Zaburi 111:1-10

Haleluya. Nitamshukuru BWANA kwa moyo wangu wote, Barazani pa wanyofu wa moyo na katika mkutano. Matendo ya BWANA ni makuu, Yafikiriwa sana na wapendezwao nayo. Kazi yake imejaa heshima na adhama, Na haki yake yadumu milele. Amefanya ukumbusho wa matendo yake ya ajabu; BWANA ni mwenye fadhili na rehema. Amewapa wamchao chakula; Atalikumbuka agano lake milele. Amewajulisha watu wake uwezo wa matendo yake, Kwa kuwapa urithi wa mataifa. Matendo ya mikono yake ni kweli na hukumu, Maagizo yake yote ni amini, Yamethibitika milele na milele, Yamefanywa kwa uaminifu na haki. Amewapelekea watu wake ukombozi, Ameamuru agano lake liwe la milele, Jina lake ni takatifu na la kuogopwa. Kumcha BWANA ndio mwanzo wa hekima, Wote wafanyao hayo wana ufahamu mzuri, Sifa zake zadumu milele.