Lu̍kū 10
10
1O̍ ko̍ŋ kɔ̍ɔ̍lī, mi̍ Māsānɔ̄ɔ̍ Chi̍i̍sū yu̍lū ŋ̄wāŋ be̍le̍ ŋɔ̍mmɛ̍ū a̍ wānāā ŋīɔ̍ɔ̍ŋ. Mbo̍ vīām nda̍ ā ŋīɔ̍ɔ̍ŋ ŋīɔ̍ɔ̍ŋnda̍ le̍ mī nda̍ a̍a̍ ku̍ɛ̄ pɔ̄ɔ̄ ndu̍ lāchī o̍ chi̍o̍o̍ŋ a̍ fo̍ndāŋndā ndu̍ pi̍la̍ ndu̍ o̍o̍ nɔ̍ o̍ kɔ̄l le̍ kɔ̄la̍ŋ nda̍ŋ. 2Mbo̍ dīmūl nda̍ āā, “Chīɛ̍i̍ vēsa̍ ta̍u̍ le̍ kōūwɔ̄ɔ̍. Kɛ̍, wānāā kūāūwāa̍ ā cho̍ a̍ bɔ̍ɔ̍ le̍. Le̍la̍ŋ, lā dīmu̍l wa᷅na̍ nɔ̍ chīɛ̍i̍ yo̍ mbō yɔ᷄ŋ wānāā wa̍lla̍ mā kūu̍ ndu̍ mu̍ŋ. 3Lā bīi̍ ni̍ko̍ nɛ̍īyo̍ lā kɔ̍.” Mbo̍ dīmūl nda̍ āā, “I̍ cho̍ māchūāā nya̍ vīōmɔ̄ɔ̍ māā sāā chu̍a̍ūwa̍ vīsīāā bīyāa̍ tɛ̄ɛ̄ŋ. 4Ndu̍yɛ̍, lā ku̍ā a̍ ŋ̄ka̍ni̍ o̍ bā le̍. Lā ku̍ā a̍ lā kɔ̄ɔ̄vɛ̄i̍ le̍. Ndu̍yɛ̍, lā ke̍ī ba̍ltā lāta̍ma̍la̍ a̍ wāŋnda̍ o̍ nɛ̄ī le̍. 5Chīɛ̄ī nya̍ lūɛ̄ī pɛ̍ lā yi᷄l wa᷅ŋnda̍ lo̍ŋ, mī lā dīmi̍ āā, ‘Mɛ̄lɛ̄ka̍ ke̍ nya̍ kɔ̄l ndɔ̄ nyu̍lōo̍ fɔ̍.’ 6Tē wānā wa̍ lo̍ŋ pɛ̍ mbō wa̍ ō bɛ̄ɛ̄ndīa̍ŋ le̍ kɔ̄l nyūlu̍ Mɛ̄lɛ̄ka̍a̍ sɔ̄lāa̍ pɛ̍, mɛ̄ɛ̍ wānā ko̍ŋ chō kɔ̄l nyūlū nya̍ dīmi̍ a̍ ndu̍ o̍kɔ̄ɔ̄ wo̍ sɔ̄lā. Kɛ̍, tē wānā wa̍ā le̍nde̍ ve̍ lo̍ŋ te̍, kɔ̄l nyūlū nya̍ dīmi̍ a̍ ndu̍ o̍kɔ̄ɔ̄ wo̍ ō mīīŋgu̍ŋ o̍ nya̍ pi̍la̍ lo̍. 