Israelfɔ Ɩlʋ 9
9
Nana Bulu Gyi Ɔtanʋkpa Yile
Dawid kanfʋ-ɩlʋ ha ɩlʋ osunapʋ. Bɔ́pʋ obi-lowu ɔmɛ wa mʋ́.
1Nana Bulu, nɛ́kanfʋ fʋ tsu mɩ ɩklʋntɔ.
Nɛ́bla aha ofula akpɔnkpɔntɩá fabwɛ fɛ́ɛ́.
2Fʋ sʋ ansɩ bɛ́hɩɛ gyi mɩ.
Ɔsʋsʋʋsʋ Mʋ Wie, nɔ́wa ɩlʋ kanfʋ fʋ ɩda.
3Mɩ alupʋ bowun fʋ bʋteyinki ɔma,
dɩda wu,
4tsufɛ asʋn ogyipʋ ɔnɔkwalɩpʋ fʋgyi.
Fatsia fʋ obiasʋ, gyi mɩ asʋn wanklaan ha mɩ.
5Bulu, fawa ɩyɩn wa ɔmá ánɩ́ bʋmeyin fʋ.
Faha lalahɛ abwɛpʋ bata,
tsitsi amʋ́ ada lɛ ɩnʋ plɩplɩplɩ.
6Anɩ alupʋ klɛtɔ lata fɛ́ɛ́.
Fabwie amʋ́ awulu fɛ́ɛ́.
Bʋmɛ́ɛtra tɩ amʋ́ ada ɛkɛkɛɛkɛ.
7Tamɛ Nana Bulu tsie brɛ fɛ́ɛ́.
Alayaɩ mʋ obia ha asʋngyi.
8Obégyi ɔyɩtɔ aha fɛ́ɛ́ asʋn mʋ́ ɔkpasʋ.
Obégyi ɔmá fɛ́ɛ́sʋ ɔnɔkwalɩsʋ.
9Nana Bulu gyi ɔtanʋkpa kinkin ha aha ánɩ́ bʋdɛ amʋ́ hɩɛ.
Ɔtanʋkpa kinkin ogyi ha aha ánɩ́ bawie ɩkplantɔ.
10Oo Nana Bulu, aha ánɩ́ bʋyin fʋ ɩda bʋtɔpʋ ansɩ dɩnka fʋsʋ,
tsufɛ fʋtamatswɛ fʋ adunkapʋ kpʋkpʋ.
11Mlɩwa ɩlʋ kanfʋ Nana Buluá otsie Sion!
Mlɩda mʋ atɔ bwɛhɛ fɛ́ɛ́ ɔkan ɔmágyiɔmátɔ.
12Tsufɛ mʋtɛka ɔha ánɩ́ alawa ɩbɩ obugyatɔ ɩkɔ.
Ɔtamakina ipian awunpʋ isu nu.
13Oo Nana Bulu, wun mɩ nwɛ!
Kɩ alɩá mɩ alupʋ bʋdɛ mɩ ipiantɔ wa!
Fʋtɛlɛ mɩ tsu lowu ɔbɔnɔ,
14mɛnɩ nɛ́kanfʋ fʋ Sionfɔ ofiakpa.
Ansɩ bégyi mɩ, tsufɛ fahɔ mɩ nkpa.
15Ɔmá-ɔmá bakpawie amʋ́ ɔbɔ kwihɛtɔ.
Amʋ́ onuto ayibi fɩnɩhɛ lalɛ amʋ́.
16Nana Bulu lalɛ ɩwɩ suna tsʋn mʋ asʋnbua ɔnɔkwalɩtɔ.
Aha lalahɛ amʋ onuto ɩbɩ ɔnɔ gyumagyihɛ lalɛ amʋ́. Mlɩfʋlɩ ɩkpɛ amʋ kʋklʋ. Ɩya.
17Afulitɔ ɩda gyo ɔmá lalahɛ
pʋ́ Bulu akisipʋ fɛ́ɛ́.
18Tsufɛ fʋmɛ́ɛtan ahianfɔsʋ brɛ fɛ́ɛ́.
Ipian awunpʋ ɔkpakɩ ɛ ɩmɔ́ɔbwɛ kpalɩ ɛkɛkɛɛkɛ.
19Oo Nana Bulu, kʋsʋ!
Máha nyankpʋsa ɔwa ɔkpayi fʋ ansɩtɔ ɔbɛɛ, magyi ɩsʋ.
Ɔmá-ɔmá bʋgyi ɩpɔn fʋ ansɩtɔ!
20Oo Nana Bulu, pʋ ifu wa amʋ́tɔ,
abʋbɩá anyankpʋsa kɛkɛ bʋgyi. Ɩya.
Iliyochaguliwa sasa
Israelfɔ Ɩlʋ 9: nko
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation