Maɛ 4

Dɛ̍ᵻ jɔ̌ gbà nyɔ̍-a nɛnǎ

(Matio 13.1-9; Luu 8.4-8)

1Dǒ ti̍ due di̍i̍ wɛ̀ Jusu tè nyɔ̍ nǎ po̍-ɛ gbɔ̀ dɛ dǒ pɛ̍nu̍ klaa wɔ̍i̍n. Sɔ nyɔ̍ ùh gbǎ-a tàdùè dǒ ɔ̍ we̍-ɛ, u̍h tìè i̍ kaa̍ ɛ̍ sì-o i̍. Ɛ̍ bo ɛ̀ nu̍ ɛ̍ wɛ̀ ɔ̍ gbǎ dě blǎgbè di̍i̍ ɔ̍ tè i̍ dǒ nǐ kɛ̍n. Iě nyɔ̍ kli̍hgbɛ̍ sie dǒ gbuǔh kɛ̍n. 2Nɛnǎᵻ bo ɔ̍ nu̍ wɛ̀ ɔ̍ po̍ u̍h nǎ dǒ dɛ̍ᵻ dɔu we̍. Ɔ̍ la̍a̍,

3“Mɔ̀ pu̍e̍e dounᵻ i̍, jɔ̍gbau due bo ɔ̀ mu̍ dɛ̍ᵻ jɔ̌ gbà la̍-a. 4-8Ɔ̍ gbà-a i̍h dě klè-ɛ, diih gbǎ dǒ wìè gblùh i̍, wɛ̀ diih gbǎ dǒ sɔɔ̌ᵻ blǔh kɛ̍n. Wɛ̀ diih gbǎ dě klàɛ̀n di̍i̍, wɛ̀ diih gbǎ dǒ gbablu̍h i̍. Jih gbǎ-a dǒ wìè gblùh i̍-ɛ, na̍wɛ̍ᵻ di̍ i̍h-i. Jih gbǎ-a dǒ blǔh sɔɔ̌ nɛ-a dě sɔ̀n-ɛ kɛ̍n-ɛ, i̍h po̍ kɔɔ̌nᵻ suei̍, dɛ̍nu̍ɛ, i̍h-a blǔh chɛ̀wlɛ di̍i̍. Sɔ i̍h-a sɛ̌n-ɛ jě wlù mu̍ ka̍. Jɛ jlǔh kma-a i̍-ɛ, wɛ̀ i̍h wlɔ̍. Jih gbǎ-a dě klàɛ̀n di̍i̍-ɛ, i̍h ke wiǎᵻ ku̍-i tàdùè. Wɛ̀ wiǎᵻ mɔɛ i̍h dlǔ i̍ ɛ̍ kɔn i̍h se̍ tlo. Jih gbǎ-a dǒ gbablu̍h i̍-ɛ, i̍h nmɔ-ɛ, wɛ̀ i̍h wa̍. Diih blě jɔ̌-a kwela ta̍a̍n, diih blě kwela mɛ̀o̍, wɛ̀ diih blě kmɛ.”

9Wɛ̀ Jusu la̍a̍, “Nyɔ̍ flɔn-a dounᵻɛ́, nɛ̀ ɔ̍ po̍-e dounᵻ.”

Tìh Jusu po̍-a nɛnǎᵻɛ́ la

(Matio 13.10-17; Luu 8.9-10)

10Ti̍ Jusu sɔ-a dǒ u̍h we̍-ɛ, wɛ̀ nyɔ̍ ùh jě-a ɔ̍ tà-a ke ɔ̍ kòà-a pùè jɔ̌ sɔɔ̌n mu̍ dě ɔ̍ we̍, wɛ̀ u̍h tèle ɔ̍ i̍ ɔ̍ iě nɛnǎᵻ laa̍ gbɔ̀ sà. 11Wɛ̀ ɔ̍ la̍a̍, “Mɔ̀ɔ̍ nɔ̀ɔ̍, Nyɔsoa nu̍ ɛ̍ wɛ̀ dɛ̍ᵻ ìh nɛ-a dě kwile de dě ɔ̍ kmɔ̌ wlu̍ i̍ kɔn-ɛ di̍i̍-ɛ, wɛ̀ mɔ̀ juo i̍h. Jɛ juh ùh nɛ-a dǒ kɛ̍n-ɛ, u̍h nɔ̀ɔ̍, dɛ̍ᵻ kli̍hgbɛ̍ nɛ dě nɛnǎᵻ di̍i̍ dǒ u̍h we̍. 12Sɔ nɛ̀,

‘U̍h-a gbèɛ̀ɛ̍n i̍, jɛ u̍h-u jě i̍,

u̍h-a pu̍e̍e dounᵻ i̍, jɛ u̍h-u wɔ̌n dɛ̍ɛ̍ i̍.