7Lā wa̍ o̍ chīɛ̄ī nda̍ yīyā nya̍ ko̍ŋ ndo̍. Ndu̍yɛ̍, nyɛ̄ nda̍ ke̍ nya̍ le̍ dīo̍o̍ a̍ kōlɔ̄ɔ̍ pɛ̍, lā di̍o̍ mī lā ko᷄l. Kāni̍ fo̍ndōle̍, wāna̍ wa̍llo̍ nɔ̄ mbō sɔ̄la̍ pāāwā ndɔ̄ɔ̍. Lā ki̍lā yīya̍lā fāŋgā, chīɛ̄ī nya̍ lūɛ̄ī ko̍ lā fūlā lā hīāū o̍ ho̍ō le̍. 8Chi̍e̍e̍ nya̍ fūūlu̍u̍ pɛ̍, mā chɛ᷄l nya̍, lā di̍o̍ nyɛ̍ dīāā nda̍ kē nya̍ wo̍. 9Ndu̍yɛ̍, lā sīŋgi̍ wa̍nāā lānāāwa̍ o̍ chi̍e̍e̍ ko̍ŋ ni᷄ŋ. O̍ ko̍ŋ kɔ̍ɔ̍lī, mī lā dīmu̍l nda̍ āā, ‘Pāa̍le̍ Mɛ̄lɛ̄ka̍ nɔ̄ le̍ wāa̍ Māsāa̍ wāŋnda̍ chōo̍ le̍ŋ, lē chō ni᷅ŋ a̍ nya̍ kpɛ̍ɛ̍lūŋ’. 10Kɛ̍ Ndu̍yɛ̍, chi̍e̍e̍ nya̍ fūūlu̍u̍ pɛ̍ mā chɛ᷄l nya̍ le̍, lā si᷄m o̍ lu᷅ŋ mī lā dīmi̍ āā, 11‘Chu̍ndo̍o̍ o̍ nya̍ lo̍ chi̍e̍e̍ na̍nu᷄ŋ bɛ̍ɛ̍ kōŋɔ̄ɔ̍ ndu̍ mbō fāŋa̍ŋ na̍a̍ o̍ ŋ̄pēlū. Ho̍ō chō wā māā lēse̍ī le̍ nyɛ̄ nya̍ tōsa̍ wo̍. Kɛ̍ ndu̍yɛ̍, lā sīna̍ pɛ̍ŋgu̍ māā pāa̍le̍ Mɛ̄lɛ̄ka̍ nɔ̄ le̍ wāa̍ Māsāa̍ wāŋnda̍ chōo̍ le̍ŋ, lē chō ni᷅ŋ kpɛ̍ɛ̍lūŋ.’ ” 12Mi̍ Chi̍i̍sū hi̍a̍ū lāchī a̍ nda̍ dīmūllo̍ āā, “Mī di̍mu̍l nya̍, tē pāa̍le̍ Mɛ̄lɛ̄ka̍ kɔ̄ɔ̄sā ni̍ŋ a̍ wāŋnda̍ kpo̍u̍ le̍ŋ lē fūūlu̍u̍ pɛ̍, wāŋnda̍ o̍ chi̍e̍e̍ wa̍ā le̍ndo̍o̍ ni᷄ŋ, nda̍ hi̍a̍ū ni̍ŋ nyɛ̍ pālāa̍ sɔ̄lā a̍ wāŋnda̍ So̍dɔ̄m chi̍e̍e̍.”
