PIENCILNA 8
8
Tuizin Kiem
1Ahi vangin Pasien in Noah le ama tawh a omton gamsate le innsate a phawh hi. Tuale Pasien in leitungah hui langsah a, tui a kiem hi; 2a thuhna-a om tuinahte le vantunga tawlette kikha a, guo kitheusah hi, 3tuale leitung panin tuite a kiem hieihiei hi. Ni za le sawmnga a cin zaw ciengin tuite a kiem sieng hi; 4a hla sagina, a ni sawm le ni sagina ni-in Ararat muol tungah tembaw kinga hi. 5A hla sawmna dongin tui kiem hieihiei a, a hla sawmna, a ni khat ni-in muol dawn sangte a kidawh ta hi.
6Ni sawmli a cin zaw ciengin Noah in a bawlsa tembaw tawlette hongin 7va-ah khat a hla hi; tuale leitungah tui a kan masangsie a leng kawikawi hi. 8Tua ciengin leitungah tui a kiem ta amah ci a thei nadingin vakhu khat a hlakia hi; 9ahi vangin lei maitang zosie-ah tui let lai ahi ziehin a tuh nading maimaw-in tembaw sungah tua vakhu a kilekia hi. Tuaci’n ama in a khut zahin vakhu man a, tembaw sungah a peipi hi. 10Ama in ni sagi sung ngahkia a, tuale tembaw panin tua vakhu a hlakia hi; 11nitah lamin ama kungah vakhu kilekia a, olive singna a tuhtha khat a nephu-ah petin a tunpi hi; tuaci’n Noah in leitung panin tuite kiem zo hi, ci-in a thei hi. 12Tua ciengin ama in ni sagi ma ngahkia-in, tua vakhu a hla kia hi; tua vakhu ama kungah a kilekia ta sih hi.
13Noah a khan kum zaguh le khatna, a hla masa, tuami hla ni masa pen ni-in leitungah tui a kang sieng hi; tuale Noah in tembaw khuna ladawhin a khuodah leh leitang pen a na hul sipsep ta hi. 14A hla nina, tua hla ni sawmni le sagi ni-in leitung a hul sieng ta hi. 15Tua ciengin Pasien in Noah kungah, 16“Nangma le na zi, na tapate le na mote tawh tembaw panin peidawh ta un. 17Na ompi hinna nei zosie - vate, ganhingte le lei-a a bawhva zosie - leitungah nosangin, khanpha-in a pun thei nadingin peipi in,” a ci hi. 18Tuaci’n a tapate le a zi le a mote tawh Noah a pei hi. 19Ganhing zosie, a bawhva zosie, le va zosie, leitunga a gamta zosie a innkuon kuonin tembaw panin a pusuoh uhi.
Noah Tunga Pasien’ Kamciem
20Tua ciengin Noah in Topa adingin maitam khat lam a, ganhing le va siengtho zosie lahah khat ta la-in maitam tungah meihal biehnate a pie hi. 21Tuale Topa in tua gimnamtui a zah bepin a lungsim sungah, “Mihing ziehin leitang ka samsie nawn sih ding hi. Azieh pen mihing’ lungsim ngaisutnate naupang ahi lai vua kipanin a gilo ahi tabo hi. Tu-a ka bawl bangin hinna nei zosie zong ka susie nawn sih ding hi.
22Leitung a om laisie
khaitu hun le anlah hun,
khuovot hun le khuolum hun,
khal hun le phalbi hun,
sun hun le zan hunte
tawp lo ding hi,” a ci hi.
Iliyochaguliwa sasa
PIENCILNA 8: ZBOTF01
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Zo Bible © Bible Society of Myanmar, 2018.