OMOCHANKO 9
9
Nyasae ogosesenia Nuhu na gokora okobwatana nere
1Nyasae agasesenia Nuhu amo nabamura baye, akabatebia, “Moibore, momeneteke, moichore ase ense. 2Ching’iti chionsi chire ase ense chiboboe na kobairoka inwe: chinyoni chia igoro, ne ching’iti chikwagura igoro ase ense, ne chinswe chionsi chi’enyancha; echio chionsi chiabekirwe ase amaboko aino. 3Kera egetongwa kere moyo na kegotaara inakebe endagera yaino; buna nabaete chinyeni na ebimeri binde bigokina, naboigo nabaeire nebio bionsi. 4Korende timoria chinyama chire nobomoyo, engencho yaye chire namanyinga ime yabo. 5Amaene, amanyinga ’obogima bwaino ninyaganie ng’akanwe; korwa ase kera eng’iti ninyaganie, na korwa ase kera omonto oyogoita oyomwabo ninyaganie ng’akanwe obogima bw’omonto oyio.
6“Onde bwensi oraitere amanyinga a mwanyabanto,
amanyinga ’omonto oyio naiterwe na mwanyabanto,
ekiagera Nyasae nigo atongete mwanyabanto
ase omogwekano oye.
7“Na inwe moibore, momenteke, mosarare, mobe abange ime ase ense.”
8Erio Nyasae agatebia Nuhu amo nabamura baye, 9“Rora, inche ngokora nde okobwatana kw’ogotianania nainwe, amo nororeria rwaino roraiborwe korwa nyuma yaino, 10naende na kera egetongwa kere moyo kere amo nainwe, chinyoni chionsi ne ching’iti chigotugwa, ne ching’iti chionsi chi’orosana chire amo nainwe, chionsi echiasokire korwa ase obwato. 11Ngokora nde okobwatana kw’ogotianania nainwe, ng’a kende gionsi kere moyo tigekomerwa naende namache ’etoigo, gose etoigo tegocha koba naende egosaria ense nyuma y’ayio.” 12Naende Nyasae agateba, “Eke nakio ekemanyererio gi’okobwatana kwane kw’ogotianania nakorire egati yane nainwe, na kera egetongwa kere moyo amo nainwe, na ase ebiaare bigochigocha: 13Inche nabekire omokubinyongo ase amare, noro nobe ekemanyererio gi’okobwatana egati yane na ense. 14Ekero nkwara amare igoro y’ense, na omokubinyongo nobe okororekana ase amare, 15erio nimbe nkoinyora okobwatana kwane, okwo nakorire egati yane nainwe, amo na kera egetongwa kere moyo. Amache takoba naende etoigo egosaria ebitongwa bionsi bire moyo. 16Ekero omokubinyongo okoba ase amare, na inche nkoyorigereria, ning’inyore okobwatana kwane gwa kare na kare, okwo nakorire egati yane, inche Nyasae, na kera egetongwa kere moyo ase ense.” 17Nyasae agatebia Nuhu, “Eke nakio ekemanyererio gi’okobwatana okwo nakorire egati yane na ebitongwa bionsi bire moyo ase ense.”
Nuhu na abana baye
18Abana ba Nuhu abarwete ase obwato nabwo aba: Shemu, na Hamu, na Yafeti. Hamu nere ise Kanani. 19Aba batato nabwo barenge abana ba Nuhu, na korwa ase abwo mwanyabanto bakaranda ase ense engima.
20Nuhu akaba omoremi, akaba oyo bwe ritang’ani gosimeka emesabibu, nero ekoroisigwa edivai. 21Ere akanywa edivai; erio agatinda, akarara ore getirianda ase eema yaye ime. 22Hamu, ise Kanani, akamorora ore getirianda, agatebia bamura bamwabo babere barenge isiko amang’ana aya aroche. 23Erio Shemu na Yafeti bakabogoria engobo, bakayebeka amareko abo igoro, bakagenda kenyuma‐nyuma, bakabisia ise obogetirianda bwaye. Amaiso abo nigo arigereretie aase bakorwa, na tibarora obogetirianda bwa ise. 24Ekero Nuhu atindokire korwa ase okonywa kwaye kw’edivai, akamanya eke omwana oye omoke amokoreire, 25agateba,
“Kanani aragererigwe;
nigo arabe omosomba bw’abasomba ase abamwabo.”
26Naende agateba,
“Omonene, Nyasae o Shemu, nasesenigwe,
na Kanani abe omosomba oye.
27Nyasae agareerie Yafeti obomenyo,
tiga amenye ase chiema chia Shemu,
na Kanani abe omosomba oye.”
28Nyuma y’etoigo eria Nuhu nigo amenyete emiaka amagana atato, na emerongo etano (350). 29Nuhu nigo akoorete emiaka amagana kianda, na emerongo etano (950), erio agakwa.
Iliyochaguliwa sasa
OMOCHANKO 9: EKEGUSIIBBLE
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
OLD EKEGUSII BIBLE PROTESTANT EDITION
©Bible Society of Kenya, 2020