Luu 5

Jusu dǎ ɔ̍ sàǐtòò kòà

(Matio 4.18-22; Maɛ 1.16-20)

1Jusu nyna i̍ dǒ pɛ̍nu̍ klaa nɛ-a Kɛnɛslɔɛ-ɛ wɔ̍i̍n-ɛ, nɛ̀ nyɔ̍gbei po̍ ɔ̍ dě pìe̍e̍ u̍h iě Nyɔsoa-a wlu̍ wɔ̌n. 2Iě ɔ̍ jě blǎgbè sɔɔ̌n dǒ pɛ̍nu̍ wɔ̍i̍n. Jɛ nɛ̀ sɔ̍ po̍ nyɔ̍-a sɔ dě i̍h di̍i̍, wɛ̀ u̍h-a wɔ̍lɔ u̍h-a sɔ̍ᵻ. 3Wɛ̀ Jusu gbǎ dě blǎgbè due di̍i̍, ɛ̀ Samo kɔn-aɛ. Iě ɔ̍ sèàɛ̍ Samo wlùh ɔ̍ iě ɛ̍ tǔn ɛ̍ iě gbuǔh we̍ i̍ ti̍ɛ̍ɛn wɛɛ. Wɛ̀ ɔ̍ tè i̍ dě blǎgbè di̍i̍ iě ɔ̍ po̍ nyɔ̍ nǎ.

4Ɔ̍ wɔ̀-a wlu-ɛ, iě ɔ̍ la̍a̍ dě Samo we̍, “Klɛɛn blǎgbè la dě wloo, nɛ̀ mɔ̀ po̍ mɔ̀-a sɔ̍ᵻ niɔ̍ mɔ̀ iě dɛ̍ gbɛ̍n.”

5Iě Samo sà ɔ̍ wlu̍ pɔ̀n we̍. Ɔ̍ la̍a̍, “Dlǔtu, à po̍ sɔ̍ po̍ po̍-o wìe̍, wɛ̀ à se̍ dɛ̍ gbɛ̍n. Jɛ ka ìn wlu-aɛ, ǎn mu̍ i̍h niɔ̍ po̍ dɛ.” 6U̍h po̍-a i̍h niɔ̍-ɛ, wɛ̀ u̍h gbɛ̍n smìi̍ dɔu, iě u̍h-a sɔ̍ᵻá pɔ̀n chɛ̍n-ɛ i̍. 7Wɛ̀ u̍h po̍ sɔ̍nᵻ dě u̍h ba̍ᵻ nɛ-a dě blǎgbè dɛɛ di̍i̍-ɛ we̍, u̍h iě u̍h we̍ gbǎ la̍-a ji̍. Iě u̍h ji̍, wɛ̀ u̍h jǐ-i blǎgbè nɛ-a sɔɔ̌n-ɛ fɛ̍ɛ̍n dǒ smìi̍ we̍. Sɔ i̍h wɛ̀la i̍h-i pa̍ nǐ wlù dɛ. 8Jɛ Samo Pitɛ jě-a dɛ̍ ɛ̀ nɛ-aɛ, iě ɔ̍ chlìi i̍ dǒ Jusu jǔ. Ɔ̍ la̍a̍, “Joi, tǎli ǎn tìh i̍. Dɛ̍nu̍ɛ, mɔ̍ gblɛ̍n sɔ̀ɛ̀n nyɔ̍.”

9Ka u̍h nu̍-a smìi̍ dɔu laa̍ gbɛ̍n-ɛɛ, ɛ̍ wlǔh i̍ ɔ̍ ke ɔ̍ ba̍ᵻ kli̍hgbɛ̍ de̍e̍. 10Samo ba̍ᵻ, Chiin ke Chɔɔn ùh nu̍-a Sɛɛbedii-a nynuu̍-ɛ, kǎ ɛ̍ nu̍ u̍h-a tìh ke. Iě Jusu la̍a̍ dě Samo we̍, “Bɔ̌ faɔn ple̍-ɛ, sɔ da̍a sèàn blǐ-ɛ, àn mu̍ la̍ nyi̍ɔ̍ gbɛ̍n ìè u̍h Nyɔsoa we̍ ja.”

