WƖAA DƖ-SUOMUŊ 3
3
Nuhuobiine ŋaa wʋbɔŋŋɔɔ
1Dɩmɩŋ nɛ fa kɛŋ wʋjɩmɩŋ a kɩɩ pʋsʋ-la kala La TƖƖNA Wɩa sɩ ŋaa. Ʋ pɩɛsɛ haal-la, “Wɩa sɛnɛ sɩ má sɩ́ tɩa-la sɩ hɛ ŋmaŋkaaŋ deeŋ tʋɔŋ nɛnɛɛ dii nɛɛ?”
2Haal-la bʋla pʋ, “Laa dii tɩɩnɛnɛ-la kala nɛ, 3ama ŋmaŋkaa-la tʋtʋɔbaanɩŋ tɩa-la nɛnɛɛ Wɩa sɩ la sɩ́ dii nɛ, la sɩ́ digi ma, dɩ la nɛ dige, la jaŋ sʋʋ.”
4Ŋɩɩ nɛ dɩŋ-la bʋla pɩ haal-la, “Ma sɛnɛ bɩ jaŋ sʋʋ. 5Wɩa jɩma dɩ ma nɛ die, ma sɩaa jaŋ polli dɩ ma nagɛ ʋ-na Wɩa, a jɩŋ wʋzɔŋŋɔɔ arɩ wʋbɔŋŋɔɔ bʋa.”
6Ŋɩɩ nɛ haal-la beŋ a na tɩa-la nɛnɛɛ dɩ ba zɔmɔ sɩɩŋ lɛ, aŋ zɔŋ arɩ diiniŋ ma aŋ bɩra cho dɩ ʋ kɛŋ wʋjɩmɩŋ. Ʋ tɔrɔ dii, aŋ tɔrɔ pɩ ʋ bala ma ʋ dii. 7Ba dii tɩa-la nɛnɩŋ dɛrɛ, ba sɩaa polli, ba na arɩ ba kɛŋ yarɩ-biree. Ba kɛŋ kanchal-pɩpaarɩŋ pɛ dɔŋɔ a kaa tɔ ba yaraa.
8Ʋ dɩdaanɩŋ sɩ yie, ba nɩɩ La TƖƖNA Wɩa naagime ŋmaŋkaa-la tʋɔŋ. Ba mʋ faa tɩɩsɩŋ bʋbʋɔŋ. 9Ŋɩɩ nɛ La TƖƖNA Wɩa yɩrɛ baal-la a bʋl, “Nɩɩ nɛ ŋ hɛ?”
10Ŋɩɩ nɛ Adam bʋl, “Mɩ nɩɩ ŋ naagime nɛ ŋmaŋkaaŋ tʋɔŋ, fawʋllʋŋ kɛmmɛ mɩ faa, bɛɛ wɩaa mɩ kɛŋ yarɩ-biree nɛ.”
11Ŋɩɩ nɛ Wɩa pɩɛsʋ, “Ŋ ŋɩɩ nɛ jɩŋ arɩ ŋ kɛŋ yarɩ-biree nɛ? Ŋ dii tɩa-la nɛnɩŋ mɩ sɩ sɩ ŋ sɩ́ dii nɛɛ?”
12Ŋɩɩ nɛ Adam bʋl, “Haal-la ŋ sɩ joŋo pɛ mɩ lɛ, ʋ nɛ tɔrɛ tɩɩnɛŋ-la pɩmɛ mɩ dii.” 13Ŋɩɩ nɛ La TƖƖNA Wɩa pɩɛsɛ haal-la, “Bɛɛ nɛ ŋ ŋaa ŋ-la?”
Ʋ sɩ, “Dɩmɩŋ nɛ nyɩsɛmɛ mɩ dii tɩɩnɛŋ-la.”
14Ŋɩɩ nɛ La TƖƖNA Wɩa ŋmɩɛsa hɛ dɩmɩŋ lɛ a bʋl, “A tɩŋ ŋ sɩ ŋaa wɩɩŋ deeŋ,
pʋsʋŋ arɩ baga kɩaa kala tʋɔŋ,
ŋ nɛ jaŋ tuuri ŋ luoruŋ nyuŋ
a dii hagɩla ŋ mɩɩsɩŋ kala lɛ.