Pò ɛ̍ se̍ la̍a̍n nɛ de-ɛ, nɛ̀ u̍h-a mu̍ Nyɔsoa we̍ ji̍ de

wɛ̀ ɔ̍ iě u̍h-a gblɛ̍n sɔ̀ɛ̀n-a tìh i̍ tǎli.’ ”

Jusu sà nɛnǎ gbɔ̀

(Matio 13.18-23; Luu 8.11-15)

13Wɛ̀ Jusu la̍a̍, “Mɔ̀ se̍ nɛnǎ la i̍ wɔ̌n ae? Nɛ̀ pò mɔ̀ se̍ ɛ̍ i̍ wɔ̌n-ɛ, nɛ̀ nɛnǎ jɛwe̍ bo mɔ̀-a mu̍ i̍ wɔ̌n nɔ̌ kmɔ̌ ɛ? 14Nyɔ̍ ɔ̀ gbà-a dɛ̍ᵻ jɔ̌-ɛ, nɛ̀ Nyɔsoa-a wlu̍ bo ɔ̍ gbà. 15Nyɔ̍ duuh wɔ̀ dɛ̍ᵻ jɔ̌ ìh gbǎ-a dǒ wìè gblùh i̍-ɛ, u̍h wɔ̌n-a Nyɔsoa-a wlu̍ ka-ɛ, ɛ̍-ɛ wlè-o wɛ̀ Setɔn-a ji̍ iě ɛ̍ sà wlu̍-a chɛ̀ dǒ u̍h wlùh kɛ̍n. 16Wɛ̀ duuh wɔ̀ jɔ̌ ìh gbǎ-a dǒ blǔh sɔɔ̌ nɛ-a dě sɔ̀n-ɛ kɛ̍n-ɛ. U̍h wɔ̌n-a wlu̍ la sàǐtòò-ɛ, sɔ u̍h gbɛ̍n-ɛ ɛ̍ sɔ̍nᵻ sɔɔ̌n i̍. 17Jɛ ti̍ nyɔ̍gbei tù-a wlu̍ la ɛ̍ tìh u̍h-a jě-ea la̍ u̍h klě, u̍h-a po̍-a u̍h wě dlǔ-ɛ, ɛ̍ kɔn u̍h se̍ ɛ̍ kɛ̍n wlè wɛ̀ u̍h ple̍ suei̍. Dɛ̍nu̍ɛ, ɛ̍ se̍ sɛ̌n po̍ dě u̍h ku̍sɔ̀n. 18Nyɔ̍ duuh wɔ̀ jɔ̌ ìh gbǎ-a dě klàɛ̀n di̍i̍-ɛ. Ti̍ u̍h wɔ̌n-a wlu̍ la-ɛ, 19kmɔ̌-a sèò ke ɛ̍ pàn-dɛ̍ᵻ i̍ jbɛɛ-ɛ ke pɔ̀n-dɛ̍ᵻ dɔu-a tìh bo ìh gbǎ dǒ u̍h wlùh kɛ̍n wɛ̀ i̍h mɔɛ wlu̍ laa̍ dlǔ i̍. Ɛ̍ kɔn ɛ̍ se̍ tlo. 20Jɛ duuh wɔ̀ jɔ̌ ìh gbǎ-a dǒ gbablu̍h i̍-ɛ, u̍h wɔ̌n wlu̍ la, wɛ̀ u̍h gbɛ̍n ɛ̍ i̍, iě u̍h tlo. U̍h-a duuh blě jɔ̌-a kwela ta̍a̍n, duuh blě kwela mɛ̀o̍, wɛ̀ duuh blě kmɛ.”