11Wɛ̀ u̍h jǎ-ɛ u̍h-a blǎgbè tlu̍h, dǒ u̍h sie dɛ̍ᵻ kli̍hgbɛ̍ iě u̍h gbǎ dǒ Jusu de̍e̍.

Jusu pǔh-i jɔ̍gbau due

(Matio 8.1-4; Maɛ 1.40-45)

12Ti̍ Jusu nɛ-a dǒ wlɔ̀ due di̍i̍-ɛ, wɛ̀ jɔ̍gbau due ji̍, nɛ̀ wìèìdih-a nu̍ ɔ̍-ɛ. Ɔ̍ jě-a Jusu-ɛ, iě ɔ̍ chlìi i̍ dǒ ɔ̍ jǔ, wɛ̀ ɔ̍ ba̍le ɔ̍. Ɔ̍ la̍a̍, “Nyɔ̍ klaa, pò ìn wɔ̌ɛn ɛ̍-ɛ, nɛ̀ ìn bɛ̌ɛ ɛ̍ nu̍-ɛ iě fɛ̍nɛ wa.”

13Wɛ̀ Jusu slɛ̌ɛ sɔ̍n i̍ iě ɔ̍ tǔh ɔ̍ i̍. Ɔ̍ la̍a̍, “Ǐn wɔ̌ɛn ɛ̍-ɛ, fɛ̍nɛ dode̍.” Dǒ tàdùè laa̍ ɔ̍ wìèìdih bɔ̌-ɛ. 14Wɛ̀ Jusu la̍a̍, “Bɔ̌ nyɔ̍-o-nyɔ̍ wlùh sèàɛ̍-ɛ, jɛ mu̍ ìè àn chɛ̀ Nyɔsoa-a slaǎ sà nyɔ̍ i̍ to. Nɛ̀ ìn sà slaǎ ɛ̀ Mose-a telě la̍ nyɔ̍ iě-a nu̍-ɛ, ɛ̍ iě ɛ̍ to dě nyɔ̍ kli̍hgbɛ̍ we̍ ka ìn fɛ̍nɛ-aɛ.”

15Jɛ Jusu-a pɔ̀n sɛ̍ i̍ kaa̍, iě nyɔ̍ tlùgbei̍ ji̍ ɔ̍ wlu̍ wɔ̌n la̍-a, ɔ̍ iě u̍h-a wɛ̌ᵻ bɔ̌-ɛ ke. 16Jɛ ɔ̍ chlìì-ɛ dě kwlǎslò we̍, iě ɔ̍ ba̍le.

Jusu pǔh-i klɔ-nyɔ̍

(Matio 9.1-8; Maɛ 2.1-12)

17Dǒ weɛ̍ due di̍i̍ nɛ̀ Jusu-a po̍ nyɔ̍ nǎ, nɛ̀ dǒ Fɛlesii nyɔ̍ ke telě nǎ poe nyɔ̍ nɛ. U̍h-a duuh sɔ wlɔ̀ᵻ gbàɛ̀ kli̍hgbɛ̍ nɛ-a dě Kaladii ke Judia fɔɔ-ɛ di̍i̍ i̍, ɛ̍ ke dǒ Juluslɛn wlɔ̀ di̍i̍ ke. Nɛ̀ Joi-a gbǐh nɛ Jusu kɛ̍n ɔ̍ iě nyɔ̍ pǔh-i. 18Iě nyɔ̍gbei blě-e klɔ-nyɔ̍ dě sabli̍ di̍i̍ u̍h-a pɔ̀n ɔ̍ dě gbò pa̍-ɛ i̍ u̍h iě ɔ̍ dǒ Jusu jǔ i̍ pɛ̌n-ɛ. 19Jɛ nɛ̀ nyɔ̍ tìè i̍, ɛ̍ kɔn u̍h se̍ jii la̍ jě u̍h iě gbò pa̍. Iě u̍h gba̍ ɔ̍ dě gbò tɔ̀u̍n we̍. Wɛ̀ u̍h sà-e biě, iě ɔ̍ sǐi dě ɔ̍ sabli̍ di̍i̍, wɛ̀ u̍h ja ɔ̍ wlù dě nyɔ̍ nynɛ̌ dǒ Jusu jǔ. 20Jusu jě-a ka u̍h nu̍-a ɔ̍ wlùh gbaɛ-ɛ, iě ɔ̍ la̍a̍, “Jɔ̍gbau, àn gblɛ̍n sɔ̀ɛ̀n-a tìh tǎli-ɛ i̍.”

