Matayo 18

Ye nani umuvina yealutye?

(Maliko 9:33-37; Luka 9:46-48)

1Neke uluvala lululaga avanyigendo vahele kwa Yesu vitigila, “Ye nani umuvina yealutye ku wutwa wa kuchanya?” 2Neke Yesu akemele Umwana swe akumuvika pagatinagati pavavene. 3Ndawe avatigilige, “Nachene nguvalongela pesimupitwiki neke muve ndawe avana simulagele mwingile ku wutwa wa kuchanya. 4Umunu yakwilevesa ndawe umwana uyu, uyo ye muvina hilo ku wutwa wa kuchanya. 5Kangi Umunu yeyeavesaga yakumwanukila Umwana yeindawe uyu mwitawa lyangu, ava akunzanukila nene.

Ifikuvaso

(Maliko 9:42-48; Luka 17:1-2)

6“Neke umunu yeyeavesaga yakwambusa uyumwi va avadodo iva vevakufuuwa nene sambi vapigage inzanangifu nene apo uyo lumuvaje awopelesewage ulwala na ukutoosewa mukiseela cha ibahali. 7Mwinalyo nyenye ye muli mung'i umumemile ifikuvaso ifya inzanangifu ifikwambusa avangi vikuvale! Neke vinalyo vala avanyakwambusa!

8“Apo wone iliwoko lyako nave ligulu likukuvase dumulage neke utage pataali hilo, kiba wingile ku uwumi wimugaya liwoko nave ligulu, pakuva siluling'eni ukwingila na amawoko gavili na magulu gavili neke usopwe kwitemela lya umoto. 9Na liliho nalyo wone likukuvase ng'amatulage neke pataali hilo lunoje wingile ku wumi na iliho limwi sindawe ukwingila kwitemela lya umoto wina amiho gavili.

Ikiganiso icha ing'olo yeyeyiyasile

(Luka 15:3-7)

10“Mulavage! Mulabedala avana avadodo iva, ipo nguvalongela nditigila avanyivaha vawo va kuchanya vaviva mbepali pa Dada vangu yalikuchanya. [ 11Pakuva Umwana va Umunu asile mukupoka chekiyasile.] 12Mwiwona ndawuli? Umunu peina ing'olo ligana, neke iyimwinga yiyage, aigita ndawuli? Siakusileka sila machumi gigonza na nyigonza kukidunda neke abite kukusaka yila yeyike yikayasile? 13Kangi peayiwene nachene nguvalongela aihekelela hilo uwimila yiyo ukulutila kwimila ing'olo sila amachumi gigonza na nyigonza sesisiyasili. 14Lwindahihyo na kwa udadenyu yealikuchanya siaiwenda uyumwinga mwa avadodo iva ayagage.

Umwananzi vako

15“Wone umuyago akwanangile ulukani, bitage yiveve ukamulagile che akwananje, veve na umwene swe, wone umwene akupulike, uva umusafile umuyago. 16Wone, sakupuliki, kemelage umuyago yumwi, nave vavili pamwi na veve sambi kwa uwolelesi wa avanu vavili nambi vadatu, ilidati ilyelivesaga lipulikiswage. 17Wone, savapuliki iwo nda, longelage umukong'ano, wone abihile na kumukong'ano avelage kwa veve ndawe umumyanza na umukong'asa imbemenenge.

Ikikane na ikitawule

18“Nachene nguvalongela semuvelaga mudindye mung'i umu sivandindile na kuchanya, na semuvelaga mudindulye mung'i umu sivandindulile na kuchanya. 19Kangi nguvalongela ulwa avanu avavili va nyenye pevipulike mung'i umu ulwakusuka, vapigilwa na Dada vangu yalikuchanya. 20Pakuva pepovali avanu vavili nave vadatu vakong'ine mwitawa lyangu, nayinene mba baho pagati apawo.”

Ikiganiso icha umukami yesidegepela

21Neke Petulo abite kwa Yesu atigile, “Mutwa, umuyangu anzanangilage kalinga nane ndimudegepele ngali naluve kimufung'ati?” 22Neke Yesu amutigile, “Sinditigila kimufung'ati hela nda, nditigila luvesage machumi gimufung'ati kali mufung'ati. 23Pa ulu uwutwa wa kuchanya wihwana na umutwa uyumwi yasakige ukuvalila ifyakwe na avakami vakwe. 24Peavanzile ukuvalila, vamuletye umunu umunyamukole gwa talanda#18:24 Talanda: Amagobole agakwilye amahombo ga myaka minyichumi na gihanu kwa umunu yeibalulila. mbilima nyichumi. 25Ave umunu yula pe agayite ichakuhomba, umutwa yula alamwe ukutigila vamugusage umwene pamwinga uvakwe na avanakwe na mbefili fyeeinafyo guhombwe umukole. 26Neke baho umukami yula afugime palu Mutwa vakwe atigilage, ‘Mutwa nzindilage nguhomba umukole mbeguli.’ 27Neke Umutwa yula amuwonele ulusungu umukami vakwe, neke amudegepele umukole mbeguli swe akumuleka ibitilage. 28Neke umukami yula, peahesile neke amufikite umukami umuyagwe yeeina umukole gwa idinali#18:28 Idinali: Amagobole agakwilye mahombo ga myesi gidatu kwa umunu yeibalulila. ligana swe neke amwibate nu kumutita itigila, ‘Nyombage umukole gwangu!’ 29Swe umukami yula afugime igongola itigila, ‘Ndegepele ndemuyago nguhomba.’ 30Neke abihile, swe akumusopa mundinde, ‘Mbaka peave ahombite umukole mbeguli.’ 31Avakami avangi vavelige vakuluwona ulo, vavifile hilo, neke vahelele kukumulongela Umutwa vawo mbesili isesipigitwe. 32Swe Umutwa vakwe akumukemela nu kumulongela, ‘Veve wi mukami wi mwaafu!’ Nene ndakudegepye umukole gula mbeguli peungongolite. 33Na yiveve siluke lukuvaji umuwonele ulusungu umuyago, ndawe nene lwendakudegepye veve? 34Neke Umutwa yula kwa ililakali, amutawe ku vanyandinde mbaka pesaave ahombite umukole gwakwe mbeguli. 35Lwindahihyo kwa Dada vangu yealikuchanya avapigila nyenye ndahihyo pesimukuvadegepela avayenyu uluhuma munumbula senyu.”

Iliyochaguliwa sasa

Matayo 18: HeNT2004

Kuonyesha

Shirikisha

Nakili