Mateyo 6
6
Utanda wa kweli.
1Teγelezai utanda wenyu msheuγoshole he mesho ya wantu mkiolelwa ndiwo! Ati mu ivyoho, nkamna upokezi kwa ishe ywenyu mweikala mwe lwingu. 2Ndiho uinkile cha mbazi, usheleke, ukitowelwa gunda haja uhoinkila, sa waja wehemba wavyoγoshola mwe mavikilo, hata lwazoi, kangwe watogolwe ni wantu! Kweli namiti: Wazabinda kuγuwa upokezi wawe. 3Miya iwe ukiinkila cha mbazi uleke, mkono wako wa kumosho ushetaile, wa kulume uvyoγoshola, 4kangwe chiya cha mbazi yako chifishiγwe! Kangi isho mweona viya vyefishiγwa atazavikuuziza.
Mivikile ya kweli.
5Mkivika mshefanane na waja wehemba! Hambu wakundisha kuvika waiγoloke, ati ni mwe mavikilo, ati ni he makintanilano ya sila za muzi, kangwe waoniγwe ni wantu; kweli namiti: Wazabinda kuγuwa upokezi wawe. 6Miya iwe ukivika ingila nyumbai mwako mwe chumba che ndai, uzuγale luvi, udahemvika isho uikifishize! Kangi isho mweikala ashihooniγwa atazavikuuziza. 7Mkivika mshehakilongela mbuli nyingi, sa wamzimu wavyoγoshola! Hambu wafanyanya, wakilonga mbuli nyingi wataiviγwa. 8Mshekifanyanye nawo! Hambu ishe ywenyu ataila viya vyemitala, mushizati mumhembeleze. 9Vikai ivyoho: Tate yweshu we uko mwe lwingu! 10Zina jako jigimbikwe! Uzumbe wako uize! Uvyokunda vibontoke kunu shi sa uko mwe lwingu! 11Utinke lelo nkande yetu yetiagiza! 12Utiushilize masa yetu, sa ishwi tivyowaushiliza weshu masa! 13Ushetiingize mwe miγezo! Miya utivunile mwe vibada! Hambu wako ni uzumbe na nguvu na utana kale na kale. 14Hambu mkiushiliza wenyu wavyomibanila, hata ishe ywenyu ywa kilwingu atazamiushiliza vyenyu. 15Miya mkishewaushiliza wenyu, hata ishe ywenyu nkezeamiushilize muvyobana.
Kufunga.
16Mkifunga msheifye vyeni, sa waja wehemba wavyoγoshola! Hambu waja wafisha vyeni vyawe, kangwe waoniγwe ni wantu kuti: Wafunga. Kweli namiti: Wazabinda kuγuwa upokezi wawe. 17Miya iwe ukifunga shisha mutwi wako mavuta, 18kangi uhake cheni chako, kangwe usheoniγwe ni wantu kuti: Wafunga, uoniγwe ni isho mweikala hashihooniγwa! Kangi isho mweona vyefishiγwa atazavikuuziza.
Mali ya kweli.
19Mshekiumbikile mali kunu shi! Hambu kunu zabindwa ni visaga na nkanga, kangi zafokolwa, zabaiγwa ni wabavi. 20Miya kiumbikilei mali mwe lwingu! Hambu kuja nkazibindwa ni visaga na nkanga, kangi nkazifokolwa, nkazibaiγwa ni wabavi. 21Hambu mali yako iliko, ne moyo wako uliko. 22Langaila ja ṅwili ni zisho; ati zisho jako ni jedi, ṅwili wako woshe una langaila. 23Miya ati zisho jako ni bada, ṅwili wako woshe una lwiza. Lushe viya vye langaila mwe ṅwili wako vikitenda kiza, kiza ṅwenye chiinga hahi? 24Nkakuna mwedaha kutumikila wazumbe waili; hambu atamshuka yuja muṅwe, amkundishe yuja mtuhu, ao akianga na yuja ywa bosi atamubela yuja mtuhu; nkamdaha kumtumikila Mulungu haṅwe na mali ya kiinushi.
Sungu zeagiza.
25Ne vyeleka, nikimiti: Msheje sungu kwa mbuli ya ugima wenyu kuγamba: Tijei? ao du: Tinywei? Msheje sungu kwa mbuli ya mili yenyu kuγamba: Tizwikei? Ugima so ukulu kuzinka ṅkande? Ṅwili so mkulu kuzinka shuke? 26Olelai madeγe yeanga ulanga! Nkayahanda, nkayaluka, nkayaika mako, kangi ishe ywenyu ywa kilwingu ayashuγa. Inywi nkamuyazinka hakulu? 27Kwenyu kuna muntu mwedaha kuongeza mishi yakwe kahindi kaṅwe du na kupikapika kwakwe? 28Nini mkikionya sungu kwa mbuli ya shuke? Hinilai mwe vititi vya tunduwi, vivyokula! Nkavina ndima, nkaviluka shuke. 29Kangi namiti: Hata Salomo aγenyezeye utana wakwe ungi nkavutile sa kititi kiṅwe. 30Ati Mulungu avutila ivyoho mani ya tunduwi yeikala lelo, kangi keloi yaashiγwa mwe moto, asheisiize kumivutila inywi? Nini mkishetozesha vyedi? 31Msheje sungu kuγamba: Tijei? ao du: Tinywei? ao du: Tizwikei? 32Ivi vyoshe wamzimu ne wevilonda. Hambu ishe ywenyu ywa kilwingu ataila, kuti mwaagiziγwa ni ivi vyoshe. 33Kuandiila londai uzumbe wa lwingu na utanda wakwe! Ne ndivyo mwinkwe viya vyoshe. 34Msheje sungu kwa mbuli za keloi! Mushi wa keloi una zakwe sungu. Vyabesha, kila mushi una ntoγo zakwe.
Iliyochaguliwa sasa
Mateyo 6: KISHNT05
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
New Testament in Kishambala © Bible Society of Tanzania, 2005.