21Sɔ telě nǎ poe nyɔ̍ ke Fɛlesii nyɔ̍-a pu̍e̍e la̍ ɛ̍ wlùh i̍ sǔh. U̍h la̍a̍, “Jɔ̍gbau la dɛ̍nu̍ ɔ̍ nu̍ la̍a̍n wlu-ɛ ɛ? Ɔ̍ blaɛ Nyɔsoa wɔ̍n. Nyɔ̍ dɔɔ se̍a gblɛ̍n sɔ̀ɛ̀n-a tìh i̍ tǎli, Nyɔsoa due gbài̍ bo ɔ̀ nu̍ ɛ̍.”

22Sɔ Jusu juo dɛ̍ u̍h-a naɛ-a wlùh i̍-ɛ, iě ɔ̍ la̍a̍ dě u̍h we̍, “Dɛ̍nu̍ mɔ̀-a naɛ dɛ̍ kaɛn la wlùh i̍ ɛ? 23Jɔ̍gbau la ɔ̍ gblɛ̍n sɔ̀ɛ̀n-a tìh i̍ tǎli-ɛ jɛ ǎn sà-a ka dǒ wɔ̍i̍n-ɛ ke, jɛ ǎn mu̍-a ka sɔ bloɔ̍ ìè na nu̍-ɛ, jɛwe̍ bo ɛ̀ pe̍ɛ i̍ ɛ? 24Jɛ ǎn pɔ̀n mɔ̀ iě ɛ̍ i̍ juo ka Nyi̍ɔ̍-a Jǔ blě-a tùn nɔ̌ bloɔ̍ ɔ̍ iě-a gblɛ̍n sɔ̀ɛ̀n-a tìh i̍ tǎli-ɛ.” Iě ɔ̍ la̍a̍ dě klɔ-nyɔ̍ we̍, “Ǎn sèàɛ̍ ìn wlùh, sɔ bloɔ̍, dǔ àn sabli̍-i ìè gbò we̍ mu̍.”

25Wɛ̀ ɔ̍ nyna-o ɔ̍ sɔ bloɔ̍ dǒ u̍h jǔ. Iě ɔ̍ dǔ ɔ̍ sabli̍, wɛ̀ ɔ̍ blě Nyɔsoa tìhwe̍ po̍-ɛ ɔ̍ mu̍ gbò we̍. 26Sɔ ɛ̍ wlǔh i̍ u̍h kli̍hgbɛ̍ de̍e̍. Wɛ̀ u̍h po̍ Nyɔsoa tìhwe̍. Iě faɔn gbɛ̍n u̍h, u̍h la̍a̍, “À jě nyɔ̍ di̍i̍ i̍ gbe-e dɛ̍ sèàn o.”

Jusu dǎ Liifaɛ ɔ̍ iě ɔ̍ de̍e̍ gbǎ

(Matio 9.9-13; Maɛ 2.13-17)

27Ɛ̀ la ɛ̍ sì-a i̍-ɛ, wɛ̀ Jusu sǐ sɔ̀n, iě ɔ̍ jě taa̍sìh sà jǔ due ɔ̍ nynɛ̌ nu̍ Liifaɛ. Nɛ̀ ɔ̍ tè i̍ dě taa̍sìh sà gbò sɔ̀n. Iě Jusu la̍a̍ dě ɔ̍ we̍, “Gbǎ dǒ ǐn de̍e̍.” 28Wɛ̀ Liifaɛ sɔ bloɔ̍, iě ɔ̍ tǎli ɔ̍ dɛ̍ᵻ kli̍hgbɛ̍ i̍, ɔ̍ gbǎ dǒ ɔ̍ de̍e̍.

