SISIKON NU TO RASUL-RASUL 10
10
I Petrus ka' i Kornelius
1I Kaisarea daagi' ko samian na mo'ane sanggonyo i Kornelius. Ia samian na kapiteng nu “Tompukan nu Suludadu nu Italia.” 2Ia mian anu mabuhuk hi Tumpu ka' iwi-iwi' na to utu-utusnyo monsombah Tumpu. Ia saja' montulungi mian nu Yahudi anu kasiasi, ka' ia saja' balado'a hi Tumpu. 3Daagi' kino sansinaan kila-kila jam totolu' ohanimo mopatas ia nontoa manasa hondo samian na Malaikat nu Tumpu tinoka ka' nolaga ia, “Kornelius!”
4I Kornelius nontonto'i Malaikat aijo' ka' nabuhukmo lantas notatae, “Daagi' ko apaa Tuan?”
Tinaaman nu malaikat aijo', “Do'aum ka' ka'ima'an nu kinyonyoaum tinalimamo nu Tumpu ka' Tumpu nonginau'mo beleyum. 5Uuka aiya saimo na mian mokiijo' i Yope molaga i Simon anu sanggonyo ahi' hondo-hondo i Simon Petrus. 6Ia daagi' sinonsoo' sasaingoni' i laigan nu topo ka'ut kilit sanggonyo i Simon, anu jojoong i sonibi nu bone'.” 7Salatan nambamo na malaikat anu bina-binasisik ka' i Kornelius aijo', i Kornelius nolaga ua'aha na mian posaihonnyo i uno nu laigan ka' samian na suludadu anu saja' monsangalui ia ka' pa'agama. 8I Kornelius nonsisikakon hi aha apaa na anu jinadimo, lantas nonsai aha mokiijo' i Yope.
9Dodododopnyo sina-sinaa, hau-haunyo aha lumajang ka' malia'mo toka i Yope, i Petrus noliba' nokiita' i laigan ka' binalado'a. 10Ia talalomo no'ohop ka' ka'oho'mo mongkaan. Hau-haunyo momposadia anu o kaan, ia nontoa sa'angu' na han anu pinotoa nu Tumpu. 11Tinoanyo langit tinabuka'mo ka' sumo hude anu bolaa inguluakon i dunia, kala-kalayo' i opat na pasu'nyo. 12I unonyo aijo' ko binatang manjoo' na ngahannyo anu opat na tengkenyo, iwi-iwi' binatang anu jumolo, ka' to tomo-tomonsi' anu ma'ela'. 13Lantas daagi' kino lewo' notatae hi ia, “Petrus pobulamo! Kolotmo ka' kaanmo!”
14Tinaaman i Petrus, “Madi', Tumpu! Ma'isa toho' aku nongkaan apa-apaa anu madi' timbali o kaan kabai anu pahengas.” 15Panyo lewo' aijo' notatae mule' hi ia, “Apaa na anu tinaloakonmo nu Tumpu timbali o kaan, bolimo nu sangka aijo' madi' timbali o kaan.” 16Anu pinotoa aijo' pino uli-ulit sampe pinintolun, lapas aitu hude aijo' tinohangkatje nokiita' i suluga'.
17I Petrus biningungmo na mompotutugakon apaa na alati'nyo nu anu tinoanyo aijo'. Hau-haunyo i Petrus mompotutugakon, to mia-mian anu sinai mae i Kornelius nolio pa' iya na laigan kinasonsoo'an i Simon tempo'nyo aijo' aha anu nolio kiijo'mo i ahop nu tumban. 18Lantas aha nolaga mian ka' nompokilawa, “Apaa daagi' ko mian anu sinonsoo' i aiya, sanggonyo i Simon Petrus?”
19Hau-haunyo i Petrus daagi' solaa' mompotutugakon da nu sumbu' na alati'nyo nu anu tinoanyo aijo', Roh nu Tumpu notatae hi ia, “O, Petrus, daagi' ko aha totolu' hau-haunyo molio beleyum. 20Inda lia-lia' pintau' mokaiyong boli bata-bata na mombatuki aha, kalana Akumo na nonsai mae aha.” 21Sahingga i Petrus nintau' nokaiyong ka' notatae hi mian haha aijo', “Akumo na anu nulio nu to Utu-utus. Te ko makisut apaa na to Utu-utus toka mae uuka?”
22Tinaaman nu aha, “Kapiteng Kornelius nonsai mae kami toka mae i uuka. Ia samian anu ma'ima' ka' mabuhuk hi Tumpu, tiba talalo otabea'i nu iwi-iwi' mian Yahudi. Samian na malaikat nu Tumpu nonsai ia mompoita i Tuan toka pe'e i laigannyo kalana, salaku bau pontaami do'anyo, ia sinai mohongo apaa na anu otaloakon i Tuan hi ia.” 23I Petrus nolaga aha minsoop da sonsoo' pe'e i kiijo'.
Dodododopnyo i Petrus nobula ka' namba hingga-hinggat tiba aha. To pia-piangkuka na mian anu palesaya lengkat mae i Yope nombatukmo suele. 24Sinansinaa aha tinokaje i Kaisarea. I kiijo' mae aha saja'mo tinanda'an i Kornelius tiba to Utu-utusnyo ka' to sanga-sangalunyo anu mompahakanaya anu i laganyomo. 25Salatan i Petrus tinokamo, i Kornelius nambamo nolabot ia ka' nonsombah i ahopnyo. 26Panyo i Petrus nontulungi ia tinuminjo, lantas notatae, “Pobulamo! Aku pe'e suele ahi' mian.” 27Hau-haunyo basisik tiba i Kornelius, i Petrus ninsoopmo i uno nu laigan. I kiijo' ia nontoa da'isanmo na mian anu sinilimu'. 28Lantas ia notatae hi aha, “Posi to Utu-utus monsumbu' saba' mian nu Yahudi o tewa' nu agamanyo na mamba molenga kabai mompahasumbu' tiba to mia-mian lengkat i bansa sangga'at. Panyo Tumpu nompotoamo hi belengku, saba' aku madi' timbali monsangka mau pe'e ihe pahengas kabai madi' timbali o kaan. 29Aijo' na sababnyo salatan i Tuan nompoita da aku toka mae, aku madi' mombahakon. Jadi uuka aiya aku mongkahanda'i monsumbu', kadaka' i Tuan mompoita aku toka.”