Nape̍ bo nyɔ̍-a jěe i̍

(Luu 8.16-18)

21Wɛ̀ Jusu la̍a̍ dě u̍h we̍, “Nyɔ̍-ɔ tba̍ nape̍ wɛ̀ nɛ̀ po̍ ɛ̍ dě too sɔ̀n àe̍e̍ dě bèe̍ sɔ̀n. Jɛ nɛ̀ àn tù ɛ̍ dǒ gbà ja̍ wɛ̀ ɛ̍ jě i̍ dě gbò. 22Ɛ̍ tìh-ɛ, dɛ̍-o-dɛ̍ ɛ̀ sìle-aɛ, ɛ̍ mu̍ tà wlǔh. Nɛ̀ dɛ̍ ɛ̀ nɛ-a dě kwile-ɛ, ɛ̍ mu̍ dǒ gbaɛ̍we̍ ji̍. 23Pò nyɔ̍-o-nyɔ̍ blě dounᵻ ɔ̍ iě i̍ wɔ̌n-ɛ, nɛ̀ ɔ̍ tba̍ dounᵻ i̍.”

24Wɛ̀ ɔ̍ la̍a̍ dě u̍h we̍, “Mɔ̀ tba̍ dounᵻ i̍ wɛ̀ dɛ̍ ǎn mu̍-a sà-ɛ, mɔ̀ iě ɛ̍ wɔ̌n. Dbee dɛ̍ mɔ̀ nyǐ-a nyɔ̍ duuh-ɛ, dbee dɛ̍ laa̍ bo Nyɔsoa-a mu̍ mɔ̀ nyǐ ke, jɛ mɔ̀ nàɛ̀-a mu̍-o sìì. 25Dɛ̍nu̍ɛ, nyɔ̍ ɔ̀ blě-a dɛ̍-ɛ, nɛ̀ ɔ̍ mu̍ dɛ̍ dɔu nyǐ-ɛ. Jɛ nyɔ̍ ɔ̀ se̍-a dɛ̍ blě-ɛ, nɛ̀ dɛ̍ juwɛ-a chɛ̀ ɔ̍ blě-a de-ɛ, ɛ̍ mu̍ ɔ̍ kwa̍a̍ sà-ɛ.”

Dɛ̍ jɔɛ̍-a ku̍-u nɛnǎ

26Wɛ̀ Jusu la̍a̍ dě u̍h we̍ dɛ, “Kǎ Nyɔsoa-a kmɔ̌ wlu̍ i̍ kɔn-ɛ nɛ ka. Jɔ̍gbau due bo ɔ̀ mu̍, iě ɔ̍ gbà dɛ̍ᵻ jɔ̌ dě klè. 27Nɛ̀ wlù ke sɔ̀n-ɛ, ɔ̍ nu̍ gbǎ nyinɔ̍ i̍ sɔ bloɔ̍, nɛ̀ kǎ dɛ̍ᵻ jɔ̌ laa̍ i̍h-a wlǔh, wɛ̀ i̍h-a ku̍. Jɛ ka i̍h-a nu̍-a ku̍-ɛɛ, ɔ̍ se̍ ɛ̍ we̍ i̍ ju̍o̍e. 28Blǔh-a chɛ̀ bo ɛ̀ nu̍ ɛ̍ wɛ̀ i̍h-a ku̍. I̍h-a po̍ kɔɔ̌n sàǐtòò, wɛ̀ i̍h-a wa̍, nɛ̀ i̍h nynǎ mlǎ dě chlǎn we̍. 29Nɛ̀ pò i̍h sàni-ɛ, nɛ̀ ɔ̍ dǔ faa kleǐn ɔ̍ iě i̍h chɛ̍n. Dɛ̍nu̍ɛ, i̍h-a chɛ̍n-ɛ nɔɔ bo wɛ̀.”

Jě à dǎɛ majlɛkɛ jɔɛ̍-a nɛnǎ

(Matio 13.31-32, 34; Luu 13.18-19)

30Jusu la̍a̍, “Dɛ̍ we̍ bo Nyɔsoa-a kmɔ̌ wlu̍ i̍ kɔn-ɛ wɔ̀ ɛ? Nɛnǎ jɛwe̍ à iě po̍ wɛ̀ à iě ɛ̍ dɛ̍ i̍ blaɛ ɛ? 31Ɛ̍ wɔ̀ jě à dǎɛ majlɛkɛ jɔɛ̍. Majlɛkɛ jɔɛ̍ wàn i̍ ɛ̍ sìì dɛ̍ᵻ jɔ̌ kli̍hgbɛ̍ nyɔ̍-a tù-aɛ. 32Jɛ pò ìn tù ɛ̍-ɛ, nɛ̀ ɛ̍ ku̍-i, iě ɛ̍ bɛ̌ i̍ ɛ̍ sìì tù-dɛ̍ᵻ plìh kli̍hgbɛ̍. Iě ɛ̍ po̍ kàgblih klaaᵻ, wɛ̀ na̍wɛ̍ᵻá poe tlěᵻ dě i̍h-a peɛ.”

