Lucas 7
7
Ema Jesús makanaraka ema makajurure ema kapita romano
(Mt 8.5-13; Jn 4.43-54)
1Te títapirikapa ema Jesús, eta máechejisirawaka'i ena achaneana, tichawapa te Cafarnaúm. 2Ánaki makawasa'i ema nakapitara ena suntaruana romanuana, tikajuma'i ema makajurure, tétavikawa'i eta máemunasira'i, tási'a tiáne'ipa'i tépena. 3Taka'e, te masamairikapa ema nakapitara ena suntaruana eta matiari'ira'i ema Jesús, máewatakawakapa ena náiyamuriana'i ena juriyuana nayaseakapa eta makatajika'ini mayana, makanarasinapana'ini ema makajurure. 4Ena máitekapauchapa ema Jesús ena wanairukana'i, ichape eta nayaseasira'i, naka'epa:
–Marari'i ema kapita te viáwasa. Ichapemuri eta máimikatasira'avi'i. 5Taicha ema témunaka'avi, tási'a maemepiyarekaware eta viurujisirarewa.
6Ema Jesús tísapawapa tiyana, máe'ikawakapa ena. Étasera te tiáne'ianapa eta mapena, mawanekawakapa ema nakapitara ena suntaruana ena máimatikasareana, nametapana ema Jesús naichapa: “Tata Nukaiyakene, nuti wa'i nakaemuñawa eta pisiapa'ini te nupena; 7eta taka'e, wa'i nupatsikawa'ini nútijakaruwaina'ini níchu'apanavi. Németeaka tarataichu pikawanairipi eta pikanarasiraya ema nukajurure. 8Taicha nuti nusuapa'i te tiwanekanuana. Nútipa nusuapakare'iware naye'e ena nusuntarurana'i. Te nuwanekawaka, té'eware níchu'awakapuka, tisuapanuana'i. Te nuwanekapuka ema nuwaneru, enurujipa tisuapanuwane.”
9Ema Jesús maramine'i eta juka masamakene'i, máichawakapa ena té'ikanapa'i:
–Nutupiruwa numetaka'e, nájina émanaina israelita mákuti'ini ema maka achane apawasana eta makasiñairanu'i.
10Taka'e, te tichawanapa ena wanairukana, te títekapanapa, náima'aine'i ema makajumakene'i tinarakaipa.
Ema Jesús makaechepuka ema amaperu máepenakene'i, suchicha esu esena suépenaimakene
11Te táekenepa eta juka, tiyanawarepa ema Jesús te awasare tikaijare Naín. Náe'ikapa'iware ena máimitureana, énapa ena kamurikeneana achaneana. 12Te títekapanawarepa te awasare nákapajikawakapa ena achaneana tiámanapa'i ema máepenakene, náekarayare'i. Kamurianapa'iware ena achaneana té'ikanapa'i. Ema máepenakene'i, makarichu'i suchicha'i esu esena suépenaimakene'i. 13Eta máimaira'i ema Viákenu, majapanuine'i esu esena. Tási'a, máichapa:
–Wa'i pikuiya'a.
14Tási'a, mapauchapa ena tiámanapa'i ema máepenakene. Titupi'anapa ena, máemamakapa eta makajone. Tási'a, maka'epa:
–Nuchicha, nuti nuwanekavi, ¡péchepuka!
15Enewaneine'i téchepukapa ema amaperu máepenakeneni'i. Téchejikapa ema amaperu. Tási'a, ema Jesús máijarakapa esu maena. 16Te naima'apa ena achaneana tipikanaine'i, taka'e tepanawanapa najiraucha ema Viya. Ánipa naka'e:
–Jé'eware ema maka achane yátupikene profeta, titekapa'i te vitarakumuri.
Éneichuware naka'epa:
–Ema Viya titeka'i maimikatakaya eta mawasa.
17Eta juka máichakene'i ema Jesús, téchakarewanepa tamutu te Judea náwasana'i ena nachakayara'a.
