Ayubu 16
16
Hotuba ya tano ya Ayubu
Ayubu anajibu: Hakika sina hatia
1Kisha Ayubu akajibu:
2“Nimepata kusikia mambo mengi kama haya,
nanyi nyote ni wafariji wenye kutaabisha!
3Je, maneno yenu mengi yasiyo na maana hayana mwisho?
Mna nini hata mwendelee kushindana kwa maneno?
4Mimi pia ningeweza kuzungumza kama ninyi,
kama mngekuwa katika hali yangu;
ningeweza kutoa hotuba nzuri dhidi yenu,
na kuwatikisia ninyi kichwa changu.
5Lakini kinywa changu kingewatia moyo;
faraja kutoka mdomoni mwangu ingewaletea nafuu.
6“Lakini nikisema, maumivu yangu bado hayatulizwi;
na nikijizuia, bado hayaondoki.
7Ee Mungu, hakika umenichakaza;
umewaangamiza kabisa watu wa nyumbani mwangu wote.
8Umenikunjakunja, nalo limekuwa ushahidi;
nako kukonda kwangu kumeongezeka sana na kushuhudia dhidi yangu.
9Mungu amenishambulia na kunirarua katika hasira yake,
na kunisagia meno yake;
adui yangu hunikazia macho yake makali.
10Watu wamenifumbulia vinywa vyao kunidhihaki;
hunipiga shavuni mwangu kwa dharau,
na kuungana pamoja dhidi yangu.
11Mungu amenigeuzia kwa watu wapotovu,
na kunitupa katika makucha ya waovu.
12Mambo yote yalikuwa mazuri, lakini alinivunjavunja;
amenikamata shingo na kuniponda.
Amenifanya mimi kuwa shabaha yake;
13wapiga upinde wake wananizunguka.
Bila huruma, huchoma figo zangu,
na kuimwaga nyongo yangu juu ya nchi.
14Huniponda tena na tena;
hunishambulia kama shujaa wa vita.
15“Nimejishonea gunia juu ya mwili wangu,
nami nimezika paji la uso wangu kwenye vumbi.
16Uso wangu umekuwa mwekundu kwa kulia,
macho yangu yamepigwa na giza.
17Hata hivyo mikono yangu haijafanya jeuri,
na maombi yangu ni safi.
18“Ee nchi, usiifunike damu yangu,
nacho kilio changu kisinyamazishwe kamwe.
19Hata sasa shahidi wangu yuko mbinguni;
wakili wangu yuko juu.
20Mwombezi wangu ni rafiki yangu
macho yangu yanapomwaga machozi kwa Mungu;
21kwa niaba ya mtu anamsihi Mungu
kama mtu anavyosihi kwa ajili ya rafiki yake.
22“Ni miaka michache tu itapita
kabla sijaenda safari ambayo sitarudi.
Iliyochaguliwa sasa
Ayubu 16: NENO
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Neno: Maandiko Matakatifu™ NMM™
Hakimiliki © 2018, 2024 na Biblica, Inc.
Imetumiwa kwa ruhusa.
Haki zote zimehifadhiwa duniani kote.
Kiswahili Contemporary Scriptures™
Copyright © 2018, 2024 by Biblica, Inc.
Used with permission. All rights reserved worldwide.