Chɛ̄nɛ̍se̍ē 23
23
A̍ pīɔ̍m Se̍lūā wo̍ o̍kɔ̄ɔ̄
1Se̍lūā chi̍i̍ wɔ̄sīla̍ŋ fa̍ū fa̍ū, kɛ̄mɛ̄ a̍ bi̍di̍i̍ŋ a̍ lā ŋɔ᷄mmɛ̍ū (127). 2O̍ ko̍ŋ kɔ̍ɔ̍lī, mi̍ Se̍lūā wū Hi̍būlɔ̄ŋ o̍ lɛ̄ŋndē Ke̍nāŋnde̍ŋ ni᷄ŋ. Mɛ̄ɛ̍ o̍ vi᷅, mi̍ E̍bīlāha᷅m cha᷅ŋ la̍a̍ ndɔ̄.
3O̍ ko̍ŋ kɔ̍ɔ̍lī, mi̍ E̍bīlāha᷅m mɛ̍ī dīāllūŋ vīlɛ̍i̍ la̍a̍ ndɔ᷄ŋ nāa̍ ŋ̄ wa̍ wa̍, mbo̍ kūā nāa̍ Hi̍ta̍i̍tīi̍ya̍ chūā a̍ nɔ̍ lɛ̄ŋnde̍ŋ nda̍. Mbo̍ dīmūl nda̍ āā, 4“Mīāllo̍ ya̍ cho̍ ni̍, mi̍ hu̍ŋ cha᷅l nya̍ tɛ̄ɛ̄ŋ. Le̍la̍ŋ, lā ke̍ ya̍ lɛ̄ŋnde̍ŋ mī pe̍ndū le̍ mī chɔ̍ la̍a̍ nūu̍.”
5Mi̍ Hi̍ta̍i̍tīi̍ya̍ dīmūl E̍bīlāha᷅m āā, 6“Fāllo̍, ŋ̄ dīmūl lɔ̍ nu̍m, ŋ̄ chu̍a̍ nu̍m māā māsa̍ kpāāyāa̍ ŋ̄ chō na̍a̍ tɛ̄ɛ̄ŋ ni̍. Mɛ̍ɛ̍ndi̍a̍ŋ sɛ̍īla̍ cho̍ na̍nu᷄ŋ nda̍ŋ ki̍nɛ̍i̍, mā hɛ̍li̍ o̍ hi̍nī nu̍m kɔ̄l lo̍. Na̍a̍ ki̍nɛ̍i̍ na̍nu᷄ŋ wānā o̍ wānā tu᷅ŋ nu̍m sɛ̄i̍ ndɔ̄ɔ̍ le̍ la̍a̍ nu̍m chɔ̄ɔ̍ lēni᷄ŋ te̍.”
7Mi̍ E̍bīlāha᷅m cha̍ŋ mbo̍ tūndu᷄ŋ wa̍nāā lēlɛ̄ŋnda̍ lāchī, nda̍ yɔ̍nūŋ māā Hi̍ta̍i̍tīi̍ya̍ ni̍, le̍ nda̍ bɛ̄ɛ̄le̍ŋ kīo̍o̍. 8Mbo̍ dīmūl nda̍ āā, “Tē lā chɛ᷄l la̍ pɛ̍ māā I̍ chɔ̍ la̍a̍ nūu̍ na̍nu᷄ŋ, mɛ̄ɛ̍ lā nyɔ̄ɔ̄lu̍l la̍ Ɛ̍fu̍lɔ̄ŋ, po̍ So̍hāā wo̍, 9mbō ke̍ ya̍ būūlōo̍ Māchīpɛ̍lā, o̍ cho̍ o̍ lɛ̄ŋndē ndɔ̄le̍ŋ hōlnɔ᷄ŋndo̍ wo̍. Tē ō chɛ᷄l mbō ke̍ ya̍ ndu̍ pɛ̍, I̍ dɔ̍ū wɔ̄ŋgū nya̍ o̍ hɔ̄l mɛ̄ɛ̍ ba̍a̍ wā yɛ̍. I̍ hɛ̍na̍ŋ tē wānā vi᷅ ya̍ ni᷅ŋ o̍ bā pɛ̍, lo̍ŋ ko̍ni̍ ya̍ I̍ chɔ̄ ni᷅ŋ ndu̍ ni̍.”
10Ɛ̍fu̍lɔ̄ŋ pi̍la̍ bɛ̍ɛ̍, ō wa̍ īchāli̍ Hi̍ta̍i̍tīi̍ya̍ tɛ̄ɛ̄ŋ o̍ fo̍ndāŋ nda̍ bīī bɔ̄ŋga᷅nda̍ŋ ndo̍ o̍ dīō sāāsa̍ chi̍o̍o̍ sōndōo̍ wa̍. Mi̍ Ɛ̍fu̍lɔ̄ŋ di̍mūl E̍bīlāha᷅m wānāa̍ chu̍u̍ŋgi̍āŋnda̍ kpo̍u̍ o̍ hɔ̄l āā, 11“Fāllo̍, I̍ di̍mūl lɔ̍ nu̍m, lɛ̄ŋndē kālālē būūlū ko̍ŋ chō ni᷄ŋ nde̍ŋ, I̍ cho̍ nu̍m mɔ̄sɔ̄ŋā kē a̍ būūlū ka̍lāa̍ lātūlu̍. I̍ cho̍ nu̍m kē wānāā nīa̍a̍ o̍ hɔ̄l, mā chɔ̍ la̍a̍ nu̍m lēni᷄ŋ.”
