Yohan 19
19
Bɛtsa kutsépia ɛki Yesu
1Lɛ Pilato aki si bɛfiaʋi Yesu litam nɛ ɛ. 2Baguta ba bɛklɔʋi bibu ʋe lɛ bɛkɔ lɛ ekume ki Yesu ŋwisi likusikuto kinɛ ɛ, lɛ kede e, bɛkpɛ liwu kyíkyĩ gblamadza ɛki yɛ 3lɛ xe beti ipɔni yɛ ɛ, kɔ bɛpani si, “Yudanɛ ma Okusi ye oze ligbã́ gblamadza!” Kɔ bɛbɔ yɛ bidɔ mɛ, bɛbitɛ nite tasɛ tasɛ.
4Pilato edo atrɛ dzɛ lɛ asi linɔkpi le si, “Mledi, matrado ni ye mani ya ki mlɔ tɔ mlamɔ si mámɔ kesetata tɔtɔ gi makɔ bu yɛ lipɔ ɔ.” 5Gi Yesu edo aba oŋwe no e, bibu ʋe likuto le lize yɛ litukpo le, lɛ liwu kyíkyĩ gblamadza nɛ kyɛ lize ní yɛ su u. Pilato asi ba si, “Mledi! Onyimee liɛ ya!”
6Agi Kusumu yo baka ba ni lisɔligba lɛ bepepe ba bɛmɔ Yesu i, bɛkpɛ ozi si, “Kú ye ní ose lo su, Ku ye ní ose lo su!” Lɛ Pilato ebu le onu aki ba si, “Mlɔ tutɔ mlagbani yɛ atsinɔ tɔ mlazɛkú ye. Mɛ xunyɔ mámɔ liboeboe gi maakɔ obu yɛ lipɔ ɔ.”
7Lɛ Yudanɛ ma bebú le onu si, “Ɔsã ɔlɛ blɔ awla gi ɛpani si, lilɛ si otse e, lɛ ese linu si akɔ lɛ si yɛ yenu Aya Yebi.”
8Agi Pilato enu liboe le e, lifu liku ye sanɔ. 9Edzì atrɛ ní kekusipea mɛ lɛ eʋi Yesu si, “Nifɔ wɔdɔ ɔ?” Pɔ̀ Yesu óbu le onu ɔki yɛ ɛ. 10Pilato eʋi Yesu si, “Wɔtrafuɛ ni mɛ na a? Wóte si kigagla kiliɛ mɛ awla si miyurɔ wɔ loo tɔ miki si beku wo ní ose lo su na a.”
11Yesu ebu le onu si, “Wɔ́mɔ kigagla ní mɛ aʋa a, xe aní kiki bɛki wɔ kɛ dɔni lifunu ne e. Lɛ loso e, ɔniliɛ gi yɛ akɔ mɛ akpɛ awla ki wɔ ɛ, yɛ eboe zimizi na ekeme sanɔ.” 12Agi Pilato enu liboe lɛ ya ɛ, ekeni edi si yipɛ́ kude kutɔ onu tɔ yiyurɔ Yesu. Pɔ̀ Yudanɛ ma bɛkpɛ ozi dzɛ si, “Xe wɔyurɔ yɛ ɛ, kɔ libasɛ si wónu Kaisaro yɛʋia a! Ɔnɔ kakaa gi akɔ isu si ye onu okusi i, ayɔ kedu ní Okusi ʋidi ye Kaisaro su!”
13Agi Pilato enu eboa la ya ɛ, agbani Yesu edo no ní oŋwe no lɛ azeeze ní yɛ litsi xwagbo le aʋa ní klɔ gi bɛplɛ Akla plataplata la gi bizɛxwa si, “line ne me e.” Ni si Hebri se me e, linyi ne linu Gabata. 14Lizè ŋwisi livlɛ lɛ ni kemizea kutsaa, liwe tile kpɛ ɔtɔ ɛki Kutseolidɔzawe le. Pilato asi Yudanɛ ma si,
“Imɔ mlɔ okusi ye!” 15Bɛkpɛ ozi si, “Mlagbani yɛ azeeye! Mlagbani yɛ azeeye! Mleku yɛ ní ose lo su!”