Chi̍e̍e̍ŋ kɛ̍ɛ̍ le̍ lāāla᷄ŋndo̍ wo̍ŋ
(Māa̍ti̍u̍ 11:20-24)
13Mi̍ Chi̍i̍sū di̍mī āā, “Nyɛ̄ nɛ̄īyāa̍ chō le̍ nya̍, nya̍ wāŋnda̍ Cho̍lu̍a̍sīŋ chi̍e̍e̍. Nyɛ̄ nɛ̄īyāa̍ chō le̍ nya̍, nya̍ wāŋnda̍ Bɛ̄tīsa̍i̍dā chi̍e̍e̍. Kāni̍ fo̍ndōle̍, wa̍lta̍ ka̍a̍ma̍ālā ya̍ I̍ to̍sa̍ nya̍ tɛ̄ɛ̄ŋ nda̍ŋ, tē la̍ a̍a̍ to̍sa̍ŋ Ta̍a̍yā chi̍e̍e̍ a̍ Sa̍i̍dɔ̄ŋ chi̍e̍e̍ pɛ̍, ā wa̍ nyɛ̄lā lābɛ̍kīla̍ŋ wōūnɔ᷄ŋ mī nda̍ a̍a̍ dɔ̍ɔ̍ŋ pu᷅lta̍ŋ chōo̍ si̍ndɛ̄ pa̍ le̍ chɔ̄mndo̍ māā ā ma᷄l yɔ̄ŋndā ndāla̍ wɔ̍ɔ̍ŋnda̍ŋ. 14Le̍la̍ŋ, tē pāa̍le̍ Mɛ̄lɛ̄ka̍ kɔ̄ɔ̄sā ni̍ŋ a̍ wāŋnda̍ le̍ŋ lē fūūlu̍u̍ pɛ̍, nya̍ hi̍a̍ū ni̍ŋ nyɛ̍ pālāa̍ sɔ̄lā a̍ wāŋnda̍ Ta̍a̍yā a̍ Sa̍i̍dɔ̄ŋ. 15Nya̍ wāŋnda̍ Kēpa̍a̍nīɔ̄m yɛ̍, nya̍ a̍a̍ hɛ̍na̍ŋ ma̍hɛ̍na᷄ŋ le̍ wāa̍ ā bɛ̄ndū mī nya̍ a̍a̍ hi̍o̍ū nyɛ̄ o̍ nyɛ̄. Kɛ̍, Mɛ̄lɛ̄ka̍ chō nya̍ hūnɔ̄ɔ̄ tɛ̄ɛ̄mbūū kpo̍u̍.”
16Mi̍ Chi̍i̍sū lo᷅ o̍ ko̍ŋ, mbo̍ di̍mūl bu̍ɛ̍i̍yāā ndūa̍a̍ āā, “Wānā o̍ wāna̍ chɛ̍l nya̍ pɛ̍, mɛ̄ɛ̍ ya̍ o̍ chɛ̍l ko̍ŋ ni̍. Ndu̍yɛ̍, wānā o̍ wāna̍ kɛ̍ɛ̍ nya̍ pɛ̍, mɛ̄ɛ̍ ya̍ o̍ kɛ̍ɛ̍ ni̍. Wānā o̍ wāna̍ kɛ̍ɛ̍ yɛ̄ ya̍ pɛ̍, mɛ̄ɛ̍ wāna̍ ve᷅m ya̍ wo̍, ndu̍ o̍ kɛ̍ɛ̍ ni̍.”
Nyɛ̄ kpe̍e̍kpe̍i̍ wānā na᷅ŋ kɔ̍l le̍ ndu̍ wo̍
17Mi̍ bu̍ɛ̍i̍yāā ŋ̄wāŋ be̍le̍-ŋɔ̍mmɛ̍ū a̍ wānāā ŋīɔ̍ɔ̍ŋ Chi̍i̍sū ve᷅m nda̍ mīīŋgū a̍ kɔ̄l kɛ̄ndɛ̄ bɛ̄ndōo̍. Ma̍ hu᷄ŋ do̍u̍nu᷄ŋ Chi̍i̍su̍ ko̍na̍. Ma̍ dīmūl ndu̍ āā, “Māsānɔ̄ɔ̍, tē ŋ̄ pɛ̄l dīōlā nūmnda̍ŋ pɛ̍, nyi̍nāā wɔ̄ɔ̍ŋnda̍ bɛ̍ɛ̍ tūsi᷄ŋndo̍ tōōlō na̍a̍ o̍ bā bɛ̄ŋgu̍.”
18Mi̍ Chi̍i̍sū di̍mūl nda̍ āā, “I̍ wa̍ tōfāa̍ mi̍ cha᷅ mi̍ Sēta̍nā, māsa̍ nyi̍nāā wɔ̄ɔ̍ŋnda̍, mbo̍ fūlā o̍ fo̍nda᷄ŋ Mɛ̄lɛ̄ka̍a̍ mbo̍ hu᷄ŋ de᷅l lɛ̄ŋ mɛ̄ɛ̍ ta᷅ŋnde̍ŋ lē fūlā nu̍a̍ā mī lē de᷄l lɛ̍.” 19Mi̍ Chi̍i̍sū hi̍a̍ū lāchī a̍ dīmīo̍o̍ āā, “I̍ ke̍ nya̍ kpāāyāa̍. Lā kēi̍ bɛ̍ɛ̍ kɛ̍ūwāā wɔ̄ɔ̍ŋnda̍ nɛ̄ī chōo̍ a̍ ŋge̍e̍ma̍a̍ nyɛ̄ o̍ nyɛ̄ yɔ̍nūŋ nya̍ le̍. Sēta̍nā ni̍ a̍ kpāāyā o̍ kpāāyā o̍ nɔ̍ ā chō wā nya̍ o̍ bā bɛ̄ŋgu̍. Ndu̍yɛ̍, nyɛ̄ o̍ nyɛ̄ yɔ̍nūŋ nya̍ le̍. 20Kɛ̍ o̍ ko̍ŋ ni̍ŋ kpo̍u̍, ō cho̍ le̍ mɛ̄ɛ̍ nyi̍nāā wɔ̄ɔ̍ŋnda̍ ā tūsi̍ŋ to̍o̍lō nya̍ o̍ bā bɛ̄ŋgu̍ yɛ̍ le̍ nya̍ nāŋ kɔ̍l te̍. Lā wa̍ a̍ kɔ̄l kɛ̄ndɛ̄ le̍ mɛ̄ɛ̍ dīōlā nyāla̍ŋ lā chō lā pōōnyīāā o̍ yāu̍wo̍ ni᷄ŋ o̍ fo̍nda᷄ŋ Mɛ̄lɛ̄ka̍a̍ yɛ̍.”
Chi̍i̍sū me̍l Mɛ̄lɛ̄ka̍ ba̍li̍ka̍
(Māa̍ti̍u̍ 11:25-27; 13:16-17)
21A̍ bōōndi̍i̍ ke̍ŋ, mi̍ Nyi̍na̍ Mɛ̄lɛ̄ka̍a̍ tōsā mi̍ Chi̍i̍sū na᷅ŋ kɔ̄l ta̍u̍. Mbo̍ dīmī āā, “Fi̍nyā nūu̍, nu᷄m cho̍ ho̍ō Māsānɔ̄ɔ̍ Mɛ̄lɛ̄ka̍ le̍ chōo̍ cho̍o̍ a̍ chi̍e̍ēŋndo̍ kpo̍u̍ wo̍, I̍ me̍l nu̍m ba̍li̍ka̍ le̍ mɛ̄ɛ̍ ŋ̄ vi᷄ŋ wānāā kɔ̄l kālu̍a̍a̍ a̍ wānāā sīnāā dɛ̍ni̍a̍a̍ sɔ̄ɔ̍ŋ mu᷅ŋ yɛ̍. Kɛ̍ o̍ ko̍ŋ kɔ̍ɔ̍lī, ma̍ chɔ̄m wānāa̍ si̍nā nyɛ̍ le̍ wa̍. Kɛ̍ ndu̍yɛ̍, nyɛ̄ ŋ̄ hīni̍ kɔ̄l lo̍, ndu̍ to̍sa̍ŋ ho̍ō ni̍, Fi̍nyā nūu̍.”
22Mi̍ Chi̍i̍sū di̍mūl wāŋnda̍ āā, “Fi̍nyā nūu̍ ō chu̍a̍ nyɔ̄ɔ̍ŋ kpo̍u̍ mbo̍ kē ya̍. Ndu̍yɛ̍, wānā o̍ wānā nɔ̍lā mbō sīna̍ wāna̍ Po̍ Mɛ̄lɛ̄ka̍a̍ ō chō le̍, mɛ̄ɛ̍ Mɛ̄lɛ̄ka̍ Fi̍nyāa̍. Ndu̍yɛ̍ vɛ̍lɛ̄, wānā o̍ wānā nɔ̍lā mbō sīna̍ wāna̍ Mɛ̄lɛ̄ka̍ Fi̍nyāa̍ ō chō wo̍ le̍, mɛ̄ɛ̍ Po̍ Mɛ̄lɛ̄ka̍a̍ a̍ wānāā Po̍ Mɛ̄lɛ̄ka̍a̍ hɛ̄lī le̍ mbō chɔ᷄m nda̍ wāna̍ Mɛ̄lɛ̄ka̍ Fi̍nyāa̍ ō chō wo̍ wa̍.”
23Mɛ̄ɛ̍ Chi̍i̍sū nda̍ bu̍ɛ̍i̍yāā ndūa̍a̍ ā lo̍ nda̍ kpe̍e̍le̍, mbo̍ dīmūl nda̍ āā, “Nya̍ che᷅ sɔ̄ɔ̍ŋ mu᷅ŋ pɛ̍ɛ̍ŋ nda̍, lā pɛ̄l tɔ̄nɔ̄ɔ̍. 24Mī di̍mu̍l nya̍, wānāā māsīndīa̍a̍ su̍a̍ā le̍ Mɛ̄lɛ̄ka̍ wa̍ ā ka̍ ka̍, a̍ māsāā bɛ̍ndūāā māsīndīa̍a̍, nda̍ a̍a̍ nɔ̍ yēēmɛ̍i̍ le̍ sɔ̄ɔ̍ŋ nya̍ chē mu᷅ŋ ndo̍ŋ chɔ̄ɔ̍. Kɛ̍, ā chi̍ mu̍ŋ te̍. Nda̍ a̍a̍ nɔ̍ yēēmɛ̍i̍ le̍ mī nda̍ a̍a̍ tu̍e̍ī sɔ̄ɔ̍ŋ nya̍ tūēī mu᷅ŋ ndo̍ŋ. Kɛ̍, ā tūi̍i̍ mu̍ŋ te̍.”
Tālo̍o̍ a̍ Sāme̍e̍līāānɔ̄ īnyīɛ̍ɛ̍yo̍ o̍kɔ̄ɔ̄
25Bōōndi̍i̍ pi᷅lɛ̍, mi̍ wāna̍ pɛ̍ɛ̍kū wa᷅ŋnda̍ sāwāla̍ Mɛ̄lɛ̄ka̍la̍ŋ ndo̍ ō pūm cha᷄ŋ mbo̍ sīm le̍ Chi̍i̍su̍ tɔ̄ɔ̄nda᷄ŋndo̍. Mbo̍ lō o̍ ko̍ŋ mbo̍ nyūnā Chi̍i̍su̍ āā vɛ̄ɛ̄, “Ti̍chā, ō yɛ̄ɛ̍nɛ̍ ya̍ to̍sa̍ yɛ̍ mī sɔ̍la̍ yōōmū kpe̍e̍kpe̍i̍yo̍ o̍ nɔ̍ la̍mɛ̍ɛ̍lu̍ le̍ wo̍?”
26Mi̍ Chi̍i̍sū nyu̍nā ndu̍ āā, “Vɛ̄ɛ̍nɛ̍ sāwāla̍ Mɛ̄lɛ̄ka̍ ke̍ Mūu̍sē la̍ŋ lā dīmi̍ yɛ̄? Vɛ̄ɛ̍nɛ̍ ŋ̄ chē yɛ̄ ō pōōnyīāā?”
