Israelfɔ Ɩlʋ 7
7
Nana Bulu Gyi Aha Fɛ́ɛ́ Asʋn Ogyipʋ
Benyaminyin Kus ɩwɩ awɩrɛhɔ-ɩlʋá Dawid lɔwa ha Nana Bulu.
1Oo Nana Bulu, mɩ Bulu, fʋ nasrɩ tanʋ.
Hɔ mɩ, afʋlɛ mɩ tsu aha ánɩ́ bʋdɩn mɩsʋ fɛ́ɛ́ ɩbɩtɔ.
2Nɩ megyi alɩ bɛ́kɩta mɩ,
tɩtɩ mɩ fɛ gyata;
mma ɔhɔpʋ.
3Oo Nana Bulu, mɩ Bulu,
nɩ nawa ɩbɩ lalahɛtɔ,
4nɩ napʋ lalahɛ ka mɩ ba kɔ,
ntɛ nasisi mɩ olupʋ kʋkʋ kpalɩ.
Nɩ napʋ ɩnɩtɔ ɩkʋ gyi ɔkʋ fiin.
5Mʋmʋ ha mɩ alupʋ abʋdɩnka mɩsʋ, abʋnya mɩ.
Bʋtsatsa mɩsʋ,
abʋsʋpa mɩ fuli. Ɩya.
6Nana Bulu, pʋ ɔblɔ kʋsʋ lɩɩ.
Mɩ Bulu kʋsʋ, mɩ alupʋ bawa ɩyɩn.
Fʋlɔpʋ asʋngyi ba.
7Ha ɔmá-ɔmá abʋbefia fʋ ansɩtɔ,
afʋtsia fʋ owie-obiasʋ ɔsʋsʋ gyi amʋ́ asʋn.
8Nana Bulu, fʋgyi ɔyɩtɔ aha fɛ́ɛ́ asʋn ogyipʋ.
Oo Nana Bulu, gyi ha mɩ, tsufɛ mɩ asʋn da ɔkpa.
Ɔlala ɩma mɩ ɩwɩ.
9Bulu, ɔnɔkwalɩpʋ fʋgyi.
Fʋtɛkali anɩ agywɩɩn pʋ́ anɩ ɩklʋntɔ asʋn.
Ka lalahɛ abwɛpʋ tin,
afʋha yile abwɛpʋ abʋlɩɩ.
10Bulu legyi ɩban wa mɩ.
Mʋtɔhɔ aha ánɩ́ amʋ́ asʋn da ɔkpa.
11Asʋn ogyipʋ ɔnɔkwalɩpʋ Bulu gyi.
Ɔtɛlɛ mʋ ɔblɔ suna ekekegyiɛkɛ.
12Nɩ bʋmɛtsɛ amʋ́ itsiatɔ a,
ɔbɛ́ya mʋ ɔdayi.
Alabɩtɩ mʋ ɔbɩn dodo.
13Alakʋla mʋ akɔtɔ akinkin tsan,
nɩna mʋ mbɩn pɩɔn-pɩɔn.
14Kɩ alɩá banya lalahɛ ɔmɛ́.
Lakpan ɔmɛ́ ɩdɛ amʋ́ dwiin.
Bɔ́kwɩɩ afunu.
15Bʋtokwi ɔbɔ, loti mʋ́tɔ klukluuklu,
amʋ́ onuto bʋtɛkpa wie mʋ́tɔ.
16Amʋ́ onuto lalahɛ teyinki ba amʋ́sʋ.
Amʋ́ owuntɔlɩn teyinki bobun amʋ́ nwunsʋ.
17Nɛ́da Nana Bulu ɩpan mʋ ɔnɔkwalɩwa sʋ.
Nɔ́wa ɩlʋ kanfʋ Nana Bulu, Ɔsʋsʋʋsʋ mʋ Wie ɩda.
Iliyochaguliwa sasa
Israelfɔ Ɩlʋ 7: nko
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation