Maɛ 7

Nyi̍ɔ̍-a telě se̍ Nyɔsoa naɛ sìì

(Matio 15.1-9)

1 Fɛlesii nyɔ̍ ke telě nǎ poe nyɔ̍ duuh ùh sɔ-a dǒ Juluslɛn wlɔ̀ di̍i̍-ɛ, u̍h gbǎ tàdùè dǒ Jusu we̍. 2Wɛ̀ u̍h jě ɔ̍ kòà duuh nɛ̀ u̍h wa̍ Juu nyɔ̍-a telě. U̍h se̍ kwa̍ dle iě u̍h-a di̍ dɛ̍.

3Dɛ̍nu̍ɛ, Fɛlesii nyɔ̍ ke Juu nyɔ̍ kli̍hgbɛ̍ nɔ̀ɔ̍, pò u̍h iě dɛ̍ di̍-ɛ, nɛ̀ u̍h-a dle kwa̍ sasǎ. Ɛ̍ bo ɛ̀ nu̍ u̍h baaᵻá telě u̍h po̍. 4Pò u̍h sɔ dě dɔɔ̌-ɛ, nɛ̀ u̍h-a dle i̍ sasǎ wɛ̀ u̍h-a di̍ dɛ̍. U̍h blě telě dɔu diih. U̍h-a wɔ̍lɔ tìɛ̀n jawih ke, kàu̍nᵻ ke plěaᵻ kɛ̍n i̍, ɛ̍ ke tike̍ᵻ bei ke.

5Ɛ̍ bo Fɛlesii nyɔ̍ ke telě nǎ poe nyɔ̍ tèle ɔ̍ i̍, u̍h la̍a̍, “Dɛ̍nu̍ àn kòà la wɛ̀ u̍h-u tè-o à baaᵻá telě i̍ ɛ? U̍h se̍ kwa̍ dle wɛ̀ u̍h-a di̍ dɛ̍.”

6Wɛ̀ ɔ̍ la̍a̍ dě u̍h we̍, “Mɔ̀-ɔ la ùh nɛ-a mɛɔ sɔɔ̌n wɔ̍ɔ̍n-ɛ, dɛ̍ Nyɔsoa-a tu̍owli po̍ nyɔ̍ Asaia bla̍-a dǒ mɔ̀ pùn-ɛ, ɛ̍ blaɛ i̍. Kǎ ɛ̍ nu̍ ka chlǐh-ɛ,

‘Nyɔ̍ la u̍h-a wɔ̍n-a sǔh bo u̍h-a tè-e ǐn ja̍,

jɛ u̍h-a wlùh ti̍ɛ̍ɛn ǐn we̍ i̍.

7U̍h-a sà ǐn wɛɛ bu̍ɛ̍i̍.

Wlɔ̀ nyi̍ɔ̍-a telě bo u̍h-a poe nyɔ̍ nǎ

u̍h-a dǎɛ naɛ̍.’ ”

8Jusu la̍a̍, “Mɔ̀ poe Nyɔsoa-a telě kɛ̍n i̍ wɛ̀ mɔ̀-a tè-o wlɔ̀ nyi̍ɔ̍-a nàɛ̀ i̍.”

9Ɔ̍ la̍a̍ dě u̍h we̍, “Mɔ̀-a po̍ gblàa̍ Nyɔsoa-a telě iě dǒ bloɔ̍ i̍ gbǎ wɛ̀ mɔ̀ naɛ nǎ iě-o sie. 10Dɛ̍nu̍ɛ, Mose la̍a̍, ‘Tè ìn de̍ ke ìn baa ja̍. Nɛ̀ nyɔ̍ jɔ mu̍-a ɔ̍ baa àe̍e̍ ɔ̍ de̍ chlèe-ɛ, nɛ̀ ɔ̍ kɔn ɔ̍ iě dbǎ-ɛ.’ 11Jɛ mɔ̀ la̍ pò nyɔ̍ blě dɛ̍ ɔ̍ iě ɔ̍ de̍ ke ɔ̍ baa nyǐ-ɛ, nɛ̀ ɔ̍ la̍a̍, ‘Dɛ̍ ǎn mu̍-a mɔ̀ nyǐ de-ɛ, ǐn nyǐ ɛ̍ Nyɔsoa wɛ̀.’ Ɛ̍ bo Juu nyɔ̍-a dǎɛ koben dě Iblu wlu̍ di̍i̍. 12Ɛ̀ laa̍ nɛ̀ mɔ̀-a sà u̍h wìè-i, u̍h-u je̍e dɛ̍ nu̍ dǒ u̍h de̍ bei we̍. 13Mɔ̀-a po̍ nǎ iě ɛ̍ sà Nyɔsoa-a wlu̍ dǒ wìè-i. Wɛ̀ nɛka dɔu diih nɛ dǒ de̍ mɔ̀-a nu̍.”

