Chɛ̄nɛ̍se̍ē 20
20
Ābīmɛ̍lɛ̍kī chu̍a̍ la̍nɔ̍ɔ̍ E̍bīlāha᷅m
1Mi̍ E̍bīlāha᷅m lo᷅ o̍ ko̍ŋ mbo̍ fāŋa᷄ŋ o̍ Ma̍mi̍lūē lo̍, o̍ fo̍ndāŋ yɔ̄mīī tɔ̍ɔ̍ma̍a̍ nāa̍ o̍ wa̍ īchāli̍ wa̍. Mbo̍ kūā o̍ lɛ̄ŋndē Ke̍nāŋnde̍ŋ bā tōūwo̍, mbo̍ kɔ̍ cha᷅l Ka̍dɛ̍sī tɛ̍ɛ̄ŋ a̍ Si̍ɔ̍ɔ̄. Fāŋa᷄ŋndo̍ lo̍ŋ, mbo̍ kɔ̍ cha᷅l Kɛ̍lūā. 2Bōōndi̍i̍ o̍ wa̍ Kɛ̍lūā ve̍, mbo̍ dīmī māā yēma̍ ndɔ̄ Se̍lūā cho̍ ni̍. Mɛ̄ɛ̍ Ābīmɛ̍lɛ̍kī o̍ wa̍ māsā bɛ̍ndōo̍ le̍ Kɛ̍lūā wo̍ sīna̍ le̍nde̍, mbo̍ vīām le̍ Se̍lūā le̍ mbō sīīŋgu̍u̍ ndu̍ la̍a̍ ndɔ̄. 3Kɛ̍ mi̍ Mɛ̄lɛ̄ka̍ dīmūl Ābīmɛ̍lɛ̍kī o̍ lūa̍a̍ŋ ni᷄ŋ nyūmmā pīlɛ̍ āā, “Chūā ŋ̄ chu̍a̍ ko̍ŋ ndo̍, la̍nɔ̍ pi̍la̍a̍ o̍ cho̍ ni̍. Le̍la̍ŋ ā chō pīɔ̍mndo̍ sɔ̄lā le̍ chūā ŋ̄ chu̍a̍ ndu̍ wo̍.”
4Kɛ̍ ndu̍yɛ̍, dɛ̍nɛ̍ o̍ dɛ̍nɛ̍ ke̍e̍ku̍ nda̍ tɛ̄ɛ̄ŋ nda̍ Se̍lūā le̍. Mi̍ Ābīmɛ̍lɛ̍kī di̍mūl Mɛ̄lɛ̄ka̍ āā, “Māsānɔ̄ɔ̍, I̍ to̍sa̍ su̍ɛ̍i̍ wɔ̍ɔ̍ŋ o̍ sūɛ̍i̍ he̍ī ni᷄ŋ te̍, di̍ī ya̍ na̍a̍ wānāā nīa̍a̍ le̍. 5E̍bīlāha᷅m pi̍la̍ di̍mu̍l la̍ ni̍ māā yēma̍ ndɔ̄ Se̍lūā cho̍ ni̍. Se̍lūā bɛ̍ɛ̍ mbo̍ dīmī māā yēma̍ ndɔ̄ E̍bīlāha᷅m cho̍ ni̍. Ō cho̍ mī kɛ̍ɛ̍si̍a̍ŋ su̍ɛ̍i̍ wɔ̍ɔ̍ŋ o̍ kɔ̄l le̍ tōsā le̍. Ndu̍yɛ̍ I̍ to̍sa̍ wɔ̍ su̍ɛ̍i̍ wɔ̍ɔ̍ŋ a̍ ndu̍ le̍.”
