Luka 23

A bankai Yesu u Bilatu n Hiridu

(Mat. 27:1-14; Mar. 15:1-5; Yah. 18:28-38)

1Aza e Kusheshe ra̱ka̱ ɗa a̱ ɗenga̱i ɗa a bankai Yesu u Bilatu.† 2Ta ɗe a̱ ka̱na̱i kuꞋuwaka nu nsata adama a̱ ni. A danai, “Tsu ka̱na̱ ta̱ vuma vu nam pa va a kuzuwa uma a yaꞋan ugbami u kaci n tsugono a iɗika i tsu. N u danai uma a tsupa utafu a̱ ubuta̱ u tsugono tsu Roma ba. Wi ta̱ kpamu a kudana uma a̱yi Kishi kaꞋa m mogono.”

3Ɗa Bilatu we ecei ni, “Avu mogono ma Ayahuda maꞋa?”

Ɗa Yesu wu ushuki, “Uteku u na vu danai, ta nannai.”

4Ɗa Bilatu u danai anan ganu vu gbagbaꞋin va n ka̱bunda̱i ka uma ka, “N ciya̱ ili i na n kunaka vuma vu nam pa ba.”

5Amma ɗaɗa o doku ɗa a iwansakai kadanshi ka Bilatu. A danai, “Kuyotsongusu ku ni ki ta̱ a kuzuwa uma o yongo a̱ vishili n uma a na i punu Yahuda dem. Ta ɗe u gita̱i a̱ Ga̱lili ali sapu ɗa wi a kuyawa na a̱ Urishelima.”

6Ana Bilatu u panai nannai, ɗa we ecei vuma vu nam pa va, “Vuza va aza a̱ Ga̱lili ɗa?” 7Ana u yevei Yesu va vuza va aza a̱ Ga̱lili ɗa a̱ ubuta̱ u na Hiridu† Antiba wi o tsugono, ɗa u suki Yesu ɗe. Adama a na a̱yi feu wi ta̱ punu a̱ Urishelima.

8Ana Hiridu we enei Yesu, ɗa u ka̱na̱i ma̱za̱nga̱ n a̱bunda̱i, adama a na ali m megeshe ɗa wi a kuciga we ene yi. Adama a na wi ta̱ a kupanasa arabali a̱ ni, wi ta̱ kpamu a̱ kula̱nsa̱ we ene ili i mereve i na Yesu wi a kuyaꞋansa. 9Ɗa u ka̱na̱i kuyaꞋansaka yi keci n a̱bunda̱i, amma ta na Yesu wu ushuki ba. 10Anan ganu vu gbagbaꞋin nu nlum n Wila̱ lo kashani o kudoku n a ukai nsata n kacaꞋa. 11Ɗa Hiridu n aza o kuvon a̱ ni ɗa a̱ ka̱na̱i kutakacika Yesu n kadanshi ka gbani-gbani. Ɗa a̱ ka̱na̱i kuyaꞋanka yi ili i wono. Ɗa a ukai ni ntogu m mogono adama a na o zoꞋosoi, a bankai ni u Bilatu. 12A kanna ka nan lo, Hiridu n Bilatu o okpoi a̱ja̱Ꞌa̱, amma ayin a cau ishi a ci ciganai ba.

Bilatu wu ushuki a una Yesu

(Mat. 27:15-26; Mar. 15:6-15; Yah. 18:39—19:16)

13Ɗa Bilatu u ɗekei anan ganu vu gbagbaꞋin nu nkoshi m gba̱ra̱gba̱ra̱ n uma dem. 14Ɗa u danai le, “I ta̱wa̱ ta̱ n vuma vu nam pa wa̱ va̱, ɗa i danai wi ta̱ a̱ kuzuwa uma vishili. Gogo na, me ecei ni na kelime ka̱ ɗa̱ dem, n ciya̱ yi n unushi u yoku u na a̱ɗa̱ va, yi a kudansika yi ba. 15Ko Hiridu ma u ciya̱ yi n unushi ba, ɗaɗa i zuwai ɗa u bonokoi ni na wa̱ tsu. Babu unushi u yoku u na u yaꞋin u na u yawai a una yi. 16Mi ta̱ a kufaba yi, ka̱ta̱ n ka̱sa̱kpa̱ yi u laza.” [ 17A̱ ka̱ya̱ dem a ayin a̱ Ka̱ɗiva̱ ka Kupasamgbanai, a ci shikpa ta̱ vuza vu ugbashi vi te vi yoku.]

