مزگینیا مەتتای 7
7
خەلكی داد نەكەن
(لوقا 6:37-38، 41-42)
1دادكرنێ نەكەن، دا هوین نەهێنە دادكرن، 2چنكو ب وێ دادكرنا هوین خەلكی پێ داد دكەن، هوین ژی دێ پێ هێنە دادكرن و ب وی پیڤەرێ هوین دپیڤن، دێ بۆ هەوە ژی ب وی هێتە پیڤان. 3بۆچی تۆ زلكی د چاڤێ برایێ خۆ دا دبینی، لێ تۆ گاریتەی د چاڤێ خۆ دا نابینی؟ 4یان چەوا تۆ دشێی بێژییە برایێ خۆ: ‹بهێلە ئەز زلكی ژ چاڤێ تە بینمە دەرێ،› لێ ئەڤە گاریتە یێ د چاڤێ تە دا! 5هەی دووڕوی، ل پێشیێ گاریتەی ژ چاڤێ خۆ بینە دەرێ، هنگی دێ باش بینی كو زلكی ژ چاڤێ برایێ خۆ بینیە دەرێ. 6تشتێ پیرۆز نەدەنە سەیان و مراریێن#7:6 مراری: ئانكو ‹لولو› خۆ نەهاڤێژنە بەر پێیێن بەرازان، نەكو بەراز پێ لێ بدانن و سە ژی ڤەگەڕیێن و هەوە بدڕینن.
بخوازن، لێ بگەڕن، دەرگەهی بقوتن
(لوقا 11:9-13)
7بخوازن، دێ بۆ هەوە هێتە دان. لێ بگەڕن، دێ بینن. دەرگەهی بقوتن، دێ بۆ هەوە هێتە ڤەكرن. 8چنكو هەر كەسێ بخوازیت دێ وەرگریت و یێ لێ بگەڕیێت دێ بینیت و یێ دەرگەهی بقوتیت دێ بۆ وی هێتە ڤەكرن. 9كی ژ هەوە، كوڕێ وی نانی ژێ بخوازیت، دێ بەرەكی دەتێ؟ 10یان ماسیەكێ ژێ بخوازیت، دێ مارەكی دەتێ؟ 11ئەڤجا ئەگەر هوینێن خراب دزانن دیاریێن باش بدەنە زاڕۆكێن خۆ، پا چەند مسۆگەرتر بابێ هەوە یێ ل ئەسمانان دێ تشتێن باش دەتە وان كەسێن ژێ دخوازن!
12ئەوا هەوە دڤێت مرۆڤ بۆ هەوە بكەن، هوین ژی وێ بۆ وان بكەن، چنكو ئەڤەیە رامانا دەستووری و پەیاما پێغەمبەران.
دەرگەهێ تەنگ
(لوقا 13:24)
13د دەرگەهێ تەنگ را هەڕنە ژۆر! چنكو ئەو دەرگەهێ دچیتە وێرانكرنێ یێ فرەهە و رێكا وی یا خۆشە و گەلەكن ئەوێن تێڕا دچنە ژۆر، 14لێ دەرگەهێ دچیتە ژیانێ گەلەك یێ تەنگە و رێكا وێ ژی گەلەك یا ب زەحمەتە و كێمن ئەوێن بسەرهەلدبن.
دار ب بەرهەمێ وێ دهێتە نیاسین
(لوقا 6:43-45)
15هشیاری پێغەمبەرێن درەوین بن، ئەوێن د كەڤلێن میهان دا دهێنە نك هەوە، لێ ئەو ژ ناڤ دا گورگێن هارن! 16دێ وان ژ بەرهەمێ وان نیاسن. ئەرێ ما مرۆڤ ژ ستریان تری دچنن، یان ژ قیڤاران هژیران دچنن؟ 17هۆسا هەر دارەكا باش دێ بەرهەمەكێ باش دەت، لێ دارا خراب دێ بەرهەمەكێ خراب دەت. 18دارەكا باش نەشێت بەرهەمەكێ خراب بدەت و دارەكا خراب ژی نەشێت بەرهەمەكێ باش بدەت. 19هەر دارەكا بەرهەمەكێ باش نەدەت، دێ هێتە بڕین و بۆ ناڤ ئاگری هێتە هاڤێتن. 20ئەڤجا هوین دێ وان ژ بەرهەمێ وان نیاسن.
كی دێ چیتە د پاشایەتیا ئەسمانان دا؟
(لوقا 13:25-27)
21نە هەر كەسەكێ بێژیتە من ‹خودان، خودان!› دێ چیتە د پاشایەتیا ئەسمانان دا، لێ ئەو دێ چیت یێ حەزا بابێ من یێ ل ئەسمانان ب ج‍‌ھ دئینیت. 22د وێ رۆژێ دا گەلەك دێ بێژنە من: ‹خودان، خودان! ما مە ب ناڤێ تە پەیاما خودێ نە راگەهاند؟ و ب ناڤێ تە مە ئەجنە نە دەرئێخستن؟ و مە گەلەك حنێر#7:22 حنێر: ب عەرەبی ‹معجزة› ب ناڤێ تە نەكرن؟› 23هنگی ئەز دێ ب ئاشكرایی بێژمە وان: ‹من چ جاران هوین نەنیاسینە. ژ من دویر بكەڤن، هەی خودانێن كارێن خراب!›
یێ ئاقلمەند و یێ دەبەنگ
(لوقا 6:47-49)
24ئەڤجا هەر كەسێ گوهێ خۆ بدەتە گۆتنێن من و كار پێ بكەت، ئەو وەكو مرۆڤەكێ ئاقلمەندە یێ خانیێ خۆ ل سەر كەڤری ئاڤا كری، 25پشتی هنگی باران بارین و لافاو رابوون و باڕۆڤە هاتن و ب وی خانی كەفتن، لێ نەكەفت، چنكو بنیاتێ وی ل سەر كەڤری هاتبوو دانان. 26لێ هەر كەسێ گو‍‌ھ بدەتە ڤان ئاخفتنێن من و كار پێ نەكەت، ئەو وەكو مرۆڤەكێ دەبەنگە كو خانیێ خۆ ل سەر خیزی ئاڤا كری. 27ئەڤجا باران بارین و لافاو رابوون و باڕۆڤە هاتن و ب وی خانی كەفتن و خانی كەفت و كەفتنا وی یا مەزن بوو.»
28دەمێ عیسای ئەڤ گۆتنێن خۆ تەمام كرین، خڕڤەبووی ژ فێركرنا وی حێبەتی بوون، 29چنكو وی وەكو مرۆڤەكێ خودان دەستهەلات ئەو فێر دكرن، نە وەكو مامۆستایێن وان یێن دەستووری.
Iliyochaguliwa sasa
مزگینیا مەتتای 7: BHD
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
All rights reserved.