6Mi̍ Mɛ̄lɛ̄ka̍ dīmūl Ābīmɛ̍lɛ̍kī āā, “I̍ si̍nā māā ō cho̍ mā kɛ̍ɛ̍si̍a̍ŋ su̍ɛ̍i̍ wɔ̍ɔ̍ŋ o̍ kɔ̄l le̍ tōsā le̍. Le̍la̍ŋ bɛ̍ɛ̍ ya̍ ku̍u̍na̍ nu̍m ni̍, a̍ pi̍la̍ŋ ndu̍ mā to̍sa̍ yɔ̄ŋ wɔ̄ɔ̍ŋ ya̍ o̍ hɔ̄l te̍ ni̍. 7Mɛ̄ɛ̍ i̍ cho̍ le̍nde̍ yɛ̍, mɛ̄ɛ̍ mi̍ŋgi̍ ndu̍ ni̍ko̍ pɔ̍nɔ̍ ndɔ̄ o̍ bā. Wāna̍ su̍a̍ā le̍ Mɛ̄lɛ̄ka̍ wo̍ E̍bīlāha᷅m cho̍ ni̍. Ō nɔ̄lā mbō pīɛ̍i̍ le̍ nūm a̍ vi᷅ lɛ̍ le̍. Kɛ̍ tē a̍ mi̍ŋgi̍ ndu̍ le̍, mɛ̄ɛ̍ si̍na̍ pɛ̍ŋgu̍ māā nūm ni̍ a̍ yu̍ŋgu̍ nu̍mndo̍, lā chō wu̍ kpo̍u̍.”
8Mɛ̄ɛ̍ Ābīmɛ̍lɛ̍kī te̍ndū īdīi̍yo̍ pu̍u̍ŋ, mbo̍ vēēlū lāŋgba̍ā kālla̍, mbo̍ chɔ̄m nda̍ lɔ̄mā o̍ sɔ̍l la̍ŋ kpo̍lo̍to̍to̍. Mɛ̄ɛ̍ lāŋgba̍ā ndūāā kālla̍ tūēī lɔ̄mā sɔ̄la᷄ŋ ma᷅ŋ, mi̍ sīōōŋnde̍ bīī nda̍. 9O̍ ko̍ŋ kɔ̍ɔ̍lī, mi̍ Ābīmɛ̍lɛ̍kī vi̍ām le̍ E̍bīlāha᷅m. Mbo̍ nyūnā E̍bīlāha᷅m āā, “Vɛ̄ na̍a̍ tōsāllo̍ nu̍a̍ā? Ō yɛ̄ɛ̄ wɔ̍ɔ̍ŋ ya̍ I̍ to̍sa̍l lɛ̄ nu̍m, ma̍ chūū ya̍ kpūndɛ̍ bɛ̄ndū wāā nu̍a̍ā o̍ lɛ̄ŋndē nīle̍ŋ ni᷄ŋ? Wānā to̍sā nu̍a̍ā a̍ wānā le̍. 10Ɔ̍ɔ̄ le̍ sa̍bū kpe̍e̍kpe̍i̍ ŋ̄ tōsa̍ le̍nde̍ wo̍?”
11Mi̍ E̍bīlāha᷅m mu̍lūl Ābīmɛ̍lɛ̍kī āā, “Yīya᷄ŋndo̍ ya̍ I̍ yi̍ya̍ŋ ni̍ māā wānā o̍ wānā cho̍ na̍nu᷄ŋ mbō nɔ̄ sīōōŋīi̍ Mɛ̄lɛ̄ka̍ le̍. Yɔ̄ŋi̍ nda̍ a̍a̍ di̍i̍ ya̍ le̍ la̍a̍ nūu̍, nyɛ̄ kōŋ ya̍ I̍ di̍mi̍ le̍nde̍ ni̍. 