Mateyo 10
10
Mazina ya ntuṅwa.
1-15.
1Azaitanga waja wahina wakwe kumi na waili, azawainka ufuṅwa wa mpepo zekandana, wadaheziingata, kangi wadahehonya mahisho na manyonge yoshe. 2Mazina ya izi ntuṅwa kumi na mbili shaya: Ywa bosi ni Simoni mweitangwa Petelo na nduγuye Andeleya, Yakobo, ṅwana Zebedeyo, na nduγuye Yohana. 3Filipo, Balitolomeyo, Toma, Mateyo mngelu, Yakobo, ṅwana Alifeyo, Tadeyo, 4Simoni ywa Kana, Yuda Isikaliyota, ni yuja amwinkileye.
Yesu avyolaγiliza ntuṅwa.
5Awa kumi na waili Yesu azawatuma na kuwalaγiliza akiwati: Mshehite na kwe sila za wamzimu, hata mwe muzi wa Wasamaliya msheingile! 6Hitai du kwe ngotongwa za mbali ya Isilayeli ziaγilezo! 7Hitai, mkabilikile kuti: Uzumbe wa lwingu u hehi! 8Wanyonge wahonyei! Wafilewo wainulei! Wakoma waushei ukoma! Mpepo ziingatei! Mzaviinkwa bule, viinkilei bule! 9Mshetoze zahabu ao feza ao senti mwe misipi yenyu! 10Funge du ya nkande za silai msheihaγate! Msheange na nkazu mbili ao du vilatu ao ngoda du! Hambu mndima aagiziγwa ni nkande zakwe. 11Mwe muzi, ati ni mkulu, ati ni mdodo, ndimo mwingile, uzai, ati muna muntu mweagiziγwa ni kumifikiza! Ne ndimo mwikale, mpaka mkizamlawa. 12Mkiingila mwe nyumbangwa muluγushei! 13Ati iyo nyumba yamiagiza, mpolele yenyu itaiikaila; ati nkaimiagiza, ija mpolele itamiuyiya. 14Ndiye ashemihokele na kuteγeleza mbuli zenyu, mulawei mwe iyo nyumba na mwe uja muzi, muhuγute vumbi ja milundi yenyu! 15Kweli namiti: Masa ya shi ya Sodoma na ya Gomola yatahuha kuzinka ayo ya uja muzi, mushi wa mlaho ukizabula. 16Olelai! Imi namituma, viya mu ngoto, na kwe mashuwi gati; kwa ivyoho tendai minyanyi sa nyoka, kangi mshowe mambeza sa suwa!
Nkondo ndizo ziwaizile wahina.
17-22.
17Miya kiγojei kwa mbuli za wantu! Hambu watazamiinkila kwe vitala, kangi nezewakamitowe mwe mavikilo yawe. 18Nezemuhunwe na kwa wafuṅwa na kwa wazumbe kwa mbuli ya imi, muwaγalukile waona waja, hata wamzimu. 19Aho ndiho nezewamiinkile, msheone sungu kwa mbuli ya milandwile! Hambu ija minga mtazainkwa, ndivyo mulandule. 20Hambu si nywiyo mwelonga, miya ni mpehongwa ya ishe ywenyu yelonga na inywi. 21Wanduγu na wanduγu nezewainkilane kwa koṅwa, hata waishe nezewainkile wana wawe, hata wana nezewaiγaile wavyazi wawe nkondo, wawakome. 22Nezemshukiziγwe ni wantu woshe kwa mbuli ya zina jangu; miya ndiwo wazizimize shuti bindilizo, awa ne ndiwo wahone. 23Ndiho wamiγulushe mwe muzi muṅwe, nyilikai na mwe mtuhu! Kweli namiti: Nkemubinde mizi ya Isilayeli, ṅwanangwa ywa muntu aishilawile. 24Mhina nkamzinka mfuzi ywakwe, mupuna nkamzinka baba yakwe. 25Vyabesha, mhina akiγaluka, sa mfuzi ywakwe alivyo, ao du mupuna, sa baba yakwe alivyo; ati ṅwenye chengo wazamunka wazimu, lushe wanae nkewawaisiize ivyoho?
Awahembuliza waja wakwe.
26-33.
26Miya mshewaogohe! Hambu nkakuna mbuli ifishiγweyo, ndiyo ishebunkuke; nkakuna vye njamanjama, ndivyo vishetailwe. 27Nivyomilonga he lwiza, vibilikilei he langaila! Nivyominoṅoneza, vibilikilei lwazoi! 28Msheogohe waja wekoma ṅwili du, washiwodaha kukoma moyo! Isiizai kumwogoha yuja mwedaha kubenta ṅwili, hata moyo uaγe kuzimu! 29Vikwele vili nkaviγulwa kasenti kaṅwe? Kangi ṅwiyae ywawe muṅwe du nkakina na shi, ishe ywenyu aishikundile. 30Hata swili za mitwi yenyu zoshe ziitazilwe. 31Ne nihomiti: Msheogohe! Inywi mwazinka vikwele vingi. 32Kila ndiye nezealonge chasale kwa wantu, kuti ni ywangu, nami nezenilonge chasale kwa Tate mwe uko mwe lwingu kuti: Uyu ni ywangu. 33Miya ndiye nezeanitowe hulu kwa wantu, nami nezenimtowe hulu kwa Tate mwe uko mwe lwingu.
34Mshefanyanye, kuti nizaiza kwa gwisha utondolo mwe shi! Siizile kwe gwisha utondolo, niizile kwa gwisha nkondo. 35Hambu nizaiza kwa banyanya muntu na ishe, ṅwana ywa kivyele na nine, mvyele na nine vyala; 36muntu weyae, awona nawo nyumbai mwakwe, newamγalukile wankulu wakwe. 37Mwemkundisha ishe ao nine kunizinka imi, nkanitala; kangi mwemkundisha ṅwanae ywa kiγoshi ao ywa kivyele kunizinka imi, nkanitala. 38Ndiye asheinule muti wakwe wa kukomelwa na kunitongela, nkanitala. 39Mwekihonya atazakiaza, miya mwekiaza kwa mbuli ya imi atazakihonya. 40Mwemihokela inywi, anihokela imi, kangi mwenihokela imi, amhokela yuja anitumileye. 41Ndiye afikize mteγanyingwa, kuti aitangwa mteγanyi, atazainkwa kitumulo chetala mteγanyi; ndiye afikize mtanda, kuti aitangwa mtanda, atazainkwa kitumulo chetala mtanda. 42Miya awa wadodo ndiye nezeamkomele ṅwiyae ywawe muṅwe nkilu na kumunka luγata lwa mazi du, kuti aitangwa mhina, kweli namiti: Kitumulo chakwe nkezechiaγe.
Iliyochaguliwa sasa
Mateyo 10: KISHNT05
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
New Testament in Kishambala © Bible Society of Tanzania, 2005.
