Maliko 5

Yesu akumuponia umunu umunyamasoka

(Matayo 8:28-34; Luka 8:26-39)

1Neke pevafisile kumwambu, kung'i iya Vagelasi. 2Peikite uluhuma mukipugu, kula kufyanga itang'ine na umunu umunyamasoka. 3Uyo ikalige mufyanga alasukuli umunu yealahwana ukumupinga nambi kwa munyololo. 4Pakuva kolofu vamupingige na inzisi na iminyololo, na mbepali adumulige inzisi na giminyololo na alasukuli umunu yealahwanite ukumwibata. 5Pakilo na pamunyi ikalige kufyanga na mufidunda we ikoolaga na ukwitemanga na amaganga.

6Neke peamuwene Yesu kwa pataali, amukimbilye, swe akamufugamile. 7Iyovela pachanya itigila, “Wisaka upige kiki kwa nene, Yesu ve Mwana va Nguluvi yealikuchanya? Ngukulongela mwitawa lya Nguluvi ngukugongola ulanesa!” 8(Alonzile ndahihyo pakuva Yesu amutige, “Hege kulu Munu uyo ve lisoka.”)

9Ndawe Yesu amuwusige, “Ilitawa lyako winani?” amupitwe, “Ilitawa lyangu ndi kilugu pakuva twiwolofu.” 10Neke umunu uyo amugongolite hilo Yesu alagahaka gala amasoka mung'i yila. 11Ino, kwekwina ikipinga cha ingubi chakwamililige mwivambala lya ikidunda. 12Swe amasoka gala gamugongolite gitigila, “Tusindike mungubi sambi hwehwe twingile musene.” 13Neke atigile mubite. Ndawe amasoka gahumite kulumunu yula, swe gakwingila mungubi. Na ikipinga mbekili cha ingubi mbilima sivili chasulunuche pa kisulunukila mbaka mu nyanza kisuda mululenga kifwa.

14Avanyakukwamila swe vikimbila, vakuvalongela avanyaboma na ing'i mbeyili. Swe avanu vakusa valave lula ulupigike. 15Ndawe vamubitilige Yesu, vakamulave umunyamasoka vakumuwona ateng'eme pala afwite imyenda ina luhala ulukwilaniche hela, umunu yeeina masoka molofu pamwandi neke wogope hilo. 16Na vala avaluwene ulwelupigike, ku munyamasoka na kungubi vavalonje avayawo ing'ani mbesili sesapigike ku munyamasoka na kungubi. 17Neke pevavange ukumugongola Yesu ahege mulutanana lwa ing'i yawo.

18Neke peyeakwingila mukipugu umunu yula yeeina amasoka amusukite ulwa vave pamwi. 19Neke Yesu abihile amutigile, “Bite kukaye ku vanyalukolo vako, ukavalongele chakupije umutwa vako, na weagisile ukukuwonela ulusungu.” 20Ndawe avangige ukudalika kulutanana ulunyaboma isinyichumi isikemelwa Dekapoli ing'ani ingomi mbesili seamupije Yesu; avanu mbevali vasasave pakomi.

Umwalive va Yailo na uyungi vipona

(Matayo 9:18-26; Luka 8:40-56)

21Nave Yesu pealowike kumwambu inzayo na ikipugu. Na amalugu makomi gakong'ine na ukumupilima, nave ealimulubali mwa inyanza. 22Neke pease umuvina uyumwi va isinagogi ilitawa lyakwe Yailo; nave peamuwone swe e igwa pamagulu ga Yesu. 23Igongola hilo itigila, “Umwalivangu mutamwa sambi ifwa, wuse umugeleke amawoko gako, sambi apone ave mumi.” 24Swe Yesu vibitasa na Yailo kono amalugu gegegamupilime gamuninilige.

25Na umo emwali umung'inetu yeahumige idanda myaka minyichumi na givili. 26Na umung'inetu uyo agudite muvakofi va imigoda wolofu na ukutawula mbefili fye alinafyo wesiilamukilagi neke peagine ukusakala hilo. 27Na peapulike isa Yesu, aninilige mumbele mwa Yesu swe iluting'asa mumalugu ipamisa umwenda. 28Pakuva atige, “Wone mamise hela umwenda gwakwe mona.”

29Na lulusika lululaga idanda yadumwike pakuhuma swe akwipulika mumuvili gwakwe ulwa yaponite uwutamwa wakwe. 30Neke Yesu, lulusika lulula iwene ulwa uludali lwakwe lukepite, swe akuvapitukila avamalugu itigila, “Ye nani yeapamise imyenda jangu?” 31Neke avanyigendo vakwe vamutigile, “Mbi sukugawona amalugu agakubanite, nave witigila ye nani yeakupamise?”

32Neke umwene pealave kono na kono ulwa wanda amuwona umunu yeagisile ndahihyo. 33Neke umung'inetu yula weakulukagula ulupigike kulumwene kono we akogopa swe igwa pamagulu ga Yesu neke peilogole mbesili. 34Neke Yesu peamutigile, “Mwalivangu ulufuuwo lwako lukuponise. Wibitile na uwikalakunoga, ponage uwutamwa wako.”

35Ave Yesu wepealonga, vaasile avanu uluhuma kukaye iya Umuvina va isinagogi vakumukutila ulwa, “Umwaliwo afwe. Lweki uve peumufwahisa Umwigisi?” 36Neke Yesu abedale sevalongige swe akumutigila Umuvina va isinagogi, “Ulogopa, velage na lufuuwo hela.” 37Neke avakanile avangi valamuninila, pesi Petulo na Yakobo na Yohane umwanakwave va Yakobo.

38Na peyevafisile kukaye iya umuvina va isinagogi swe akuvawona avanu vasasing'ine vivemba na ukuyova. 39Neke peinje avatige, “Mbi ndawuli musasing'ine na ukuvemba? Umwana siafwi nda agonelye hela.” 40Neke vamuheke swe akuvahumya mbevali kwivala, swe ibita na udade va Umwana na yu Yuve neke na vala avanyigendo vakwe vakwingila kwe ekwali umwana. 41Ndawe amwibatige iliwoko na ukumulongela, “Talita nyichumi,” kwe kutigila, “Ve muhinza, ngukulongela lamuke.” 42Swe ulusika lululaga umuhinza alamwike ivanga ukugenda. (Pakuva alagelaniche myaka ginyichumi na givili.) Na lulusika lululaga avanu vasasavale. 43Nave avakanie hilo vala, ulwa alalukagula munu ulu, neke peavalongele vamupele ikinu alye.

Iliyochaguliwa sasa

Maliko 5: HeNT2004

Kuonyesha

Shirikisha

Nakili