12O̍ ko̍ŋ, mi̍ E̍bīlāha᷅m cha̍ŋ mbo̍ tūndu᷄ŋ wa̍nāā lēlɛ̄ŋnda̍ lāchī. 13Mbo̍ dīmūl Ɛ̍fu̍lɔ̄ŋ wāŋnda̍ o̍ hɔ̄l āā, “I̍ du̍a̍ū wɔ̍ lɛ̄ŋndē kālāle̍ŋ wɔ̄ŋgū nu̍m o̍ bā, tē ī bɛ̄ndā pɛ̍ le̍nde̍. Bi̍i̍ wɔ̍ŋgū ndɔ̄ɔ̍.”
14Mi̍ Ɛ̍fu̍lɔ̄ŋ di̍mūl E̍bīlāha᷅m āā, 15“Ba̍ā lɛ̄ŋnde̍ŋ mɛ̄ɛ̍ wāŋnda̍ pīsī yɛ̍, lē chō ka̍ni̍ŋ hu̍mbo᷅ŋ kɛ̄mɔ̄ɔ̍ lē hīɔ̍ɔ̍lu̍ (400), kɛ̍ a̍ nāāŋa᷅ŋndo̍ o̍kɔ̄ɔ̄, ko̍ŋ cho̍ nyɛ̍ o̍ nyɛ̄ le̍. Kɔ̍ mā kɔ̍ chɔ̄ la̍a̍ nu̍m lo̍ŋ.” 16Mi̍ E̍bīlāha᷅m chɛ᷅l nyɛ̄ Ɛ̍fu̍lɔ̄ŋ di̍mi̍ wo̍. Mbo̍ chɔ̄m ka̍ni̍ŋ hu̍mbo᷄ŋ kɛ̄mɔ̄ɔ̍ lē hīɔ̍ɔ̍lu̍ (400). Ba̍ā nda̍ wa̍ lɛ̄ŋnde̍ŋ pīsīo̍o̍ wo̍ wa̍ ko̍ŋ ni̍. Mɛ̄ɛ̍ o̍ chɔ̍m mu̍ŋ wānāā lēlɛ̄ŋnda̍ o̍ hɔ̄l tɛ̍kpɛ̍ tɛ̍kpɛ̍, mbo̍ kē Ɛ̍fu̍lɔ̄ŋ.
17Mɛ̄ɛ̍ nu̍a̍ā lɛ̄ŋndē Ɛ̍fu̍lɔ̄ŋ ndu̍ o̍o̍ nɔ̍ Māchīpɛ̍lā, le̍ hūnɔ̄ɔ̍ Ma̍mi̍lūē, kūmbū pāa̍le̍ŋ lē chāŋ ndo̍ le̍ŋ, lē lōōku̍ sīmnɔ᷄ŋ le̍ E̍bīlāha᷅m ni̍. Lɛ̄ŋndē lēŋ a̍ pɛ̄ŋgu̍la̍ ndɔ̄la̍ŋ chɛ̍ chɛ̍, a̍ būūlū ko̍ŋ lēni᷄ŋ fa̍ū, a̍ yɔ̄m o̍ yɔ᷄m cho̍ lēni᷄ŋ, mi̍ ŋ̄ sīmnu᷄ŋ nyɛ̍m E̍bīlāha᷅m. 18Mi̍ chɛ̄la᷅ŋndo̍ yɔ̄nu᷄ŋ Hi̍ta̍i̍tīi̍ya̍ tɛ̄ɛ̄ŋ a̍ wa̍ o̍ bɔ̄ŋa᷅ŋ kōŋ ni᷄ŋ nda̍, māā chɔ̍ŋ a̍ bōōndi̍i̍ ke̍ŋ, E̍bīlāha᷅m nɔ̍ lɛ̄ŋndē lēŋ ni̍ a̍ būūlū ko̍ŋ.
19O̍ ko̍ŋ kɔ̍ɔ̍lī, mi̍ E̍bīlāha᷅m chɔ̄ Se̍lūā la̍a̍ ndɔ̍ o̍ būūlū ko̍ŋ ni᷄ŋ, chɔ̍ŋ Māchīpɛ̍lā le̍ hūnɔ̄ɔ̍ Ma̍mi̍lūē, kūmbū pāa̍le̍ŋ lē chāŋ ndo̍, o̍ lɛ̄ŋndē Ke̍nāŋnde̍ŋ ni᷄ŋ. 20Chɔ̍ŋ a̍ bōōndi̍i̍ ke̍ŋ, mi̍ Hi̍ta̍i̍tīi̍ya̍ ā kē E̍bīlāha᷅m lɛ̄ŋndē lēŋ a̍ būūlu̍ cho̍ lēni᷄ŋ ndo̍ māā nyɛ̄ ndɔ̄. Mi̍ būūlū ko̍ŋ sīmnu᷄ŋ na̍a̍ E̍bīlāha᷅m chɔ᷅ wa̍nāā ndūa̍a̍ wa̍.
Iliyochaguliwa sasa
Chɛ̄nɛ̍se̍ē 23: YM
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Kisi Bible © Bible Society in Liberia, 2015.