
11Mian aijo' saja'mo ahi' mombatuki Petrus ka' i Yohanes. Ka' tempo'nyo aha totolu'tinoka i gandalia anu osanggohi “Gandalia i Salomo”, iwi-iwi' na mian tinoka sinihuk hi aha kalana binangangmo. 12Salatan i Petrus nontoa to mia-mian aijo', ia notatae hi aha, “O, to mia-mian Israel, kadaka' to Utu-utus bangang i han aiya? Kadaka' komiu saja' montoa mae kami? Apaa komiu monsangka mian aiya timbali lumajang kalana ko kuasa hi kami kabai kalana kami mohongo-hongo hi Tumpu? 13#Kel. 3:15 Tumpu anu o sombah i Abraham, i Ishak, ka' i Yakub, Tumpu nu mompolee'to, Tumpu aijo' nompopodaka'mo Posaihon-Nyo aijo'mo i Yesus. I Yesus aijo'mo na anu binee' miu hi aha anu mongkuasai, ka' komiumo na sampo bali'nyo i ahop i Pilatus, tempo'nyo i Pilatus ka'oho'mo molapasakon Ia. 14#Mat. 27:15-23, Mrk. 15:6-14, Luk. 23:13-23, Yoh. 19:12-15 Ia Susi' ka' ma'ima', panyo komiu mombahakon Ia ka' mompakisa da i Pilatus molapasakon samian na topo patei hi komiu. 15To utu-utus mompateimo Ia, padahan Iamo na pinolengkatan nu kantumuu'an bau kapentingan nu iwi-iwi' mian. Ka' Tumpu po'ule'mo nompotumuu' ia lengkat i kapateannyo. Kami nonsakisimo han aijo'. 16To utu-utus nontoamo ka' nonsakisimo apaa na anu jinadimo tiba mian kapi' aiya. Ia po'ule'mo nahoson ka' sinehat kalana ia palesaya hi Yesus ka' kuasa-Nyo. Kalana palesaya hi Yesus, sahingga mian aiya po'ule'mo sinehat i ahop nu to Utu-utus iwi-iwi'.
17To Utu-utus! Uuka sinumbu'kumo saba' apaa na anu binaumo miu ka' to pola-polaya' miu mongkona i Yesus, aijo' binaumo miu kalana komiu madi' monsumbu' apaa na anu hau-haunyo binaumo miu. 18Ka' kalana aijo'mo na jinadi suele apaa na anu noko poto'imo nu Tumpu u'utu mae hi to nabi-nabi-Nyo, anu pinotokanyomo hi komiu saba' Tomundo anu Momposalamat anu jinanji'mo aijo' tionyo mongoa'i sansala. 19Mokonyo aijo' to Utu-utus, balatobatmo i dosa-dosa' miu ka' pinsusule'mo mae hi Tumpu, da Ia mongalinakon dosa-dosa' miu. 20Tumpu tokaje hi komiu da komiu mongoa'ije kasanangan kalana kapalesaya'an. Ka' Tumpu monsaije i Yesus hi komiu, kalana Ia tinantukanmo nu Tumpu timbali Tomundo anu Momposalamat hi komiu. 21Ia tionyo jojoong i suluga' sampe Tumpu mompotimbalimo iwi-iwi' bu'ou sumo anu tinaloakonmo nu Tumpu hi to nabi-nabi-Nyo, anu pinotokanyo hi komiu daagi' pe'e u'utu mae. 22#Ul. 18:15, 18 I Musa toho'mo notatae, ‘Tumpu Tumpu miu monsaije hi komiu samian na nabi lengkat i posi bansa miu, sumo Ia nonsaimo aku. Komiu tionyo mohongo iwi-iwi' anu nutaloakon nu nabi aijo' hi komiu. 23#Ul. 18:19 Mian anu madi' mompalahatikan apaa na anu nutaloakon nu nabi aijo', mian aijo' osabatakon lengkat hi mian anu palesayamo hi Tumpu ka' o silakai.’ 24To nabi-nabi anu toho'mo nompotokakon lele lengkat hi Tumpu Allah, lengkat pe'e hi Nabi Samuel ka' nabi-nabi sangga'at anu tinokaje i mihi, iwi-iwi' monsisikakon mongkona tempo' aiya. 25#Kej. 22:18 Anu lewa' Jinanji' nu Tumpu anu pinotokakonmo nu to nabi-nabi aitumo toka hi to Utu-utus. I uno nu Palajanjian anu binau nu Tumpu tiba mompolee' miu, Tumpu notataemo hi Abraham sumo uuka, ‘Lengkat mae i lee' miu Kubalakatije iwi-iwi' na bansa i dunia aiya.’ Palajanjian aijo' bau kapentingan miu suele. 26Aijo' na sababnyo Tumpu nompile'i Posaihon-Nyo, lantas nonsai Ia toka mae hi komiu momonanyo, da Ia mombalakati komiu. Bau-baunyo nu Ia mombalakati aijo'mo mompotimbali to Utu-utus iwi-iwi' balatobat i bau-baunyo nu kantumuu'anum anu ma'idek.”
Iliyochaguliwa sasa
SISIKON NU TO RASUL-RASUL 3: LAILOE
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