18Ɗa ka̱bunda̱i ka uma dem ko orukpoi, “Unai ni, ka̱ta̱ vu ka̱sa̱kpa̱ka̱ tsu Barabas!” 19(Adama a na ishi ta̱ a zuwa Barabas ugbashi adama a na u ɗengusa̱ ta̱ vishili n tsugono tsu Roma, ali ɗa wu unai uma.)

20Bilatu u ciga ta̱ kuka̱sa̱kpa̱ Yesu, ɗa u folonoi ka̱bunda̱i ka uma ka. 21Amma ɗa o doku ɗa o orukpoi “Unai ni! Unai ni!”

22Ɗa u doku ɗa u we ecei tatsu, “Unushi we ne u ɗai u yaꞋin? Mpa me ene unushi u na u yaꞋin ali ɗa u yawai ni u kuwa̱ ba. Mpa mi ta̱ a kufaba yi, ka̱ta̱ n ka̱sa̱kpa̱ yi.”

23Amma ɗa o doku ɗa a̱ ka̱na̱i kacaꞋa, “Unai ni! Unai Yesu!” Ɗa ta na u panai ma̱shi me le. 24Ɗa Bilatu wu ushuki le ili i na i o kufolono va. 25Ɗa u ka̱sa̱kpa̱i vuza na o folonoi ni u ka̱sa̱kpa̱ va. Vuza na ishi a zuwai ugbashi adama a na ayin o yoku u ɗengusa̱ ta̱ vishili, ali wu unai uma. Ɗa u nekei Yesu a̱ ubuta̱ wo osoji, adama a na a yaꞋanka yi ili i na uma a cigai.

A bapai Yesu a maɗanga ma atakaci

(Mat. 27:32-44; Mar. 15:21-32; Yah. 19:17-27)

26Ɗa osoji a̱ pura̱i Yesu, ele a nwalu ɗa a cinai vuma vi yoku, kula ku ni ku ɗa Sima, vuza va aza e Kure. A̱yi a kubana asuvu a̱ likuci, ɗa a̱ pura̱i ni ɗa a zuwakai ni kogboli ka na a saꞋaki Yesu. Ɗa a zuwai ni u canuku kaꞋa o kutono yi. 27Ɗa ka̱bunda̱i ka uma ko tonoi ni, punu va a̱ma̱ci o yoku i ta punu ɗa a̱ ka̱na̱i ma̱shi n a panai asuvayali a̱ ni. 28Ɗa Yesu u kpatalai, ɗa u danai le, “A̱ma̱ci a̱ Urishelima, ka̱ta̱ i shika̱ adama a̱ va̱ ba, amma adama a̱ ka̱ci ka̱ ɗa̱ m muku n ɗa̱. 29Adama a na ayin i ta̱ lo a̱ kuta̱wa̱ a na uma a kudana, ‘A̱ma̱ci a na ka̱ta̱ a saꞋwai kumatsa vuza ba, ko kuneke muku mani ba, i ta̱ a kuyaꞋan ma̱za̱nga̱ adama a na ele ndari ma̱ a̱ma̱ci n ɗa.’

30“Ayin a nan lo a ɗa uma a kudana nsasan,

‘Yikpa̱i ka̱ta̱ i tsugba tsu!’

ka̱ta̱ kpamu a dana akpanlai,

‘O sokongu tsu.’

31Ili i nam pa i ciya̱ mu baci mpa maɗanga ma̱ ta̱ku, a̱ɗa̱ ta na aza e ɗekpu?”

32Uma o yoku kpamu oboki aza e re, a ɗikai le adama a na a bana a una le feu koɓolo n Yesu. 33Ana a yawai a̱ ubuta̱ u na e ci ɗeke Ubuta̱ u MokoꞋo ma Kaci,† ta lo a kutangi Yesu ikusa lo gaɗi vu maɗanga ma atakaci koɓolo n oboki a, vuza te a̱ ugula̱, vuza te a usingai. 34Ɗa Yesu u danai, “Dada, cinukpaka le n unushi u le, adama a na e yeve ili i na i a kuyaꞋan ba.” Ɗa a yaꞋin kazagba uteku u le adama a na e pecei ntogu n ni.

35Ɗa uma a shamgbai lo, ɗa a̱ ka̱na̱i kinda, amma aza a̱ gba̱ra̱gba̱ra̱ a Yahuda a̱ ka̱na̱i kuzoꞋoso yi, “Wi isa ta̱ uma. Mayun ɗa baci wi Kirisiti Kishi ka̱ Ka̱shile, Mazagbi, yaꞋan feu u cipa̱, adama a na wi isa ka̱ci ka̱ ni.”