Ɛ̀ nyni-a nyɔ̍ dě Nyɔsoa jlǐh i̍-ɛ la

(Matio 15.10-20)

14Wɛ̀ Jusu dǎ nyɔ̍ tlùgbei̍ laa̍ dɛ, iě ɔ̍ la̍a̍ dě u̍h we̍, “Mɔ̀ kli̍hgbɛ̍ mɔ̀ po̍ nɔ̌ ǐn we̍ dounᵻ wɛ̀ mɔ̀ iě dɛ̍ɛ̍ i̍ wɔ̌n. 15Dɛ̍ jɛ mu̍-a dě nyɔ̍ di̍i̍-ɛ, ɛ̍-ɛ nyni-i nyɔ̍ dě Nyɔsoa jlǐh i̍. Jɛ wlu̍ ɛ̀ sɔ-a dě nyɔ̍ wɔ̍ɔ̍n-ɛ, ɛ̍ bo ɛ̀ nu̍ ɛ̍ wɛ̀ nyɔ̍-a nyni dě Nyɔsoa jlǐh i̍. [ 16Nyɔ̍ ɔ̀ pɔ̀n-a tìh wɔ̌n-ɛ i̍-ɛ, nɛ̀ ɔ̍ po̍-e dounᵻ.]”

17Wɛ̀ Jusu sɔ dǒ u̍h we̍ iě ɔ̍ mu̍ gbò we̍. Wɛ̀ ɔ̍ kòà tèle ɔ̍ i̍ nɛnǎ la ɛ̍ tìh. 18Wɛ̀ Jusu la̍a̍ dě u̍h we̍, “Mɔ̀ɔ̍ nɔ̀ɔ̍, mɔ̀ se̍ ɛ̍-ɛ i̍ wɔ̌n ke ae? Mɔ̀ se̍ ɛ̍ juo ka dɛ̍ ɛ̀ mu̍-a dě nyɔ̍ di̍i̍-ɛ, ɛ̍ se̍-a nyɔ̍ dě Nyɔsoa jlǐh i̍ nyni-i mu̍-ɛ ae? 19Ka i̍h se̍-a dǒ ɔ̍ wlùh kɛ̍n mu̍, wɛ̀ i̍h mu̍-a dě ɔ̍ wùò di̍i̍-ɛ, nɛ̀ i̍h-a mu̍ sɔ̀n sǐ dě ɔ̍ de̍e̍.” Dɛ̍ Jusu-a bla̍-ɛ, ɛ̍ nu̍ di̍-dɛ̍ᵻ kli̍hgbɛ̍ nmɔ jii̍ nyɔ̍ iě i̍h di̍.

20Wɛ̀ ɔ̍ la̍a̍, “Dɛ̍ ɛ̀ sɔ-a dě nyɔ̍ ku̍sɔ̀n-ɛ, ɛ̍ bo ɛ̀ nyni-i nyɔ̍ dě Nyɔsoa jlǐh i̍. 21Dɛ̍nu̍ɛ, dǒ nyɔ̍ wlùh kɛ̍n bo dɛ̍ᵻ sɔ̀nᵻ wlùh i̍ naɛ-a sɔ. I̍h bo ìh nu̍-a gbǎn nu̍-ɛ ke, jlǐ-ɛ ke, nyɔ̍ gbe̍ja̍a̍ po̍-ɛ ke, nynɛ̌à nu̍-ɛ ke, 22klǎn kɔn-ɛ ke, kà kɔn-ɛ ke, gblàa̍ ke, jii̍ ku̍-ɛ ke, wlɛ̀n ke, nyɔ̍-a wlu̍ wɔ̍i̍n nyni-ɛ ke, blɔ̌-ɛ ke, ɛ̍ ke we̍i̍ bo-ɛ ke. 23Dɛ̍ᵻ sɔ̀nᵻ kli̍hgbɛ̍ la i̍h-a sɔ dě nyɔ̍ di̍i̍, wɛ̀ i̍h-a nu̍ ɛ̍ nyɔ̍-a nyni-e Nyɔsoa jlǐh i̍.”

Nynɔ̌-a wlùh gbaɛ-ɛ pǔh-i ɔ̍ jǔ

(Matio 15.21-28)

24Wɛ̀ Jusu wlǔh-i gbààn, iě ɔ̍ mu̍ dě Taiɛ fɔɔ dǒ wlɔ̀ due di̍i̍. Wɛ̀ ɔ̍ nu̍ soɛɛ ɔ̍ pa̍ dě gbò nyɔ̍-ɔ je̍e ɔ̍ jě. Jɛ ɛ̍ kma-a ɔ̍ iě nyɔ̍ jii̍ sìle. 25Dǒ nynɔ̌ due nyna ɔ̍ wɔ̌n ɔ̍ nynɛ̌. Nɛ̀ jeědih nɛ dǒ ɔ̍ jǔ nynɔ̌gbaɔ de̍e̍. Wɛ̀ ɔ̍ ji̍ dǒ Jusu we̍, iě ɔ̍ gbɛ̍n ɔ̍ bu̍hᵻ i̍. 26Nynɔ̌-a chɛ̀ ɔ̍ se̍ Juu nynɔ̌, ɔ̍ sɔ Fɔnisia fɔɔ dě Siwlia bloa̍ kɛ̍n. Wɛ̀ ɔ̍ ba̍le Jusu ɔ̍ iě ɔ̍ jǔ jeědih de̍e̍ sà. 27Jɛ Jusu la̍a̍ dě ɔ̍ we̍, “Bɔ̌, nynuu̍plìh bo ùh iě di̍-dɛ̍ jě ke sàǐtòò. Ɛ̍ se̍ i̍ slɛ̌ nyɔ̍ iě nynuu̍plìh-a di̍-dɛ̍ᵻ dǒ gbèᵻ jǔ i̍ wèla.”