Pilato eʋi ba si, “Mlɛpɛ si mikú mlɔ okusi ye ní ose lo su na a?” Kusumu yo baka ba bebu le onu si, “Okusi tole liɛ klɔ gi ɔlɛ ní blɔ awla ɛ, yɛ onu Kaisaro.” 16Lɛ Pilato akɔ Yesu aki ba si bazɛ ku ní ose lo su i.
Baguta ba beku Yesu ní ose lo su
Lɛ baguta ba bɛgbani Yesu i sɛnɔ ɛ. 17Lɛ loso bɛgbani yɛ dono, gi etu yɛ osetsase lo atsinɔ níklɔ gi bizɛɛxwa si Litukpoxwa lɛ Ozeklɔ ɔ, Ni si Hebri se me e, bizɛɛxwa níklɔ si, Golgota. 18Niklɔ beku ye ní osetsase lo su; xe bekú benyime tiaʋa ɛpɔni yɛ ɛ, tole ní yɛ kabaa me, ɔʋlaɛ ní yɛ kaŋaa mɛ lɛ Yesu eze ní ba kusi i.
19Pilato aŋwlimi bidɔ gi aki si bɛkɔ eku ní Yesu etukpo la onu u si, “Yesu Nazaret ƆNƐƐ, YUDANƐ MA OKUSI YE.” 20Niklɔ gi bekú Yesu i, ódze ni ɔma ʋidi no su u, lɛ loso Yudanɛ glegle bɛkla bidɔ ŋwlimiŋwlimi ʋɛ. Bɛŋwlimi bidɔ mɛ ní si Hebri se, si Roma sɛ ani si Hela sɛ mɛ. 21Líze Yudanɛ ma kusumu yo baka ba ole e, lɛ bɛsi Pilato si, “Wógyeni ŋwlimi si ‘Yudanɛ ma Okusi ye,’ boŋu i, si Onyime liɛ si, ‘Mɛ menu Yudanɛ ma Okusi ye.’ ”
22Pilato ebu le onu si, “Kidiliɛ gi maŋwlimi i, mátrakyi ke e.”
23Agi baguta ba bekú Yesu ní ose lo su pɔ́ ɛ, bɛlɛ yɛ ewu la ɛkpɛ ní kupɛ tune me, ɔguta kakaa azɛ kapɛ tiele. Bɛkɔ yɛ liwu gblamadza nɛ fɛ, gi beyo kpɛlikpɔ ɛ, xe bátsa lɛ ní ɔkɔkɔ ɛ. 24Lɛ baguta ba bɛpani ní ba tsali kusi si, “Mlakí ki tɔ kukyì liwu le e; boŋu i mlaki tɔ kuta exoeʋi la ní lɛ aʋa tɔ kudi si nyaŋwɛ linɛ liadzi na a.”
Lɛ ya liba lɛ mɛ tɔ liboe le gi bɛŋwlimi kpɛ Aya yɛ liboe le me e, liba lɛ mɛ si,
“Bɛlɛ mɛ ewu la ɛkpɛ ní ba kusi
lɛ bɛta exoeʋi la ní mɛ liwu gblamadza nɛ aʋa ɛ.”
Lɛ lɛ ya baguta ba bɛbitɛ ɛ.
25Ní Yesu yɛ ose lo su pɛ ɛ, Yesu yene, yeneda Maria gi onu Klopa yedze e, ani Maria Magdaladzee bɛlɛɛ. 26Yesu amɔ yene ni yɛ ɔdɔkpasi liɛ gi alɔ ɛ, gi balɛɛ níklɔ ɔ; lɛ asi yene si, “Mone wobinyimee yɛ liɛ.” 27Lɛ Yesu asi ɔdɔkpasi yɛ kyɛ si, “Wone yɛ liɛ.” Dɔni lipoe lɛ klɔ aʋa ɛ, ɔdɔkpasi yɛ agbani Maria atsini yɛ kepea mɛ.
Yesu yɛ kutseo
28Yesu ete si kɔna ni abla ɛ, yeblo ni liboe kakaa, lɛ tɔ liboe lɛ gi bɛŋwlimi plɛ liba lɛ mɛ ɛ, akpɛ ozi si, “Olile eeku me.” 29Keʋe katɔ mɛ gi kuda nyagba nyagba kwize e, keze niklɔ; lɛ bɛkɔ ɔsapo ɔtɔ ɛkpɛ ní kɔ mɛ ɛ, xe bɛkɔ lɔ ɛxla ní hisope yɛ kiseʋi gblamadzaɛtɔ onu lɛ bɛkɔ kɔ ɛtɔsi ki yɛ ɛ. 30Gi Yesu aŋwɛ kudaa pɔ́ ɛ, akpɛ ozi si, “Liblo e!” Lɛ kede e, akpɛ yɛ litukpo le kesea lɛ akɔ yɛ Ɔfuɛfuɛ nɔ akɔ ɛ.
