MATIUS 10
10
Yesus danun wawan samfur seser risuru Ḇyesi
10:1-4
(Mrk. 3:13-19; Luk. 6:12-16)
1Yesus dor manfamyan samfur seser risuru Ḇyesi fa siryur ma ḇyuk papoik faro si insa ssḇuki yaw rodur ḇeḇarḇor ma dafduf kam ma raryarḇa nakam. 2Wawan samfur seser risuru ansi sisnosna naiso nane: Ḇeponya Simon sniri kako ḇe Petrus ma ḇedar ḇyedi Andreas, ma Yakobus Zebedeus mandaḇendi, ma ḇedar ḇyedi Yohanes, 3Filipus ma Bartolomeus, Tomas ma Matius ḇeyor som, Yakobus Alfeus mandaḇendi, ma Tadeus, 4Simon snon Zelot ma Yudas Iskariot ḇeḇoḇ Yesus.
Yesus iwan wawan samfur seser risuru Ḇyesi
10:5-15
(Mrk. 6:7-13; Luk. 9:1-6)
5Wawan samfur seser risuru ansi Yesus iwansi kuker ananun faro si: “Mkoso awer nyan ḇeraḇe er ḇese ma mkosun awer ro mnu-mnu Samaria, 6ḇoi mkora faro domba-domba ḇeḇor ro fandu er Israel. 7#Luk. 10:4-12 Mkora ma mkoḇaryas: Ḇaḇesasoser Boiyaswa fyanam kwar. 8Mkoḇuk pararei faro snonkaku ḇedufsi; mko ḇawes ḇemarsi; mkofasren ḇeduf padosi; ma mkoyaw Ibiris ya. Papoik nane mkosma waworekna monda kwar, inja mkakḇuk waworek kako.
9Mkun awer brawen, roḇa sarak roḇa kansai roiḇeḇoḇek mkoḇena. 10#1 Kor. 9:14; 1 Tim. 5:18 Mkun awer roi ḇeḇaryam ro maran mkoḇena, mkun syadi awer sansun risuru, roḇesower roḇa ankyon, snar snonkaku ḇefararur oso nari isma ḇaḇyak.
11Rofyor mkosun ro mnu-mnu ḇeba ma kasun, mkosewar ro dia snonkaku ḇefrur pyum fa mkokainus si rao isof ro mkombran wer. 12Rofyor mkosun ro rum ono, mkokofen aroo faro si. 13Rofyor ḇena rum ya ḇyenaḇye, aroo mkoḇena nkain faro si, ḇape roroḇaido aroo ani kyaḇer faro mko. 14#Kis. 13:51 Ma rofyor snon oso ḇyenaḇye mkoḇa, ma imnaf wos mkoḇenaḇa, mkosasyar ma mkobur rum roḇa mnu ma mkokokef fafen ḇero mkowemna. 15#Kej. 19:24-28; Mat. 11:24 Yakofen faro mko: Kaku ḇeri ro ras mankara ya sup Sodom ma Gomora kandera sedi nari myanan syadi kandera ḇekur mnu ine.”
Ḇaḇekandera nari ḇerama ma ḇaḇekankarem faro Yesus
10:16-33
(Mrk. 13:9-13; Luk. 21:12-19, 12:2-9)
16 #
Luk. 10:3
“Mkomame, Yawan mko imnis domba ro fandu randip arḇur, inja mkofawi kaku imnis ikak ma mkonapes imnis man jawa. 17Ma mkepen mko ro snonkaku sya kam; snar nari ono sḇoḇ mko faro kankain karkara agama ma siprer mko ro rum nadi sena. 18Ma snar Aya nari ssun mko ḇe ḇarpon ḇena papok ma wairek-wairek imnis fasasnai faro si ma faro snonkaku ḇefawi Allah ḇa sya kako. 19Rofyor sḇoḇ mko, mkararyof awer rariso ma rosai nari mkawos ḇesyan na, snar nakam nari Yaḇukna ḇe mko ro fafisu ya beri. 20Snar nari mkoiso ḇeyawos mko ya ḇa, ḇoi Kma mko ḇedi Rur Ḇyedi; iso nari ḇeyawos pyan ro mkosḇam na.
