Yohan 2

Lidzɛgbanɔwe le ní Kanaa

1Liwetanɛ we le e, kudzɛgbanɔ kwize ní Kana ɔma nɔ mɛ ní Galilea. Yesu yene eze níklɔ, 2lɛ bɛxwa Yesu ni yɛ badɔkpasi ba fɛ tsinɔ ní ɔdzɛɛ ɔgbanɔ klɔ ɔ. 3Agi kudaa kwiblo e, Yesu yene asi yɛ si, “Kudaa kwiblo.”

4Yesu ebu le onu si, “One ege lɛ loso wɔɛkpɛ mɛ ní lɛ mɛ ɛ?” “Mɛ lipoe le liʋína sukɔ ɔ.”

5Yesu yene asi besumubi ba si, “Liboe kakaa gi aasi mlɔ ɛ, mlabitɛ ní lɛ aʋa.”

6Bedu akla izɔ tiglo níklɔ kí kuni gi kɔsu axwɛ Yudanɛ ma bizɛwa ní ba kusuploo ligoʋi le me e, lɛ kuni galɔn avi taʋa tsini avi tata kuzeku ní ɔzɔ kakaa mɛ.

7Lɛ Yesu asi besumubi ba si, “Mlakpɛ kuni ní izɔ lɛ mɛ.” Lɛ bɛkpɛ kuni yo ní izɔ lɛ mɛ xe iyi i.

8Lɛ Yesu asi ba si, “Abla ɛ, mlesi kutɔ atsini bidɔŋaŋa ʋɛ ɔʋadi ye.” Besi ko ɛtsini yɛ,

9lɛ gi bidɔŋaŋa ʋɛ ɔʋadi ye akpɛ kuni uliɔ gi kwikyi dzi wain yɛ onu edi i. Yɛ óte niklɔ gi wain yɛ ádɔ ɔ, pɔ̀ besumubia ba gi ba besi kuni yo kɔ bete e. Lɛ ebu ɔdzɛnyee kuka, 10lɛ asi yɛ si, “Kuda gbã ɔnɔ kakaa izɛ tu kɔ ní ɔdzɛ ɔgbanɔ kɔ ɔ, kɔ xegi banɔxwaxwa ba bɛŋwɛ ɛ xe kwiimu ba ɛ, kɔ ableke bɛmani kuliɔ gi kúpɛ ɛ. Pɔ̀ wɔkɔ kuda gbã ɔbla gakɔna ni abla a!” 11Yesu abitɛ linugutseboe tɔpu i lɛ ya ní Kana ní Galilea; niklɔ ebu yɛ kigaglaɛ abasɛ, xe yɛ badɔkpasi ba bɛzi yɛ aʋa ɛɛŋa a.

Yesu akpikpini badɔda ba ní Lisɔligba lɛ mɛ

12Lɛ ya kede e, Yesu ni yene, yɛ beneminyime ba, ani yɛ badɔkpasi ba bɛsɛ trɛ ní Kapernaum. Beze niklɔ ewe klakla atɔ.

13Agi Yudanɛ ma Kutseolidɔzawe ŋaŋa nɛ lihana ɛ, Yesu atrɛ ní Yerusalem. 14Ní Lisɔligba lɛ mɛ ɛ, amɔ banima gi bɛzɛda egume, iʋesi ni abronuma ʋa ani banɔatɔ gi bɛzɛtsrɛ kibɔ ɛ, gi bedi ní ba ikplɔ nɛ su i. 15Lɛ loso Yesu aaʋì igbé lɛ akɔ lɛ akpikpini baga ʋa petee dono ní Lisɔligba lɛ mɛ ɛ, iʋesi ni egume; ehle babɔtsrɛ ba bibɔ ʋɛ lɛ ekyi ba ikplɔ nɛ ewe e; 16lɛ akpɛ ɔsã akí banama gi bɛɛda abronuma ʋa si, “Mlebu bidɔ bɛ ya dono ni ya! Mlakíkɔ Mɔka kepea mɛ akpɛ kedzí me e!”

17Yɛ badɔkpasi ba bɛplɛ aŋu si bɛŋwlimi kpɛ kuŋwlimi dradraa mɛ si, “Aya, isu kukɔkyɛ kí wɔ kepea ɛ, kwiisɔ ní mɛ mɛ̀ ŋwisi kifu kinɛ ɛ.” 18Lɛ Yudanɛ ma bebu le onu ni kuʋiʋi si, “Linugutseboe woli wɔabitɛ gi liabasɛ blɔ si wɔmɔ kigagla si wɔabitɛ eboa la ya na a?” 19Yesu ebu le onu si, “Mlayaʋi Lisɔligba ɛ lɛ ya, maadzini le kuwa ní ewe tata mɛ ɛ.”

20Lɛ Yudanɛ ma beʋi Yesu si, “Wɔtradzini Lisɔligba ɛ lɛ ya ɛwa ní ewe tata mɛ na a? Agɔ avitene ni teglo bɛkɔ ɛwa Lisɔligba ɛ lɛ ya!” 21Pɔ̀ Lisɔligba ɛ lɛ su gi Yesu azɛɛpani i, lɛ lize yɛ ɔnɔ se lo. 22Lɛ gi Aya ayɔni yɛ adɔni bekpo ʋa mɛ ɛ, yɛ badɔkpasi ba bɛplɛ aŋu si Yesu apani liboe lɛ ya aplɛ lɛ bɛzi kuŋwlimi dradra ni liboe lɛ klɔ gi Yesu apani aplɛ aʋa ɛɛŋa ɛ.

Yesu ete Ɔnɔ gbagbe yɛ Kizeze me

23Agi Yesu eze ní Yerusalem ní Kutseolidɔzawe ŋaŋa nɛ mɛ ɛ, banɔ glegle bɛzi yɛ aʋa ɛɛŋa lɛ ese linu si bɛmɔ enugutseboe ala gi abitɛ ɛ. 24Pɔ̀ Yesu ɔ́yurɔ isu ɔki ba a, lɛ ese linu si ete ɔnɔ gbagbe kakaa. 25Lɛ líziã si ɔnɔnɔ ɔpani ní basu ɔki yɛ ɛ, lɛ ese linu si yɛ ɔtutɔ ete kidiliɛ gi kilɛ ní ba ina nɛ mɛ ɛ.

Iliyochaguliwa sasa

Yohan 2: avn

Kuonyesha

Shirikisha

Nakili