15Mɩ jaŋ joŋ dʋndɔnnʋŋ hɛ ŋ dɩ haal-la pɛgɛ.
Ŋ biiriŋ arɩ ʋ biiriŋ jaŋ ŋaa dʋndɔmɔ.
Adam doho nʋʋ jaŋ ŋmoo ŋ nyuŋ yɛrɛ,
ka dɩ ŋ ma ta ʋ naatilimiŋ lɛ.”
16Ŋɩɩ nɛ aŋ bɩra bʋla pɩ haal-la ma,
“Mɩ jaŋ leŋ dɩ ŋ na hɛɛŋ biiriŋ lʋlʋŋ lɛ.
Dɩ ŋ nɩɩ lʋl, ŋ hɛɛŋ jaŋ yʋga pɛ.
Ama ŋ ha jaŋ hɩhɩɛnɛ ŋ bala
ʋ jaŋ kɛŋ doluŋ ŋ nyuŋ.”
17Wɩa bɩra bʋla pɩ Adam ma, “Ŋ sɩ jegile nɩɩ ŋ haala niiŋ a dii tɩɩnɛŋ-la mɩ sɩ sɩ ŋ sɩ́ dii,
mɩ kalɩba hɛ tinteeŋ lɛ nɛ a tɩŋ ŋ wɩaa.
Ŋ mɩɩsɩŋ kala lɛ ŋ jaŋ tɩma suoli aŋ-na dii.
18Sɔsʋŋ arɩ yaŋ jaŋ nyʋ tinteeŋ,
ŋ jaŋ tɩŋ a suoli aŋ-na wuo na kʋdiilee a dii.
19Ŋ jaŋ kpɩɩnɛ suoluŋ
aŋ na kʋdiilee halɩɩ a mʋ sʋʋ.
Tɩɛrɩŋ nɛ mɩ kaa mɛŋ,
ŋ jaŋ bɩra bɩrɩmɛ tɩɛrɩŋ.”
20Adam hɛ ʋ haala yɩrɩŋ Hawa, ʋ nɛ ŋaa nʋʋkala nahɩma.
21La TƖƖNA Wɩa kɛŋ teniŋ yɛrɛ gɛnnɩŋ a pɩ Adam arɩ ʋ haala Hawa ba kaa tɔ ba hɩɩsɩŋ. 22Ŋɩɩ nɛ La TƖƖNA Wɩa bʋl, “Baala deeŋ lɛɛlɛ nagɛ la nɛ. Ʋ jɩŋ wʋzɔmʋŋ bʋa nɛ. Ʋ bɩ maga dɩ ʋ tɔrɛ tɩa-la sɩɩ pɩ mɩɩsɩŋ nɛnɩŋ dii a sɩ́ sʋʋ.” 23Ŋɩɩ nɛ La TƖƖNA Wɩa kiri Adam arɩ ʋ haala ta ŋmaŋkaa-la sɩ hɛ Ɛdɩŋ tinteeŋ lɛ, dɩ Adam lɩɩ pɩpɛrɛ tintee-la Wɩa sɩ lɔgɔ mɛʋ lɛ. 24Ʋ sɩ kiri Adam ta ʋ lɩɩ ŋɩɩ, ʋ leŋ Wɩa tɩndaara sɩ kɛŋ kɩŋkɛnsɩŋ a kori tokobiiŋ sɩɩ chol nyiniŋ a hɛ Ɛdɩŋ wɩɩpɔsʋŋ dɩɩrɩŋ a vivilli, a pɔ nʋʋkala sɩ́ tɩa-la sɩɩ pɩ mɩɩsɩŋ kpagʋ.
Iliyochaguliwa sasa
WƖAA DƖ-SUOMUŊ 3: SIS
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
©Ghana Institute of Linguistics Literacy and Bible Translation 1984, 2014