33Nɛnǎᵻ dɔu nɛka la, ìh u̍h-a mu̍-a i̍ wɔ̌n-ɛ, i̍h bo Jusu poe Nyɔsoa-a tu̍owli dě u̍h we̍. 34Ɔ̍-ɔ ja dě u̍h we̍ wlu wɛ̀ ɔ̍-ɔ se̍ nɛnǎ po̍. Jɛ pò ɔ̍ ke ɔ̍ kòà chɛn gbɔ̍i̍ wɛ̀-ɛ, wɛ̀ ɔ̍ sèàɛ̍ dɛ̍ᵻ kli̍hgbɛ̍ we̍ i̍ dě u̍h we̍.

Jusu po̍ poɔ bɔ̌ i̍

(Matio 8.23-27; Luu 8.22-25)

35Dǒ weɛ̍ due laa̍ di̍i̍ nɛ̀ ɛ̍ nu̍ flìwe̍ wɛ̀, wɛ̀ Jusu la̍a̍ dě ɔ̍ kòà we̍, “Mɔ̀ à tàn pɛ̍nu̍ klaa la à iě dě ɛ̍ fɔ̌ dɛɛ we̍ gbǎ.” 36Wɛ̀ ɔ̍ kòà gbǎ dě blǎgbè kɔn di̍i̍ ɔ̍ tè-a i̍-ɛ. Iě u̍h ke ɔ̍ mu̍, u̍h si̍e̍ nyɔ̍ tlùgbei̍ laa̍. Nɛ̀ u̍h ke blǎgbè diih-a mui wìè-i. 37U̍h iě-a kèle-ɛ, nɛ̀ tìlèè poɔ chɛn ja̍i̍ wɛ̀. Wɛ̀ pɛ̍nu̍ laa̍ ɛ̍ dǒ-a du̍ blǎgbè we̍, iě nǐ-a wlǎ dě ɛ̍ di̍i̍. Sɔ nɛ̀ ɛ̍ wɛ̀la ɛ̍-ɛ jǐ nǐ di̍i̍ dɛ. 38Nɛ̀ Jusu nɛ dě blǎgbè-a chɛ̀ gbɔ̀we̍ ɔ̍ po̍ tu̍klo̍o̍ dlǔ kɛ̍n ɔ̍ mɔ̌. Wɛ̀ ɔ̍ kòà bla̍ ɔ̍ kɛ̍n i̍, iě u̍h la̍a̍, “Dlǔtu, à ji̍-a mɛ̌ la̍-ɛ, mɔ̀ɔ̍, ìn se̍-e kɔn ae?”

39Wɛ̀ Jusu sɔ bloɔ̍, iě ɔ̍ po̍ poɔ laa̍ bɔ̌ i̍, ɔ̍ la̍a̍, “Nɛ klìi̍.” Iě ɔ̍ la̍a̍ dě dǒ we̍, “Nɛ tìi̍n.” Wɛ̀ poɔ bɔ̌, iě dɛ̍ᵻ kli̍hgbɛ̍ nɛ tùàa̍n. 40Wɛ̀ ɔ̍ la̍a̍ dě u̍h we̍, “Dɛ̍ po̍ mɔ̀ faɔn ɛ? Mɔ̀ se̍ wlùh gbaɛ blě ke̍ sǔh ae?”

41Sɔ ɛ̍ flɔn-ɛ u̍h wɔ̍n dɛ kaa̍, iě u̍h-a tèle-e we̍ i̍. U̍h la̍a̍, “Ka jɔ̍gbau la ɔ̍ tìh nɛ ɛ? Poɔ ke nǐ-a dǒ bei-a nu̍ ɔ̍ wlu̍ wa.”

Iliyochaguliwa sasa

Maɛ 4: KDNT

Kuonyesha

Shirikisha

Nakili