Ema Juan Tíkachasirikara'i mawanekawakapa ena máimitureana
(Mt 11.2-19)
18Ema Juan masamairikapa tamutu eta juka, taicha nametakapa ena máimitureana, taka'e máichu'awakapa ena apinana 19tási'a, máewatakapa nayaserepanayare'i ema Viya, nayaserepanayare'i te yátupi'ipuka émaipa'i ema nakuchapakene'i, té'eserapuka tímiyanawayarepuka nakuchapaya ema apana. 20Ena wanairukana'i me Juan náitekapauchapa ema Jesús, tási'a naichapa:
–Ema Juan Tikachasirikara'i tiwaneka'avi'i viyaserekaviyare te yátupi'ipuka píti'ipa'ipuka ema vikuchapakene'i. Te wa'ipuka vímiyanawayarepuka vikuchapa ema apana.
21Eta náitekapauchira'i ema Jesús, ema makanarakawakapa'i ena nakajumakeneana. Mákijikaware ena éreanana tiáwa'akana'i nákani achaneana. Makaimairikaware ena maverakeneana púchukiana. 22Taka'e, ema Jesús majikapawakapa:
–Eyana emetaka ema Juan eta íma'akene'i. Emétakayare, eta nukaimairikawakaipa ena púchukiana, nímipaisiraipa ena masariana, nukanarakawakaipa eta najumanaini ena karachameana, énapa ena tú'ukiñana samara'ianapa, nukaechepusirawakaipawa ena náepenakeneanaini, éneichuware níchu'a'i ena páureana vimisamawaka'i eta Arairu échejiriruwa. 23¡Tiurikakareya mákani achane te wa'i tikainajiruwa eta makasiñawaira eta mae'isiranu!
24Te tiyananapa ena wanairukana'i me Juan, ema Jesús tépanawapa téchejika'i, máechejisi'apa ema Juan, maka'epa: “¿Te eyanapa eti te máwapa'i apake'e, naja'a ima'apana'i? ¿Eta máechejisira'i, takuti'i te vímararaka ta taflurena eta akutena te takayamuririjika'i eta tékatikawa? 25Te wa'ipuka ¿Taja'asika eta timikuchuka'e'i ima'akene'i? ¿Émana achane tuirinamuiri'a? Eti échaichu'i, ena tiurinamuiri'ana, ena tikapenana'i te napena ena reyeana. 26Taka'e ¿Nája'asika ema íma'apanakene'i? ¿Íma'apana'i ema émana profeta? Ene taka'e'i, ema íma'apanakene'i ema'i profeta. 27Ema Juan émara taechejisi'akene'i eta Ajureka:
‘Nuti nuwanekayare
te pimira'u ema tikametarairuyare,
apaesa matserereka eta achene.’
28Nutupiruwa numetaka'e, te nasimutuwa ena achaneana nájina mákutima'i ema Juan. Ena achaneana ánichichapana te anuma mawasa ema Viya, marari'i ema chapepana maye'e ema.”
29Ena achaneana, énaipa ena tisipekaturara'ianaini, náimatiaka'i ema Juan eta mawanekasiwa'i me Viya. Nasuapa'iware eta mametarairuana ema Juan. Eta taka'e, tikaikachasianapa maye'e; 30énasera ena fariseona énapa ena máestroana, ena máisapawara'ana'i nakaikachasi'ini maye'e ema Juan, taicha wa'i nawara'a'ini nasuapa'ini ema Viya. Temepururekawanaipa eta náuriwayare'ini.
31“¿Naja'apuka nímikuticha ena achaneana puiti juka sácheana? 32Nímikutichina'e ena amaperuana tiyanana tiutseruana te plaza, piararerekana'i, apápipijichucha eta nakayemakeneanapa'i te nakachanewaka ena nachamaperuwana: ‘Vikasivivi'i, vepiyaka'i eta piesta, étisera wa'i irimaika'ini, vijirapika'i eta katisamurekarewa, wá'iware iya'a'ini eti.’ 33Taicha te tímerekawapa ema Juan Tíkachasirikara'i, wa'i tákuti'ini eta nanikasareana ena achaneana. Narari'isera te emuri ena tépiyaekene'ana'i ema. Náimijacha'i máwa'aru'i ema éreana. 34Taka'e titeka'i ema manerejiru'i ema Viya, kánisiukitataji, kawa'arasi makachanewaka'i ena achaneana tisipekaturara'iana, enapa ena tive'ara'iana eta viyase'ana taye'eyare'i eta awasare Roma 35Etasera eta maitukakene ema Viya timereuchawa'i eta maitauchira'i.”