30Tinaaman i Kornelius, “Tolunsinaamo ka' uuka kila-kila tempo'nyo sumo uuka aiya, aku hau-haunyo balado'a i laigan jam totolu' ohanimo malom. Monti-montiik samian na mo'ane tinuminjo i ahopku. Baju' nu mian aijo' jongkilaban. 31Ia notatae, ‘Kornelius! Tumpu nontalimamo do'a nu beleyum ka' monginau' ka'ima'an nu kinyonyoaum. 32Jadi saimo na mian mokiijo' i Yope molaga mian anu sanggonyo i Simon Petrus. Ia daagi' sinonsoo' i laigan nu samian anu topo ka'ut kilit sanggonyo i Simon; laigannyo aijo' i sonibi nu ambai.’ 33Aijo' na sababnyo aku nalia-lia' nonsai mian mamba molaga i Tuan. Ka' i Tuan totu'u ma'ima' na kinyonyoa da toka mae. U'uka aiya kami iwi-iwi' silimu'mo i ahop nu Tumpu, da mohongo iwi-iwi' anu osaiakon nu Tumpu da otaloakon i Tuan hi kami.”
Pidatu i Petrus
34 #
Ul. 10:17
Lantas i Petrus notatae, “Uuka aiya aku totu-totu'u sininsumbu'mo taalu' Tumpu mombau iwi-iwi' mian pokakana. 35Mian anu mabuhuk hi Tumpu ka' mombau anu ma'ima', mian aijo' otalima nu Tumpu, madi' mompile'i ia bansa apaa. 36Sinumbu'mo nu to Utu-utus na isi nu lele anu pinotoka nu Tumpu hi bansa Israel. Lele aijo' aitumo Lele Ma'ima', mongkona paladamean hi Yesus Kristus, aitumo Tumpu nu iwi-iwi' mian. 37Komiu nonsumbu'mo apaa na anu jinadimo i songko-songko na Yudea, aijo'mo anu mulai lengkat i Galilea noko lapas na palamandian anu pinoto'i i Yohanes. 38Komiu nonsumbu'mo saba' Tumpu nompile'imo i Yesus mian nu Nazaret aijo' ka' nombee' hi Ia Roh nu Tumpu ka' kuasa. Komiu mule' nonsumbu'mo saba' i Yesus namba iyaya mae da mombau anu ma'ima'; Ia nompa'alin iwi-iwi' mian anu kinuasanmo nu Ibilis, sabab Tumpu mongkalibosi Ia. 39Kamimo aiya na to mia-mian anu nosi toamo sagala apa-apaa anu binaunyo i kampung nu mian Yahudi ka' i Yerusalem. Mau pe'e sumo aijo' aha nonsalibmo ka' nompateimo Ia. 40Panyo i sinaa ko totolu'nyo Tumpu po'ule'mo nompo tumuu' Ia lengkat i kasilakannyo ka' nompotoa Ia hi mian; 41madi' hi iwi-iwi' na mian, sambiha'nyo ola posi kami anu pinile'anmo nu Tumpu i momonanyo da timbali to saki-sakisi-Nyo: Kami nongkaan ka' nonginum tiba Ia, salatan Ia po'ule'mo tinumuu' lengkat i kasilakan-Nyo. 42Ka' Ia nonsai kami mompolele Lele Ma'ima' aijo' hi to mia-mian ka' nombee'i katalangan koonyo Iamo na anu i hangkat nu Tumpu da timbali Mian Kopian nu to mia-mian anu daagi' tumuu' ka' to mia-mian anu sinilakamo. 43Iwi-iwi' to nabi-nabi motatae mongkona Ia. Aha notatae tukoonyo iwi-iwi' mian anu palesaya hi Yesus, o ampunije na dosa'nyo nu kakuasa'an lengkat hi Yesus.”
To mia-mian misa' Yahudi mohumpak Roh nu Tumpu
44Hau-haunyo i Petrus daagi' basisik, Roh nu Tumpu nintatau'mo ka' nongkuasaimo iwi-iwi' mian anu nohongo lele aijo'. 45To mia-mian nu Yahudi anu palesayamo hi Yesus ka' nombatukimo i Petrus lengkat i Yope, iwi-iwi' binangang na nontoa Tumpu nombee'i suele Roh-Nyo hi to mia-mian bansa sangga'at anu misa' Yahudi. 46Sabab aha nohongo to mia-mian aijo' notatae i uno nu lupa-lupa nu basa' ka' mompuji-puji' Kadaka'an nu Tumpu. Lantas i Petrus notatae, 47“Soba toa, to mia-mian aiya nohumpakmo Roh nu Tumpu sumo kita. Jadi moko ala na mian montewa' aha o palamandikan nu uee?” 48Sahingga i Petrus nonsai aha da o palamandikan nu sanggo i Yesus Kristus. Ilapas aijo' pinoita nu aha da i Petrus jojoong tiba aha to pia-pian sinaa na kopinnyo.
Iliyochaguliwa sasa
SISIKON NU TO RASUL-RASUL 10: LAILOE
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