36Ɗa osoji a, a̱ ka̱na̱i kuzoꞋoso Yesu. Ɗa a banai wa̱ ni ɗa e nekei ni ma̱kya̱n ma kalam. 37Ɗa a danai, “Isa ka̱ci ka̱ nu, avu ɗa baci mogono ma Ayahuda.”

38Ɗe gaɗi va ɗa a ɗanai, “na va ɗaɗa mogono ma ayahuda.”

39A̱ ka̱tsuma̱ ko oboki a nan lo a a na i ɗe gaɗi n Yesu va, ɗa vuza te va u ka̱na̱i kushika Yesu, “Avu ɗa Kishi ka ba? Isa ka̱ci ka̱ nu n a̱tsu feu!”

40Ɗa vuza te va u dansukai ni, “Ashe avu va kupana wovon u Ka̱shile ba? Ali ɗa vi a kisa afada icuꞋu i te n a̱yi? 41Atakaci a̱ tsu ta u gaꞋin a yaꞋanka tsu nannai, adama a na tsu nusa ta̱. Amma a̱yi u nusa ba.”

42Ɗa u danai Yesu, “Mi ta̱ ufolu u nu, vu ciɓa nu mpa, ayin a na baci vu banai o tsugono tsu nu.”

43Ɗa Yesu u danai ni, “Uteku n anana vi ta̱ koɓolo nu mpa ɗe a̱ ubuta̱ u kuvuka.”†

Ukpa̱ u Yesu

(Mat. 27:45-56; Mar. 15:33-41; Yah. 19:28-30)

44Kanna ɗe a kaci, ɗa ka̱yimbi ka palai ubuta̱ dem ali a kubana viyum vu tatsu vu kulivi. 45Kanna ko doku ka akana ba. Kakashi ka na ki punu a̱ A̱Ꞌisa̱ a Gbayin ɗa ka sazai e mere, ko okpoi ugboku u re. 46Ɗa Yesu u ɗengusa̱i ka̱la̱ka̱tsu ka̱ ni n utsura, “Dada, wa̱ nu u ɗa mi e kuneke ayinviki a̱ va̱.” Ana u dansai nannai, ɗa ta na u kuwa̱i.

47Ana jagaba vo osoji we enei nannai, ɗa u cikpai Ka̱shile, ɗa u danai, “Mayun ɗa vuma vu nam pa vuma vu usuɓi ɗa.” 48Ana uma a banai o ɓolongi ɗe, ɗa e enei ili i na i yaꞋin. Ɗa a lazai o kubono a kpaꞋa, ɗa a̱ ka̱na̱i kukeɓe a̱tsuma̱ e le adama o wovon. 49Aza a na e yevei Yesu dem, n a̱ma̱ci a na o tonoi ni a̱ uta̱i Ga̱lili, ɗa a shamgbai daꞋin ɗa a̱ ka̱na̱i kinda ili i nan lo.

Ka̱ciɗa̱ ke Yesu

(Mat. 27:57-61; Mar. 15:42-47; Yah. 19:38-42)

50Vuma vi yoku vi ta̱ lo kula ku ni ku ɗa Isuhu† vuza va aza a Aramatiya. A̱yi feu wi ta̱ a̱ ka̱tsuma̱ ka Aza e Kusheshe, vuma vu singai ɗa n usuɓi kpamu. 51A̱yi wu ushuku kutono le n ili i na a yaꞋin ba. Wi ta̱ a kuvana kuta̱wa̱ ku tsugono tsu Ka̱shile. 52Ɗa u banai u Bilatu u folonoi e neke yi keven ke Yesu, adama a na u ciɗa̱ngu. 53Ɗa u cipa̱ka̱i n kaꞋa, ɗa u palai ni n arikinlai a̱ ka̱ciɗa̱. Ɗa u ciɗa̱ngi ni a kasaun ka na e sheꞋwei a katali ka na kpamu ka̱ta̱ a̱ ciɗa̱ngi punu vuza ba. 54N Ajima a ɗa (Kanna ko Ofoɓuso), ana Ashibi a uwa.

55A̱ma̱ci a na o tonoi Yesu a na uta̱i Ga̱lili o tonoi Isuhu, adama a na e ene kasaun ka a̱ ubuta̱ u na a zuwai ikyamba i Yesu. 56Ɗa a lazai o kubono a kpaꞋa, ɗa o foɓusoi ili i ma̱gula̱ni m maniꞋin ma na a kusukumaka Yesu. N Ashibi ɗa a uvukai uteku u na wila̱ u le u danai.

Iliyochaguliwa sasa

Luka 23: asgNT

Kuonyesha

Shirikisha

Nakili