O Kandɔɔ 9
9
Kpema Hala yiilu Noe-o
1Mí Hala dɔaw Noe nda poaa ndɔa duaa, mó dimul nda aa: «La naŋ ipúlú, la kuí mì la pei lɛŋnden ca. 2Visia bɛndua a à pɔmbɔa o lɛŋnden coo, yowva, visia sasun lɛŋ-nda a suwva o peelo kpow a nɔnin siòòŋii niɛi. Niaa o ba bɛngu nda vanin ni. 3Ɲaa yoomaa co kelaa o lɛŋnden coo-a kpede vanin ɲɛ niaa diaa ni. Mɛɛ ya yɔngu niaa bil kiyɛiyo a yɔmii koamɛi le dioo yɛ, lende koni ya yɔngu vɛlɛ niaa ɲaa yoomaa kan ni. 4Kɛ nduyɛ, la dia vision a yoomoo lenin te, koovan pɛɛn. 5Le kooma niaan yɛ, i ɲunanin konaa le man, kani yoomu niaa co kon ni. Visi oo visi dii pɛ vanacieo, i ɲunanin ndu ɲɛ vem ndu ken tosaa-o, vanndacieea bɛɛ, vana-vana dii pɛ vanacieo, i ɲunanin ndu le kɔlɔ o tɛɛmbuu yoomu vanaciee co puapilɛ ndɔɔ-o-o.
6Kani vana soli pɛ vanacieo koovan,
ndu bɛɛ vanacieo sòli ndu koovan.
Bau a velan ya Hala-o ya cɔw vanacieo ni.
7Le niaa yɛ, la naŋ ipúlú, la kuí taw mì la tiw o lɛŋnden coo sɔ́.»
8Mí Hala soaa vɛlɛ o Noe nda poaa ndɔa lo, mó dimul nda aa: 9«Kandɔɔ a niaa pila, kɔ bii a cuavaa niaa imamaa, le fɛɛn a fɛɛn, i yiilu niaa hau kpemaa. 10Kpemaa ho yiinun vɛlɛ le ɲaa yoomaa co niaa ikɛi-ya kpow: yowva, cɔlua, visia yondoa, ɲɛ-ɲɛ yoomaa fula o dɛ̀ndɔ̀ɔ́ nin. 11Kpema yiilun niaa-o co hoo ni: le fɛɛn a fɛɛn nin, mɛnndan ma tɛɛmbuu lɛnin ɲaa yoomaa o ceendo coo le. Mɛmma bɛnduma celen ma mel-lɛnin kpundɛ vaa nuaa le.» 12Mí Hala cɔɔlu vɛlɛ dimi aa: «Le fɛɛn a fɛɛn, te vanacieo co vɔ pɛ yoomu o ceendo coo, tɔɔmasele kpema ya yiilu niaa a ɲaa yoomaa-o co hoo ni: 13I kɛsi ninginangaa coocoo, ndu vanin tɔɔmaseloo le loonɔnndo a kpema ya yiilu niaa-o ni. 14Lɔ́ɔ́-lɔ́ɔ̀ ya cuungiaa pɛ yumbuyumboo coocoo, mì piɔɔ hel, te ninginangaa fula pɛ, 15i loonun dɔ́ɔ́ a kpema ya yiilu niaa cuàà n'vanndaciee a ɲaa yoomaa kpow-vo, kpema kon co hoo ni: mɛnndan ma tɛɛmbuu lɛnin ɲaa yoomaa o lɛŋnden coo le. 16Ninginangaa hini pɛ o yumbuyumboo coo, mì tofa ndu, i loonun dɔ́ɔ́ a kpema ya yiilu ɲaa yoomaa o lɛŋnden coo le fɛɛn a fɛɛn-ndo.» 17Mí Hala cɔɔlu sondo mingi o sɔɛi he coo, mó dimul Noe aa: «Ninginangaa co tɔɔmasele kpema ya yiilu ɲɛ-ɲɛ co yoomu o ceendo coo-o ni.»
Poaa Noe-a
18Poaa Noe-aa fula o dɛ̀ndɔ̀ɔ́ nin-nda va Sɛm, Ham a Yafɛt ni. Ham yɔŋnun fuɲaa Kanaan ni. 19Poaa yaa Noe-a yɔŋnun kan ni, nda kui nuaa ni mí lɛŋnden le pia cá a vanndacieea.
20Noe kandu lɛŋnden vàá ni, mó soli nakɔ n'rɛsɛnndo. 21Paale pilɛ, mó kol mɔiyan, mɛɛ má bii ndu, mó yungan pulee, mó hinin tum fondo o cɛi-kola-toandaa ndɔɔ nin. 22Mí Ham po ndɔ, fuɲaa Kanaan, kɔ komal ndu ihini tum fondo fúú, mó kɔ dimul Sɛm nda Yafɛt, nda va o bɛ́ɛ̀. 23Mí Sɛm nda Yafɛt cua doma bɛndoo, má handun o lacongú, má muli kɔɔlan, má luɛi a makɔɔ o cɛi-kola-toandaa fuɲa nda-o nin, má kuumbuu doma bɛndu kon ndu coo. A tofa nɛɛ fuɲa nda va ihini-a le, yɔŋii ndáà cɔ ndu tum fondo. 24Mɛɛ mɔiyan má kiolu Noe o hɔl, mó tuɛi ɲɛ Ham po ndɔ tosal ndu-o. 25Mó dɔaw ndu danga aa:
«Dangaa co le Kanaan.
O vanin o cɛle cɛa puapilɛa ndɔa bɛngu.»
26Kɛ mó dɔaw Sɛm nda Yafɛt duaa aa:
«Biiloo co le Mɛlɛka, Hala Sɛm-ndo pɛɛn.
Màá Kanaan siŋnun cɛ Sɛm-ndo!
27Màá Hala kui lɛŋnde Yafɛt len,
mò va icali o cɛila-kolala-toandaala Sɛm-ndan bɛngu!
Màá Kanaan siŋnun cɛ ndaa fɔ́!»
28O kpundɛ mɛmma bɛndu kon kɔɔli, mí Noe cii vɛlɛ yoomu vɔsilan kɛmɛ leyáá a beleŋuɛɛnu. 29O tosa yoomu o lɛŋnden coo vɔsilan kɛmɛ leŋɔmahiɔɔlu a beleŋuɛɛnu malan o vu.
Iliyochaguliwa sasa
O Kandɔɔ 9: BKG
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© Alliance Biblique en Guinée