MATIUS 25
25
Sarḇer ro inkbor samfur
25:1-13
1 #
Luk. 12:35
“Rofyor ani Ḇaḇesasoser Boiyaswa imnis inkbor samfur, ḇeyun parambrom sena ma sra sisrow manfakawinya. 2Rim ro fandu si sifawi royoḇa mḇoi rim ḇese sya sifawi nananem. 3Inkbor ḇefawi royoḇa ssun parambrom sena, ḇape ssun mani ḇa, 4mḇoi inkbor ririm ḇefawinananem ansi ssun parambrom sena ma mani kako ro botol sena. 5Ḇape snon manfakawin ani ryama fasauḇa isof enef ya myun si inja senef kam.
6Rofyor romfawru simnaf mkaren ḇeyor: Manfakawin ryama! Mkosrow i! 7Inkbor ansi sikbok kam ma sfasasos parambrom sena. 8Inkbor ḇefawi royoḇa ansi sikofen faro inkbor ḇefawinananem ansi: Mkoḇuk mani mkoḇena ono ḇeinko, snar parambrom nkoḇena fanam nambrer. 9Ḇape inkbor ḇefawinananem ansi sikofen: Roḇa, nari namnis faro nkoḇa ma faro mkoḇa kako. Ipyum syadi mkora faro ḇeḇoḇ mani ma mkokoḇes ro diwa. 10Ḇape rofyor sramura fa skoḇes mani ya, manfakawin ani ryama ma ḇefasos kwar ansi siyaker i ma ssun kuker i ro sim munara fakawin ani, posa kedwai ya ḇyeḇesisen.
11 #
Luk. 13:25
Ḇarpur ya inkbor ḇese ansi srama ma sikofen: Tuano, tuano, bas kedwai ya ma ḇe inko! 12Ḇape kyarem: Yakofen faro mko, kaku ḇeri yamam ḇaḇir mkoḇa.
13Rarirya, mkowaren, snar mkofawiḇa ras ma fafisu ya.”
Sarḇer ro talenta
25:14-30
(Luk. 19:12-27)
14“Snar Ḇaḇesasoser Boiyaswa imnis raris snon ḇemarisen ḇesasyar ḇe mnu ḇese, inja dor manfamyan ḇyesi ma ḇyuk nana ḇyena faro si, kuker kakyar insa sifararur kuker na. 15Rarirya ḇyuk faro oso talenta ririm, faro oso wer suru ma faro oso wer ḇyuk oser, sisma raris samambraḇ sena, raimnai rya. 16Manfamyan ḇena talenta ririm ani rya fasau. Ifararur kuker pipi ansi ma isma syadi talenta ririm wer. 17Manfamyan ḇesma talenta risuru ani kako dakfararur rarirya ma isma syadi talenta risuru wer. 18Ḇape manfamyan ḇena talenta oser ani kada rya ma ḇyai saprop ya ma derak tuan ḇyedi pipi ḇyani.
19Fyoro kwar manfamyan ansi tuan sedi iburma ma ifrur karkor kuker manfamyan ḇyansi. 20Manfamyan ḇena talenta ririm ani ryama ma dun syadi talenta ririm, ma ikofen ḇo doḇo: Tuan, talenta ririm iso wakyar ḇe aya; mame yasma syadi talenta ririm wer. 21Inja tuan ḇyani ikofen faroi: Fararur bedi ipyum kaku, ne, manfamyan ḇeḇye ma ḇeḇesyowi yedi; fasnai kwar ḇesyowi roi kasun, nari yaḇuk fa mamwarek roi ḇeba. Swun ma wakun aski ro tuan bedi. 22Raimnai manfamyan ḇesma talenta risuru ani dakrama, ma ikofen: Tuan, talenta risuru suiso wakyarma ḇe aya; mame yasma syadi talenta risuru wer. 23Inja tuan ḇyani ikofen faroi: Fararur bedi ipyum kaku, ne, manfamyan ḇeḇye ma ḇeḇesyowi yedi; fasnai kwar ḇesyowi roi kasun, nari yaḇuk fa mamwarek roi ḇeba. Swun ma wakun aski ro tuan bedi. 24Insape manfamyan ḇena talenta oser ani dakrama ma ikofen, ḇo doḇo: Tuan, yafawi au snonkaku ḇeḇarḇor ḇeyuf ro moḇ kwekef ro ḇa ma ḇesrai ro moḇ rosai kwer ro ḇa. 25Rarirya yamkak ḇo yara yerak talenta ḇani ro saprop ya dori: Talenta bani isoine! Tuan wuni! 26Inja tuan ani kyarem: Ne, au, manfamyan ḇeḇarḇor ma ḇemyarenḇa, wafawi, yuf ro moḇ yakekef roḇa ma yasrai ro moḇ rosai yaker ro ḇa? 27Rarirya ipyum syadi pipi yesi buksi faro snonkaku ḇefarḇaḇyan sya, insa yasiḇer ido yun pipi yesi kuker pampen ḇyesi. 28Rarirya mkun talenta ani buri ma mkobuki faro ḇesma samfur ani. 29#Mat. 13:12; Mrk. 4:25; Luk. 8:18 Snar snonkaku mansei ḇena ya nari ssḇuk faroi wer fa nya nabor syadi wer. Ḇape mansei ḇenaḇa, nari rosai nya na nari neḇeyun bur i. 30#Mat. 8:12, 22:13; Luk. 13:28 Ma manfamyan ḇeḇefainda ḇa ani mkosawen i ḇe ḇondi, ḇe moḇ ḇepampan syadi. Ro diwa nari ismai kankanes ma arkfafais nakor.”