Ema Jesús tikaichu'akasi'i te mapena ema fariseo tikaijare'iware Simón
36Matiari'i'i ema achane tikaijare'i Simón, fariseoana'i ema. Makumpirachapa ema Jesús, manipana te mapena. Masuapa'isera ema Jesús, tiyanapa, te tiúripa, eta tinikakare, téjakapa te mesa, 37Susamairikapa esu ésuna esena tisipekaturara'i'i eta matiari'ira'i ema Jesús te mapena ema fariseo. Títekapapa suámapa'i eta perfume. 38Tiya'apa'i tépuyukapa te máiwapechakaya ema Jesús, tási'a tépanawapa tíya'akawapa, táetsipapapewachapa eta sutsera. Taka'e suájipewachapa te suchutimaka, suetserarekapa eta maiwapeana, tási'a, suépusapewachapa eta perfume. 39Taka'e, eta máimaira'i ema fariseo eta juka, mapanerekene'apa. Téchejikapa te masamure: “Te yátupina'ini profetaina'ini ema maka, máimatiakaipa'ini esu suka esena Temamaka'i: Esu suka esena ichape eta susipekaturaraiwa'i.” 40Émasera ema Jesús masama'i eta mapanereru'i ema fariseo. Máichapa:
–Simón, jukari'i nuwara'a numetakaviya.
Ema fariseo majikapapa:
–Níma'aseji, pimetakanu, maestro.
41Taka'e, ema Jesús máimikutiarachinapa, máichapa:
–Natiari'i ena apinana ajairana tikanteveana'i maye'e ema riku. Ema émana tikanteve'i kinientu'i, ema apana tikanteve'i cincuenta, 42Taka'e, wa'i nárata'a'ini nawachacha'ini eta nanteveana. Tási'a, majapanuwakapa ema riku ena apinana. Tiuri puiti, nuyaserekaviyare. Ena nani apinana, ¿nája'apuka ema témunakapana'i ema riku?
43Majikapapa ema Simón:
–Tikutima'i ema tisintevepana'i.
Taka'e, máichapa ema Jesús:
–Píma'aipajira.
44Taka'e, ema Jesús máimararakaipa'i esu esena. Tási'a, máichapa:
–¿Pipanereaka esu suka esena? Puíti'i, te nusiapapa te pipena, wa'i pímisipaka'ini eta níwape. Ésusera esu suka esena tisipapewachanu'i te sutsera, tiájapewachanupa te suchutimaka. 45Píti wa'i pitsiukanu'ini eta pijakapiranu'i. Ésusera, ichapemuri'i eta sutsiukapewachiranu'i. 46Wá'iware piámasichanu'ini eta aceite eta pijakapiranu'i. Ésusera esu suka esena tisipapewachanu'i eta táijiyekene perfume. 47Yátupi tisipekaturaini'i esu suka, numetakaviyaresera, nukaepa'ainaipa esu tamutu eta supekaturanaini. Eta taka'e, ichape eta suímeresira'i eta yátupira'i eta suémunasiranu'i. Nákanisera apaesaichu'i eta napekaturana'i, apaesaichu'iware eta náemunaraiwa, taicha apaesaichu'iware eta najakapira'i eta majapanurapi.
48Taka'e, ema Jesús máichapa esu esena:
–Wa'i pikueñamawa, nukaepa'ainavipa tamutu eta pipekaturanaini'i.
49Taka'e, ena natiari'ikeneana'i chimarakana'i náejaruana'i te mesa naka'epa te nasamureana:
–¿Nája'apuka ema maka tikaemuñawa'i marata'a makaepa'a eta pekatuana?
50Émasera ema Jesús máichapa esu esena:
–Táurikapa piyana. Yátupi eta piúchuku'airaya táichavene'i eta pikasiñairanu'i.
Iliyochaguliwa sasa
Lucas 7: IGB
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Nuevo Testamento Ignaciano © Sociedad Bíblica Boliviana, 2004.