21Ono nari sḇoḇ naek sesi fa smun si, rarirya kako sinan oso faro romawa ḇyesi. Ma romawa sya srakrakrok sinan sesi ma nari smun si. 22#Mat. 24:9, 13 Ma nari Yafnai fa kawasa kam sayinmko ma sisurem mko ḇape faro mansei ḇemku isof papupes ya nari sisma aski. 23Rofyor sewayam mko ro mnu ine, mko frar ḇe mnu ḇese; snar Yakofen faro mko: Kaku ḇeri rofyor mkora faro mnu-mnu Israel nakam ḇaim, Rumkun Snonkaku ryama kwar.
24 #
Luk. 6:40; Yoh. 13:16, 15:20 Romawa farkor oso isyadi ro guru ḇyedi ḇa, rarirya kako manfyan oso isyadi tuan ḇyedi ḇa. 25#Mat. 9:34, 12:24; Mrk. 3:22; Luk. 11:15 Inja, rofyor romawa farkor ani imnis raris guru ḇyedi, ma manfyan ani imnis raris tuan ḇyedi, kuker rarirya imnis kwar faro si. Rofyor tuan ḇena rum ya snir i ḇe Beelzebul, rosai wer kuker kina ḇero rum ya.
26 #
Mrk. 4:22; Luk. 8:17 Inja mkomkak awer si, snar roi oso isisen ma iyokef ḇa snar nakam nfababa ma kofawi na kam kwar. 27Rosai Yakofen faro mko ro panpan, mkawos na roisnai; ma rosai sfararumro knaram mkoḇena mkoḇaryas na ro rum bunem iyaswa. 28Ma mkomkak awer faro mansei ḇemun ḇaken ya, ḇape ḇepok fa ḇemun rur ya ḇa; mkomkak syadi faro ḇepok ḇemun iḇye rur ya ma ḇaken ya ro for ḇembrerḇa ya.
29Mkofawi ḇake manesu risuru sḇoḇ su kuker maeja ropia oser? Rariryano osero ro man mkun ansi ipok imar famfnomḇa rofyor Mami ro Boiyaswa Imarisenḇa. 30Ma mko kako snonburyam mkoḇena naser karkor epen. 31Inja mkomkak awer snar mkoḇe maeja syadi ro manesu ḇeḇor.
32Snonkaku oser-oser ḇekarem Aya ro ḇarpon snonkaku, Aya kako nari Yakkarem i ro ḇarpon Mami ro boiyaswa. 33#2 Tim. 2:12 Mḇoi mansei ḇefamyun Aya ro ḇarpon snonkaku, Aya kako nari Yakfamyun i ro ḇarpon Mami ro boiyaswa.”
Yesus dun rarwas – Koso Yesus rariso
10:34–11:1
34 #
Mi. 7:6
“Mkokara awer ḇo mkoḇo, Yarama fa Yun aski faro supswan ine; Yarama fa Yun askiḇa, mḇoi Yun sumber. 35Snar Yarama fa Yararwas romawa sya bur sikmas si, inai sya bur sisnas si, Imbikin sya bur imbanyo sesi, 36ma kina ro rum oso nari sembroḇ yaesi.
37 #
Luk. 14:26-27
Mansei ḇeswar snari ma kmari syadi ro Aya, ikada isyusḇa faro Aya; ma mansei ḇeswar romawa ma inai ḇyesi isyadi ro Aya, ikako daksyusḇa faro Aya. 38#Mat. 16:24-25; Mrk. 8:34-35; Luk. 9:23-24Mansei ḇeḇar aprop ḇyedi ḇo ḇeso Ayaḇa, isyusḇa faro Aya. 39#Luk. 17:33; Yoh. 12:25Mansei ḇefaduru kankenem ḇyedi nari kankenem ani ryo bur i, ma mansei kankenem ḇyedi ryo bur i snar Aya nari isma i wer. 40#Mrk. 9:37; Luk. 9:48, 10:16; Yoh. 13:20Mansei ḇena mko irya daknai Aya, ma mansei ḇena Aya irirya daknai Mami ḇewan Ayanya. 41Mansei ḇena nabi oso snar i nabi nari isma ḇaḇyak nabi, ma mansei ḇena snon ḇenapes oso nari isma ḇaḇyak snon ḇenapes. 42#Mrk. 9:41Ma mansei ḇeḇuk war ḇepnunek sek oser monda faro awak param oso, snar i ḇeso Aya, rarirya Yakofen faro mko: Kaku ḇeri ḇaḇyak ḇyedi ipok ryo bur iba.”
Iliyochaguliwa sasa
MATIUS 10: LAIBHW
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