Bɛsɔ́ Yesu bidɔ ní opoga nɔ mɛ
31Lɛ Yudanɛ baka ba bezeʋi Pilato tɔ ɔki ba kude e, tɔ bavini banɔaklɔ gi beku ní ise le su i, ba ikli lɛ ani tɔ bati bekpo ʋa ní ise le su. Beʋi liboe lɛ ya lɛ ese linu si, liwe le lize Lisɔpa gi bizɛɛbla ɛki Lizemɔniwe le e, lɛ bápɛ si bekpo ʋa beze ní isetsase le su ní Lizemɔniwe le aʋa a, gi Lizemɔniwe le linu liwe dradra loso o. 32Lɛ loso e, baguta ba bɛtrɛ lɛ bɛzɛɛvini ɔnɔ tɔpu yɛ ni ɔnɔ ʋlaɛ gi bekú i pɔni Yesu i ba ikli lɛ. 33Pɔ̀ gi bɛna Yesu aʋa ɛ, bɛmɔ si yɛkɔɔ etse kooko lɛ loso, bávini yɛ ikli lɛ ɛ. 34Pɔ̀ baguta ba mɛ tole, asɔ Yesu ɔtrɛ nɔ ní opoga nɔ mɛ, nite me si ika lɛ ni kuni yo kwido kyɔŋ 35Ɔniliɛ gi amɔ eboa la ya aŋu mɛ ɛ, yɛ apani la su, tɔ mlɔ fɛ mlaazi ŋa. Liboe lɛ gi apani i, linu anukwarɛ lɛ ete si yɛ apani anukwarɛɛ. 36Eboa la ya ɛba la mɛ tɔ kuŋwlimi dradraa kuba kɔ mɛ si, “Bátravini yɛ lixwa ɛtɔtɔ ɔ.” 37Lɛ dzɛ ɛ, kuŋwlimi dzedze kwipani si, “Banima biadi ɔniliɛ gi bɛsɔ́ bidɔ mɛ ɛ.”
Yesu yɛ Kuviveo
38Lɛ ya kede e, Yosef, gi ádɔ Arimatia ɛ, azeeʋi Pilato tɔ ɔyurɔ Yesu yɛ okpo ye ɔki yɛ, Yosef eze ni Yesu kude ní kikpokpo me, lɛ ese linu si azeese Yudanɛ baka ba a. Pilato aki yɛ kude, lɛ Yosef atrɛ xe azɛɛsɛ ni okpo ye e. 39Nikodemo gi yɛ adzɛ Yesu klɔ elesi la ɛ, yɛ ni Yosef bɛtrɛ. Nikodemo aki si bevu bawa ní kisrɛsrɛ mɛ gi ba bizɛɛkɔ ɛlulɔ bekpo ʋa a, xe bɛtrɛ ɛ. 40Banɔ tiaʋa ya ɛ, bɛkɔ Yesu yɛ okpo ye lɛ bɛsra bawa flafla ʋa ɛki yɛ ɛ, lɛ bɛxla yɛ ɛkpɛ ní asaba pititi gblamadzaatɔ mɛ ɛ, ní Yudanɛ ma ligoʋi le onu kiliɛ gi bizɛbla bekpo ʋa ɛki kunɔvive e. 41Bidɔŋaŋa kuka kutɔ kwize niklɔ gi beku Yesu ní ose lo su u, xe etse e, ɔdrɔ vuvu gi bakpɛ okpo lɔ mɛ oʋídi i, eze kɔ mɛ. 42Agi lize Yudanɛ ma liblawe le kpɛ ɔtɔ ɛki Lizemɔniwe le e, xe ɔdrɔ lɔ kyɛ eti ipɔnɔ, loso e, bɛkpɛ Yesu ní lɔ mɛ.
Iliyochaguliwa sasa
Yohan 19: avn
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© Ghana Institute of Linguistics, Literacy and Bible Translation, 2017 In cooperation with Wycliffe Bible Translators, Inc