29Wɛ̀ Liifaɛ dǎ peě klaa dǒ Jusu we̍ dě ɔ̍ blǐ gbò. Iě taa̍sìh sà nyɔ̍ dɔu ke nyɔ̍ dɔu duuh ji̍. Iě u̍h ke u̍h tìèe̍ i̍ dǒ teble̍ gbɔ̀. 30Wɛ̀ Fɛlesii nyɔ̍ ke u̍h-a telě nǎ poe nyɔ̍-a wlu-i Jusu-a kòà we̍. U̍h la̍a̍, “Dɛ̍nu̍ mɔ̀ ke taa̍sìh sà nyɔ̍ ke gblɛ̍n sɔ̀ɛ̀n nyɔ̍-a di̍ i̍ dɛ̍ tàdùè ɛ?”

31Wɛ̀ Jusu sà u̍h-a wlu̍ pɔ̀n we̍. Ɔ̍ la̍a̍, “Nyɔ̍ ùh nɛ-a blee-ɛ, u̍h se̍ kwɛ̍i̍n nyɔ̍ i̍ pɔ̀n. Jɛ poa-nyɔ̍ nɔ̀ɔ̍, u̍h-a pɔ̀n ɔ̍ i̍. 32Ǐn se̍ i̍ slɛ̌-nyɔ̍ i̍ pɔ̀n la̍-a ji̍, jɛ gblɛ̍n sɔ̀ɛ̀n nyɔ̍ bo ǐn ji̍ i̍ pɔ̀n la̍-a, wɛ̀ u̍h iě i̍ bǐi.”

Jusu po̍ jlǔh po̍ dɛ-a nǎ

(Matio 9.14-17; Maɛ 2.18-22)

33Wɛ̀ nyɔ̍ɔ la̍a̍ dě Jusu we̍, “Chɔɔn-a kòà-a po̍ jlǔh chɛ̍chɛ̍, iě u̍h-a ba̍le, kǎ Fɛlesii nyɔ̍-a kòà-a nu̍ ke. Jɛ nàɛ̀ nɔ̀ɔ̍, u̍h-a di̍ dɛ̍ iě u̍h-a nǎ.”

34Iě Jusu la̍a̍ dě u̍h we̍, “Pò nynɔ̌ delee-a kɔan nɛ dǒ nynɔ̌ jla̍ ja peě kɛ̍n-ɛ, nɛ̀ dihwi̍hᵻ se̍ jlǔh po̍-ɛ bɛ̌ɛ. 35Jɛ ɛ̍ mu̍ ti̍ kɔn wɛ̀ nynɔ̌ delee-a kɔan iě dě u̍h nynɛ̌ we̍ sà-ɛ, wɛ̀ u̍h iě jlǔh po̍-ɛ dǔ dǒ ti̍ laa̍ di̍i̍.”

36Jusu po̍ nɛnǎ la ke dě u̍h we̍. Ɔ̍ la̍a̍, “Nyɔ̍ bɔ̌ plɛ̀i̍ delee fǎle-ɛ, wɛ̀ ɔ̍ bɔ̌ ɛ̍ plɛ̀i̍ soa pǎ-ɛ. Pò ɔ̍ nu̍ la̍a̍n-ɛ, nɛ̀ ɔ̍ mu̍ delee naɛ fǎle. Fɔ̌ soa ke delee naɛ se̍ pùn i̍ nmɔ-ɛ mu̍. 37Nɛ̀ nyɔ̍ bɔ̌ nmɔ̍ delee dě dɛ̍ku sòlɛ̀ soa di̍i̍ po̍-ɛ. Pò ɔ̍ nu̍ la̍a̍n-ɛ, nɛ̀ nmɔ̍ delee-a mu̍ dɛ̍ku sòlɛ̀ laa̍ wa̍, nɛ̀ nmɔ̍-a mu̍ i̍ wlǎ, wɛ̀ sòlɛ̀ iě-e gbɔ̀lɔ. 38Jɛ nmɔ̍ delee bo ɛ̀ iě dě dɛ̍ku sòlɛ̀ delee di̍i̍ gbǎ. 39Nyɔ̍-ɔ wɔ̀ nmɔ̍ soa nǎ-a wɛ̀ nɛ̀ pɔ̀n nmɔ̍ delee i̍. Dɛ̍nu̍ɛ, soa naɛ bo ɛ̀ nmɔ jii̍.”

Iliyochaguliwa sasa

Luu 5: KDNT

Kuonyesha

Shirikisha

Nakili