12Kɛ̍ ndu̍yɛ̍, Ī chō tōnya̍ māā yēma̍ nūu̍ Se̍lūā cho̍ ni̍. Kɛ̍ ō cho̍ ye᷅ma̍ ni̍ kālā pi᷅lɛ̍ le̍. Yēma̍ ni̍ fi̍nyā pīlɔ̍ɔ̍ o̍ cho̍ ni̍, kɛ̍ mi̍ chu̍ā ndu̍ o̍ nɔ̄ɔ̍ ni᷄ŋ. 13Le̍ he̍ī, mɛ̄ɛ̍ Mɛ̄lɛ̄ka̍ dīmu̍l la̍ māā ya̍ I̍ mɛ̍i̍ chi̍ɛ̍i̍ fi̍nyā nūu̍ mī ba̍lu̍ o̍ lɛ̄ŋīī yɛ̍ yɛ̍i̍ ni᷄ŋ, mi̍ di̍mūl Se̍lūā la̍a̍ ni̍ a̍a̍, ‘Ma̍la̍ ya̍. Bā o̍ bā na̍a̍ ŋ̄ kūɛ̄ pɛ̍, di̍mī māā pɔ̍nɔ̍ nu̍m te̍ ya̍ I̍ cho̍ le̍. Di̍mi̍ māā yēmā nu̍m ya̍ I̍ cho̍ ni̍.’ ”
14O̍ ko̍ŋ, mi̍ Ābīmɛ̍lɛ̍kī mi̍ŋgī E̍bīlāha᷅m la̍a̍ ndɔ̄ o̍ bā. Mbo̍ bīī sāa̍ a̍ nāūwa̍ mbo̍ kē E̍bīlāha᷅m. Mbo̍ kē ndu̍ vɛ̄lɛ̄ chīa̍a̍, wāŋ pīāāndūa̍a̍ a̍ wāŋ lāāndūa̍a̍. 15Mi̍ Ābīmɛ̍lɛ̍kī di̍mūl ndu̍ āā, “Na̍a̍ nu᷄m ŋ̍ nɔ̍ lɛ̄ŋnde̍ŋ nde᷅ŋ ni̍. Mɛ̍ɛ̍ndi̍a̍ŋ ba᷅ o̍ ba̍ hɛ̍na̍ŋ nu̍m, mā cha̍l lo̍ŋ.” 16Mbo̍ dīmūl Se̍lūā āā, “I̍ ke̍ yēmā nu̍m ka̍ni̍ŋ hu̍mbo᷄ŋ wāa̍ ō pīlɛ̍, le̍ nu̍m tɔ̍ɔ̍ wɔ̍ɔ̍ŋ fo̍ndōo̍ ho̍ō fāŋāa̍ chōo̍. He̍ī chɔ᷅m wa̍nāa̍ cho̍ nu̍m o̍ bā wa̍ ni̍, a̍ wānā o̍ wānā māā dɛ̍nɛ̍ o̍ dɛ̍nɛ̍ ke̍e̍ku̍ na̍a̍ tɛ̄ɛ̄ŋ na̍a̍ nūm te̍.”
17-18Ndu̍yɛ̍, le̍ chūā Ābīmɛ̍lɛ̍kī o̍ chu̍a̍ ko̍ŋ Se̍lūā, la̍nɔ̍ɔ̍ E̍bīlāha᷅m ndo̍, mi̍ Mɛ̄lɛ̄ka̍ Ya̍a̍wɛ̄ɛ̄ ndu̍ o̍o̍ yi̍ī wāŋ lāāndūa̍a̍ kpo̍u̍ o̍ Ābīmɛ̍lɛ̍kī lo̍ chi̍e̍ī ni̍ŋ de̍mbēla̍ŋ nda̍ a̍a̍ vi̍lū le̍. Kɛ̍ mɛ̍ɛ̍ Ābīmɛ̍lɛ̍kī mi̍ŋgi̍ E̍bīlāha᷅m la̍a̍ ndɔ̍ o̍ bā, mi̍ E̍bīlāha᷅m pi̍ɛ̍ī Mɛ̄lɛ̄ka̍ le̍ Ābīmɛ̍lɛ̍kī a̍ chīɛ̄ī ndɔ̄ɔ̍. O̍ ko̍ŋ, mi̍ Mɛ̄lɛ̄ka̍ kūmbī la̍nɔ̍ɔ̍ Ābīmɛ̍lɛ̍kī dēmbōo̍, a̍ wānā la̍nɔ̍ o̍ wānā la̍nɔ̍ cho̍ o̍ ndu̍ lo̍ chi̍ɛ̍ī ni᷄ŋ le̍ mā vēlū.
Iliyochaguliwa sasa
Chɛ̄nɛ̍se̍ē 20: YM
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Kisi Bible © Bible Society in Liberia, 2015.