Ḇaḇemankara papupes
25:31-46
31 #
Mat. 16:27, 19:28 “Rofyor Rumkun Snonkaku ryama kuker payamyum Ḇyedi ma malaikatsya kam siyaker I, ma nari kyain ro karapasa nasan Ḇyadi. 32Raimnai er sya kam nari seḇefanjur ro ḇarpon Ḇyedi ma nari kyinfir si oser ḇe oser, raris ḇefarandosya kyinfir domba sya bur kambing sya, 33ma nari domba sya ḇyesi fa snara ḇar raku ḇyedi ma kambing sya snara ḇar rasar ḇyedi. 34Ma nari ikofen faro ḇenara ḇar raku ḇyedi: Mkorama, ne, besma ḇok ro Kma Yedi, mkakna Ḇaḇesasoser ḇefasos kwar faro mko ro fafisu supswan ine ḇyeḇefrur ya. 35Snar rofyor yabiser mkofan Aya; rofyor yambrow mkoḇe war fa yinem; rofyor yaḇe snon dakam mkoḇe moḇ fa yaḇeryar ro; 36rofyor yaḇaḇer mkoḇuk ḇe Aya mar fa yafmar; rofyor yaduf, mkofaduru Aya; rofyor yasma ro bui, mkora kaki Aya. 37Rarirya snonkaku ḇenapes ansi nari skarem faro I, ḇo sikofen: Manseren, fyor rosaiso nkomam wabiser ma nkofan Au, roḇa wambrow ma nkoḇuk war fa winem? 38Fyor rosaiso nkomam Au ḇe snon dakam, ma nkoḇuk moḇ ryar faro Au, roḇa baḇer ḇo nkoḇuk mar faro Au? 39Fyor saiso nkomam waduf roḇa wasmai ro bui ma nkora kaki Au? 40Ma Wairek ani nari kyarem faro si: Yakofen faro mko, kaku ḇeri roi ḇeḇor kam mkofrur faro oser ro fandu naek Ayesi ḇeḇenyawa ḇa sine, irya mkofrur kwar maḇe Aya.
41Ma nari ikofen kako faro ḇeyores ro ḇar rasar Ḇyedi: Ne, mkobur ḇarpon Ayedi, ne, snonkaku ḇesma fras, mkosun ro for ḇembrer ḇa ḇefasos kwar faro Ibiris kuker malaikat-malaikat ḇyesi. 42Snar fyor Yabiser, mkofan Aya ḇa; fyor Yambrow mkoḇuk war fa Yinemba; 43fyor yaḇe snon dakam, mkoḇuk moḇ fa Yaḇe ryar ro ḇa; rofyor Yaḇaḇer, mkoḇuk mar faro Aya ḇa; rofyor Yaduf ma Yasmai ro bui, mkora kaki Aya ḇa. 44Ma nari sikaem skarem faro I, ma sikofen: Manseren, fyor saiso nkomam wabiser, roḇa wambrow, roḇa besnon dakam, roḇa baḇer roḇa waduf, roḇa wer wasmai ro bui ḇape nkuf farmyan Au ḇa? 45Ma nari kyarem faro si: Yakofen faro mko, kaku ḇeri roi ḇeḇor rosai mkofrur ḇa faro naek Ayesi ḇeḇenyawa ḇa sine, rarirya kako mkakfrur na faro Aya ḇa. 46#Dan. 12:2 Ma snonkaku sine nari ssun ḇe moḇ wayam ḇekain fyoro, ḇape snonkaku ḇenapes sya ssun ro kankenem ḇemnaiḇa ya.”
Iliyochaguliwa sasa
MATIUS 25: LAIBHW
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