28Wɛ̀ ɔ̍ la̍a̍, “I̍i̍n, nyɔ̍ klaa, kǎ ɛ̍ nɛ, jɛ gbèᵻá chɛ̀ pò i̍h nɛ dě teble̍ sɔ̀n-ɛ, nɛ̀ i̍h-a di̍ nynuu̍plìh-a di̍h gbàɛ̀ nɔ̀ɔ̍.”

29Wɛ̀ Jusu la̍a̍ dě ɔ̍ we̍, “Ka ìn nu̍-a ǎn wlu̍ la pɔ̀n we̍ sà-aɛ, ɛ̍ po̍ ǐn gbǐh. Ɛ̍ tìh-ɛ, mu̍ gbò we̍ ìè àn jǔ jě, jeědih sɔ dǒ ɔ̍ de̍e̍ wɛ̀.”

30Nynɔ̌ iě-a gbò we̍ mu̍-ɛ, taǐntain, nɛ̀ jeědih sɔ dǒ ɔ̍ jǔ de̍e̍ wɛ̀. Nɛ̀ ɔ̍ pɛ̌n i̍ dǒ bèe̍ kɛ̍n.

Jusu pǔh-i bo̍bo̍ ɔ̀ sǔn-aɛ

31Wɛ̀ Jusu sɔ dě Taiɛ fɔɔ, iě ɔ̍ jii dě Saidɔn ke bloa̍ blě-a Wlɔ̀ᵻ Pùè-ɛ kɛ̍n. Wɛ̀ ɔ̍ mu̍ dě pɛ̍nu̍ klaa nɛ-a dě Kaladii fɔɔ-ɛ wɔ̍i̍n. 32Dě-e bo u̍h ja-ɛ jɔ̍gbau due ɔ̀ sǔn-aɛ dǒ ɔ̍ we̍. Ɛ̍ kma-a jɔ̍gbau-a chɛ̀ iě wlu. Wɛ̀ u̍h ba̍le Jusu ɔ̍ iě ɔ̍ sɔ̍n dlǔ tè. 33Wɛ̀ Jusu sà ɔ̍ dě nyɔ̍ɔ nynɛ̌, iě ɔ̍ chɛn-ɛ ɔ̍ gbɔ̍i̍. Wɛ̀ ɔ̍ gba̍ ɔ̍ chèɛ̀ᵻ dě jɔ̍gbau dounᵻ. Iě ɔ̍ po̍ tɔ̍n kwa̍ i̍, wɛ̀ ɔ̍ tǔh ɔ̍ mɛɔ i̍ dɛ ke. 34Wɛ̀ Jusu gbɛ̀n dě ja̍u̍n we̍, iě ɔ̍ wlǎ flɛ̀n i̍. Wɛ̀ ɔ̍ la̍a̍ dě jɔ̍gbau we̍, “Ɛfata,” ɛ̍ gbɔ̀ nu̍, pɔ̀ni.

35Wɛ̀ ɔ̍ dounᵻ pɔ̀ni, iě ɔ̍ mɛɔ gbàli-ɛ. Sɔ ɔ̍ wlu la̍-ɛ gbài̍gbài̍ sǔh. 36Wɛ̀ Jusu gbɛ̍n-ɛ u̍h wɔ̍i̍n u̍h-u je̍e nyɔ̍-o-nyɔ̍ wlùh sèàɛ̍. Jɛ ka ɔ̍ gbɛ̍n-ɛa u̍h wɔ̍i̍n u̍h-u je̍e-a nyɔ̍ wlùh sèàɛ̍-ɛ, nɛ̀ kǎ u̍h-a dlɛɛ ɛ̍ pɛ̍n nǐ i̍ ke sǔh. 37Sɔ ɛ̍ wlǔh i̍ nyɔ̍ kli̍hgbɛ̍ de̍e̍ kaa̍ka. Iě u̍h la̍a̍, “Jɔ̍gbau la dɛ̍ᵻ kli̍hgbɛ̍ ɔ̍ nu̍-aɛ, i̍h bo ìh nmɔ jii̍. Ɔ̍ nu̍ ɛ̍ sǔn-nyɔ̍-a wɔ̌n i̍, wɛ̀ bo̍bo̍ bei-a wlu.”

Iliyochaguliwa sasa

Maɛ 7: KDNT

Kuonyesha

Shirikisha

Nakili