27Mbo̍ mūlī āā, “Ka̍a̍la̍ Ma̍sānɔ̄ɔ̍ o̍ cho̍ Mɛ̄lɛ̄ka̍ ŋ̄ pīɛ̄īyo̍ wo̍ nyɛ̄ kɛ̄ndɛ̄ kɛ̍ndɛ̍ī. Ka̍a̍la̍ ndu̍ a̍ kɔ̄l nūmndo̍ kpo̍u̍ a̍ kpāāyā nu̍mndo̍ kpo̍u̍. Ndu̍yɛ̍, mā wa̍ yīya᷄ŋndo̍ a̍ ndu̍ o̍kɔ̄ɔ̄ le̍ te̍le̍ŋ o̍ te̍le̍ŋ. Ndu̍yɛ̍, mā ka̍a̍la̍ wāna̍ nya̍ chīɛ̄ɛ̄li̍āŋ ndo̍ mɛ̄ɛ̍ ŋ̄ kāāla̍ nūm pi̍la̍ yɛ̄.”
28Mi̍ Chi̍i̍sū lo᷅ lo̍ŋ mbo̍ di̍mūl ndu̍ āā, “A̍ di̍mi̍ tōnya̍. Le̍la̍ŋ, kɔ̍ ni̍ko̍ mā kɔ̍ to̍sā le̍nde̍. A̍ to̍sa̍ le̍nde̍ pɛ̍, ā chō yōōmū kpe̍e̍kpe̍i̍yo̍ sɔ̄lā.”
29Kɛ̍, pōo̍ ho̍ō ndu̍ o̍o̍ hɛ̍na̍ŋ mī ndu̍ o̍o̍ ke̍ŋnu̍ŋ di̍ o̍ sūɛ̍i̍ he̍ī ni᷄ŋ. Le̍ he̍ī, mbo̍ nyūnā Chi̍i̍sū āā, “Ō nɛ̄ɛ̍nɛ̍ cho̍ yɛ̄ wāna̍ na̍a̍ ŋ̄ chīɛ̄ɛ̄li̍āŋ ndo̍?”
30Mi̍ Chi̍i̍sū hi̍a̍ū lāchī a̍ sūɛ̍i̍. Mbo̍ dīmī āā, “Po̍ pi᷅lɛ̍ chɛ̍ŋ Chūlu̍sɛ̄lɛ̄m ni̍, mbo̍ wā kɔ̄la̍ŋ Chɛ̄lu̍i̍kō chi̍e̍e̍. O̍ kɔ̄lā ndɔ̄la̍ŋ ni᷄ŋ, mi̍ vīīya̍ kēī ndu̍ dēlɔ̄ɔ̄ chōo̍. Nyɛ̄ o̍ nyɛ̄ ndu̍ o̍o̍ nɔ̍ ma̍ pōōndīāā ndu̍ o̍ bā. O̍ ko̍ŋ kɔ̍ɔ̍lī, ma̍ lūāā ndu̍ lɔ̄ɔ̍ pi̍la̍. Ā mɛ̄i̍ ndu̍ ō chō fɔ̄ɔ̄lāa̍ ma̍ kūānu᷄ŋ. 31Mi̍ ī yɔ̄nu᷄ŋ ki̍nɛ̍i̍, mi̍ wāna̍ so̍lī sa̍lāa̍ o̍ Mɛ̄lɛ̄ka̍ lo̍ wo̍ ō pūm cha᷄ŋ Chūlu̍sɛ̄lɛ̄m mbo̍ wa̍ kēēkōo̍ o̍ nɛ̄ī ko̍ŋ le̍ kɔ̄la̍ŋ Chɛ̄lu̍i̍kō. Mɛ̄ɛ̍ o̍ che᷅ pōo̍ ho̍ō pɛ̍ɛ̍ŋ, mbo̍ kēēku᷄ŋ o̍ nɛ̄īyo̍ da̍ŋga̍la̍ ku̍mbōo̍ pīlɔ̍ɔ̄ mbo̍ kūānu᷄ŋ. 32Le̍nde̍ ko̍ni̍ vɛ̍lɛ̄, mi̍ po̍ pi᷅lɛ̍ bɛ̍ɛ̍ ndu̍ hu᷅ŋ a̍ nɛ̄ī ko̍ŋ. Ndu̍ bɛ̍ɛ̍, wāna̍ ma̍lā a̍ wa̍llo̍ o̍ chīɛ̍i̍ Mɛ̄lɛ̄ka̍a̍ ni᷄ŋ ndo̍ o̍ wa̍ ni̍. Mɛ̄ɛ̍ o̍ fu̍u̍lu̍u̍ o̍ fo̍ndāŋ ko̍ŋ, mbo̍ chā ndu̍, ndu̍ bɛ̍ɛ̍ mbo̍ kēēku᷄ŋ o̍ nɛ̄īyo̍ da̍ŋga̍la̍ kpe̍ŋgēi̍ pīlɛ̍ī mbo̍ kūānu᷄ŋ. 33Kɛ̍, mi̍ Sāme̍e̍līāānɔ̄ pīlɛ̍ ndu̍ wa᷅ kɔ̄la̍ŋ īnɛ̍. Mbo̍ fūūlūū o̍ fo̍ndāŋ kōŋ. Mɛ̄ɛ̍ o̍ che᷅ lāŋu̍nɔ̄ vīīya̍ lɔ̄ɔ̄ ho̍ō wo̍, mi̍ nyīɛ̍ɛ̍yīī ndūɛ̍i̍ ī bīī ndu̍. 34Mbo̍ sɔ̄ɔ̄ŋgūū mbo̍ kɔ̍ chu̍ā ndu̍. Mbo̍ dūāū chūɛ̄īya̍ŋ a̍ mūɛ̄īmā pūm o̍ pāūvīī kēŋ. Ma̍ŋ ma̍ wa̍ kōo̍wa̍ŋ ni̍. Mbo̍ yīū yīū ndi̍ a̍ kōlāla̍ ŋ̍pɛ̍ŋgɛ̍la̍ŋ. Mbo̍ chūā ndu̍ mbo̍ hēēlū ndu̍ o̍ vīsī o̍ wa̍ kɔ̄la̍ŋ lēchōo̍ wo̍ chōo̍. Mbo̍ kūā a̍ ndu̍ o̍ chīɛ̄ī nda̍ yīyā wa̍nāā hīāūwa᷄ŋnda̍ wo̍ le̍ mbō chīɔ̍u̍ ndu̍. 35Dīi̍māndɔ̄ɔ̍, mbo̍ bīī nyɛ̄ sɔ̄lāa̍ mbo̍ kē wāna̍ chīɛ̄īyo̍. Mbo̍ mɛ̄ī ndu̍ ō chōŋga᷄ŋ āā, ‘Hi̍o̍u̍ la̍chi̍ a̍ ndu̍ chīɔ̄ūwo̍. Nyɛ̄ o̍ nyɛ̄ chēle̍ŋ tē a̍ pi̍si̍ le̍ ndu̍ pɛ̍, tē I̍ wa̍ mīīŋgōo̍ pɛ̍, I̍ ke̍i̍ pāāwā.’ ”
36O̍ mɛ̄ɛ̄lu̍la̍ŋ, mi̍ Chi̍i̍sū nyu̍nā wāna̍ pɛ̍ɛ̍kū ko̍ŋ wa᷅ŋnda̍ sāwāla̍ Mɛ̄lɛ̄ka̍la̍ŋ ndo̍ āā vɛ̄ɛ̄, “Wānāā yāa̍wa̍ ha̍ā, o̍ kūɛ̍ɛ̍nɛ̍ chɔ̍m yɛ̄ po̍ vīīya̍ lɔ̄ɔ̄ wo̍ māā ō chō wāna̍ nda̍ chīɛ̄ɛ̄li̍āŋ nda̍ ndu̍ wo̍?”
37Mbo̍ lō lo̍ŋ mbo̍ mūlī āā, “Wāna̍ tūīīnu̍ŋ ndu̍ īnyīɛ̍ɛ̍ wo̍, ndu̍ chɔ̍m ndu̍ ni̍ māā wāna̍ nda̍ chīɛ̄ɛ̄li̍āŋ nda̍ ndu̍ wo̍ o̍ cho̍ ni̍.”
Mi̍ Chi̍i̍sū di̍mūl ndu̍ āā, “Mɛ̄ɛ̍ nūm bɛ̍ɛ̍ kɔ̍ mā kɔ̍ to̍sā le̍nde̍.”
Chi̍i̍sū ku̍ɛ̄ o̍ Ma̍tā nda̍ Mēēle̍ lo̍ chīɛ̄īyo̍
38Mi̍ Chi̍i̍sū nda̍ bu̍ɛ̍i̍yāā ndūa̍a̍ hīāū lāchī a̍ kɔ̄la̍ŋ. Ma̍ fūūlūū o̍ sɔ̄ndɔ̄kɔ̍lɔ̍ pīlɛ̍. Ndu̍yɛ̍, chūā pīlɛ̍ wa̍ o̍ sɔ̄ndɔ̄kɔ̍lɔ̍ kōŋ dīōla̍ŋ āā, Ma̍tā. Mbo̍ yīyā Chi̍i̍sū o̍ ndu̍ lo̍ chi̍ɛ̍ī ni̍ŋ. 39Chūa̍a̍ ho̍ō ndu̍ o̍o̍ nɔ̍ pɔ̄mbɔ̄ɔ̍ dīōla̍ŋ āā, Mēēle̍. Mɛ̄ɛ̍ Ma̍tā yi̍ya̍ Chi̍i̍sū, mi̍ pɔ̄mbɔ̄ ndɔ̄ ko̍ŋ chāl Chi̍i̍su̍ īkɛ̄i̍. Mbo̍ wā nīla̍ŋ yāŋɔ̄ɔ̍ o̍ pɛ̄ɛ̄kū Chi̍i̍sū wa̍ wo̍. 40Kɛ̍, Ma̍tā ndu̍ wa̍ ō tūānda᷄ŋ ta̍u̍ a̍ kpe̍ku̍la̍ŋ le̍ mīālla̍. Mbo̍ lo᷅ o̍ ko̍ŋ mbo̍ kūā nāa̍ Chi̍i̍sū chu̍a̍. Mbo̍ kɔ̍ di̍mūl ndu̍ āā, “Māsānɔ̄ɔ̍, mī pɔ̄mbɔ̄ nūu̍ ma᷄l la̍ o̍ kpe̍ku̍la̍ŋ ni᷄ŋ nu̍a̍ā, a̍ sa̍a̍lāŋ te̍? Di̍mu̍l ndu̍ ō kɔ̍ ma̍lā ya̍.”
41Mi̍ Chi̍i̍sū di̍mūl ndu̍ āā, “Ma̍tā, a̍ la̍ndu̍ŋ kɔ̍l fa̍ŋgā fa̍ŋgā o̍ kpe̍ku̍la̍ŋ. 42Kɛ̍ ndu̍yɛ̍, ō pīlɛ̍ bɛ̍nda̍ kpe̍e̍kpe̍i̍ le̍ tōsāa̍ ni̍. Ō kɛ̄ndɔ̄ɔ̍, ndu̍ Mēēle̍ hɛ̄li̍ ni̍. Ndu̍yɛ̍, wānā bi̍ī ndu̍ ndu̍ o̍ bā le̍.”
Iliyochaguliwa sasa
Lu̍kū 10: YM
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Kisi Bible © Bible Society in Liberia, 2015.
